ထံကီၢ်ခိၣ်နၢ်တဖၣ် ဟ့ၣ်ပလီၢ်ဝဲလၢ တယံာ်ဘၣ်န့ၣ် အၢ်မက့းဒိၣ် ကဘၣ်ဝဲ. အဝဲသ့ၣ် ဟ့ၣ်ပလီၢ်တၢ်ဝံၤ တယံာ်ဘၣ်ဒီး ဖဲမုၢ်တနံၤဂီၤခီ, လါအီးကထိဘၢၣ် ၁၀, ၂၀၂၂ န့ၣ် ရၢၡါ မၤပိၢ်ထီၣ်ဝဲ မ့ၣ်ပိၢ်လၢ ယူၣ်ခြ့အဝ့ၢ်တဖၣ်အပူၤ, မ့ၢ်လၢ လၢအပူၤကွံာ်ခံသီန့ၣ် ယူၣ်ခြ့မၤဟးဂီၤဝဲ တိၤလၢအအိၣ်လၢ ခရံမံယါ ဒီးရၢၡါ အဘၢၣ်စၢၤ

•    ဖဲလါအီးကထိဘၢၣ် ၆ သီ, ၂၀၂၂ န့ၣ်အမဲရကၤကီၢ်ခိၣ် ကၠိ ဘါဒ့ၤ တဲဝဲလၢ “စးထီၣ်လၢ [အမဲရကၤ ကီၢ်ခိၣ် ကၠီ အဲၣ်] ခဲနဒံၤ ဒီးကၠူဘး ဒုးတၢ်လၢမ့ၣ်ပိၢ် ဝံၤအလီၢ်ခံ တၢ်ကဲထီၣ်အသး တဘျီညါအံၤန့ၣ် အကဲတၢ်အဆိကတၢၢ်တဘျီလၢ ပတူၢ်ဘၣ်ကဒီးလၢ အၢ်မက့းဒိၣ်ဘူးထီၣ်. ပှၤမ့ၢ်သူ နၠူခလံယါ တၢ်စုကဝဲၤလၢတၢ်ဒုးပူၤဒု အၢ်မက့းဒိၣ် ကကဲထီၣ်ဝဲ သပှၢ်ကတၢၢ်.”

•   ဖဲလါအီးကထိဘၢၣ် ၈ သီ, ၂၀၂၂ န့ၣ် BBC တၢ်ကစီၣ် သံကွၢ်ဝဲ ယူၣ်ခြ့အကီၢ်ခိၣ် ဘလီၤဒမံၤ စလဲစခံၤ ဘၣ်ဃးဒီး ပှၤသူနၠူခလံယါ တၢ်စုကဝဲၤအဃိ တၢ်ကကဲထီၣ်အသးဒ်လဲၣ်အခါ အဝဲတဲဝဲလၢ “ယနာ်လၢ အၢ်မက့းဒိၣ် ကဘၣ်ဘူးထီၣ်လံ. တၢ်လီၤဘၣ်ယိၣ် အိၣ်ဝဲလၢ ဟီၣ်ခိၣ်ဒီဘ့ၣ်အဂီၢ်လံ.”

 အၢ်မက့းဒိၣ် ကကဲထီၣ်ဝဲ ခီဖျိလၢ နၠူခလံယါ တၢ်စုကဝဲၤတဖၣ်အဃိဧါ. ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံ တဲဝဲဒ်လဲၣ်.

 တမ့ၢ်ဘၣ်. လၢလံာ်စီဆှံပူၤ တၢ်ကတိၤလၢအမ့ၢ် “အၢ်မက့းဒိၣ်” န့ၣ်ပထံၣ်ဘၣ်အီၤ ထဲတဘျီလၢ လီၣ်ဖျါ ၁၆:၁၆ အပူၤ. ဒီးအတအဲၣ်ဒိးတဲဝဲ တၢ်ဒုးလၢ ထံကီၢ်တဘ့ၣ်ဒီးတဘ့ၣ် အဘၢၣ်စၢၤဘၣ်. အဲၣ်ဒိးတဲဝဲ ကစၢ်ယွၤ ဒီး “စီၤပၤတဖၣ်လၢ အအိၣ်လၢဟီၣ်ခိၣ်ဒီဘ့ၣ်” အတၢ်ဒုး. (လီၣ်ဖျါ ၁၆:၁၄) ဖဲအၢ်မက့းဒိၣ်တၢ်ဒုးန့ၣ် ကစၢ်ယွၤ ကမၤကတၢၢ်ကွံာ် ဟီၣ်ခိၣ်အတၢ်ပၢတၢ်ပြးခဲလၢာ်.—ဒၤနံးယ့လး ၂:၄၄.

 နမ့ၢ်အဲၣ်ဒိးသ့ၣ်ညါအါထီၣ် ဘၣ်ဃးဒီး အၢ်မက့းဒိၣ် တၢ်ဒုးအဃိ တၢ်ကကဲထီၣ်အသးလၢဟီၣ်ခိၣ် ဒ်လဲၣ်န့ၣ် ဖးကွၢ်တၢ်ဂ့ၢ် လၢအမ့ၢ်အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်

 တမၤဟးဂီၤဘၣ်. ခါဆူညါန့ၣ် ဟီၣ်ခိၣ်ပဒိၣ်ပပှၢ်တဖၣ် မ့ၢ်သူဝဲ နၠူခလံယါ တၢ်စုကဝဲၤသနာ်က့ ကစၢ်ယွၤ တပျဲလၢ အဝဲသ့ၣ်​ ကမၤဟးဂီၤဟီၣ်ခိၣ်ဘၣ်. လံာ်စီဆှံတဲဝဲလၢ–

•   “ဟီၣ်ခိၣ်န့ၣ် အိၣ်ဂၢၢ်ဆိးကျၢၤဝဲ လီၤထူလီၤယိာ်လီၤ.”—စံၣ်တဲၤတဲလီၤတၢ် ၁:၄.

•   “ပှၤတီပှၤလိၤ ကန့ၢ်သါဘၣ် ဟီၣ်ခိၣ်ဒီးအဝဲသ့ၣ် ကအိၣ်ဘၣ်ဝဲလၢ ဟီၣ်ခိၣ်ချၢ လီၤထူလီၤယိာ်လီၤ.”—စံးထီၣ်ပတြၢၤ ၃၇:၂၉.

 ဝံအတၢ်စံးပာ် လၢလံာ်စီဆှံပူၤ ဒီးတၢ်မၤအသးလၢ ပစိၤခဲအံၤန့ၣ် ပာ်ဖျါထီၣ်ဝဲလၢ တၢ်ဆီတလဲဖးဒိၣ် ကအိၣ်ထီၣ်လၢ ပှၤဟီၣ်ခိၣ်ဖိတဖၣ်အဂီၢ် ဘူးထီၣ်လံ. (မးသဲ ၂၄:၃-၇; ၂ တံၤမသ့း ၃:၁-၅) လံာ်စီဆှံတဲဝဲ ဘၣ်ဃးဒီး ခါဆူညါ တၢ်ကမၤအသးဒ်လဲၣ်န့ၣ် နကသ့ၣ်ညါအါထီၣ်အဂီၢ် မၤလိလံာ်စီဆှံလၢ တလိၣ်ဟ့ၣ်အပှ့ၤဘၣ်.