Matyu 4:1-25
4 Dɔn di spirit dayrɛkt Jizɔs go ɔp na di wildanɛs,* na in di Dɛbul tɛmt am.
2 Afta i dɔn fast fɔ 40 dez ɛn 40 nɛt, i angri.
3 Ɛn di wan we de tɛmt kam tɛl am se: “If yu na Gɔd in pikin, tɛl dɛn ston ya fɔ tɔn to bred.”
4 Bɔt i ansa am se: “Dɛn rayt se: ‘Nɔto it* nɔmɔ go mek mɔtalman kɔntinyu fɔ liv, bɔt na we i du ɔl wetin Jiova* se.’”
5 Dɔn di Dɛbul kɛr am go na di oli siti ɛn mek i tinap pantap di wɔl* na di tɛmpul,
6 ɛn i tɛl am se: “If yu na Gɔd in pikin, jomp go dɔŋ, bikɔs dɛn rayt se: ‘I go sɛn in enjɛl dɛn to yu,’ ɛn ‘Dɛn go ol yu na dɛn an so dat yu nɔ go nak yu fut pan ston.’”
7 Jizɔs tɛl am se: “Dɛn rayt bak se: ‘Yu nɔ fɔ tɛst Jiova* yu Gɔd.’”
8 Afta dat di Dɛbul kɛr am go ɔp wan ay ay mawntin ɛn sho am ɔl di kiŋdɔm dɛn na di wɔl wit ɔl di gud tin dɛn we de de.
9 Ɛn i tɛl am se: “A go gi yu ɔl dɛn tin ya if yu butu ɛn wɔship mi wan tɛm nɔmɔ.”
10 Dɔn Jizɔs tɛl am se: “Kɔmɔt na ya Setan! Dɛn rayt se: ‘Na Jiova* yu Gɔd yu fɔ wɔship, ɛn na in nɔmɔ yu fɔ sav.’”
11 Nain di Dɛbul lɛf am, ɛn enjɛl dɛn kam ɛn bigin fɔ ɛp am.
12 We i yɛri se dɛn dɔn arɛst Jɔn, i go na Galili.
13 We i kɔmɔt Nazarɛt, i kam de na Kepanyɔm nia di si na di distrikt dɛn na Zɛbyulɔn ɛn Naftali,
14 so dat wetin di prɔfɛt Ayzaya bin dɔn tɔk go apin, we i se:
15 “Pipul dɛn na Zɛbyulɔn ɛn Naftali, we de na di rod nia di si, na di ɔda pat na di Jɔdan, we na Galili, usay pipul dɛn we kɔmɔt ɔda neshɔn dɛn de liv!
16 Di pipul dɛn we sidɔm na dak ples dɔn si wan brayt layt, ɛn layt dɔn shayn pan di wan dɛn we sidɔm usay day de.”
17 Frɔm da tɛm de, Jizɔs bigin fɔ prich se: “Una ripɛnt, bikɔs di Kiŋdɔm na ɛvin dɔn nia.”
18 As i de waka nia di Si na Galili, i si tu brɔda dɛn, Saymɔn, we dɛn de kɔl Pita, ɛn in brɔda we nem Andru. Na bin fishaman dɛn ɛn dɛn bin de ib dɛn fishin nɛt na di si.
19 Ɛn i tɛl dɛn se: “Una fala mi, ɛn a go sho una aw fɔ luk fɔ pipul dɛn jɔs lɛk aw una kin luk fɔ fish.”
20 Wantɛm wantɛm, dɛn lɛf dɛn nɛt dɛn ɛn fala am.
21 We i kɔmɔt de, i si tu ɔda brɔda dɛn, dat na Jems, we na Zɛbidi in pikin, ɛn in brɔda Jɔn. Dɛn bin de na di bot wit dɛn papa we na Zɛbidi, de pach dɛn nɛt dɛn, ɛn i kɔl dɛn.
22 Wantɛm wantɛm, dɛn lɛf di bot ɛn dɛn papa ɛn fala am.
23 Afta dat, i go ɔlsay na Galili de tich na dɛn sinagɔg* dɛn, i prich di gud nyuz bɔt di Kiŋdɔm, ɛn mɛn ɔlkayn sik we di pipul dɛn bin gɛt.
24 Ɛn di pipul dɛn ɔlsay na Siria yɛri bɔt am, ɛn dɛn briŋ ɔl di wan dɛn we bin gɛt difrɛn difrɛn sik ɛn ɔlkayn pen, di wan dɛn we bin gɛt dimɔn, di wan dɛn we bin gɛt fiks, ɛn di wan dɛn we paralayz, ɛn i mɛn dɛn.
25 So bɔku bɔku pipul dɛn we kɔmɔt Galili, Dikapolis,* Jerusɛlɛm, Judia, ɛn di ɔdasay na di Jɔdan bin de fala am.
Futnot
^ Rid Baybul Wɔd dɛn Minin.
^ Ɔ “bred.”
^ Rid Baybul Wɔd dɛn Minin.
^ Ɔ “relin; di say we ay pas ɔl.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Dat na, di ples usay di Ju dɛn bin de wɔship. Rid Baybul Wɔd dɛn Minin.
^ Ɔ “Ples we Gɛt Tɛn Siti.”
