MYUZIK na bin impɔtant pat pan di Izrɛlayt dɛn kɔlchɔ. Insay di Baybul, bɔku say dɛn de we dɛn tɔk bɔt myuzik instrumɛnt dɛn ɛn pipul dɛn we bin de siŋ. Infakt, bɔku buk dɛn na di Baybul na siŋ dɛn. Fɔ ɛgzampul, Sams, Sɔlɔmɔn in Siŋ, ɛn Lamɛnteshɔn. Wan buk we nem Music in Biblical Life tɔk se di Baybul “sho klia wan se di Izrɛlayt dɛn bin de yuz myuzik we dɛn bin de du bɔku tin dɛn.”

Myuzik bin de pat ɔf dɛn layf. Di Izrɛlayt dɛn bin de ple myuzik instrumɛnt dɛn ɛn siŋ fɔ sho aw dɛn de fil. (Ayz. 30:29) Uman dɛn bin de ple tamborin dɛn, siŋ wit gladi-at, ɛn dans we dɛn gɛt program dɛn lɛk we dɛn de mek pɔsin kiŋ, we sojaman dɛn win wɔ, ɛn ɔda fɛstival dɛn fɔ wɔship Jiova. (Jɔj. 11:34; 1 Sam. 18:6, 7; 1 Kiŋ 1:39, 40) Di Izrɛlayt dɛn bin de siŋ bak we pɔsin day fɔ sho se dɛn at pwɛl. (2 Kro. 35:25) McClintock ɛn Strong dɛn Cyclopedia tɔk se “wan dawt nɔ de se di Izrɛlayt dɛn na pipul dɛn we bin rili lɛk myuzik.”

Myuzik na di pales. Di kiŋ dɛn na Izrɛl bin lɛk myuzik. Kiŋ Sɔl bin kɔl Devid fɔ kam na in pales fɔ bi myuzishian. (1 Sam. 16:18, 23) Leta, we Devid insɛf bi kiŋ, i bin mek myuzik instrumɛnt dɛn, rayt fayn siŋ dɛn, ɛn ɔganayz sɔm pipul dɛn we go de ple myuzik na Jiova in tɛmpul. (2 Kro. 7:6; Emɔs 6:5) Kiŋ Sɔlɔmɔn bin gɛt man ɛn uman dɛn we bin de siŋ na in pales.—Ɛkli. 2:8.

Myuzik fɔ wɔship Jiova. Di tɛm we impɔtant pas ɔl we dɛn bin de yuz myuzik na fɔ wɔship Jiova. Infakt, na 4,000 man dɛn bin de ple myuzik instrumɛnt dɛn na di tɛmpul na Jerusɛlɛm. (1 Kro. 23:5) Dɛn bin de ple simbal dɛn, myuzik instrumɛnt dɛn we gɛt string, ap dɛn, ɛn trɔmpɛt dɛn. (2 Kro. 5:12) Bɔt nɔto dɛn man dɛn ya nɔmɔ we sabi bɔt myuzik bin de siŋ fɔ wɔship Jiova. Bɔku Izrɛlayt dɛn bin de siŋ we dɛn bin de go na Jerusɛlɛm fɔ sɛlibret di fɛstival dɛn we dɛn kin gɛt ɛni ia. Dɛn bin de kɔl dɛn siŋ dɛn de, Di Wan dɛn We De Go Ɔp na di Siti, Dɛn Siŋ. (Sam 120-134) Akɔdin to di tin dɛn we di Ju pipul dɛn rayt, di Izrɛlayt dɛn bin de siŋ di Alɛl Sam dɛn a di tɛm we dɛn bin de it di Pasova it.

Myuzik stil impɔtant to Gɔd in pipul dɛn tide. (Jems 5:13) Wi de siŋ fɔ prez Jiova. (Ɛfi. 5:19) Myuzik de mek wi gɛt wanwɔd wit wi kɔmpin Kristian dɛn. (Kol. 3:16) Ɛn i de ɛp wi fɔ bia we wi gɛt prɔblɛm. (Akt 16:25) Wan fayn we we wi go sho se wi lɛk Jiova ɛn gɛt fet pan am na we wi de siŋ fɔ wɔship am.