Әре, Шәйтʹан Мире-щьна бь рʹасти һәйә. Әв һәйә әʹфринәки рʹӧһʹани, йе кӧ мьԛабьли Хԝәде рʹабу, у Кʹьтеба Пирозда те готьне, ԝәки әԝ «сәрԝере ве дьнйайе» йә (Йуһʹәнна 14:30; Әфәси 6:11, 12). Кʹьтеба Пироз рʹастийе дәрһәԛа Мире-щьна әʹйан дькә у ԝан сәрнава дьдә ԝи:

•   Шәйтʹан, чь кӧ те һʹәсабе «Мьԛабьл» (Ибо 1:6).

•   Мире-щьна, чь кӧ те һʹәсабе «Бӧхданбеж» (Әʹйанти 12:9).

•   Мәʹр, чь кӧ Кʹьтеба Пирозда те хәбьтандьне ча «Фелбаз» (2 Корьнтʹи 11:3).

•   «Йе кӧ дьщерʹьбинә» (Мәтта 4:3).

•   «Дәрәԝин» (Йуһʹәнна 8:44).

Кәсе реали йә, нә кӧ һʹӧнӧре хьраб ә

 Һьнә кәс дьфькьрьн, ԝәки Мире-щьна әв һәйә һʹӧнӧре хьраб нав мәрьвада. Ле Кʹьтеба Пирозда те готьне, ԝәки Хԝәде тʹәви Мире-щьна хәбәр дьда. Хԝәде беԛьсур у кʹамьл ә, ләма жи набә ԝәки әԝ тʹәви һʹӧнӧре хԝәйә хьраб хәбәр да (Ԛануна Дӧщари 32:4; Ибо 2:1-6). Хенщи ԝе йәке, Мире-щьна Иса дьщерʹьбанд, нав кʹижанида гӧнә тʹӧнә бу (Мәтта 4:8-10; 1 Йуһʹәнна 3:5). Бь ԝе йәке Кʹьтеба Пироз дьдә кʹьфше, ԝәки Мире-щьна кәсе реали йә, нә кӧ һʹӧнӧре хьраб ә.

 Гәло әв йәк әʹщебмайи йә, ԝәки мәрьв баԝәр накьн кӧ Мире-щьна бь рʹасти һәйә? На, чьмки Кʹьтеба Пирозда пешда дьһатә готьне, ԝәки Мире-щьна дәрәԝа дьдә хәбате сәва кӧ бьгьһижә нетед хԝә (2 Тʹесалоники 2:9, 10). Йәк жь тʹәлькед ԝи әв ә, ԝәки фәʹме мәрьва дадә сәва кӧ әԝана баԝәр нәкьн ԝәки әԝ бь рʹасти һәйә (2 Корьнтʹи 4:4).

  Ньһерʹандьна нәрʹаст: Лутсифер йәк жь сәрнавед Мире-щьна йә.

 Избати: Хәбәра Ибрани, йа кӧ һьнә ԝәлгәрʹандьнед Кʹьтеба Пирозда һатийә ԝәлгәрʹандьне ча «Лутсифер», те һʹәсабе «йе кӧ дьбьрьԛә» (Ишайа 14:12). Жь контексте те кʹьфше, ԝәки әв хәбәр һатийә хәбьтандьне һьндава пʹадшед Бабилоне, кʹижана кӧ жь бо ԛӧрʹәбун у бабахийа ԝан, Хԝәде әԝ ньмьз кьрьн (Ишайа 14:4, 13-20). Кʹьтеба Пирозда хәбәра «бьрԛок» бь щурʹе ԛәрф те хәбьтандьне, гава те готьне дәрһәԛа ахьрийа рʹобәти йа пʹадшед Бабилоне.

Ньһерʹандьна нәрʹаст: Мире-щьна али Хԝәде дькә, ԝәки Әԝ диԝана мәрьва бькә.

 Избати: Мире-щьна нә кӧ хьзмәткʹаре Хԝәде йә, ле дьжмьне ԝи йә. Мире-щьна мьԛабьли хьзмәткʹаред Хԝәде дәрте у бӧхдана давежә сәр ԝан (1 Пәтрус 5:8; Әʹйанти 12:10).