YOMARA ɛn in brɔda dɛn we nem Masɛlo ɛn Iva de na wan smɔl vilej we nem Gwatemala. Yomara bin stɔdi di Baybul wit Jiova Witnɛs dɛn ɛn leta in brɔda dɛn jɔyn di stɔdi. Bɔt dɛn bin gɛt wan prɔblɛm. Dɛn ɔl tri blayn ɛn dɛn nɔ bin sabi rid brel. So we dɛn bin de stɔdi, na dɛn Baybul ticha de rid di paregraf dɛn ɛn di skripchɔ dɛn we de na di lɛsin fɔ dɛn.

I nɔ bin izi bak fɔ lɛ dɛn atɛnd mitin. Dɛn bin nid fɔ yuz lɛk 40 minit fɔ go na di Kiŋdɔm Ɔl we bin de nia dɛn. Bɔt dɛn nɔ bin ebul fɔ go fɔ dɛnsɛf, so di brɔda ɛn sista dɛn na di kɔngrigeshɔn bin arenj fɔ kɛr dɛn go na ɔl di mitin dɛn. Ɛn we Yomara ɛn in brɔda dɛn bigin gi tɔk na di mitin we wi kin gɛt insay di wik, di brɔda dɛn bin ɛp dɛn fɔ kram wetin dɛn fɔ tɔk.

Insay Me 2019 dɛn bigin ol mitin na dɛn vilej. Bay da tɛm de, wan brɔda ɛn in wɛf we na rɛgyula payɔnia bin dɔn muf kam na di vilej. Dɛn bin mek am dɛn gol fɔ tich Yomara ɛn in brɔda dɛn fɔ rid ɛn rayt brel pan ɔl we dɛnsɛf nɔ bin sabi brel. Dɛn bin go na wan laybri fɔ lan bɔt brel ɛn fɔ stɔdi bɔt aw fɔ tich pipul dɛn we blayn fɔ yuz brel.

Afta tu-tri mɔnt, Yomara ɛn in brɔda dɛn bigin rid brel izi wan ɛn dat bin mek dɛn ebul gɛt tayt padi biznɛs wit Jiova. a Naw Yomara, Masɛlo ɛn Iva na rɛgyula payɔnia dɛn. Ɛn Masɛlo na ministerial savant. Dɛn bizi de du bɔku tin dɛn fɔ sav Jiova ɛvride, ɛn dɛn zil de ɛp ɔda pipul dɛn fɔ gɛt zil bak.

Yomara ɛn in brɔda dɛn rili gladi fɔ di we aw di kɔngrigeshɔn de sho se dɛn lɛk dɛn ɛn dɛn de sɔpɔt dɛn. Yomara tɔk se: “Frɔm di fɔstɛm we wi mit Jiova Witnɛs dɛn, dɛn dɔn sho wi se dɛn gɛt tru tru lɔv.” Masɛlo insɛf tɔk se: “Wi gɛt gud padi dɛn na wi kɔngrigeshɔn ɛn wi gɛt famili ɔlsay na di wɔl we gɛt lɔv ɛn wanwɔd.” Yomara ɛn in brɔda dɛn de rili wet fɔ si aw Jiova go mek di wɔl bi Paradays.—Sam 37:​10, 11; Ayz. 35:​5.