Sɔnde, Janwari 5, 2014, Saj Jiraldin bin de travul na wan bɔs fɔ go na asɛmbli we Jiova Witnɛs dɛn bin gɛt na Paris, Frans, we i si wan bad bad aksidɛnt. I bin tɔk se “Wan motoka bang wan kɔnkret wɔl we de protɛkt di brij ɛn flay go ɔp, di motoka we bang di brij, kech faya wantɛm wantɛm ɛn i tɔnoba we i fɔdɔm.”

Saj bin dɔn de wok na faya fɔs fɔ 40 ia. Ɛnti in na bin kaptin fɔ di wan dɛn we de ɔt faya, dat bin mek i du sɔntin kwik kwik wan. I bin tɔk se: “Pan ɔl we wi bin de na di ɔda say na di strit, a bin stil tɛl di drayva fɔ stɔp di bɔs, ɛn a rɔn go bak to di motoka we de bɔn.” Saj bin yɛri we pɔsin de ala se “Ɛp mi! Ɛp mi!” I bin tɔk bak se: “Na kot ɛn nɛk tay a bin wɛr, ɛn a nɔ bin gɛt natin fɔ protɛkt misɛf. Bɔt di ala we dɛn bin ala mek a fil se dɛn pipul dɛn ya nid pɔsin fɔ sev dɛn!”

We Saj go rawnd di motoka, i mit wan pasenja we dɔn wik ɛn i ɛp am. Saj se: “I tɛl mi se tu ɔda pipul dɛn stil de na di motoka. Bay dis tɛm, bɔku motoka dɛn bin dɔn stɔp. Bɔt bikɔs di ples bin wam pasmak ɛn faya bin de kech, pipul dɛn nɔ bin ebul fɔ kam nia de.”

Bɔku trɔk drayva dɛn kam wit tin dɛn we dɛn de tek fɔ ɔt faya. Saj tɛl dɛn mek dɛn spre am insay di motoka, dis mek di faya bin ɔt smɔl. Bɔt di drayva bin dɔn fasin ɔnda di motoka. So Saj ɛn ɔda pipul dɛn we bin tinap de es di motoka ɛn pul di drayva kɔmɔt, dɔn dɛn kɛr am go na say we sef.

Saj se: “Da tɛm de, di faya kech big wan!” Bɔt ɔda pasenja bin ɛng in fut de ɔp ɛn in ed de dɔŋ na in sit bɛlt. Wan ɔda man we dɔn kɔmɔt wok we de ɔt faya bin kam, i bin wɛr klos we dɛn de yuz fɔ rayd bayk. Saj se: “A tɛl am se sɔntɛm i lɛf smɔl fɔ mek big big faya kech pan di motoka, so wi bin disayd fɔ ol di man in an ɛn drɛg am kɔmɔt na di motoka, ɛn na dat wi bin du.” I nɔ tu te na de big big faya kech pan di motoka.

We di wan dɛn we de ɔt faya ɛn pipul dɛn we de trit ɔda pipul dɛn we wund, bin kam, dɛn kia fɔ di wan dɛn we wund ɛn ɔt di faya. Dɛn trit Saj bikɔs i wund ɛn in an dɛn bin ros. As i lod pan di bɔs fɔ go na di asɛmbli, bɔku man dɛn bin rɔn go mit am ɛn tɛl am tɛnki.

Saj bin gladi bikɔs i bin de de fɔ ɛp dɛn. I bin tɔk se: “A bin fil se na wok we Jiova, mi Gɔd gi mi fɔ sev dɛn pipul dɛn de dɛn layf. Wetin bin mek a gladi mɔ na dat a bin ebul fɔ ɛp fɔ sev dɛn pipul dɛn de.”