Romans 3:1-31
3 Us bɛnifit naw pɔsin go gɛt if in na Ju ɔ if i sakɔmsayz?
2 Bɔku bɛnifit de. Fɔs, na dɛn bin gɛt Gɔd in mɛsej we oli.
3 Wetin naw wi go se? If sɔm nɔ gɛt fet, fɔ se di fet we dɛn nɔ gɛt min se Gɔd nɔ fetful?
4 Nɔ-o! Gɔd de tɔk tru, ilɛksɛf ɔlman de lay, jɔs lɛk aw dɛn rayt se: “So dat dɛn go si se yu de tɔk di rayt tin ɛn win we dɛn de jɔj yu.”
5 Bɔt if di tin dɛn we wi de du we nɔ rayt de sho se Gɔd de du wetin rayt, wetin wi go se? Fɔ se Gɔd nɔ de du wetin rayt we i de sho se i vɛks? (A de tɔk lɛk mɔtalman.)
6 Nɔ-o! If na so i bi, aw Gɔd go jɔj di wɔl?
7 Bɔt if di lay we a de lay de sho se Gɔd de tɔk tru ɛn i de mek pipul dɛn prez am, wetin mek Gɔd fɔ se mi na sina?
8 Wetin mek wi nɔ go se, “Lɛ wi du bad tin dɛn so dat gud tin dɛn go apin,” jɔs lɛk aw sɔm pipul dɛn lay se na dat wi tɔk? Di jɔjmɛnt we dɛn pipul ya go gɛt go bi di rayt wan.
9 Wetin wi go se naw? Wi bɛtɛ pas di ɔda wan dɛn? Nɔ-o! Wi bin dɔn ɔlrɛdi tɔk se di Ju dɛn ɛn Grik dɛn ɔl de sin;
10 jɔs lɛk aw dɛn rayt se: “Nɔbɔdi nɔ de we de du wetin rayt, wan sɛf nɔ de;
11 nɔbɔdi nɔ de we de tink gud wan fɔ ɔndastand, ɛn nɔbɔdi nɔ de we de luk fɔ Gɔd.
12 Ɔlman dɔn tɔn ɔdasay, dɛn nɔn nɔ bɛtɛ; nɔbɔdi nɔ de we de du gud, wan sɛf nɔ de.”
13 “Dɛn trot na grev we opin; dɛn de yuz dɛn tɔŋ fɔ ful pipul dɛn.” “Snek pɔyzin de biɛn dɛn lip.”
14 “Ɛn na soso kɔs ɛn badat tɔk de na dɛn mɔt.”
15 “Dɛn fut nɔ de westɛm fɔ go kil.”
16 “Dɛn jɔs de fɔ pwɛl ɛn mek pipul dɛn sɔfa,
17 ɛn dɛn nɔ no aw fɔ gɛt pis.”
18 “Dɛn nɔ de fred Gɔd atɔl.”
19 Wi no se ɔl di tin we di Lɔ se na fɔ di wan dɛn we de fala di Lɔ, so dat ɔlman go sɛt in mɔt ɛn Gɔd go jɔj di wɔl.
20 So Gɔd nɔ go se ɛnibɔdi de du wetin rayt bikɔs i de du wetin lɔ se, bikɔs Lɔ de mek wi no di kɔrɛkt tin bɔt sin.
21 Bɔt naw wi dɔn si se pɔsin go ebul fɔ du wetin rayt na Gɔd in yay, ilɛksɛf i nɔ de obe di Lɔ, jɔs lɛk aw di Lɔ ɛn di Prɔfɛt dɛn se.
22 Fɔ tru, Gɔd de tek ɔl di wan dɛn we de sho se dɛn gɛt fet pan Jizɔs Krays as pipul dɛn we de du wetin rayt na in yay, ɛn dis na fɔ ɛp ɔl di wan dɛn we gɛt fet. Dɛn ɔl na di sem.
23 Ɔlman dɔn sin, ɛn dɛn nɔ ebul gɛt Gɔd in glori.
24 Gɔd de tɔk se dɛn na pipul dɛn we de du wetin rayt bikɔs Krays Jizɔs dɔn pe di prayz fɔ fri dɛn. Na Gɔd in spɛshal gudnɛs* mek i gi dɛn dis gift fɔ fri.
25 Gɔd gi am as sakrifays so dat pipul dɛn go gɛt pis wit Am if dɛn put fet pan Jizɔs in blɔd. Dis na fɔ sho se Gɔd de du wetin rayt, bikɔs di bia we i de bia mek i bin de fɔgiv pipul dɛn trade fɔ dɛn sin dɛn.
26 Dis na fɔ sho se i de du wetin rayt insay dis tɛm, so dat i go stil de du wetin rayt ivin we i tɔk se pɔsin de du wetin rayt bikɔs i gɛt fet pan Jizɔs.
27 Pɔsin fɔ bost? Nɔ-o! Us lɔ de stɔp am fɔ bost? Fɔ se na di lɔ we se wetin pɔsin de du impɔtant? Nɔ-o! Na di lɔ we se pɔsin fɔ gɛt fet.
28 Wi si am se na fet de mek Gɔd tɔk se pɔsin de du wetin rayt, nɔto bikɔs i de obe Lɔ.
29 Fɔ se in na Gɔd fɔ di Ju dɛn nɔmɔ? In nɔto Gɔd bak fɔ di pipul dɛn na ɔda neshɔn dɛn? In na Gɔd bak fɔ di pipul dɛn na ɔda neshɔn dɛn.
30 Bikɔs Gɔd na wan, i go tɔk se di pipul dɛn we sakɔmsayz de du wetin rayt bikɔs ɔf fet ɛn di pipul dɛn we nɔ sakɔmsayz de du wetin rayt bikɔs dɛn gɛt fet.
31 Wi go pul Lɔ kɔmɔt bikɔs wi gɛt fet? Nɔ-o! Bifo dat, wi de sɔpɔt Lɔ.
Futnot Dɛn
^ Rid Baybul Wɔd dɛn Minin.
