1. Wetin mek wi lɛk pipul dɛn we de peshɛnt?

 WI ƆL lɛk pipul dɛn we de peshɛnt. Wi kin rɛspɛkt di wan dɛn we nɔ kin vɛks we dɛn de wet fɔ sɔntin. We wi mek mistek, wi kin gladi we ɔda pipul dɛn de peshɛnt wit wi. Ɛn wi gladi we wi Baybul ticha bin peshɛnt wit wi we i nɔ bin izi fɔ wi fɔ lan, fɔ gri wit di tin dɛn we di Baybul de tich, ɛn aplay dɛn. Ɛn wi gladi mɔ bikɔs Jiova we na wi Gɔd de peshɛnt wit wi!—Rom. 2:​4.

2. Us tin dɛn kin apin we kin mek i nɔ izi fɔ bi pɔsin we de peshɛnt?

² Pan ɔl we wi kin gladi we ɔda pipul dɛn de peshɛnt wit wi, sɔntɛnde, i nɔ kin izi fɔ lɛ wi bi pɔsin we de peshɛnt. Fɔ ɛgzampul, i nɔ go izi fɔ peshɛnt we wi de na trafik, mɔ we wi dɔn let fɔ go sɔnsay. Sɔntɛm wi at go wam we ɔda pipul dɛn du sɔntin we mek wi vɛks. Ɛn sɔntɛnde, i nɔ kin izi fɔ lɛ wi kɔntinyu fɔ peshɛnt wet fɔ lɛ di nyu wɔl we Jiova dɔn prɔmis kam. Bɔt yu go lɛk fɔ bi pɔsin we rili peshɛnt? Insay dis atikul, wi go tɔk bɔt wetin i min fɔ bi pɔsin we de peshɛnt ɛn wetin mek dat rili impɔtant. Wi go tɔk bak bɔt wetin go ɛp wi fɔ bi pɔsin we de rili peshɛnt.

3. Wetin pɔsin we de peshɛnt kin du we dɛn du tin we fɔ mek i vɛks?

³ Lɛ wi tɔk bɔt 4 eria dɛn we wi go sho se wi na pɔsin we de peshɛnt. Fɔs, pɔsin we de peshɛnt nɔ de vɛks kwik. I kin tray nɔ fɔ vɛks ɔ tɔn-am-gi we dɛn du tin we fɔ mek i vɛks. Ɛn i nɔ kin trit pipul dɛn ash we we i strɛs. Di fɔs  tɛm we dɛn yuz di wɔd dɛn “nɔ de vɛks kwik” na we dɛn bin de tɔk bɔt Jiova se na “PAPA GƆD we gud ɛn de sho masi, we nɔ gɛt shɔtat, we in lɔv nɔ de fel, ɛn PAPA GƆD we pɔsin kin put in op ɛn trɔs pan.”—Ɛks. 34:​6.

4. Wetin pɔsin we de peshɛnt kin du we i nid fɔ wet?

⁴ Sɛkɔn, pɔsin we de peshɛnt nɔ kin vɛks we i de wet. If sɔntin tek lɔng tɛm fɔ apin pas aw i bin de ɛkspɛkt, pɔsin we de peshɛnt nɔ de taya fɔ wet ɔ vɛks. (Mat. 18:​26, 27) Bɔku tin dɛn go apin we go mek wi nid fɔ wet. Fɔ ɛgzampul, wi nid fɔ peshɛnt lisin we sɔmbɔdi de tɔk ɛn nɔ kɔt wɔd na in mɔt. (Job 36:​2) Wi nid bak fɔ peshɛnt we wi de ɛp Baybul studɛnt dɛn fɔ ɔndastand wetin di Baybul de tich ɔ fɔ lɛf wan bad abit.

5. Us ɔda we wi go sho se wi na pɔsin we de peshɛnt?

⁵ Tɔd, pɔsin we de peshɛnt kin tink bifo i du sɔntin. Na tru se sɔntɛnde we sɔntin apin, wi kin nid fɔ du sɔntin kwik kwik wan. Bɔt we pɔsin we de peshɛnt gɛt impɔtant wok fɔ du, i nɔ de rɔsh fɔ bigin du di wok ɔ rɔsh fɔ dɔn am. Bifo dat, i kin mek shɔ se i gɛt bɔku tɛm fɔ du di wok. Dɔn i kin tek in tɛm fɔ du di wok fayn fayn wan.

6. Wetin pɔsin we de peshɛnt kin du we i gɛt prɔblɛm dɛn?

⁶ Nɔmba 4, pɔsin we de peshɛnt kin tray nɔ fɔ kɔmplen we i de bia prɔblɛm dɛn. Dis min se fɔ peshɛnt gɛt sɔntin fɔ du wit fɔ bia. Na tru se i nɔ bad fɔ tɛl yu tayt padi bɔt yu prɔblɛm ɛn aw yu de fil bɔt yu prɔblɛm. Bɔt pɔsin we de peshɛnt kin tink bak bɔt di gud tin dɛn we dɔn apin na in layf ɛn i go du in bɛst fɔ kɔntinyu fɔ sav Jiova wit gladi-at. (Kol. 1:​11) Jiova in pipul dɛn nid fɔ sho se dɛn na pipul dɛn we de peshɛnt pan ɔl dɛn tin dɛn  ya. Wetin mek? Lɛ wi tɔk bɔt sɔm rizin dɛn.

7. Akɔdin to Jems 5:​7, 8, wetin mek i rili impɔtant fɔ bi pɔsin we de peshɛnt? (Luk bak di pikchɔ.)

⁷ We wi bi pɔsin we de peshɛnt, dat go mek wi gɛt layf we go de sote go. Lɛk di fetful savant dɛn we bin de trade, wisɛf nid fɔ peshɛnt wet fɔ lɛ Gɔd du ɔl di tin dɛn we i dɔn prɔmis. (Ibru. 6:​11, 12) Di Baybul kɔmpia wi to fama. (Rid Jems 5:​7, 8.) Fama kin wok tranga wan fɔ plant ɛn wata di tin dɛn we i dɔn plant, bɔt i nɔ kin no di patikyula tɛm we dɛn go gro. So di fama kin peshɛnt wet ɛn biliv se i go avɛst di tin dɛn we i dɔn plant. Semweso, wi de wok tranga wan fɔ bi Krays in disaypul dɛn pan ɔl we wi “nɔ no di de we [wi] Masta de kam.” (Mat. 24:​42) Wi de peshɛnt wet ɛn biliv se we di rayt tɛm rich, Jiova go du ɔl di tin dɛn we i dɔn prɔmis. If wi stɔp fɔ bi pɔsin we de peshɛnt, wi go taya fɔ wet ɛn smɔl smɔl, wi go lɛf Jiova. Wi go ivin bigin fɔ pe atɛnshɔn pan tin dɛn we wi tink se go mek wi gɛt gladi-at naw. Bɔt if wi kɔntinyu fɔ peshɛnt, wi go bia te di ɛnd kam ɛn wi go sev.—Mayk. 7:​7; Mat. 24:​13.

8. If wi na pɔsin we de peshɛnt, aw wi go trit ɔda pipul dɛn? (Koloshians 3:​12, 13)

⁸ If wi na pɔsin we de peshɛnt, dat go mek wi gɛt gud padi biznɛs wit ɔda pipul dɛn. I go ɛp wi fɔ tek tɛm lisin we ɔda pipul dɛn de tɔk. (Jems 1:​19) We wi de peshɛnt, dat de mek bak wi gɛt pis wit ɔda pipul dɛn. I go mek wi nɔ rɔsh fɔ du tin ɛn tɔk sɔntin we go mek ɔda pipul dɛn fil bad we wi strɛs. Ɛn if wi na pɔsin we de peshɛnt, wi nɔ go de vɛks kwik we sɔmbɔdi tɔk ɔ du sɔntin we mek wi fil bad. Bifo wi tɔn-am-gi, wi go “kɔntinyu fɔ bia [wi] kɔmpin dɛn ɛn fɔgiv dɛn fɔ fri.”—Rid Koloshians 3:​12, 13.

9. If wi na pɔsin we de peshɛnt, aw dat go afɛkt di tin dɛn we wi de disayd fɔ du? (Prɔvabs 21:​5)

⁹ We wi bi pɔsin we de peshɛnt, dat go ɛp wi fɔ disayd fɔ du di rayt tin dɛn. Bifo wi rɔsh ɛn nɔ tink bifo wi du sɔntin, wi go tek tɛm du risach ɛn tink bɔt di bɛst tin we wi go disayd. (Rid Prɔvabs 21:​5.) Fɔ ɛgzampul, sɔntɛm if wi de fɛn wok, wi go want fɔ tek di fɔs wok we wi gɛt pan ɔl we dat go mek wi nɔ atɛnd di mitin dɛn ɔltɛm ɔ go fil savis. Bɔt if wi na pɔsin we de peshɛnt, wi go tek tɛm tink bɔt usay di wok de, aw lɔng wi go tek fɔ rich de, ɛn aw dis wok go afɛkt wi famili ɛn wi padi biznɛs wit Jiova. If wi na pɔsin we de peshɛnt, wi go avɔyd fɔ disayd fɔ du tin dɛn we nɔ rayt.

10. Aw Kristian go gɛt di kwaliti fɔ peshɛnt ɛn kɔntinyu fɔ gɛt am?

¹⁰ Pre fɔ bi pɔsin we de rili peshɛnt. Fɔ bi pɔsin we de peshɛnt na wan pan di kwaliti dɛn we di spirit de gi. (Gal. 5:​22, 23) So wi kin pre fɔ oli spirit ɛn beg Jiova fɔ ɛp wi fɔ gɛt in kwaliti dɛn. If sɔntin tɛst di peshɛnt we wi de peshɛnt, wi fɔ “kɔntinyu fɔ aks” fɔ oli spirit fɔ ɛp wi fɔ bi pɔsin we de peshɛnt. (Lyuk 11:​9, 13) Wi kin beg Jiova bak fɔ ɛp wi fɔ si tin di we aw i de si am. Dɔn afta wi dɔn pre, wi fɔ du ɔl wetin wi ebul fɔ bi pɔsin we de peshɛnt ɛvride. If wi kɔntinyu fɔ pre fɔ gɛt dis kwaliti ɛn tray fɔ sho am, Jiova go ɛp wi fɔ gɛt am ilɛk wi nɔto pɔsin we bin de peshɛnt.

11-12. Aw Jiova dɔn sho se in na pɔsin we de peshɛnt?

 ¹¹ Tink gud gud wan bɔt Baybul ɛgzampul dɛn. Di Baybul gɛt bɔku ɛgzampul dɛn bɔt pipul dɛn we bin de peshɛnt. We wi de tink gud gud wan bɔt dɛn ɛgzampul dɛn ya, wi go si eria dɛn we wi go sho se wi de peshɛnt. Bifo wi tɔk bɔt dɛn ɛgzampul dɛn ya, lɛ wi tɔk bɔt Jiova we na di bɛst ɛgzampul bɔt pɔsin we de peshɛnt.

¹² Setan bin pwɛl Jiova in nem na di gadin we bin de na Idɛn ɛn mek i luk lɛk se Jiova nɔ lɛk wi ɛn i nɔ de rul fia wan. Bifo Jiova dɔnawe wit Setan we na pɔsin we de pwɛl ɔda pɔsin in nem wantɛm wantɛm, i bin peshɛnt ɛn kɔntrol insɛf bikɔs i bin no se i go tek lɔng tɛm fɔ mek i pruv se di we aw I de rul na di bɛst we. Ɛn as i de wet, i dɔn bia we pipul dɛn de tɔk bad tin bɔt in nem. Dɔn bak, Jiova peshɛnt de wet so dat bɔku pipul dɛn go gɛt di chans fɔ gɛt layf we go de sote go. (2 Pit. 3:​9, 15) Dis dɔn mek bɔku bɔku pipul dɛn dɔn kam fɔ no am. If wi pe atɛnshɔn pan di bɛnifit dɛn we wi de gɛt bikɔs Jiova de peshɛnt, dat go mɔs mek i izi fɔ wi fɔ bia wet te di tɛm rich we i go mek di ɛnd kam.

13. Aw Jizɔs bin falamakata di peshɛnt we in Papa de peshɛnt pafɛkt wan? (Luk bak di pikchɔ.)

¹³ Jizɔs bin falamakata in Papa pafɛkt wan fɔ sho se in na pɔsin we de peshɛnt, ɛn i bin sho dis kwaliti we i bin de na di wɔl. Sɔntɛm i nɔ bin izi fɔ am fɔ sho ɔltɛm se in na pɔsin we de peshɛnt, mɔ to di ipokrit Lɔ ticha ɛn Faresi dɛn. (Jɔn 8:​25-27) Bɔt jɔs lɛk in Papa, Jizɔs nɔ bin de vɛks kwik. I nɔ bin tɔn-am-gi we dɛn bin yuz bad wɔd dɛn pan am ɔ provok  am. (1 Pit. 2:​23) Jizɔs bin peshɛnt bia prɔblɛm dɛn ɛn i nɔ bin de kɔmplen. Na dat mek di Baybul tɛl wi fɔ “tink gud wan bɔt di wan we dɔn bia we sina dɛn tɔk bad bɔt”! (Ibru. 12:​2, 3) Wit Jiova in ɛp, wisɛf go ebul fɔ bi pɔsin we de peshɛnt ɛn bia ɛni prɔblɛm we go mit wi.

14. Wetin wi lan frɔm di peshɛnt we Ebraam bin peshɛnt? (Ibruz 6:​15) (Luk bak di pikchɔ.)

¹⁴ Wetin wi go du if di tin dɛn we wi bin de ɛkspɛkt se go apin di tɛm we di wɔl want fɔ dɔn nɔ apin yet? Sɔntɛm wi bin de ɛkspɛkt se di ɛnd fɔ dɔn kam lɔng tɛm bifo dis tɛm. Ɔ sɔntɛm wi de fred se wi nɔ go de alayv fɔ si we di ɛnd go kam. Wetin go ɛp wi fɔ kɔntinyu fɔ peshɛnt wet? Tink bɔt Ebraam in ɛgzampul. We Ebraam bin ol 75 ia ɛn nɔ bin gɛt pikin, Jiova bin prɔmis am se: “A go mek yu jɛnareshɔn bɔku te dɛn bi wanol neshɔn.” (Jɛn. 12:​1-4) Fɔ se Ebraam bin si we da prɔmis de bin kam tru? I nɔ bin si ɔltin. Afta i krɔs di Yufretis Riva ɛn wet fɔ 25 ia, Ebraam bin si we dɛn bɔn in bɔypikin Ayzak bay mirekul ɛn afta 60 ia, i bin si we dɛn bɔn in granpikin dɛn Isɔ ɛn Jekɔb. (Rid Ibruz 6:​15.) Bɔt Ebraam nɔ bin ɛva si we in pikin dɛn bi gret neshɔn ɛn gɛt di land we Gɔd bin dɔn prɔmis. Bɔt da fetful man de bin gɛt tayt padi biznɛs wit di Wan we mek ɔltin. (Jems 2:​23) Ɛn we Ebraam go gɛt layf bak, i go gladi fɔ no se bikɔs i bin peshɛnt ɛn gɛt fet, ɔl di neshɔn dɛn na di wɔl bin gɛt blɛsin! (Jɛn. 22:​18) Wetin na di lɛsin fɔ wi? Sɔntɛm wi nɔ go de fɔ si we ɔl di tin dɛn we Jiova dɔn prɔmis kam tru. Bɔt if wi peshɛnt lɛk Ebraam, wi shɔ  se Jiova go blɛs wi naw ɛn ivin blɛs wi mɔ insay In nyu wɔl we i dɔn prɔmis.—Mak 10:​29, 30.

15. Wetin na sɔm tin dɛn we wi go stɔdi bɔt we wi de du wi pasɔnal stɔdi?

¹⁵ Di Baybul gɛt bɔku ɛgzampul dɛn bɔt pipul dɛn we bin de peshɛnt. (Jems 5:​10) Yu nɔ tink se i go fayn fɔ stɔdi bɔt dɛn ɛgzampul dɛn ya? b Fɔ ɛgzampul, pan ɔl we dɛn bin anɔynt Devid fɔ bi kiŋ na Izrɛl we i bin yɔŋ, i bin nid fɔ wet fɔ lɔng tɛm bifo i bi kiŋ. Simiɔn ɛn Ana bin kɔntinyu fɔ wɔship Jiova fetful wan as dɛn bin de wet fɔ di Mɛsaya we bin gɛt fɔ kam. (Lyuk 2:​25, 36-38) As yu de stɔdi bɔt dɛn ɛgzampul dɛn ya, luk fɔ di ansa dɛn to dɛn kwɛstyɔn dɛn ya: Wetin go dɔn ɛp dis pɔsin fɔ sho se in na pɔsin we de peshɛnt? Aw i bin bɛnifit bikɔs in na pɔsin we de peshɛnt? Aw a kin falamakata am? Sɔntɛm yu go bɛnifit bak we yu lan bɔt pipul dɛn we nɔ bin de peshɛnt. (1 Sam. 13:​8-14) Yu kin aks yusɛf: ‘Wetin bin mek dɛn pipul dɛn ya nɔ bin de peshɛnt? Us bad tin dɛn bin apin to dɛn bikɔs dɛn nɔ bin de peshɛnt?’

16. Wetin na sɔm bɛnifit dɛn we wi go gɛt if wi na pɔsin we de peshɛnt?

¹⁶ Tink bɔt di bɛnifit dɛn we yu go gɛt if yu na pɔsin we de peshɛnt. We wi de peshɛnt, dat go mek wi gladi mɔ ɛn gɛt kolat. If wi na pɔsin we de peshɛnt, dat go mek wi gɛt wɛlbɔdi ɛn tink di rayt we. We wi de peshɛnt wit ɔda pipul dɛn, dat go mek wi gɛt tayt padi biznɛs wit dɛn. Wi kɔngrigeshɔn go gɛt wanwɔd mɔ ɛn mɔ. If pɔsin du tin we fɔ mek wi vɛks ɛn wi nɔ vɛks kwik, wi nɔ go mek di prɔblɛm wɔs. (Sam 37:​8; Prɔv. 14:​29) Bɔt wetin impɔtant pas ɔl na dat, we wi bi pɔsin we de peshɛnt, wi de falamakata wi Papa we de na ɛvin ɛn dat go mek wi kam nia am mɔ ɛn mɔ.

17. Wetin wi fɔ mekɔp wi maynd fɔ du?

¹⁷ Fɔ bi pɔsin we de peshɛnt na fayn kwaliti ɛn i go bɛnifit wi ɔl! Pan ɔl we i nɔ izi fɔ bi pɔsin we de peshɛnt ɔltɛm, Jiova go ɛp wi fɔ kɔntinyu fɔ gɛt dis kwaliti. Ɛn as wi de peshɛnt wet fɔ di nyu wɔl, wi biliv se ‘PAPA GƆD [“Jiova,” NWT] in yay de pan ɔl udat abop pan am; ɛn i de wach dɛn wan we de wet fɔ in lɔv we nɔ de chenj.’ (Sam 33:​18) Lɛ wi ɔl mekɔp wi maynd fɔ kɔntinyu fɔ bi pɔsin we de peshɛnt.