Di pipul dɛn we di Baybul se fɔ kia fɔ di kɔngrigeshɔn na “ovasia dɛn ɛn ministerial savant dɛn.” (Lɛta Fɔ Filipay 1:1, NW) Bɔku ɛlda ɛn ministerial savant dɛn de na ɔl di kɔngrigeshɔn dɛn fɔ ɛp di brɔda dɛn. Us wok di ministerial savant dɛn de du na di kɔngrigeshɔn?

Dɛn de ɛp di ɛlda dɛn. Ministerial savant dɛn na brɔda dɛn we lɛk Jiova, we ɔda pipul dɛn kin abop pan ɛn we de du wetin rayt. Sɔm pan dɛn na yɔŋ pipul dɛn ɛn ɔda wan dɛn dɔn ol. Na dɛn de du dɛn af-af wok dɛn na di kɔngrigeshɔn. Dis de mek di ɛlda dɛn gɛt chans fɔ tich ɛn ɛnkɔrej di brɔda dɛn na di kɔngrigeshɔn.

Dɛn de du smɔl smɔl wok dɛn na di kɔngrigeshɔn. Sɔm ministerial savant dɛn kin bi atɛndant. Dat na pɔsin we de grit pipul dɛn we dɛn kam na di mitin ɛn sho dɛn say fɔ sidɔm. Ɔda wan dɛn kin de na di say we dɛn de ple di sɔng dɛn, ɔ na di say we dɛn de gi buk dɛn to di brɔda ɛn sista dɛn. Sɔm dɛn bak kin de na di mɔni say, ɛn ɔda wan dɛn kin de fɔ sho di brɔda ɛn sista dɛn usay fɔ prich. Ministerial savant dɛn kin ɛp bak fɔ klin ɛn mek di say dɛn we dɔn pwɛl na di Kiŋdɔm Ɔl. Sɔntɛnde, di ɛlda dɛn kin tɛl dɛn fɔ ɛp di brɔda ɛn sista dɛn we dɔn ol. Di ministerial savant dɛn kin rɛdi fɔ du ɛnitin we dɛn tɛl dɛn fɔ du. So, ɔlman na di kɔngrigeshɔn fɔ rɛspɛkt dɛn fɔ di wok we dɛn de du.—Fɔs Lɛta To Timoti 3:13.

Dɛn de du fayn tin dɛn we ɔda pipul dɛn kin falamakata. Dɛn de pik pɔsin fɔ bi ministerial savant bikɔs i gɛt fayn abit dɛn we Kristian dɛn fɔ gɛt. Ɛnitɛm we dɛn gɛt chans fɔ tich na di kɔngrigeshɔn, dɛn kin ɛp wi fɔ biliv Gɔd mɔ. Dɛn ɛn di ɛlda dɛn kin de bifo fɔ prich ɛn dis de mek wisɛf want fɔ prich mɔ. Bikɔs di ministerial savant dɛn de du wetin di ɛlda dɛn de tɛl dɛn, dɛn de mek ɔlman gladi ɛn gɛt wanwɔd na di kɔngrigeshɔn. (Lɛta Fɔ Ɛfisɔs 4:16) Leta, dɛnsɛf kin bi ɛlda.

• Udat na ministerial savant?

• Us wok di ministerial savant dɛn de du na di kɔngrigeshɔn?