ပှၤဟံးန့ၢ် ယ့ၣ်ၡူးအတၢ်သိၣ်လိတဖၣ် ဒီးဒုးအိၣ်ထီၣ် “ခရံာ်ဖိ” တၢ်ဘူၣ်တၢ်ဘါအါမး. ဘၣ်ဆၣ် လံာ်စီဆှံတဲဝဲလၢ ခရံာ်ဖိ အမ့ၢ်အတီန့ၣ် အိၣ်ထဲတခါလီၤ. ဘၣ်မနုၤအဃိ ပတဲဒ်အံၤသ့လဲၣ်န့ၣ် ပကကွၢ်သကိး တၢ်ဂ့ၢ်သၢထံၣ်.

1.  ၁. ယ့ၣ်ၡူးတဲဝဲလၢ အတၢ်သိၣ်လိန့ၣ်မ့ၢ် “တၢ်မ့ၢ်တၢ်တီ” ဒီးခရံာ်ဖိလၢပျၢၤတဖၣ်စ့ၢ်ကီး တဲဝဲလၢ အဝဲသ့ၣ် အတၢ်ဘူၣ်တၢ်ဘါန့ၣ်ကဲဝဲ “တၢ်မ့ၢ်တၢ်တီ.” (ယိၤဟၣ် ၈:၃၂; ၂ ပ့းတရူး ၂:၂; ၂ ယိၤဟၣ် ၄; ၃ ယိၤဟၣ် ၃) အဃိ ပသ့ၣ်ညါဘၣ်လၢ ပှၤသ့ၣ်တဖၣ်လၢ အဆီၣ်ထွဲ တၢ်သိၣ်လိလၢ အထီဒါယ့ၣ်ၡူး အတၢ်သိၣ်လိတဖၣ်န့ၣ် တမ့ၢ်ခရံာ်ဖိ အမ့ၢ်အတီဘၣ်.

2.  ၂. လံာ်စီဆှံတဲဝဲလၢ ခရံာ်ဖိတဖၣ်န့ၣ်ကြၢး “တဲတၢ်တမံၤဃီ.” (၁ ကရံၣ်သူး ၁:၁၀) ဘၣ်ဆၣ် ခရံာ်ဖိတၢ်ဘူၣ်တၢ်ဘါ အါဒူၣ်န့ၣ် အတၢ်သိၣ်လိတဖၣ် လီၤဆီလိာ်အသး. အဃိ ခရံာ်ဖိတၢ်ဘူၣ်တၢ်ဘါတဖၣ်အံၤန့ၣ် တမ့ၢ်လၢ အကဘၣ်ခဲလၢာ်ဘၣ်.—၁ ပ့းတရူး ၂:၂၁.

3.  ၃. ယ့ၣ်ၡူးတဲဆိပာ်စၢၤဝဲလၢ ပှၤအါဂၤန့ၣ် ကတဲလီၤအသးလၢ အကဲခရံာ်ဖိဘၣ်ဆၣ် အဝဲသ့ၣ် တမၤပိာ်ထွဲဝဲ ယ့ၣ်ၡူးအတၢ်သိၣ်တၢ်သီဘၣ်. အဃိ ယ့ၣ်ၡူးတတူၢ်လိာ် ပှၤသ့ၣ်တဖၣ်အံၤဘၣ်. (မးသဲ ၇:၂၁-၂၃; လူၤကၣ် ၆:၄၆) ဒီးယ့ၣ်ၡူးတဲဝဲလၢ တၢ်ဘူၣ်တၢ်ဘါ ခိၣ်နၢ်လၢဃုထဲ အနီၢ်ကစၢ်အဘျုး ဒီးတသိၣ်လိတၢ်မ့ၢ်တၢ်တီဘၣ် တဖၣ်န့ၣ် ကလံၣ်န့ၢ်လီန့ၢ်ပှၤအါဂၤ. (မးသဲ ၇:၁၅) ဘၣ်ဆၣ် မ့မ့ၢ်ပှၤအဂၤတနီၤန့ၣ် ကဘၣ်သူၣ်ဘၣ်သးဝဲ ခရံာ်ဖိလၢအကမၣ်တဖၣ် ခီဖျိအဝဲသ့ၣ် အဲၣ်ဒိးနၢ်ဟူဝဲ တၢ်လၢအကနၣ်ဝဲမုာ် ဒီးခရံာ်ဖိကမၣ်တဖၣ် အတၢ်သိၣ်လိ မ့ၢ်တဟဲလၢလံာ်စီဆှံပူၤနာ်က့ အဝဲသ့ၣ် ကနၣ်ဝဲကမုာ်.—၂ တံၤမသ့း ၄:၃, ၄.

 ယ့ၣ်ၡူးဟ့ၣ်တၢ်အဒိလၢ ဘၣ်ဃးဒီး ဘုဒီးနီၣ်န့ၣ် ယ့ၣ်ၡူးအဲၣ်ဒိး တဲဆိပာ်စၢၤဝဲလၢ ခရံာ်ဖိလၢ အကမၣ်တဖၣ် ကဟဲအိၣ်ထီၣ်. (မးသဲ ၁၃:၂၄-၃၀, ၃၆-၄၃) ဒီးတၢ်ဆၢကတီၢ် ကအိၣ်ဝဲဖးယံာ်ညါလၢ ပှၤနီၤဖး ခရံာ်ဖိလၢအမ့ၢ်အတီ ဒီးခရံာ်ဖိလၢအကမၣ်န့ၣ် တဘၣ်ဘၣ်. ဒ်ယ့ၣ်ၡူးတဲဆိပာ်စၢၤဝဲအသိး ဖဲတၢ်မၢဖိတဖၣ် သံဝံၤအလီၢ်ခံ ခရံာ်ဖိလၢ အကမၣ်တဖၣ် ဟဲအိၣ်ထီၣ် ဒီးအါထီၣ်ဝဲ. (မၤတၢ် ၂၀:၂၉, ၃၀) ဒီးအဝဲသ့ၣ် အတၢ်သိၣ်လိန့ၣ် အိၣ်ဝဲအကလုာ်ကလုာ်. ဘၣ်ဆၣ် အဝဲသ့ၣ်ခဲလၢာ်န့ၣ် ကဲဝဲ ပှၤလၢအ “ပာ်တ့ၢ်ကွံာ် တၢ်မ့ၢ်တၢ်တီ” အဃိ အဝဲသ့ၣ်ကဲဝဲ ခရံာ်ဖိလၢအကမၣ်တဖၣ်.—၂ တံၤမသ့း ၂:၁၈.

 ဘၣ်ဆၣ် ယ့ၣ်ၡူးတဲဆိစ့ၢ်ကီးဝဲလၢ လၢခံန့ၣ် ပှၤနီၤဖး ခရံာ်ဖိလၢ အကမၣ် ဒီးခရံာ်ဖိလၢ အမ့ၢ်အတီ ကဘၣ်ဝဲ. ဒီးတၢ်ကဲထီၣ်အသးဒ် ယ့ၣ်ၡူးတဲဝဲအသိး လၢပစိၤ, ဖဲ “တၢ်အစိၤလၢ အလီၢ်ခံကတၢၢ်” အတီၢ်ပူၤလီၤ.—မးသဲ ၁၃:၃၀, ၃၉.