Pipul dɛn kin aks dis kwɛstyɔn bikɔs Jizɔs bin prɔmis da tifman we dɛn nel nia am se i go gɛt layf na Paradays. Jizɔs bin tɛl am se: “Tide, a de tɛl yu fɔ tru se, Yu go de wit mi na Paradays.” (Lyuk 23:43) Mɛmba se Jizɔs nɔ sho usay di Paradays go de. So fɔ se Jizɔs bin min se di tifman go de wit am na ɛvin?

Fɔs, lɛ wi tɔk bɔt di tifman, if i gɛt op fɔ go na ɛvin. Di wan dɛn we go gɛt layf na ɛvin fɔ bi pipul dɛn we dɔn baptayz ɛn gɛt oli spirit pan dɛn. Na dat go mek dɛn bi Gɔd in pikin dɛn ɛn Jizɔs in disaypul dɛn. (Jɔn 3:3, 5) Wan ɔda tin we de mek pɔsin go na ɛvin, na we i du wetin Gɔd want ɛn sho se i gɛt gud kwaliti dɛn, lɛk fɔ du tin stret wan, fɔ tinap tranga wan nɔ fɔ du bad, ɛn fɔ fil sɔri fɔ pipul dɛn. (Fɔs Lɛta Fɔ Kɔrint 6:9-11) Wan ɔda tin bak we go mek pɔsin go na ɛvin na we i fetful to Gɔd ɛn Jizɔs te i day. (Lyuk 22:28-30; Sɛkɔn Lɛta To Timoti 2:12) Na we pɔsin du ɔl dɛn tin ya na in go mek i gɛt layf bak ɛn go de na ɛvin fɔ wok as kiŋ ɛn prist wit Krays fɔ rul mɔtalman fɔ wan tawzin ia.—Rɛvɛleshɔn 20:6.

Di man we bin de nia Jizɔs bin de tif ɛn du ɔda bad bad tin dɛn, ɛn i kɔntinyu fɔ du dat te i day. (Lyuk 23:32, 39-41) Na tru se i sho se i gɛt rɛspɛkt we i tɛl Jizɔs se: “Mɛmba mi we yu go na yu Kiŋdɔm.” (Lyuk 23:42) Bɔt pan ɔl dat, di man nɔ bin dɔn baptayz yet ɛn in nɔto bin Jizɔs in disaypul. Apat frɔm dat, i nɔ bin liv in layf lɛk fetful pɔsin. Yu tink se i fɔ fayn fɔ mek Jizɔs prɔmis am layf na ɛvin wit in disaypul dɛn we dɔn sho se dɛn rili fetful?—Lɛta Fɔ Rom 2:6, 7.

Fɔ ɛgzampul: If pɔsin beg yu fɔ fɔgiv am bikɔs i dɔn tif yu mɔni, yu go sɔri fɔ am. Bɔt yu go biliv am fɔ du yu biznɛs ɔ fɔ mek i kia fɔ yu famili? Yu nɔ go du dat. Yu go gi da kayn wok de to pɔsin we yu rili biliv. Semweso, di wan dɛn we gɛt fɔ go na ɛvin fɔ sho klia wan se dɛn go du wetin Gɔd want we dɛn go de rul mɔtalman. (Rɛvɛleshɔn 2:10) Pan ɔl we di tifman chenj da shɔt tɛm bifo i day, i nɔ stil pruv se i fit fɔ go na ɛvin.

Bɔku pipul dɛn biliv se Jizɔs bin tɛl di tifman se i go de wit am na ɛvin da sem de de. Bɔt nɔto so i bi, bikɔs Jizɔs nɔ bin go na ɛvin da sem de de. I bin de na di grev fɔ tri dez. (Matyu 12:40; Mak 10:34) Ɛn ivin afta i gɛt layf bak, i bin stil de na di wɔl fɔ 40 dez bifo i go na ɛvin. (Di Apɔsul Dɛn Wok [Akt] 1:3, 9) So di tifman nɔ bin de na ɛvin wit Jizɔs da sem de de.

Us Paradays naw, di tifman bin fɔ go? We i gɛt layf bak, i go de na Paradays na dis wɔl we Jizɔs go rul. (Di Apɔsul Dɛn Wok [Akt] 24:15; Rɛvɛleshɔn 21:3, 4) Fɔ lan mɔ bɔt dis Paradays ɛn wetin Gɔd want, tɔk to ɛniwan pan Jiova Witnɛs dɛn.