5 We i si di krawd, i go ɔp di mawntin. We i sidɔm, in disaypul dɛn kam to am. 2 Dɔn i bigin fɔ tich dɛn se:

3 “Di wan dɛn we no se dɛn nid fɔ lan bɔt Gɔd a gɛt gladi-at bikɔs na dɛn gɛt di Kiŋdɔm we de na ɛvin.

4 “Di wan dɛn we dɛn at pwɛl gɛt gladi-at bikɔs dɛn go kɔrej dɛn.

5 “Di wan dɛn we ɔmbul gɛt gladi-at bikɔs dɛn go gɛt di wɔl.

6 “Di wan dɛn we rili want fɔ lɛ wetin rayt apin gɛt gladi-at bikɔs Gɔd go satisfay dɛn.

7 “Di wan dɛn we de sɔri fɔ ɔda pipul dɛn gɛt gladi-at bikɔs dɛn b go sɔri fɔ dɛn.

8 “Di wan dɛn we dɛn at klin gɛt gladi-at bikɔs dɛn go si Gɔd.

9 “Di wan dɛn we de mek pis c gɛt gladi-at bikɔs dɛn go kɔl dɛn Gɔd in pikin dɛn.

10 “Di wan dɛn we pipul dɛn dɔn mek sɔfa bikɔs dɛn de du wetin rayt gɛt gladi-at bikɔs na dɛn gɛt di Kiŋdɔm we de na ɛvin.

11 “Una we pipul dɛn de trit bad, ɛn una we dɛn de mek sɔfa ɛn lay pan bad bad wan fɔ mi sek gɛt gladi-at. 12 Una gladi pasmak bikɔs una gɛt bɔku blɛsin na ɛvin. Na so dɛn bin de mek di prɔfɛt dɛn we bin de bifo una sɔfa.

13 “Una na di sɔl na di wɔl, bɔt if di sɔl nɔ gɛt tes igen, aw i go gɛt in tes bak? I nɔ gɛt no yus igen pas fɔ trowe am na do lɛ pipul dɛn mas am.

14 “Una na di layt na di wɔl. Siti we de pantap mawntin nɔ ayd. 15 We pipul dɛn layt lamp, dɛn kin put am pan di stand fɔ put lamp fɔ mek i shayn pan ɔlman na di os, dɛn nɔ de put am ɔnda baskɛt. d 16 Semweso, una mek una layt shayn bifo pipul dɛn, so dat dɛn go si di fayn tin dɛn we una de du ɛn prez una Papa we de na ɛvin.

17 “Una nɔ tink se a kam fɔ pwɛl di Lɔ ɔ wetin di Prɔfɛt dɛn tich. A nɔ kam fɔ pwɛl dɛn, a kam fɔ mek wetin dɛn tich apin. 18 Fɔ tru, a de tɛl una se ivin if ɛvin ɛn dis wɔl nɔ de igen, wan pan di lɛta dɛn we smɔl pas ɔl ɔ pat pan wan lɛta nɔ go kɔmɔt na di Lɔ pas te ɔltin apin. 19 So ɛnibɔdi we brok wan pan dɛn lɔ ya we nɔ tu impɔtant ɛn tich ɔda pipul dɛn fɔ du dat nɔ fit fɔ go na di Kiŋdɔm we de na ɛvin. Bɔt ɛnibɔdi we obe dɛn ɛn tich dɛn, fit fɔ go na di Kiŋdɔm we de na ɛvin. 20 A de tɛl una se if una nɔ du wetin rayt pas di Lɔ ticha dɛn ɛn Faresi dɛn, una nɔ go go insay di Kiŋdɔm we de na ɛvin.

  21 “Una dɔn yɛri se dɛn bin tɛl di wan dɛn we bin de trade trade se: ‘Yu nɔ fɔ kil pɔsin. Ɛnibɔdi we kil pɔsin, go ansa na kɔt.’ 22 Bɔt mi de tɛl una se ɛnibɔdi we kɔntinyu fɔ vɛks bad pan in brɔda go ansa na kɔt; ɛn ɛnibɔdi we yuz bad wɔd fɔ disgres in brɔda go ansa na di Ay Kɔt; bɔt ɛnibɔdi we  se, ‘Yu yuzlɛs fulman!’ go ɛnd-ɔp na di faya na Gɛɛna. e

23 “So if yu de kam wit yu gift na di ɔlta ɛn we yu rich de, yu mɛmba se yu brɔda nɔ gladi wit yu, 24 lɛf yu gift bifo di ɔlta ɛn go mek pis fɔs wit yu brɔda, dɔn kam bak ɛn gi yu gift.

25 “Tray kwik kwik wan fɔ sɔlv di prɔblɛm we yu gɛt wit di wan we want fɔ kɛr yu go na kɔt, we yu de wit am na rod fɔ go de, so dat i nɔ go kɛr yu go to di jɔj, ɛn di jɔj mek di prizin ɔfisa put yu na prizin. 26 Fɔ tru, a de tɛl yu se yu nɔ go kɔmɔt de pas te yu pe ɔl yu mɔni.

27 “Una dɔn yɛri se dɛn bin se: ‘Yu nɔ fɔ lɛf yu man ɔ wɛf ɛn go du mami ɛn dadi biznɛs wit ɔda pɔsin.’ 28 Bɔt mi de tɛl una se ɛnibɔdi we kɔntinyu fɔ luk uman we nɔto in wɛf, te i gɛt filin fɔ am, dɔn ɔlrɛdi du mami ɛn dadi biznɛs wit am na in at. 29 If yu rayt yay de mek yu sin, pul am ɛn trowe am. I bɛtɛ lɛ wan pan yu pat dɛn nɔ de, pas fɔ mek yu wan ol bɔdi go na Gɛɛna. f 30 Ɛn if yu raytan de mek yu sin, kɔt am ɛn trowe am. I bɛtɛ lɛ wan pan yu pat dɛn nɔ de, pas fɔ mek yu wan ol bɔdi go na Gɛɛna. g

31 “Pantap dat, dɛn bin se: ‘Ɛnibɔdi we dayvɔs in wɛf fɔ gi am dayvɔs satifiket.’ 32 Bɔt mi de tɛl una se ɛnibɔdi we dayvɔs in wɛf, we i bi se in wɛf nɔ du mami ɛn dadi biznɛs di we aw Gɔd nɔ want, h de tɛmt am fɔ du mami ɛn dadi biznɛs wit ɔda pɔsin, ɛn ɛnibɔdi we mared uman we dɛn dayvɔs dis we dɔn du mami ɛn dadi biznɛs wit ɔda man in wɛf.

33 “Una bin dɔn yɛri bak se dɛn bin tɛl di wan dɛn we bin de trade trade se: ‘Yu nɔ fɔ swɛ ɛn nɔ du wetin yu se yu go du; yu fɔ du wetin yu dɔn vaw to Jiova i se yu go du.’ 34 Bɔt mi de tɛl una se: Una nɔ swɛ atɔl atɔl, una nɔ swɛ to ɛvin bikɔs na Gɔd in tron; 35 ɔ swɛ to di wɔl, bikɔs na de i de put in fut; ɔ swɛ to Jerusɛlɛm, bikɔs na di gret Kiŋ in siti. 36 Nɔ swɛ to yu ed, bikɔs yu nɔ ebul tɔn wan ia wayt ɔ blak. 37 Jɔs mek yu ‘Yɛs’ min yɛs, ɛn yu ‘Nɔ’ min nɔ, bikɔs ɛnitin apat frɔm dis kɔmɔt frɔm di wikɛd wan!

38 “Una bin dɔn yɛri wetin dɛn bin dɔn tɔk. Dɛn bin se: ‘If pɔsin damej sɔmbɔdi in yay, dɛn fɔ damej in yon, ɛn if pɔsin brok sɔmbɔdi in tit, dɛn fɔ brok in yon.’ 39 Bɔt mi de tɛl una se: Nɔ fɛt pɔsin we wikɛd, bɔt ɛnibɔdi we slap yu na yu rayt jɔ, tɔn di ɔdasay fɔ am. 40 Ɛn if pɔsin want fɔ kɛr yu go na kɔt fɔ tek di klos we yu wɛr ɔnda, gi am bak di wan we yu wɛr pantap; 41 ɛn if pɔsin we gɛt pawa fos yu fɔ kɛr lod wan mayl, go wit am tu mayl. 42 If pɔsin aks yu fɔ sɔntin gi am, ɛn nɔ tɔn yu bak pan di wan we want fɔ lɛnt j to yu.

43 “Una bin dɔn yɛri wetin dɛn bin dɔn tɔk. Dɛn bin se: ‘Yu fɔ lɛk yu neba ɛn et yu ɛnimi.’ 44 Bɔt a de tɛl una se: Una fɔ kɔntinyu fɔ lɛk una ɛnimi dɛn ɛn pre fɔ di wan dɛn we de mek una sɔfa, 45 so dat una go sho se una na pikin dɛn to una Papa we de na ɛvin, bikɔs i de mek in san shayn pan di wikɛd pipul dɛn ɛn di gud pipul dɛn, ɛn i de mek ren kam pan di pipul dɛn we de du wetin rayt ɛn di wan dɛn we nɔ de du wetin rayt. 46 If una lɛk di wan dɛn we lɛk una, us blɛsin una go gɛt? Di wan dɛn we de gɛda taks de du  di sem tin, nɔto so? 47 Ɛn if na una brɔda dɛn nɔmɔ una de grit, una tink se wetin una de du bɛtɛ pas wetin ɔda pipul dɛn de du? Pipul dɛn we de na ɔda neshɔn dɛn de du di sem tin, nɔto so? 48 So una fɔ pafɛkt k lɛk aw una Papa we de na ɛvin pafɛkt.

6 “Una tek tɛm mek una nɔ du wetin rayt bifo pipul dɛn fɔ lɛ dɛn si una, bikɔs una Papa we de na ɛvin nɔ go blɛs una. 2 So we yu de gi gift dɛn to po pipul dɛn, yu nɔ fɔ blo trɔmpɛt l bifo yu lɛk aw dɛn ipokrit pipul dɛn kin du na di sinagɔg a dɛn ɛn na di strit dɛn, so dat mɔtalman go prez dɛn. Fɔ tru, a de tɛl una se dɛn dɔn ɔlrɛdi gɛt dɛn pe. 3 Bɔt we yu de gi gift dɛn to po pipul dɛn, nɔ mek yu lɛftan no wetin yu raytan de du, 4 so dat di gift dɛn we yu de gi to po pipul dɛn go bi sɔntin we na sikrit. Dɔn yu Papa we de si yu pan ɔl we ɔda pipul dɛn nɔ de si yu go blɛs yu.

5 “Ɛn we una de pre, una nɔ mek lɛk dɛn ipokrit pipul dɛn, bikɔs dɛn lɛk fɔ tinap na dɛn sinagɔg b ɛn kɔna dɛn na di men strit dɛn fɔ pre so dat mɔtalman go si dɛn. Fɔ tru, a de tɛl una se dɛn dɔn ɔlrɛdi gɛt dɛn pe. 6 Bɔt we yu want fɔ pre, go insay yu rum ɛn lɔk di domɔt, dɔn pre to yu Papa we pɔsin nɔ de si. Ɛn yu Papa we de si yu pan ɔl we ɔda pipul dɛn nɔ de si yu go blɛs yu. 7 We yu de pre, nɔ se di sem tin igen ɛn igen lɛk aw di pipul dɛn na ɔda neshɔn dɛn de du, bikɔs dɛn tink se Gɔd go yɛri dɛn we dɛn yuz bɔku wɔd dɛn. 8 So una nɔ tan lɛk dɛn, bikɔs una Papa no wetin una nid ivin bifo una aks am.

9 “Na so una fɔ pre:

“‘Wi Papa we de na ɛvin, lɛ ɔlman tek yu nem as sɔntin we oli. c 10 Lɛ yu Kiŋdɔm kam. Lɛ wetin yu want, bi na dis wɔl lɛk aw i de bi na ɛvin. 11 Gi wi di it d we wi nid fɔ dis de, 12 ɛn fɔgiv wi fɔ wi sin e dɛn jɔs lɛk aw wi dɔn fɔgiv di wan dɛn we sin agens wi. 13 Nɔ alaw tɛmteshɔn fɔ ebul wi, bɔt sev wi frɔm di wikɛd wan.’

14 “If una fɔgiv pipul dɛn fɔ di bad tin dɛn we dɛn du, una Papa we de na ɛvin insɛf go fɔgiv una; 15 bɔt if una nɔ fɔgiv pipul dɛn fɔ di bad tin dɛn we dɛn du, una Papa nɔ go fɔgiv una.

16 “We una de fast, una nɔ mek una fes da sɔri we lɛk dɛn ipokrit dɛn; dɛn nɔ kin tek kia ɔf dɛn fes fɔ lɛ pipul dɛn no se dɛn de fast. Fɔ tru, a de tɛl una se, dɛn dɔn ɔlrɛdi gɛt dɛn pe. 17 Bɔt we yu de fast, rɔb ɔyl na yu ed ɛn was yu fes, 18 so dat mɔtalman nɔ go no se yu de fast bɔt na yu Papa nɔmɔ we pɔsin nɔ de si go no. Dɔn yu Papa we de si yu pan ɔl we ɔda pipul dɛn nɔ de si yu go blɛs yu.

19 “Una lɛf fɔ kip jɛntri fɔ unasɛf na di wɔl, usay bɔgbɔg f ɛn rɔsti kin pwɛl am ɛn usay tifman dɛn kin brok go insay ɛn tif. 20 Bifo dat, una kip una jɛntri na ɛvin usay bɔgbɔg ɔ rɔsti nɔ go pwɛl am ɛn usay tifman dɛn nɔ go brok go insay ɛn tif am, 21 bikɔs usay una jɛntri de, na de bak una at go de.

22 “Di bɔdi in lamp na di yay. So if yu yay de pan wan tin, g yu wan ol bɔdi go brayt. h 23 Bɔt if yu yay milɛ, i yu wan ol bɔdi go dak. If di layt we de insay yu na daknɛs, mɔs no aw yu bɔdi dak!

 24 “Nɔbɔdi nɔ go bi slev to tu masta, bikɔs i go et di wan ɛn lɛk di ɔda wan, ɔ i go de biɛn di wan ɛn nɔ rɛspɛkt di ɔda wan. Una nɔ go ebul bi slev fɔ Gɔd ɛn fɔ Jɛntri.

25 “Na dis mek a de tɛl una se: Una lɛf fɔ wɔri bɔt una layf j we i kam pan wetin una go it ɔ wetin una go drink, ɔ bɔt una bɔdi we i kam pan wetin una go wɛr. Layf k impɔtant pas it, ɛn di bɔdi impɔtant pas klos, nɔto so? 26 Una tek tɛm wach di bɔd dɛn we de flay na di skay, dɛn nɔ de plant sid ɔ avɛst ɔ kip na stɔ, bɔt stil una Papa we de na ɛvin de fid dɛn. Una nɔ tink se una bɛtɛ pas bɔd dɛn? 27 Uswan pan una we de wɔri go ebul fɔ ad ivin shɔt tɛm l pan in layf? 28 Ɛn wetin mek una de wɔri bɔt klos? Una lan frɔm di we aw di flawa a dɛn de gro; dɛn nɔ de wok ɔ so klos; 29 bɔt a de tɛl una se pan ɔl we Sɔlɔmɔn bin gɛt bɔku fayn fayn tin dɛn, i nɔ bin de drɛs fayn lɛk wan pan dɛn flawa ya. 30 If na so Gɔd de drɛs dɛn flawa ya we de ya tide ɛn tumara dɛn put dɛn na ovin, una nɔ tink se i go gi una klos, una we gɛt smɔl fet? 31 So una nɔ ɛva wɔri ɛn aks se, ‘Wetin wi go it?’ ɔ, ‘Wetin wi go drink?’ ɔ, ‘Wetin wi go wɛr?’ 32 Na ɔl dɛn tin ya di pipul dɛn na di ɔda neshɔn dɛn de rɔnata. Una Papa we de na ɛvin no se una nid ɔl dɛn tin ya.

33 “Una kɔntinyu fɔ put di Kiŋdɔm ɛn wetin rayt na Gɔd in yay fɔs na una layf ɛn Gɔd go gi una ɔl dɛn ɔda tin ya. 34 So una nɔ ɛva wɔri bɔt tumara, bikɔs ɔda tin dɛn go de fɔ wɔri bɔt tumara. Ɛnide gɛt in yon prɔblɛm.

7 “Una lɛf fɔ jɔj pipul dɛn so dat Gɔd nɔ go jɔj una; 2 bikɔs aw una jɔj ɔda pipul dɛn, na so i go jɔj una, ɛn aw una de mɛzhɔ fɔ ɔda pipul dɛn, na so dɛn go mɛzhɔ fɔ una. 3 So, wetin mek yu de luk di smɔl tik we de na yu brɔda in yay, bɔt yu nɔ de si di bod we de na yu yon yay? 4 Ɔ aw yu go tɛl yu brɔda se, ‘Alaw mi mek a pul di smɔl tik na yu yay,’ we i bi se bod de na yu yon yay? 5 Ipokrit! Pul di bod na yu yon yay fɔs, dɔn yu go si klia wan aw fɔ pul di smɔl tik na yu brɔda in yay.

6 “Una nɔ gi wetin oli to dɔg ɔ trowe una pal b dɛn bifo ɔg, so dat dɛn nɔ go ɛva mas am ɛn tɔn ɛn atak una.

7 “Una kɔntinyu fɔ aks ɛn una go gɛt wetin una de aks fɔ; una kɔntinyu fɔ luk, ɛn una go fɛn; una kɔntinyu fɔ nak, ɛn di domɔt go opin; 8 bikɔs ɛnibɔdi we de aks go gɛt wetin i de aks fɔ, ɛn ɛnibɔdi we de luk go fɛn, ɛn ɛnibɔdi we de nak, di domɔt go opin fɔ am. 9 Fɔ tru, uswan pan una go gi in bɔypikin ston if i aks fɔ bred? 10 Ɔ if una bɔypikin aks fɔ fish, una nɔ go gi am snek, nɔto so? 11 So, if una we wikɛd, no aw fɔ gi fayn gift to una pikin dɛn, una fɔ no se una Papa we de na ɛvin go mɔs gi gud tin dɛn to di wan dɛn we de aks am!

12 “So ɔl wetin una want mek ɔda pipul dɛn du to una, na in una fɔ du to dɛn. Infakt, na dis di Lɔ ɛn di Prɔfɛt dɛn de tich.

13 “Pas na di smɔl get, bikɔs di get we big ɛn di rod we wayd go mek pɔsin ɛnd-ɔp fɔ day, ɛn bɔku pipul dɛn de pas de, 14 bɔt di get we smɔl ɛn di rod we nɔ big go mek pɔsin ɛnd-ɔp fɔ gɛt layf, ɛn di pipul dɛn we de fɛn am nɔ bɔku.

15 “Tek tɛm wit dɛn lay lay prɔfɛt dɛn we de kam to una ɛn mek lɛk se  dɛn na ship, bɔt we tan lɛk wulf c dɛn we dɔn angri bad bad wan. 16 Una go no dɛn bay wetin dɛn de du. d Pipul dɛn nɔ de pik greps ɔ fig pan chukchuk, nɔto so? 17 Semweso, ɛni tik we gud de bia fayn frut, bɔt ɛni tik we rɔtin nɔ de bia fayn frut. 18 Gud tik nɔ de bia frut we nɔ fayn, ɛn rɔtin tik nɔ de bia fayn frut. 19 Ɛni tik we nɔ de bia fayn frut, dɛn go kɔt am ɛn ib am na faya. 20 Fɔ tru, una go no dɛn lay lay prɔfɛt ya bay wetin dɛn de du.

21 “Nɔto ɔlman we de kɔl mi, ‘Masta, Masta,’ go go insay di Kiŋdɔm we de na ɛvin, bɔt na di wan dɛn nɔmɔ we de du wetin mi Papa we de na ɛvin want go go de. 22 Da de de bɔku pipul dɛn go se: ‘Masta, Masta, nɔto yu nem wi bin de yuz fɔ tɔk wetin Gɔd tɛl wi fɔ tɔk, nɔto yu nem wi bin de yuz fɔ pul dimɔn dɛn, ɛn nɔto yu nem wi bin de yuz fɔ du bɔku pawaful tin dɛn?’ 23 Bɔt a go tɛl dɛn se: ‘A nɔ wande sabi una! Una kɔmɔt nia mi, una we de du bad!’

24 So ɛnibɔdi we yɛri dɛn wɔd ya we a de tɔk ɛn du dɛn, go tan lɛk wan man we gɛt sɛns we bil in os pantap rɔk. 25 Ren kam, di wata bɔku te i kam insay di os, ɛn big briz blo pan di os, bɔt i nɔ fɔdɔm, bikɔs na pantap rɔk i bil am. 26 Bɔt ɛnibɔdi we yɛri dɛn wɔd ya we a de tɔk ɛn nɔ du dɛn, go tan lɛk wan fulman we bil in os pan sansan. 27 Ren kam, di wata bɔku te i kam insay di os, ɛn big briz blo pan di os, ɛn di os fɔdɔm ɛn pwɛl kpatakpata.”

28 We Jizɔs dɔn fɔ tɔk dɛn wɔd ya, di pipul dɛn kɔle di we aw i bin de tich, 29 “ bikɔs wetin i bin de tich dɛn kɔmɔt frɔm Gɔd; i nɔ bin de tich lɛk dɛn Lɔ ticha dɛn.