Чахе тӧ дьхԝази дәстпеки тьштәки бьки, тʹәбийәти йә кӧ дьбәкә тӧ дьфькьри: «Әв ԝе кʹаре бьдә мьн?» Ле һәрге әм пьрсе бьдьнә хԝә кӧ гәло кʹара дӧа һәйә, әв те һʹәсабе кӧ әм хԝәһʹьз ьн? На. Әм дьхԝазьн бьзаньбьн, кӧ чь кӧ әм дьхԝазьн бькьн, ве йәкеда тьштәки баш һәйә йан на.

Дь тʹемед дәрбазбуйида мә шеԝьр кьр, кӧ дӧа нә кӧ тʹәне әʹдәте религийайе йә йан дьлрʹьһʹәткьрьн ә, ле әԝ һе зедә йә. Хԝәдайе рʹаст бь рʹастийе дӧа дьбьһе. Һәрге әм рʹаст дӧа дькьн у бона тьштед рʹаст жь ԝи һиви дькьн, әԝ ԝе гӧһ бьдә дӧайед мә. Рʹасти жи, әԝ гәләк дьхԝазә кӧ әм незики ԝи бьн (Аԛуб 4:8). Ле һәрге әм тʹьме дӧа дькьн, әм чь кʹаре дькарьн бьстиньн? Ԝәрә хәбәрдьн дәрһәԛа чәнд кʹара.

Чахе проблем у чәтьнайи рʹасти тә тен, тӧ зәʹф хәмгин дьби? Кʹьтеба Пироз мә һелан дькә кӧ ԝәʹде ԝан чәтьнайа «һәр гав дӧа бькьн», у кӧ хԝәстьна мә «бьра бь дӧа-дьрозга, . . . Хԝәдева әʹйан бә» (1 Тʹесалоники 5:17; Филипи 4:6). Кʹьтеба Пироз мәрʹа дьбежә кӧ һәрге әм Хԝәдерʹа дӧа бькьн, «әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред [мә] йәктийа Мәсиһ Исада хԝәй кә» (Филипи 4:7). Әме дьлрʹьһʹәт бьн, чахе дьле хԝә Баве хԝәйи әʹзманарʹа вәкьн. Чьмки әԝ хԝәха мә һелан дькә кӧ ӧса бькьн. Дь Зәбурда те готьне: «Тӧ баре хԝә жь Хӧданрʹа бьһелә, әԝе тә ль сәр льнган бьһелә» (Зәбур 55:22, ИМ).

Гәләк мәрьва нав тʹәмамийа дьнйайе әв әʹдьлайи тʹәхмин кьрьнә. Һе Ран жь Корейа Башуре, дьбежә: «Һәла һе чахе проблемед мьнә мәзьн жи һәнә, әз чаԝа кӧ дӧа дькьм, әз тʹәхмин дькьм кӧ барәки гьран сәр мьн һатә һьлдан у дьвиньм кӧ ԛәԝата мьн һәйә тәйах кьм бәр ԝан проблема». Сесилиа, дь  Филипинеда, гьли дькә: «Чьмки әз де мә, әз гәләк хәмгин дьбьм сәва ԛизед хԝә, у ӧса жи сәва дийа хԝә, кӧ ньһа жь бо нәхԝәшийе нькарә мьн нас кә. Ле бь сайа дӧакьрьне, әз жийина хԝәйә һәр рʹожида кем хәмгин дьбьм. Чьмки әз заньм кӧ Йаһоԝа ԝе али мьн бькә кӧ әз мьԛати ԝан бьм».

Дьбәкә һун рʹасти стресе тен, йан жи дәрәщед гәләк гьран, кʹижан кӧ дькарьн зийане бьдьн әʹмьре ԝә. Хԝәдейе «һʹәму бәрдьлийе» дькарә гәләк ԝә дьлрʹьһʹәт кә, һәрге һун ԝирʹа дӧа бькьн. Кʹьтеба Пироз дьбежә, кӧ әԝ «һʹәму тәʹли-тәнгийада дьл дьдә бәр мә» (2 Корьнтʹи 1:3, 4). Мәсәлә, щарәке чахе Иса гәләк стреседа бу, әԝ кʹәтә сәр чока у дӧа кьр. У чь бу паши ве йәке? «Жь әʹзмен мьлйакʹәтәк ԝива хӧйа бу у әԝ ԛәԝат кьр» (Луԛа 22:41, 43).  Щарәке жи тьрс кʹәтә дьле мерәки амьн Нәһәмйа, бо мәрьвед зӧлм йед кӧ дьхԝастьн әԝ шьхӧле Хԝәде бьдана сәкьнандьн, кʹижан кӧ әԝи гәрәке бькьра. Әԝи дӧа кьр: «Йа Хԝәде, ньһа ԛәԝате бьдә дәсте мьн». Паше ӧса бу, кӧ бь рʹастийе Хԝәде али ԝи кьр сәва кӧ әԝ нәтьрсә у шьхӧле хԝә рʹьнд бькә (Нәһәмийа 6:9-16). Рещедалд жь Ганайе, гьли кьр кӧ чахе әԝ дӧа дькә чь тʹәхмин дькә: «Чахе әз илаһи ԝәʹде проблемед гьран дӧа дькьм, һьнге әз тʹәхмин дькьм кӧ әз проблема хԝә гьли дькьм ԝи кәсирʹа, ԛәԝата кʹе жи һәйә али мьн бькә у кʹижан кӧ мьн дьдә баԝәркьрьне, ԝәки мәʹнийа хәмгинийе тʹӧнә йә». Бәле, Хԝәде дькарә мә дьлгәрм кә чахе әм ԝирʹа дӧа дькьн.

Һьнә сафикьрьнед кӧ әм дькьн дькарьн сәр мә у мәрьвед мәйи незик һʹӧкӧм бьн. Ле әм ча дькарьн сафикьрьна бь билани бькьн? Кʹьтеба Пироз дьбежә: «Һәгәр сәрԝахтийа йәки жь ԝә тʹера ԝи накә, [илаһи ԝәʹде чәтьнайа] бьра һиви жь Хԝәде бькә у ԝе жь ԝирʹа бе дайине. Әԝ бь мәрʹдани дьдә һʹәмуйа у тʹӧ кәси беԛәдьр накә» (Аԛуб 1:5). Һәрге әм дӧа дькьн бона биланийе, Хԝәде дькарә рʹӧһʹе хԝәйи пироз бьдә хәбате, сәва кӧ әм сафикьрьна бь билани бькьн. У әм дькарьн рʹастә-рʹаст жь Хԝәде бьхԝазьн рʹӧһʹе пироз, чьмки Иса гот кӧ «Баве әʹзмана ԝе чьԛас зедә Рʹӧһʹе Пироз бьдә әԝед кӧ жь ԝи дьхԝазьн» (Луԛа 11:13).

Һәла һе Иса жи чахе сафикьрьнед фәрз дькьр, жь Баве хԝә һиви дькьр бона аликʹарийе. Кʹьтеба Пироз мәрʹа дьбежә кӧ чахе Иса дьхԝәст 12 шагьрта бьжберʹә, йед кӧ гәрәке бьбуна шандийед ԝи, әԝи «тʹәмамийа шәве бәр Хԝәде бь дӧа дәрбаз кьр» (Луԛа 6:12).

Иро жи гәләка мина Иса дитьнә, кӧ Хԝәде щаба дӧайед ԝан дайә, у али ԝан кьрийә кӧ сафикьрьна бь билани бькьн. Регина, жь Филипине, гьли дькә дәрһәԛа щурʹә-щурʹә проблема, кʹижан кӧ рʹасти ԝе һатьнә. Паши мьрьна малхе хԝә, әԝе гәрәке хԝә у малбәта хԝә хԝәй кьра, һьн жи әԝе хәбата хԝә ӧнда кьр у мәзьнкьрьна зарʹада чәтьнайи дьдит. Ле чь али ԝе кьр кӧ сафикьрьна рʹаст бькә? Әԝ дьбежә: «Бь сайа дӧакьрьне мьн аликʹари жь Йаһоԝа дьстанд». Кԝабеда жь Ганайе, гьли дькә кӧ әԝи чьрʹа аликʹари жь Хԝәде хԝәст. Әԝ дьбежә: «Мьн хәбата хԝәйә сәр авакьрьне ӧнда кьр, кʹижан кӧ һәԛ гәләк бу». Чахе Кԝабеда дьфькьри кӧ кʹижан щурʹә хәбате бьжберʹә, әԝи гот: «Мьн тʹьме Йаһоԝарʹа дӧа дькьр, бона рʹебәрийе бьдә мьн, кӧ сафикьрьне рʹаст бькьм». Әԝ зедә дькә: «Әз зәʹф тʹәхмин дькьм, кӧ Йаһоԝа али мьн кьр ԝәки әз хәбата ӧса бьжберьм, кӧ бькарьбьм бона һʹәԝщед хԝәйә рʹӧһʹани у физики хәм бькьм». Һун жи дькарьн бьвиньн рʹебәрийа Хԝәде, чахе дӧа бькьн бона ԝан тьшта, кʹижан кӧ дькарьн һʹӧкӧм бьн сәр һәләԛәтийа ԝә тʹәви Хԝәде.

Мә хәбәрда дәрһәԛа тʹәне һьнә кʹара, кʹижан кӧ һун дькарьн жь дӧа бьстиньн. (Бона һе зедә мәсәла, бьньһерʹьн чаргошә « Кʹара Дӧа».) Ле сәва кӧ һун әԝан кʹара бьстиньн, йа әʹԝльн һун гәрәке Хԝәде у ԛьрара ԝи нас кьн. Һәрге һун дьхԝазьн әԝе йәке бькьн, әм ԝә һелан дькьн кӧ жь Шәʹдед Йаһоԝа аликʹарийе бьхԝазьн бона һинбуна Кʹьтеба Пироз. a Әв ԝе гава ԝәйә пешьн бә кӧ незик бьн тʹәви ԝи, «йе кӧ дӧайан дьбьһизә» (Зәбур 65:2, ИМ).