DI TƆPIK NA DI FRƆNT PEJ—DI STORI BƆT AW DƐN NƆ EBUL FƆ PWƐL DI BAYBUL
Di Baybul Stil De, Pan ɔl we di Pepa dɛn We Dɛn Yuz fɔ Rayt Am De Rɔtin
DI PRƆBLƐM: Di fɔstɛm pipul dɛn we rayt di Baybul bin de yuz pepa dɛn we dɛn yuz plant fɔ mek ɛn pepa dɛn we dɛn yuz animal kanda fɔ mek. (Sɛkɛn Lɛta To Timoti 4:13) Aw dɛn tin ya we dɛn yuz fɔ rayt di Baybul dɔn mek i nɔ izi fɔ mek di Baybul de te tide?
Di pepa dɛn we dɛn yuz plant fɔ mek bin izi fɔ chɛr, di kɔlɔ kin chenj, ɛn i nɔ kin strɔng bɛtɛ igen. Tu masta sabi bukman dɛn we nem Richad Pakinsin ɛn Stɛfan Kwɔkyɔn we de stɔdi bɔt aw Ijipt bin de trade bin tɔk se: “As tɛm kin go, di pepa kin rɔtin, tɔn chaf-chaf, ɛn tɔn to dɔti. We dɛn kin kip di pepa dɛn, dɛn kin bigin miliju ɔ rɔtin we i sok smɔl ɛn sɔntɛnde smɔl smɔl animal dɛn lɛk arata ɔ insɛkt dɛn lɛk anch kin it dɛn we dɛn bɛr dɛn.” Afta we dɛn fɛn sɔm pepa dɛn we dɛn yuz fɔ rayt di Baybul, dɛn bin put dɛn ɔnda san ɔ say we i go sok smɔl, dat bin mek dɛn pwɛl ɔ rɔtin kwik kwik wan.
Di pepa dɛn we dɛn mek frɔm animal kanda bin de te pas di wan dɛn we dɛn yuz plant fɔ mek, bɔt i kin pwɛl kwik if dɛn nɔ ol am fayn ɔ if dɛn put am na say we wam ɔ kol pasmak, say we i go sok smɔl, ɔ ɔnda san. * Insɛkt dɛn bak kin lɛk fɔ it di pepa dɛn we dɛn yuz animal kanda fɔ mek. Na dat mek bɔku pepa dɛn we dɛn rayt fɔs fɔstɛm nɔ de naw. If di Baybul bin dɔn rɔtin, dat min se di mɛsej we de insay de nɔ bin fɔ dɔn de.
WETIN MEK DI BAYBUL DE TE NAW?: Di Ju lɔ bin se ɛnibɔdi we na kiŋ fɔ “kɔpi” di fɔs fayv buk dɛn na di Baybul. (Ditarɔnɔmi 17:18) Bikɔs pipul dɛn we bin sabi fɔ rayt bin dɔn kɔpi bɔku pat dɛn na di Baybul, dat mek insay di fɔstɛm Kristian dɛn tɛm, di Skripchɔ dɛn bin de na Ju mitin os dɛn we bin de na Izrɛl ɛn ivin na Masidonia! (Lyuk 4:16, 17; Di Apɔsul Dɛn Wok [Akt] 17:11) Aw sɔm ol ol pepa dɛn de te naw?
Fɔs fɔstɛm pepa dɛn we dɛn de kɔl di Dɛd Si Skrol dɔn de te naw bikɔs dɛn put am insay bɔtul dɛn we dɛn mek wit kle ɛn kip dɛn insay kev dɛn usay wata nɔ de mit dɛn
Filip W. Kɔnfɔt we na wan masta sabi bukman we de rayt bɔt di Nyu Tɛstamɛnt bin se: “Dɛn sabi di Ju pipul dɛn fɔ put dɛn skrol dɛn we dɛn rayt di Baybul insay jɔg ɔ bɔtul dɛn fɔ kip dɛn.” Dis bin mek dɛn bin ebul fɔ fɛn sɔm fɔstɛm pepa dɛn we dɛn bin rayt di Baybul, insay bɔtul dɛn we dɛn mek wit kle, insay dak rum, ɛn kev dɛn, mɔ na say dɛn we wata nɔ de.
DI BƐNIFIT: Tide wi dɔn gɛt bɔku bɔku pepa dɛn we dɛn bin rayt di Baybul pan we ol lɛk 2,000 ia so. No ɔda buk nɔ de we dɛn bin rayt trade trade we gɛt bɔku bɔku fɔs fɔstɛm pepa dɛn we dɔn te so.
^ par. 5 Fɔ ɛgzampul, di pepa we dɛn bin sayn na Amɛrika fɔ di agrimɛnt we sho se dɛn dɔn de fɔ dɛnsɛf na bin pepa we dɛn yuz animal kanda fɔ mek. Naw i dɔn pas 250 ia, ɛn i dɔn fed pasmak ɛn i nɔ izi fɔ mek pɔsin rid am.
