Ibruz 13:1-25
13 Una kɔntinyu fɔ lɛk una brɔda dɛn.
2 Una nɔ fɔgɛt fɔ lɛk strenja dɛn,* bikɔs dat dɔn mek sɔm pipul dɛn kia fɔ enjɛl dɛn pan ɔl we dɛn nɔ no se na enjɛl dɛn.
3 Una go de mɛmba di wan dɛn we de na prizin,* lɛk se unasɛf de na prizin wit dɛn, ɛn di wan dɛn we dɛn de trit bad, bikɔs unasɛf de na di bɔdi.*
4 Lɛ ɔlman ɔnɔ mared, ɛn mek nɔbɔdi nɔ dɔti di mared bed, bikɔs Gɔd go jɔj di pipul dɛn we de du mami ɛn dadi biznɛs di we aw Gɔd nɔ want* ilɛksɛf dɛn mared ɔ dɛn nɔ mared.
5 Lɛ di we aw una de liv una layf sho se una nɔ lɛk mɔni, ɛn una satisfay wit di tin dɛn we de naw. Bikɔs i dɔn tɔk se: “A nɔ go ɛva lɛf yu, ɛn a nɔ go ɛva lɛf fɔ ɛp yu.”
6 So dat wi go gɛt maynd ɛn tɔk se: “Na Jiova* de ɛp mi; a nɔ go fred. Wetin mɔtalman ebul du mi?”
7 Una mɛmba di wan dɛn we de bifo una, we dɔn tɛl una Gɔd in wɔd, ɛn as una de tek tɛm luk di fayn we aw dɛn de biev, una falamakata dɛn fet.
8 Jizɔs Krays na di sem yɛstade, tide, ɛn sote go.
9 Una nɔ alaw difrɛn tichin dɛn ɛn nyu tichin dɛn fɔ ful una, i bɛtɛ mek Gɔd in spɛshal gudnɛs* mek una* tinap tranga wan pas fɔ lɛ fud* mek una tinap tranga wan, bikɔs di wan dɛn we bisin tumɔs bɔt fud nɔ de bɛnifit frɔm am.
10 Wi gɛt ɔlta we di wan dɛn we de du oli wok na di tɛnt nɔ gɛt rayt fɔ it de.
11 Di animal dɛn we di ay prist kin kɛr dɛn blɔd go insay di oli ples as sin sakrifays, dɛn kin pul dɛn bɔdi na di kamp ɛn bɔn dɛn.
12 So Jizɔs insɛf nɔ sɔfa insay di siti, i sɔfa na do so dat i go mek di pipul dɛn oli wit in yon blɔd.
13 So lɛ wi kɔmɔt insay di kamp ɛn go to am na do, ɛn gɛt di sem disgres we i bin gɛt,
14 bikɔs wi nɔ gɛt siti na ya we go kɔntinyu fɔ de, bɔt wi de wet wit ɔl wi at fɔ di wan we de kam.
15 Lɛ wi de prez Gɔd ɔltɛm tru am, bikɔs dat tan lɛk sakrifays; lɛ wi yuz wi mɔt fɔ tɔk bɔt am na pɔblik, dat na, di frut we wi de gi am.
16 Pantap dat, una nɔ fɔgɛt fɔ de du gud ɛn sheb wetin una gɛt wit ɔda pipul dɛn, bikɔs Gɔd rili lɛk dɛn kayn sakrifays dɛn de.
17 Una obe di wan dɛn we de bifo una ɛn una rɛdi fɔ du wetin dɛn tɛl una, bikɔs dɛn de kia fɔ una as pipul dɛn we go ansa to Gɔd, so dat dɛn go du so wit gladi-at ɛn nɔ pini, bikɔs dat go ambɔg una bad.
18 Una kɔntinyu fɔ pre fɔ wi, bikɔs wi biliv se wi gɛt klin kɔnshɛns, ɛn wi want fɔ ɔnɛs pan ɔltin.
19 Bɔt a de rili ɛnkɔrej una fɔ pre so dat a go kam to una jisnɔ.
20 Mek di Gɔd we de gi pis, we gi layf bak to di gret shɛpad fɔ di ship dɛn, dat na, wi Masta Jizɔs, wit di blɔd fɔ wan agrimɛnt we go de sote go,
21 gi una ɔlkayn gud tin fɔ du wetin i want. I de yuz Jizɔs Krays fɔ mek wi du wetin rayt na in yay. Mek i gɛt di glori sote go. Emɛn.
22 Mi brɔda dɛn, a de ɛnkɔrej una fɔ peshɛnt ɛn lisin to dis wɔd we go ɛnkɔrej una, bikɔs a dɔn rayt shɔt lɛta to una.
23 A want mek una no se dɛn dɔn fri wi brɔda Timoti. If i kam jisnɔ, wi go kam togɛda fɔ si una.
24 Una grit ɔl di wan dɛn we de bifo una ɛn ɔl di oli wan dɛn. Di wan dɛn we de na Itali de grit una.
25 Mek Gɔd in spɛshal gudnɛs* de pan una ɔl.
Futnot Dɛn
^ Ɔ “du gud to strenja dɛn.”
^ Insay Grik, “di wan dɛn we dɛn tay.”
^ Ɔ i kin bi, “lɛk se unasɛf de sɔfa wit dɛn.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Insay Grik, “una at.”
^ Dat na, lɔ dɛn bɔt fud.
^ Rid Baybul Wɔd dɛn Minin.
