Sam 69:1-36
To di wan we de dayrɛkt; di myuzik we nem “Di Lili Dɛn.” Devid in siŋ.
69 E Gɔd, sev mi bikɔs wata want fɔ kɛr mi go.
2 A dɔn sink insay dip pɔtɔpɔtɔ usay di grɔn nɔ strɔng.
A dɔn go insay dip wata,Ɛn di kɔrɛnt dɔn kɛr mi go.
3 Di kɔl kɔl dɔn mek a taya;Mi vɔys dɔn kɔt.
Mi yay dɔn taya we a de wet fɔ mi Gɔd.
4 Di wan dɛn we et mi fɔ no rizinDɔn bɔku pas di ia na mi ed.
Di wan dɛn we want fɔ kil mi,Mi ɛnimi dɛn we de ful mi* dɔn rili bɔku.
Dɛn fos mi fɔ an ova wetin a nɔ tif.
5 E Gɔd, yu no bɔt di fulish tin dɛn we a dɔn du,Ɛn yu no bɔt mi sin dɛn.
6 E Jiova we gɛt bɔku bɔku sojaman dɛn,Di Masta We De Rul Ɔlman,
Lɛ di wan dɛn we abop pan yu nɔ shem bikɔs ɔf mi.E Izrɛl in Gɔd,
Lɛ di wan dɛn we de luk fɔ yu nɔ disgres bikɔs ɔf mi.
7 Pipul dɛn de tɔk bad bad tin dɛn bɔt mi bikɔs ɔf yu;Ɛn dat dɔn mek a rili disgres.
8 A dɔn bi strenja to mi brɔda dɛn,A dɔn tan lɛk fɔrina to mi mama in bɔypikin dɛn.
9 Di zil we a gɛt fɔ yu os dɔn tan lɛk faya insay mi,Ɛn misɛf dɔn gɛt di badnem we pipul dɛn dɔn gi yu.
10 We a put misɛf dɔŋ ɛn kip fast,*A gɛt badnem fɔ dat.
11 We a wɛr klos we pipul dɛn kin wɛr we dɛn at pwɛl,Dɛn bin de provok* mi.
12 Na mi di wan dɛn we sidɔm na di siti get de tɔk bɔt,Ɛn na mi di drɔnkɔman dɛn de siŋ bɔt.
13 E Jiova, lɛ mi prea rich to yu di rayt tɛm.E Gɔd, yu gɛt bɔku bɔku lɔv we nɔ de chenj,
Ansa mi ɛn sho se yu na mi fetful Gɔd we de sev mi.
14 Pul mi insay di pɔtɔpɔtɔ;Nɔ mek a sink.
Sev mi frɔm di wan dɛn we et miƐn pul mi insay dip wata.
15 Nɔ mek di wata in kɔrɛnt kɛr mi go,Nɔ mek a drawn,Nɔ mek di wɛl lɔk we a de insay de.
16 E Jiova, ansa mi, bikɔs yu lɔv we nɔ de chenj gud.
Tɔn to mi bikɔs yu rili gɛt sɔri-at,
17 Nɔ ayd yu fes pan yu savant.
Ansa mi kwik wan bikɔs a gɛt prɔblɛm.
18 Kam nia mi ɛn sev mi;Sev mi bikɔs ɔf mi ɛnimi dɛn.
19 Yu no bɔt mi disgres, mi shem, ɛn di badnem we a dɔn gɛt.
Yu de si ɔl mi ɛnimi dɛn.
20 Di badnem we a dɔn gɛt dɔn mek mi at pwɛl ɛn di wund nɔ de wɛl.*
A bin de op se dɛn go sɔri fɔ mi, bɔt nɔbɔdi nɔ sɔri fɔ mi,A bin de op se dɛn go kɔrej mi, bɔt nɔbɔdi nɔ kɔrej mi.
21 Dɛn gi mi pɔyzin* as fud,Ɛn we a tɔsti, dɛn gi mi viniga fɔ drink.
22 Lɛ dɛn tebul tɔn trap fɔ dɛn,Ɛn lɛ dɛn jɛntri bi trap fɔ dɛn.
23 Lɛ dɛn yay dak so dat dɛn nɔ go si,Ɛn lɛ dɛn wesbon dɛn go de trimbul ɔltɛm.
24 Pul yu vɛksteshɔn pan dɛn,Ɛn lɛ yu at wam pan dɛn bad bad wan.
25 Lɛ nɔbɔdi nɔ de na dɛn kamp;*Lɛ nɔbɔdi nɔ de na dɛn tɛnt dɛn,
26 Bikɔs dɛn rɔnafta di wan we yu nak,Ɛn dɛn kɔntinyu fɔ tɔk bɔt di pen dɛn we de pan di wan we yu wund.
27 Ad mɔ sin pan dɛn sin,Ɛn nɔ si dɛn as pipul dɛn we de du wetin rayt.
28 Wep dɛn nem na di buk we de sho se pɔsin go gɛt layf,Ɛn nɔ rayt dɛn nem usay di wan dɛn we de du wetin rayt dɛn nem de.
29 Bɔt a gɛt pen ɛn a de sɔfa.
E Gɔd, protɛkt mi ɛn yuz yu pawa fɔ sev mi.
30 A go siŋ fɔ prez Gɔd in nem,Ɛn a go ɔnɔ am fɔ tɛl am tɛnki.
31 Dis go mek Jiova gladi pas we a sakrifays man kaw to am,I go gladi pas we a sakrifays yɔŋ man kaw we dɔn big we gɛt ɔn dɛn ɛn sus dɛn.
32 Di wan dɛn we ɔmbul go si am ɛn gladi.
Lɛ di wan dɛn we de luk fɔ Gɔd tek kɔrej.
33 Jiova de lisin to di wan dɛn we po,Ɛn i nɔ go si in pipul dɛn we dɛn kapchɔ as pipul dɛn we nɔ impɔtant.
34 Lɛ ɛvin ɛn di wɔl prez am,Lɛ di si ɛn ɔl wetin de insay de prez am.
35 Gɔd go sev Zayɔn,Ɛn i go bil di siti dɛn na Juda bak,Ɛn dɛn go de de ɛn i* go bi dɛn prɔpati.
36 In savant dɛn pikin dɛn go gɛt am as prɔpati,Ɛn di wan dɛn we lɛk in nem go de de.
Futnot Dɛn
^ Ɔ “Di wan dɛn we et mi fɔ no rizin.”
^ Ɔ i kin bi, “We a kray ɛn kip fast.”
^ Insay Ibru, “pul parebul pan.”
^ Ɔ “ɛn i lɛf smɔl fɔ mek a luz op.”
^ Ɔ “plant we na pɔyzin.”
^ Ɔ “kamp we gɛt fɛns.”
^ Dat na, di land.
