Sam 83:1-18
Esaf in siŋ.
83 E Gɔd, nɔ sɛt mɔt;E di Gɔd we oli, tɔk ɛn du sɔntin.
2 Luk! Yu ɛnimi dɛn de ala;Di wan dɛn we et yu de mek prawd.
3 Dɛn de yuz kɔni kɔni we fɔ plan sikrit wan agens yu pipul dɛn;Dɛn de ɛng ed fɔ du bad to di wan dɛn we yu de protɛkt.*
4 Dɛn se: “Una kam lɛ wi dɔnawe wit di wan ol neshɔn,So dat dɛn nɔ go mɛmba Izrɛl in nem igen.”
5 Dɛn dɔn mek wan plan;*Dɛn dɔn kam togɛda* fɔ de agens yu,
6 Dat na, di Idɔmayt dɛn ɛn di Ishmɛlayt dɛn tɛnt dɛn, Moab ɛn di Agrayt dɛn,
7 Gibal, Amɔn, ɛn Amalɛk,Wit Filistia ɛn di wan dɛn we de na Taya.
8 Asiria bak dɔn jɔyn dɛn;Dɛn de sɔpɔt Lɔt in bɔypikin dɛn. (Sila)
9 Du to dɛn wetin yu du to Midian,Du to dɛn wetin yu du to Sisera ɛn Jebin na di watasay* na Kayshɔn.
10 Dɛn day na Ɛndɔ;Dɛn tɔn manyɔ fɔ di grɔn.
11 Mek dɛn bigman dɛn tan lɛk Orɛb ɛn ZiɛbƐn mek dɛn prins* dɛn tan lɛk Ziba ɛn Zalmɔna.
12 Dɛn se: “Mek wi tek di land we Gɔd de.”
13 E mi Gɔd, mek dɛn tan lɛk dray plant we gɛt chukchuk,Mek dɛn tan lɛk chafchaf we briz de blo.
14 Jɔs lɛk faya we de bɔn fɔrɛst,Ɛn jɔs lɛk faya we de bɔn mawntin dɛn,
15 Na so yu go rɔnafta dɛn wit yu big big brizƐn yuz yu big big briz fɔ mek dɛn fred.
16 E Jiova, mek lɛ dɛn shem,So dat dɛn go kɔl yu nem.
17 Lɛ dɛn shem ɛn fred sote go;Lɛ dɛn disgres ɛn day;
18 Lɛ pipul dɛn no se yu we nem Jiova,Na yu wangren de pantap ɔlman na di wɔl.
Futnot Dɛn
^ Insay Ibru, “we yu dɔn kip.”
^ Insay Ibru, “Dɛn dɔn mek wan plan wit ɔl dɛn at.”
^ Ɔ “dɔn mek agrimɛnt.”
^ Ɔ “vali.”
^ Ɔ “lida.”
