ဘၣ်ဃးဒီးတၢ်ဂ့ၢ်အံၤ နကြၢးသ့ၣ်ညါ တၢ်မနုၤလဲၣ်န့ၣ် တၢ်ကွဲးဖုၣ်အံၤ ကပာ်ဖျါထီၣ်ဝဲ

•  နကဆှၢမဲးစ့း (message) ဆူ မတၤအအိၣ်လဲၣ်

•  နကဆှၢတၢ်ဂ့ၢ်မနုၤလဲၣ်

•  နကဆှၢလၢ အဆၢကတီၢ်ဖဲလဲၣ်

တၢ်ကွဲးဖုၣ်တခါအံၤ ကပာ်ဖျါထီၣ်စ့ၢ်ကီး–

•  တၢ်ဟ့ၣ်ကူၣ်

•  တၢ်သံကွၢ်

ပှၤသးစၢ်အါဂၤထံၣ်ဝဲ တၢ်ဆှၢမဲးစ့းလၢလီတဲစိန့ၣ် မ့ၢ်တၢ်ဆဲးကျိးလိာ်သးလၢ အရ့ဒိၣ်တခါလီၤ. နမိၢ်နပၢ် မ့ၢ်တတြီနၤဘၣ်န့ၣ် နဆဲးကျိးဒီးပှၤလၢနအဲၣ်ဒိး ဆဲးကျိးဒီးအီၤတဖၣ် သ့ခဲလၢာ်လီၤ.

လနီ စံးဝဲလၢ­­- “ယၤဒီး ယဒ့မုၣ် ပဆဲးကျိးလိာ်သးဒီး ပှၤပိာ်ခွါန့ၣ် ယပါတဘၣ်အသးဘၣ်. အဝဲတဲဝဲလၢ ပမ့ၢ်အဲၣ်ဒိးတဲတၢ်န့ၣ် ပကဘၣ်တဲအီၤလၢ လီတဲစိလၢ ပှၤပာ်အီၤဖဲ တမှံၤဒၢးန့ၣ်လီၤ.”

တၢ်လၢနကြၢးသ့ၣ်ညါ– နမ့ၢ်ဟ့ၣ်ပှၤကိးဂၤဒဲးလၢ နလီတဲစိအနီၣ်ဂံၢ်န့ၣ် ဘၣ်သ့ၣ်သ့ၣ် နကဘၣ်ကီဘၣ်ခဲလီၤ.

စကီး စံးဝဲလၢ­- “နမ့ၢ်ဟးဟ့ၣ်ကြီ ပှၤဂၤနလီတဲစိအနီၣ်ဂံၢ်န့ၣ် ဘၣ်သ့ၣ်သ့ၣ် နကဒိးန့ၢ်ဘၣ် မဲးစ့း ဒီးတၢ်ဂီၤလၢ နတအဲၣ်ဒိးဘၣ်လီၤ.”

စတံၤဘ့ၣ်­ စံးဝဲလၢ­- “ပိာ်မုၣ်ဒီးပိာ်ခွါ မ့ၢ်ဆှၢလိာ်အသး မဲးစ့းထီဘိန့ၣ် တယံာ်ဘၣ်ဒီးအဝဲသ့ၣ် အသးကအိၣ်လိာ်အသးလီၤ”

လံာ်စီဆှံစံးဝဲ– “ပှၤကူၣ်တၢ်ဘၣ်န့ၣ်, ထံၣ်ဘၣ်တၢ်အၢ, ဒီးပာ်တဒၢအသးလီၤ” (ကတိၤဒိ ၂၂:၃) ပမ့ၢ်အိၣ်ဒီးတၢ်ပလီၢ်သးန့ၣ် ပဟးဆှဲးတၢ်လၢ အလီၤသးအုးတဖၣ် ကသ့လီၤ.

တၢ်ဂ့ၢ်နီၢ်ကီၢ်– မလံဒၤ စံးဝဲလၢ- “ယအိၣ်ဒီးတံၤသကိး ပိာ်ခွါတဂၤ ဒီးယဆှၢမဲးစ့းဆူ အအိၣ်ဆူၣ်မး. ပမ့ၢ်တံၤသကိးအဃိ ပဆှၢလိာ်သးမဲးစ့းန့ၣ် ယဆိကမိၣ်လၢ တၢ်ကီတၢ်ခဲတအိၣ်ဘၣ်. တချုးလၢအဝဲတဲယၤလၢ အအဲၣ်ယၤဒံးဘၣ်န့ၣ် ယဆိကမိၣ်လၢ တဘၣ်တၢ်နီတမံၤဘၣ်. ယမ့ၢ်ဆိမိၣ်ကဒါက့ၤ တၢ်မၤအသးတဖၣ်န့ၣ် ယတကြၢးသူတၢ်ဆၢကတီၢ် ဒီးဆှၢန့ၢ်အီၤမဲးစ့းထဲထဲန့ၣ်ဘၣ်. ”

ဆိကမိၣ်ကွၢ်တက့ၢ်– တၢ်မၤအသး ဒ်အံၤဝံၤအလီၢ်ခံ မလံဒၤ ဒီးအတံၤသကိး အတၢ်ရ့လိာ်သး ကအိၣ်ဒ်လဲၣ်.

ကွဲးလီၤနတၢ်ထံၣ်– မလံဒၤ ဒီးအတံၤသကိး အဝဲသ့ၣ်ခံဂၤလၢာ် မ့ၢ်အဲၣ်ဒိးရ့လိာ်အသးဒ် တံၤသကိးယိယိဖိန့ၣ် အဝဲကြၢးမၤဝဲဒ်လဲၣ်.

ပမ့ၢ်ဆှၢမဲးစ့းလၢ လီတဲစိန့ၣ် ပဆှၢဘၣ်အီၤညီဒီး ပဖးဘၣ်အီၤမုာ်ဒိၣ်မးလီၤ. ဘၣ်ဆၣ်တၢ်လၢ နကွဲးအီၤတဖၣ်န့ၣ် ပှၤနၢ်ပၢၢ်ကမၣ်အီၤ ညီဒိၣ်မးလီၤ.

တၢ်လၢနကြၢးသ့ၣ်ညါ– တၢ်ကတိၤလၢ နဆှၢအီၤလၢ လီတဲစိန့ၣ် ပှၤနၢ်ပၢၢ်ကမၣ်ဝဲသ့လီၤ.

ဘြံၤယဲနၤ စံးဝဲလၢ- “နမ့ၢ်ဆှၢမဲးစ့းလၢ လီတဲစိန့ၣ် ပှၤတသ့ၣ်ညါ နတၢ်တူၢ်ဘၣ်ဒီး တနၢ်ဟူနကလုၢ်ဘၣ်, နမ့ၢ်ဆှၢဃုာ်ဒီး တၢ်ပနီၣ်ဒၣ်လဲာ် ပှၤတသ့ၣ်ညါဘၣ်. ပှၤနၢ်ပၢၢ် ကမၣ်အီၤသ့လီၤ.”

လီရၤ စံးဝဲလၢ- “ပှၤပိာ်မုၣ်ဖိတနီၤနီၤ အဝဲသ့ၣ်ဆှၢမဲးစ့းဆူ ပှၤပိာ်ခွါအအိၣ်အဃိ အမံၤဟးဂီၤဝဲ. ဒီးအမံၤဟူထီၣ်လၢ ဂဲၤလိာ်ကွဲတၢ်အဲၣ်လီၤ.”

လံာ်စီဆှံစံးဝဲ– “ပှၤတီပှၤလိၤဆိကမိၣ်တၢ် ဒ်သိးအကစံးဆၢတၢ်လီၤ.” (ကတိၤဒိ ၁၅:၂၈) ပန့ၢ်ဘၣ်တၢ်မၤလိလၢ တချုးပဆှၢလံာ်ဒံးဘၣ်န့ၣ် ပကြၢးကွၢ်ကဒါက့ၤလံာ်ကျိၤလီၤ.

တချုးလၢနဆှၢမဲးစ့းလၢ လီတဲစိဒံးဘၣ်န့ၣ် ဆၢတဲာ်ဆိပာ်နသး တၢ်လၢနကြၢးမၤဒီး တၢ်လၢနတကြၢးမၤဘၣ်န့ၣ်တက့ၢ်.

တၢ်လၢနကြၢးသ့ၣ်ညါ– ဖဲနဆှၢမဲးစ့းလၢ လီတဲစိအခါ နမ့ၢ်တပလီၢ်နသးဘၣ်န့ၣ် ပှၤကဆိကမိၣ် ကမၣ်နၤလၢ နတအိၣ်ဒီးတၢ်ပာ်ကဲဘၣ်လီၤ. ဒီးပှၤကထံၣ်နၤဒ် ပှၤလၢအတလီၤရ့ဘၣ်လီၤ.

အဲလဲစၢၤ စံးဝဲလၢ- “နကကဲထီၣ်ပှၤလၢ အတအိၣ်ဒီးတၢ်ပာ်ကဲသ့. အဒိ ဖဲယကတိၤတၢ်ဒီး ပှၤတဂၤဂၤအခါ မ့တမ့ၢ် ဖဲယအီၣ်ဟါတၢ်အီၣ်အခါ ယဆှၢညီနုၢ်မဲးစ့းအဃိ ယဘၣ်ပလီၢ်ယသးဒိၣ်မး.”

အဲ(န်) စံးဝဲလၢ- “ပနီၣ်ကါတခီခီ ဒီးပမ့ၢ်ဆှၢမဲးစ့းတခီခီန့ၣ် လီၤဘၣ်ယိၣ်ဒိၣ်မး. ဖဲပသးစၢၢ်ဆၢလၢ လီတဲစိအခါ တၢ်ဘၣ်ဒိဘၣ်ထံး ကဲထီၣ်ဝဲသ့လီၤ.”

လံာ်စီဆှံစံးဝဲ– “တၢ်အခ့အခါအိၣ်ဝဲလၢ ကယဲၢ်တၢ်တမံၤလၢ်လၢ်အဂီၢ်, . . . အကတီၢ်လၢ ပှၤကအိၣ်ဘှီၣ်ကလာ်အဂီၢ်, ဒီးအကတီၢ်လၢ ပှၤကကတိၤတၢ်အဂီၢ်” အိၣ်ဝဲလီၤ. (စံၣ်တဲၤတဲလီၤတၢ် ၃:၁, ၇) လံာ်စီဆှံတဆၢအံၤ ဘၣ်ထွဲလိာ်အသးဒီး တၢ်ကတိၤတကးဘၣ် ဘၣ်ထွဲစ့ၢ်ကီးဒီး တၢ်ဆှၢမဲးစ့းလၢ လီတဲစိလီၤ.

နကဆှၢမဲးစ့းဆူမတၤအအိၣ်လဲၣ်

• ;-)ဒိကနၣ်နမိၢ်နပၢ် အတၢ်ဟံးစုနဲၣ်ကျဲတက့ၢ်.—ကလီးစဲ ၃:၂၀.

• ;-)နလီတဲစိ အနီၣ်ဂံၢ်န့ၣ် တဘၣ်ဟ့ၣ်ပှၤကိးဂၤဒဲးတဂ့ၤ. ဖဲပှၤဃ့နလီတဲစိ အနီၣ်ဂံၢ် ဒီးနနီၢ်ကစၢ် အတၢ်ဂ့ၢ်တၢ်ကျိၤအခါ နဂ့ၢ်လိာ်ကွံာ်အီၤ မ့ၢ်သ့န့ၣ် ခါဆူညါတၢ်အံၤကကဲဘျုးလၢ နဂီၢ်လီၤ.

• ;-) တၢ်ကတိၤလၢ ကကဲထီၣ်တၢ်ဂဲၤလိာ်ကွဲ တၢ်အဲၣ်န့ၣ် တဘၣ်ဆှၢအီၤတဂ့ၤ. တၢ်အဲၣ်တၢ်ကွံ မ့ၢ်ဟဲအိၣ်ထီၣ်လၢ နသးပူၤန့ၣ်နကတူၢ်ဘၣ် တၢ်သးဘၣ်တံာ်တာ်ဒီး တၢ်ကီတၢ်ခဲလီၤ.

ဘြံၤယဲနၤ စံးဝဲလၢ- “ယသူလီတဲစိ ဒ်လဲၣ်ဒ်လဲၣ်န့ၣ် ယမိၢ်ယပၢ်သ့ၣ်ညါဝဲဂ့ၤဂ့ၤလီၤ. လၢတၢ်နၣ်အဃိ အဝဲသ့ၣ်နာ်ယၤ ဒီးပှၤလၢယဆဲးကျိးဒီးအီၤတဖၣ်လီၤ.”

နကဆှၢတၢ်ဂ့ၢ်မနုၤလဲၣ်

• ;-)တချုးနကွဲးလံာ်ဒံးဘၣ်န့ၣ် သံကွၢ်လီၤနသးဒ်အံၤ– ‘ယမ့ၢ်ကွဲးလံာ်ဒ်အံၤန့ၣ် ဘၣ်ကကြၢးဧါ.’ တၢ်ဂ့ၢ်တနီၤနီၤန့ၣ် ပမ့ၢ်တဲအီၤလၢ လီတဲစိ မ့တမ့ၢ် ပမ့ၢ်အိၣ်ခိးတုၤလၢ ပထံၣ်လိာ်သးလၢ ပနီၢ်ကစၢ်ဒီးတဲအီၤန့ၣ် ကဂ့ၤဝဲလီၤ.

• ;-)ဖဲနထံၣ်လိာ်နသးအခါ တၢ်ကတိၤလၢနမ့ၢ်တတဲအီၤဘၣ်န့ၣ် တဘၣ်ကွဲးလၢလံာ်တဂ့ၤ. စဲရၤ လၢအသးအိၣ် ၂၃ နံၣ်တဂၤတဲဝဲလၢ– “တၢ်ကတိၤလၢ နတဲအီၤလၢ နကိာ်ပူၤမ့ၢ်တဘူၣ်ဘၣ်န့ၣ် နတကြၢးဆှၢလၢ မဲးစ့းစ့ၢ်ကီးဘၣ်.”

စဘဲ စံးဝဲလၢ- “ပှၤတဂၤဂၤမ့ၢ်ဆှၢန့ၢ်နၤ တၢ်ဂီၤလၢအတကြၢးတဘၣ်ဘၣ်န့ၣ် တဲဘၣ်နမိၢ်နပၢ်တက့ၢ်. နမ့ၢ်မၤဒ်န့ၣ်န့ၣ် နကဒိးန့ၢ်ဘၣ်တၢ်ဒီသဒၢ ဒီးနမိၢ်နပၢ်စ့ၢ်ကီး ကနာ်န့ၢ်နၤလီၤ.”

နကဆှၢလၢ အဆၢကတီၢ်ဖဲလဲၣ်

• ;-)နကသူလီတဲစိလၢ ဆၢကတီၢ်ဖဲလဲၣ် ဒီးနတသူအီၤလၢ ဆၢကတီၢ်ဖဲလဲၣ်န့ၣ် ဆၢတဲာ်ပာ်နသးတက့ၢ်. ပိာ်မုၣ်ဖိလၢ အမံၤမ့ၢ် အီၣ်လံဘံယါ တဲဝဲလၢ– “ဖဲယအီၣ်မ့ၤအခါ, ယဖးကၠိအလံာ်အခါ, ယမၤနီၢ်ကစၢ် တၢ်မၤလိလံာ်စီဆှံအခါ ယဘၣ်ယိၣ်လၢ ယကသူဘၣ်လီတဲစိအဃိ ယတပာ်အီၤလၢ ယကပၤဘၣ်. ဖဲယထီၣ်တၢ်အိၣ်ဖှိၣ်အခါ ယဘၣ်ယိၣ်လၢ ယကသူဘၣ်အီၤအဃိ ယပံးတံာ်ဃာ်အီၤလီၤ.”

• ;-) အိၣ်ဒီးတၢ်ဒိသူၣ်ဒိသး. (ဖံလံးပံၤ ၂:၄) ဖဲနကတိၤတၢ်ဒီး ပှၤတဂၤဂၤအခါ တဘၣ်ဆှၢမဲးစ့းတဂ့ၤ.

ကၠဲနလံၤ စံးဝဲလၢ- “မ့တမ့ၢ်တၢ်ဂ့ၢ်လၢ အရ့ဒိၣ်ဘၣ်န့ၣ် ယပာ်လီၤယသးလၢ ယတဆှၢမဲးစ့းဘၣ်. ဒီးယပာ်လီၤယသးလၢ ယတဟ့ၣ် ယလီတဲစိ အနီၣ်ဂံၢ်လၢ ပှၤလၢယတသ့ၣ်ညါအီၤ ဂ့ၤဂ့ၤတဖၣ်စ့ၢ်ကီးဘၣ်.”