Yu tink se i nɔ mek sɛns fɔ biliv se di wan dɛn we dɔn day go gɛt layf bak? Di apɔsul Pɔl nɔ bin tink se i nɔ mek sɛns. Na dat mek i bin rayt se: “If na dis layf nɔmɔ wi abop pan Krays, wi go sɔri pas ɛnibɔdi. Bɔt naw Krays dɔn gɛt layf bak, na in na di fɔs pɔsin we dɔn gɛt layf bak pan ɔl di wan dɛn we dɔn day.” (Fɔs Lɛta Fɔ Kɔrint 15:19, 20) Pɔl bin rili biliv se di wan dɛn we dɔn day go mɔs gɛt layf bak. We Jizɔs bin gɛt layf bak, dat bin mek i biliv mɔ. * (Di Apɔsul Dɛn Wok [Akt] 17:31) Na dat mek Pɔl bin se na Jizɔs “na di fɔs pɔsin we gɛt layf bak.” Dis min se na in na di fɔs pɔsin fɔ gɛt layf bak ɛn liv sote go. If na Jizɔs fɔs bin gɛt layf bak, dat min se ɔda wan dɛn de we go gɛt layf bak.

Ɔda rizin de fɔ mek yu biliv se pipul dɛn go gɛt layf bak. Jiova na Gɔd we de tɔk tru. “Gɔd . . . nɔ de lay.” (Taytɔs 1:2) Jiova nɔ wan de lay, ɛn i nɔ go ɛva lay. Yu tink se i go prɔmis wi se pipul dɛn go gɛt layf bak ɛn ivin du sɔntin fɔ sho wi aw i go du dat, ɛn nɔ mek dɛn prɔmis dɛn de kam tru? I nɔ go du dat!

Wetin mek Jiova dɔn arenj fɔ lɛ pipul dɛn gɛt layf bak tumara bambay? Na bikɔs i lɛk wi. Job bin aks se: “If pɔsin day, i go gɛt layf bak?” Job insɛf bin ansa dis kwɛstyɔn we i se: “A go de wet na di Grev te di tɛm kam we yu go pul mi de. Yu go kɔl, ɛn a go ansa. Yu rili want fɔ si di tin dɛn we yu dɔn mek.” (Job 14:14, 15) Job bin biliv se in Papa we de na ɛvin go rili want fɔ gi am layf bak. Yu tink se Gɔd dɔn chenj? “Mi na Jiova; a nɔ de chenj.” (Malakay 3:6) Gɔd stil want fɔ gi layf bak to di wan dɛn we dɔn day; i want mek dɛn gɛt wɛlbɔdi ɛn i want mek dɛn gladi. Mama ɛn papa dɛn we lɛk dɛn pikin dɛn we dɔn day, kin fil dis sem we. Wan tin we difrɛn na dat Gɔd gɛt pawa fɔ du wetin i want.—Sam 135:6.

 Jiova go yuz in Pikin fɔ mek di wan dɛn we dɛn at pwɛl bikɔs dɛn fambul day, gladi pasmak. Aw Jizɔs fil bɔt dat? Bifo Jizɔs gi Lazarɔs layf bak, i bin si se Lazarɔs in sista dɛn ɛn in padi dɛn bin rili fil am ɛn dat bin mek insɛf “kray.” (Jɔn 11:35) Wan ɔda tɛm, Jizɔs bin mitɔp wan uman na wan tɔŋ we dɛn kɔl Nen. Dis uman ya so in man bin dɔn day ɛn in wangren bɔy pikin sɛf dɔn day. Jizɔs “sɔri fɔ am, ɛn i tɛl am se: ‘Lɛf fɔ kray.’” Wantɛm wantɛm, i bin gi in pikin layf bak. (Lyuk 7:13) So Jizɔs kin rili fil am we pɔsin day ɛn i kin fil am we pɔsin de fil pen bikɔs in fambul day. Jizɔs go rili gladi fɔ du sɔntin we go mek pipul dɛn gladi ɛn lɛf fɔ fil pen!

Yu dɔn ɛva gɛt fambul we dɔn day? Yu go tink se day na prɔblɛm we nɔbɔdi nɔ go ebul fɔ sɔlv. Bɔt nɔto so i bi, bikɔs Gɔd go yuz in Pikin fɔ gi layf bak to pipul dɛn we dɔn day. Mɛmba se Gɔd want fɔ mek yu si we dat go apin. I want lɛ yu de de fɔ ɔg di wan dɛn we yu lɛk. Imajin aw i go tan lɛk fɔ mek una ɔl de togɛda ɛn plan fɔ de sote go, una nɔ go nid fɔ se baybay igen!

Layonɛl, we wi bin dɔn tɔk bɔt bin se: “A bin kam fɔ lan se pipul dɛn go gɛt layf bak. Di fɔs tɛm we a lan bɔt dis, i bin at fɔ mek a biliv ɛn a nɔ bin ivin biliv di pɔsin we tɛl mi bɔt dat. Bɔt a bin stɔdi di Baybul mɔ ɛn a kam fɔ si se na tru! A rili de wet fɔ si mi granpa bak.”

Yu go lɛk fɔ no mɔ? Jiova Witnɛs dɛn go gladi fɔ sho yu na yu yon Baybul wetin mek dɛn biliv se pipul dɛn go gɛt layf bak tumara bambay. *