Satide, Mach 1, 2014, 823 pipul dɛn bin gladi fɔ gɛda na Bɛnin Siti na Jiova Witnɛs dɛn Asɛmbli Ɔl fɔ wan impɔtant program insay Nayjiria. Frɔm 1999, we dɛn bin arenj fɔ bil Kiŋdɔm Ɔl dɛn na kɔntri dɛn we nɔ gɛt bɛtɛ mɔni, Jiova Witnɛs dɛn bin dɔn bil, 3,000 Kiŋdɔm Ɔl dɛn na dis kɔntri.

Dɛn bin tɔk smɔl na di mitin bɔt di wok we dɛn bin gɛt fɔ du frɔm 1920 fɔ mek Kiŋdɔm Ɔl dɛn fɔ di Kɔngrigeshɔn dɛn we de na Nayjiria. Fɔs, dɛn bin de yuz ɔda ples dɛn ɛn rɛnt ɔl dɛn fɔ ol mitin. Di fɔs ples we Jiova Witnɛs dɛn bin de yuz fɔ mitin insay 1935 na bin wan ɔl we de na Ilɛsa siti. Insay 1938 ɛn 1990, di kɔngrigeshɔn dɛn bɔku, frɔm 14 to 2,681, ɛn bɔku pan dɛn bin de sɔfa fɔ gɛt ples fɔ gɛt mitin. Na lɛk siks kɔngrigeshɔn dɛn so kin yuz wan Kiŋdɔm Ɔl. Ɔda say dɛn, di wan dɛn we kin atɛnd mitin kin fulɔp di Kiŋdɔm Ɔl so sɔm pan dɛn kin tinap na do ɛn lisin bay di winda. Fɔ sɔmtɛm, bɔku kɔngrigeshɔn dɛn kin stil gɛt mitin na ɔda ples dɛn ɛn na dɛn klasrum dɛn na skul.

Insay 1990 Jiova Witnɛs dɛn Branch ɔfis bigin fɔ sɔpɔt di wok we dɛn bin de du fɔ bil Kiŋdɔm Ɔl dɛn frɔm di mɔni dɛn we dɛn bin de gɛt frɔm di Kiŋdɔm Ɔl dɛn. Frɔm 1997, di Kɔmiti we de fɔ Bil Kiŋdɔm Ɔl dɛn dɔn ɛp 105 kɔngrigeshɔn dɛn fɔ bil ɔ fɔ mek sɔm say dɛn we dɔn pwɛl na dɛn Kiŋdɔm Ɔl dɛn. Insay di ia 1997 to 1999 dɛn bin tek lɛk 7 to 15 dez fɔ bil 13 Kiŋdɔm Ɔl dɛn.

Pan ɔl di bɔku Kiŋdɔm Ɔl dɛn we dɛn bin mek, i stil nɔ bin du fɔ di kayn we aw Jiova Witnɛs dɛn bin de bɔku insay Nayjiria. Insay Epril 1998, di branch ɔfis bin kam fɔ no se na lɛk 1,114 Kiŋdɔm Ɔl dɛn, dɛn bin nid na di kɔntri.

As Brɔda Dɔn Trɔst we na mɛmba fɔ di Branch Kɔmiti na Nayjiria bin de tɔk na di spɛshal mitin we dɛn bin gɛt na Bɛnin Siti, i bin tɛl di ɔdiɛns se “Na bin big big wok! Wi bin wɔnda, ‘Aw wi go dɔn dis wok?’” Frɔm 1999, dɛn bin ansa di kwɛstyɔn bay we dɛn mek Grup dɛn we gɛt siks to et pipul dɛn we de ɛp fɔ bil Kiŋdɔm Ɔl dɛn na di kɔntri. Bikɔs dɛn yuz simpul we fɔ bil, fɔ di pas 14 ia dɛn dɔn ebul fɔ bil lɛk 17 Kiŋdɔm Ɔl dɛn ɛvri mɔnt.

Afta Brɔda Trɔst tɛl di ɔdiɛns tɛnki fɔ wetin dɛn dɔn du, i tɔk bak se dɛn stil gɛt bɔku tin fɔ du. Insay 2013 Jiova Witnɛs dɛn we de na Nayjiria bin gɛt fɔ ad so dat bin mek dɛn pas 8,000. I bin tɔk bak se: “Fɔ mek dɛn go gɛt ples fɔ ɔlman, dɛn nid fɔ bil lɛk 100 Kiŋdɔm Ɔl dɛn ɛvri ia”. Insay 2013 dɛn bin gɛt lɛk 351,000 Witnɛs dɛn we de na lɛk 5,700 kɔngrigeshɔn na Nayjiria.