Дәрса 10
Ча әм Дькарьн те Дәрхьн Хԝәде К′ижан Һ′әбандьне Ԛәбул Дькә?
«Һ′әвза хԝә жь п′ехәмбәред дәрәԝ бькьн». МӘТТА 7:15
«Әԝ дьбежьн, кӧ Хԝәде нас дькьн, ле бь кьред хԝә ԝи инк′ар дькьн». ТИТО 1:16
1. Һ′әбандьна кӧ Хԝәде ԛәбул дькә т′әне йәк ә?
Иса Мәсиһ шагьртед хԝәр′а т′әне һ′әбандьнәк һишт, у т′әне әԝе һ′әбандьне Хԝәде ԛәбул дькә. Әв һ′әбандьн мина р′еке йә, йе кӧ бәрбь жийина һ′әта-һ′әтайе дьбә. Иса Мәсиһ гьлийед ӧса гот: «Һьндьк ьн әԝед кӧ ԝе р′ейе дьбиньн» (Мәтта 7:14). Хԝәде т′әне әԝе һ′әбандьне ԛәбул дькә, йа кӧ ль сәр һ′име Хәбәра ԝи йә. Бьхунә Йуһ′әнна 4:23, 24; 14:6; Әфәси 4:4, 5.
2. Чь Иса Мәсиһ гот дәрһәԛа мәсиһийед нәр′аст?
Иса Мәсиһ ә′лам кьр, кӧ п′ехәмбәред дәрәԝ ԝе мәсиһитийа р′аст т′әвиһәв хьн. Гава ль сәр ԝана дьньһер′и, тә т′ьре кӧ әԝана ԛӧльхк′аред р′аст ьн. Ԝана нав данийә ль сәр хԝә кӧ мәсиһи нә. Ле к′и нә әԝана бь р′астийе әм һеса дькарьн те дәрхьн. Чьмки мәсиһийед р′аст Хԝәдер′а р′аст ԛӧльх дькьн, ләма жи т′әне щәм мәсиһийед р′аст һәнә әԝ һ′ӧнӧр у хәйсәтед баш, бь сайа чь жи әԝана тенә наскьрьне. Бьхунә Мәтта 7:13-23.
3. Ча тӧ дькари те дәрхи к′ижан ьн мәсиһийед р′аст?
Ньһа әм пебьһ′әсьн дәрһәԛа пенщ тьшта, бь сайа чь жи мәсиһийед р′аст тенә наскьрьне:
Мәсиһийед р′аст К′ьтеба Пироз һ′әсаб дькьн Хәбәра Хԝәде у ԛәдьре ве к′ьтебе дьгьрьн. Әԝана һ′әму тьшти дькьн, ԝәки пе принсипед К′ьтеба Пироз бьжин. Мәсиһийед р′аст чь кӧ даннасин дькьн, бь ви щур′әйи хԝәха жи дьжин. Ле һ′әбандьна нәр′аст ль сәр һ′име нет у фькьред мәрийа йә (Мәтта 15:7-9). Ләма жи орт′а һ′әбандьна р′аст у йед майин фьрԛи һәйә. Бьхунә Йуһ′әнна 17:17; 2 Тимот′ейо 3:16, 17.
Мәсиһийед р′аст, наве Хԝәде Йаһоԝа һӧрмәт дькьн. Муса у Даԝьде п′ехәмбәр наве Хԝәде заньбун у дьданә хәбате (Дәрк′әтьн 3:15; Зәбур 8:1). Иса Мәсиһ жи наве Хԝәде һӧрмәт дькьр у ә′йан дькьр. Әԝи али мәрьва дькьр, ԝәки әԝана Хԝәде нас бькьн. Иса ӧса жи әԝана һин дькьрьн дӧа бькьн, кӧ наве Хԝәде пироз бә (Мәтта 6:9). Ле ньһа пьрсе бьдә хԝә: Ль ԝан щийа к′идәре кӧ әз дьжим, к′и дәрһәԛа наве Хԝәде хәбәр дьдә? Бьхунә Йуһ′әнна 17:26; Р′омайи 10:13, 14.
Мәсиһийед р′аст дәрһәԛа П′адшатийа Хԝәде даннасин дькьн. Йаһоԝа Хԝәде, Иса шандә сәр ә′рде, кӧ әԝ мьзгинийа хере дәрһәԛа п′адшатийа Хԝәде даннасин бькә, чьмки т′әне әв ә гӧмана мәрийа. Иса Мәсиһ т′ьме дәрһәԛа ве п′адшатийе хәбәр дьда, у әԝи һ′әта бәр мьрьне жи хәбәр да дәрһәԛа п′адшатийе (Луԛа 4:43; 8:1; 23:42, 43). Иса Мәсиһ гот, ԝәки шагьртед ԝи жи гәрәке дәрһәԛа П′адшатийа Хԝәде даннасин бькьн. Ньһа пьрсе бьдә хԝә: Иро к′и дәрһәԛа П′адшатийа Хԝәде даннасин дькә? Бьхунә Мәтта 24:14.
Йед пәй Иса Мәсиһ дьчьн, хԝә жь ве дьнйа нәһәԛ дур дьгьрьн. Тӧ дькари мәсиһийед р′аст бь ԝе йәке нас ки, кӧ әԝана нак′әвьнә нав шьхӧлед политике у шәр′-дә′ԝе ве дьнйайе (Йуһ′әнна 17:16; 18:36). Әԝана ӧса жи хԝә жь һ′әму шьхӧлед һә′рам у хьраб, йед кӧ дь ве дьнйайеда тенә кьрьне, дур дьгьрьн. Бьхунә Аԛуб 4:4.
Орт′а мәсиһийед р′аст һ′әзкьрьна мәзьн һәйә. Мәсиһийед р′аст жь К′ьтеба Пироз һин дьбьн ԛәдьре һ′әму мьләта бьгьрьн. Һ′әбандьнед нәр′аст т′ьме пьштгьрийа шәр′е орт′а мьләта дькьн у ԝана к′әрәм дькьн, ле мәсиһийед р′аст инк′ар дькьн ве йәке (Миха 4:1-3). Мәсиһийед р′аст ԝә′де хԝә у п′әре хԝә хәрщ дькьн, сәва кӧ али мәрьва бькьн у ԝана дьлгәрм кьн, у дь ве йәкеда әԝана к′ара хԝә нагәр′ьн. Бьхунә Йуһ′әнна 13:34, 35; 1 Йуһ′әнна 4:20.
4. Тӧ дькари те дәрхи к′ижан ә һ′әбандьна р′аст?
Һинкьрьна к′ижан һ′әбандьне бь т′әмами ль сәр һ′име К′ьтеба Пироз ә? К′ижан һ′әбандьн наве Хԝәде р′умәт дькә у даннасин дькә, кӧ т′әне П′адшатийа Хԝәде дькарә һ′әму проблемед мәрийа сафи кә? Ча тӧ дьшьрмиш дьби әв к′ижан һ′әбандьн ә, кӧ һ′әзкьрьне ә′йан дькә у хԝә жь шәр′а дур дьгьрә? Бьхунә 1 Йуһ′әнна 3:10-12.
