ဖလံစၤ– ယဒိၣ်ထီၣ်လၢ ကီၢ်စပ့ၣ်ဒီး ယဟံၣ်ဖိဃီဖိစ့ၢ်ကီး အတၢ်တအိၣ်တယၢၤဘၣ်. ယဟံၣ်ဖိဃီဖိ မ့ၢ်ပှၤခဲးသလ့းဖိဒီး ပသးဆူၣ်လၢ တၢ်ဘူၣ်တၢ်ဘါတကပၤလီၤ. ယဘူးယတံၢ် ၁၃ ဂၤန့ၣ် မ့ၢ်ခဲးသလ့းအတၢ်ဘူၣ်တၢ်ဘါခိၣ်နၢ်တဖၣ် မ့တမ့ၢ် မၤတၢ်လၢ သရိာ်အပူၤလီၤ. ယမိၢ်အတခွါမ့ၢ် ခဲးသလ့းအစီၤသီဒီး သိၣ်လိတၢ်လၢ ခဲးသလ့းအကၠိလီၤ. ဖဲအဝဲသံအခါန့ၣ် ပၤပၤ ကၠီၣ်ဖီ ခံဂၤတဂၤ (Pope John Paul II) ဟဲမၤလၤကပီၤအီၤလီၤ. ယပၢ်မၤစၢၢ်ထးအတၢ်မၤ, မ့မ့ၢ်ယမိၢ်န့ၣ်မ့ၢ် ပှၤမၤစံာ်ဖိလီၤ. ပဒီပုၢ်ဝဲၢ်အိၣ်ဝဲ ၈ ဂၤဒီး ယမ့ၢ်ပှၤဝဲၢ်ကိလီၤ.

ဖဲယအိၣ် ၁၂ နံၣ်အခါ တၢ်ဒုးကဲထီၣ်လၢ စပ့ၣ်အကီၢ်ပူၤလီၤ. တၢ်ဒုးဝံၤအလီၢ်ခံ ယပၢ်ဘၣ်လဲၤလီၤဆူဃိာ်ပူၤ မ့ၢ်လၢအတၢ်ထံၣ်တလီၤပလိာ်လိာ်အသးဒီး ပဒိၣ်အဃိလီၤ. ယပၢ်တအိၣ်အဃိ ယမိဘၣ်လုၢ်အီၣ်လုၢ်အီ ပဒီပုၢ်ဝဲၢ်တဖၣ် နးနးကျံၤကျံၤလီၤ. အဃိ အဝဲဆှၢလီၤ ယဒ့မုၣ် ၃ ဂၤလၢအမံၤမ့ၢ် အရၣ်စံလံး, လီရံၣ်ဒီး ရၣ်မိနံၣ်လၢ ကလဲၤအိၣ်လၢ ဝ့ၢ်ဘ့ဘါအိၤလၢ ဖံဝါအကၠိလီၤ. ဖဲန့ၣ်န့ၣ် ယဒ့မုၢ်တဖၣ်အံၤကအီၣ်ဘၣ် အီဘၣ်လၢလၢပှဲၤပှဲၤလီၤ.

အရၣ်စံလံး– ဖဲန့ၣ်အခါ ယသးအိၣ် ၁၄ နံၣ်, လီရံၣ်အိၣ်ဝဲ ၁၂ နံၣ်ဒီး ရၣ်မိနံၣ်အိၣ်ဝဲအနံၣ် ၁၀ လီၤ. ပအိၣ်ဖဲန့ၣ်အခါ ပသ့ၣ်နီၣ်ဘၣ် ပဟံၣ်ဖိဃီဖိဒိၣ်မးလီၤ. လၢခဲးသလ့းအကၠိန့ၣ် ပဘၣ်မၤကဆှီတၢ်လီၤ. ခံနံၣ်ဝံၤအလီၢ်ခံ ဖံဝါဆှၢပှၤဆူ ကၠိအဂၤတဖျၢၣ်လၢ အကွၢ်ထွဲပှၤသးပှၢ်လၢအိၣ်ဖဲ ဝ့ၢ်စၣ်ရၣ်ကိစၣ်အပူၤန့ၣ်လီၤ. ဖဲန့ၣ်ပဘၣ်မၤကဆှဲကဆှီ ဖၣ်ကပူၤဒီး ပလီၤဘှံးလီၤတီၤဒိၣ်မးလီၤ.

ဖလံစၤစံးဝဲလၢ– ဖဲယဒ့မုၣ်တဖၣ်လဲၤအိၣ်လၢ ဖံဝါအကၠိဖဲ စၣ်ရၣ်ကိစၣ်အခါ ယမိၢ်ဒီးယဖါတံၢ်လၢအမ့ၢ် ခဲးသလ့းအတၢ်အိၣ်ဖှိၣ်သရၣ်လၢ ပလီၢ်ကဝီၤပူၤတဂၤ အဲၣ်ဒိးဆှၢယၤဖဲန့ၣ်စ့ၢ်ကီးလီၤ. အဝဲသ့ၣ်အဲၣ်ဒိး ထုးယံၤယၤဒီး ပိာ်ခွါလၢအကွၢ်ဂ့ၤယၤတဂၤလီၤ. ယအဲၣ်ဒိး လဲၤအိၣ်ဖဲန့ၣ် မ့ၢ်လၢယအဲၣ်ယွၤအဃိလီၤ. ယလဲၤထီၣ်သရိာ်ကိးနံၤဒဲးဒီး ယအဲၣ်ဒိးကဲထီၣ် မံးၡၢၣ်နရံၣ်ဒ်ယတခွါလၢ ကီၢ်အၤဖြံၤကၤတဂၤအသိးန့ၣ်လီၤ.

ဘၣ်ဆၣ်လၢ ဖံဝါအကၠိန့ၣ် ယတူၢ်ဘၣ်လၢ တၢ်လၢယအဲၣ်ဒိးမၤတဖၣ်န့ၣ် ယမၤတန့ၢ်ဘၣ်. ဖံဝါတဖၣ်တဆီၣ်ထွဲစ့ၢ်ကီးယၤလၢ ယကလဲၤမၤတၢ်လၢ ထံကီၢ်အဂၤ ဒ်ယဆၢမုၢ်လၢ်အသိးန့ၣ်ဘၣ်. လၢတၢ်န့ၣ်အဃိ ပူၤကွံာ်တနံၣ်ဝံၤအလီၢ်ခံ ယက့ၤဆူယဟံၣ်ဒီး ယကွၢ်ထွဲယဖါတံၢ်လၢ အမ့ၢ်ခဲးသလ့းတၢ်အိၣ်ဖှိၣ်သရၣ်တဂၤလီၤ. ယမၤန့ၢ်အီၤ ဟံၣ်အတၢ်မၤဒီးကိးနၤဒဲး ပဃ့ဘါထုကဖၣ်တၢ် တပူၤဃီလီၤ. ယကတဲာ်ကတီၤ ဖီလၢသရိာ်အဂီၢ်ဒီး ယဒုးကူဒုးကၤ နီၢ်မၤရံဒီး “ပှၤစီဆှံတဖၣ်” အဂီၤလီၤ.

အရၣ်စံလံး– ဖဲယအိၣ်လၢ စၣ်ရၣ်ကိစၣ်အခါ ယမၤတၢ်အၢၣ်လီၤအီလီၤ အဆိကတၢၢ်လၢ ယအဲၣ်ဒိးကဲထီၣ် ဖံဝါလီၤ. လၢခံဖံဝါတဖၣ် ဆၢတဲာ်ဝဲလၢ ကဒုးအိၣ်ဖးယၤဒီး ယဒီပုၢ်ဝဲၢ်မုၣ်တဖၣ်လီၤ. လၢတၢ်န့ၣ်အဃိ အဝဲသ့ၣ်ဆှၢယၤဆူ မၣ်ဒရံး ဖံဝါအကၠိ, မ့မ့ၢ် လီရံၣ်န့ၣ် ဆှၢဝဲဆူ ဘၣ်လဲစံၣ်ယၣ် ဖံဝါအကၠိ ဒီးရၣ်မိနံၣ်တခီန့ၣ် အိၣ်တ့ၢ်ဖဲ စၣ်ရၣ်ကိစၣ်လီၤ. ဖဲမၣ်ဒရံး ဖံဝါအကၠိန့ၣ် ယမၤတၢ်အၢၣ်လီၤအီလီၤ ခံဘျီတဘျီ လၢယကကဲဖံဝါတဂၤလီၤ. ပှၤကၠိဖိဒီး ပှၤသးပှၢ်တဖၣ် ဟဲအိၣ်ဝဲဖဲန့ၣ်လီၤ. လၢတၢ်န့ၣ်အဃိ တၢ်မၤအိၣ်ဝဲအါမးလီၤ. မ့မ့ၢ်ယၤန့ၣ် ယမၤတၢ်လၢ ဖံဝါအတၢ်ဆါဟံၣ်လီၤ.

ယအဲၣ်ဒိးကဲထီၣ် ဖံဝါတဂၤလီၤ. ယဆိကမိၣ်လၢ ယကသူဘၣ်တၢ်ဆၢကတီၢ်အါအါလၢ တၢ်ဖးလံာ်စီဆှံဒီး တၢ်မၤလိလံာ်စီဆှံအဂီၢ်လီၤ. ဘၣ်ဆၣ် ယသးဘၣ်ဒိဒိၣ်မး မ့ၢ်လၢပှၤတသူလံာ်စီဆှံဘၣ် ဒီး ပှၤတတဲကစၢ်ယွၤ ဒီးယ့ၣ်ၡူးအဂ့ၢ်နီတဂၤဘၣ်. ယမၤလိလဲးတ့ၣ်အကျိာ် တစဲးဒီးဃုသ့ၣ်ညါ ခဲးသလ့းအ “ပှၤစီဆှံ” အတၢ်အိၣ်မူအဂ့ၢ်ဒီး ယဘူၣ်ထီၣ်ဘါထီၣ် နီၢ်မၤရံလီၤ. ဘၣ်ဆၣ်အါတက့ၢ်န့ၣ် ပဘၣ်မၤတၢ်ဆူၣ်ဆူၣ်လီၤ.

ယအိၣ်ဒီး တၢ်သူၣ်အုးသးအုးဒီး တၢ်သူၣ်ကိၢ်သးဂီၤလီၤ. ယတူၢ်ဘၣ်လၢ ယကြၢးဃုကျိၣ်ဃုစ့ဒီး မၤစၢၤယဟံၣ်ဖိဃီဖိလီၤ. ယတကြၢးမၤတၢ်ဖဲအံၤ ဒ်သိးပှၤအဂၤကထူးထီၣ်တီၤထီၣ်အဂီၢ်လၢၤဘၣ်. အဃိ ယလဲၤတဲဘၣ်ဖံဝါအခိၣ်လၢ ယအဲၣ်ဒိးက့ၤအဂ့ၢ်န့ၣ်လီၤ. ဘၣ်ဆၣ် အဝဲပံးတြဲၤဒီးကးတံာ်ဃာ်ယၤလၢ ဒၢးပူၤလီၤ. အဝဲဆိကမိၣ်ဝဲလၢ မ့ၢ်မၤဝဲဒ်အံၤန့ၣ် ယကအိၣ်ဒံးဖဲန့ၣ်လီၤ.

ဖံဝါတဖၣ် ပျဲဟးထီၣ်ယၤလၢဒၢးပူၤ ဘၣ်ဆၣ် ဖဲအဝဲသ့ၣ်သ့ၣ်ညါဝဲလၢ ယသးတဆီတလဲအသးဘၣ်အခါ အဝဲသ့ၣ်ပံးတြဲၤဒီးကးတံာ်ဃာ်ကဒီးယၤလီၤ. အဝဲသ့ၣ်မၤယၤဒ်အံၤ သၢဘျီဝံၤအလီၢ်ခံ အဝဲသ့ၣ်စံးဘၣ်ယၤလၢ ယမ့ၢ်အဲၣ်ဒိးဟးထီၣ်န့ၣ် ယဘၣ်ကွဲးလံာ်ဒ်အံၤ– “ယအဲၣ်ဒိးဟးထီၣ် မ့ၢ်လၢယအဲၣ်ဒိးမၤ မုၣ်ကီၤလံၢ်အတၢ်မၤဒိၣ်န့ၢ် တၢ်မၤယွၤအတၢ်မၤအဃိလီၤ.” ယဖုးညါ, ယအဲၣ်ဒိးဟးထီၣ်အနီၢ်ကီၢ်လီၤ. ဘၣ်ဆၣ် ယတအဲၣ်ဒိးကွဲးလံာ် ဒ်အံၤဘၣ်. လၢခံကတၢၢ် ယစံးယအဲၣ်ဒိးတဲသကိးတၢ်ဒီး ခဲးသလ့းအစီၤသီလီၤ. ဒီးယတဲပၠးအီၤ တၢ်မၤအသးဒီးယၤတဖၣ်န့ၣ်လီၤ. ဒီးစီၤသီတဂၤအံၤဒိးန့ၢ်ဘၣ် တၢ်အခွဲးလၢ ဘံၡီးအအိၣ်လၢ ကဆှၢကဒါက့ၤယၤဆူ စၣ်ရၣ်ကိစၣ်လီၤ. စှၤလါဝံၤအလီၢ်ခံ ပှၤပျဲက့ၤယၤလီၤ. လၢခံန့ၣ် လီရံၣ်ဒီး ရၣ်မိနံၣ်စ့ၢ်ကီး ဟးထီၣ်ကွံာ်ဝဲ လၢဖံဝါအကၠိန့ၣ်လီၤ.

ဖလံစၤ– တၢ်န့ၣ်ဝံၤအလီၢ်ခံ ယဆီဟံၣ်ဆီဃီ ဒီးယလဲၤအိၣ်လၢ ခဲထၣ်ဘြံၣ်ယၣ်လီၤ. ယလဲၤထီၣ်ဒံး သရိာ်ထီဘိလီၤ. ဘၣ်တဘျီဖဲ မုၢ်အိၣ်ဘှံးနံၤ လၢသရိာ်ပူၤန့ၣ် ခဲးသလ့းအစီၤသီတဂၤ ကိးပသူထီၣ်ဝဲလၢ “သုသါကွၢ်လံာ်အံၤဧါ.” အဝဲဒုးနဲၣ်ပှၤလၢ လံာ်တဘ့ၣ်လၢအမ့ၢ် The Truth That Leads to Eternal Life န့ၣ်လီၤ. အဝဲစံးဝဲလၢ “ပှၤတဂၤဂၤမ့ၢ်ဟ့ၣ်သုလံာ်အံၤန့ၣ် ဟဲဟ့ၣ်ယၤ မ့တမ့ၢ် တၢၤကွံာ်အီၤ.”

လံာ်အံၤတအိၣ်လၢ ယအိၣ်ဘၣ်, ဘၣ်ဆၣ် ယအဲၣ်ဒိးဖးအီၤလီၤ. စှၤသီဝံၤအလီၢ်ခံ ပှၤပိာ်မုၣ်ခံဂၤ ဟဲဆူယဟံၣ်လီၤ. အဝဲသ့ၣ် မ့ၢ်ယဟိဝၤပှၤအုၣ်အသးဒီး ဟ့ၣ်ယၤလံာ်အဝဲန့ၣ်လီၤ. ယဖးအီၤတနၤဃီလီၤ. ဖဲအဝဲသ့ၣ်ဟဲက့ၤကဒါက့ၤအခါ သံကွၢ်ယၤလၢ မ့ၢ်ယအဲၣ်ဒိးမၤလိလံာ်စီဆှံဧါ. ဒီးယတဲအီၤလၢ ယအဲၣ်ဒိးမၤလိလီၤ.

ယအဲၣ်ဒိးမၤတၢ်ဘၣ် ယွၤအသးထီဘိလီၤ. အဃိ ယမၤလိတၢ်မ့ၢ်တၢ်တီဘၣ်ဃးဒီး ယဟိဝၤယွၤဒီး ယအဲၣ်ဘၣ်အီၤနီၢ်နီၢ်လီၤ. ယအဲၣ်ဒိးတဲဘၣ် ပှၤကိးဂၤဒဲးလၢ ယွၤအဂ့ၢ်လီၤ. ဖဲ ၁၉၇၃ န့ၣ်ယဒိးဘျၢယသးလၢထံလီၤ. တသ့ဖဲအသ့ ယတဲဘၣ်ယဟံၣ်ဖိဃီဖိလၢ တၢ်မ့ၢ်တၢ်တီလီၤ. ဘၣ်ဆၣ် ယဟံၣ်ဖိဃီဖိတဖၣ် လီၤဆီဒၣ်တၢ် ယဒ့မုၣ်အရၣ်စံလံး ထံၣ်ဝဲလၢ ယတၢ်နာ်ကမၣ်ဝဲလီၤ.

အရၣ်စံလံး– လၢဖံဝါအကၠိန့ၣ် ပှၤမၤနၢၤအီၣ်ယၤအဃိ ယသးပှံၢ်ထီၣ်ဒီး ယသးလၢာ်ကွံာ်ယတၢ်ဘူၣ်တၢ်ဘါလီၤ. ဘၣ်ဆၣ် ယလဲၤထီၣ်ဒံး သရိာ်ကိးနွံဒဲး ဒီးယဃ့ဘါထုကဖၣ်တၢ် ကိးနံၤဒဲးလီၤ. ယအဲၣ်ဒိးနၢ်ပၢၢ်လံာ်စီဆှံအဃိ ယဃ့တၢ်မၤစၢၤလၢ ကစၢ်ယွၤအအိၣ်လီၤ. လၢခံန့ၣ် ဖလံစၤတဲဘၣ်ယၤ တၢ်လၢအမၤလိဘၣ်ဝဲတဖၣ်န့ၣ်လီၤ. ဘၣ်ဃးဒီးအတၢ်နာ်န့ၣ် အသးဆူၣ်ဝဲဒိၣ်မးအဃိ ယဆိကမိၣ်လၢ အပျုၢ်လံ. ယတတူၢ်လိာ် တၢ်လၢအတဲဝဲတဖၣ်ဘၣ်.

လၢခံယက့ၤကဒါက့ၤဆူ ဝ့ၢ်မၣ်ဒရံးလၢ ယကမၤတၢ်မၤအဂီၢ်ဒီး ယထီၣ်ပှၢ်ဖဲန့ၣ်လီၤ. ယပာ်သူၣ်ပာ်သးလၢ ပှၤလၢအလဲၤထီၣ်သရိာ်တဖၣ်န့ၣ် တအိၣ်မူဝဲ ဒ်ယ့ၣ်ၡူးအတၢ်သိၣ်လိအသိးနီၢ်နီၢ်ဘၣ်. အဃိ ယတလဲၤထီၣ်သရိာ်လၢၤဘၣ်. ယတနာ် “ပှၤစီဆှံတဖၣ်” ဒီးလရာ်လၢၤဘၣ်. ဒီးယတဆိကမိၣ်လၢ ခဲးသလ့းအစီၤသီတဖၣ် ပျၢ်ပှၤဂၤအတၢ်ကမၣ်န့ၢ်ဝဲဘၣ်. ယတၢၤကွံာ် ယတၢ်ဂီၤတၢ်ဖီၣ်ခဲလၢာ်လီၤ. ယမၤတၢ်လၢအဘၣ်ဧါ တဘၣ်ဧါ ယတသ့ၣ်ညါလီၤတံၢ်ဘၣ်. ယသးဘၣ်ဒိ ဘၣ်ဆၣ် ယဃ့ဘါထုကဖၣ်ဆူယွၤအအိၣ်ဒီး စံးဘၣ်အီၤလၢ– “ယအဲၣ်ဒိးသ့ၣ်ညါနၤလီၤ. မၤစၢၤယၤတက့ၢ်.” ယသ့ၣ်နီၣ်ထီၣ်က့ၤလၢ ယဟိဝၤပှၤအုၣ်အသးတဖၣ် ဟဲဒိတကျိာ်ယပဲတြီ အါဘျီဘၣ်ဆၣ် ယတအိးထီၣ်န့ၢ်အီၤဘၣ်. ယတနာ်အီၣ် တၢ်ဘူၣ်တၢ်ဘါနီတခါလၢၤဘၣ်.

ယဒ့မုၣ်လီရံၣ် အိၣ်လၢကီၢ်ဖြၣ်စ့ၣ်ဒီး ရၣ်မိနံၣ်န့ၣ် အိၣ်လၢကီၢ်စပ့ၣ်လီၤ. ဖဲ ၁၉၈၀ ဃၣ်ဃၣ်န့ၣ် အဝဲသ့ၣ်စးထီၣ်မၤလိ လံာ်စီဆှံဒီး  ယဟိဝၤပှၤအုၣ်အသးလီၤ. ဒ်ဖလံစၤအသိး ယနာ်လၢ အဝဲသ့ၣ်တသ့ၣ်ညါလီၤအသးလၢ အမၤလိတၢ်လၢအကမၣ်ဘၣ်. လၢခံယထံၣ်လိာ်သးဒီး အဲၣ်ကၠ့လံဒီး ပကဲထီၣ်ဘၣ်တံၤသကိးလီၤ. အဝဲစ့ၢ်ကီး မ့ၢ်ယဟိဝၤပှၤအုၣ်အသးတဂၤလီၤ. အဲၣ်ကၠ့လံဒီးအဝၤ သံကွၢ်ယၤအါဘျီလၢ မ့ၢ်ယအဲၣ်ဒိးမၤလိလံာ်စီဆှံဒီး အဝဲသ့ၣ်ဧါ. ယတဲဘၣ်အဝဲသ့ၣ်လၢ ယသးတအိၣ်တၢ်ဘူၣ်တၢ်ဘါ သနာ်က့ အဝဲသ့ၣ်သ့ၣ်ညါနၢ်ပၢၢ်လၢ ယသးအိၣ်သ့ၣ်ညါလံာ်စီဆှံအဂ့ၢ်န့ၣ်လီၤ. လၢခံယတဲဘၣ်အဝဲသ့ၣ်လၢ– “ဂ့ၤလံ, ယသူယလံာ်စီဆှံမ့ၢ်သ့န့ၣ် ယကမၤလိလံာ်စီဆှံလီၤ.” လၢယအိၣ်န့ၣ် နါခၣ် ခိၣ်လါကၣ် (Nácar-Colunga) တၢ်ကွဲးကျိာ်ထံလံာ်စီဆှံအိၣ်ဝဲလီၤ.

ဖလံစၤ– ယဒိးဘျၢထံဖဲ ၁၉၇၃ နံၣ်လီၤ. ဒီးဖဲန့ၣ်အဆၢကတီၢ်လၢ စဲထဲဒၢၣ်လၢ အမ့ၢ်ခဲထၣ်ဘြံၣ်ယၣ်အဝ့ၢ်ခိၣ်န့ၣ် ယဟိဝၤပှၤအုၣ်အသးအိၣ်ဝဲအဂၤ ၇၀ ဃၣ်ဃၣ်လီၤ. ဒ်သိးပလဲၤစံၣ်တဲၤတဲလီၤတၢ်လၢ သဝီအဖျၢၣ်လၢအကယၤအအိၣ် ကတုၤအဂီၢ် ပဘၣ်လဲၤတၢ်ဖးယံၤလီၤ. လၢတၢ်န့ၣ်အဃိ ဒ်သိးပလဲၤ သဝီတဖျၢၣ်ဘၣ်တဖျၢၣ်ကန့ၢ်အဂီၢ် ပဘၣ်ဒိး ဘၢးစ် (bus) တဆီဝံၤ ပဘၣ်ဒိးဒံးကါတဆီလီၤ.

နံၣ်တဖၣ် ပူၤကွံာ်ဝံၤအလီၢ်ခံ ယသိၣ်လိဘၣ်ပှၤအါဂၤလၢ လံာ်စီဆှံ ဒီးအဝဲသ့ၣ်အကျါ ၁၁ ဂၤန့ၣ် ဒိးဘျၢအသးလၢထံလီၤ. ပှၤအါတက့ၢ်လၢ ယသိၣ်လိအီၤလံာ်စီဆှံန့ၣ် မ့ၢ်ပှၤခဲးသလ့းဖိလီၤ. ယဘၣ် အိၣ်ဒီးတၢ်ဝံသးစူၤလၢ အဝဲသ့ၣ်အဖီခိၣ်လီၤ. အဝဲသ့ၣ်လီၤဂာ်ဒီးယၤလီၤ. အဃိ ဒ်သိးအဝဲသ့ၣ်ကသ့ၣ်ညါဝဲလၢ တၢ်လၢအနာ်ဝဲတဖၣ် မ့ၢ်တၢ်လၢအကမၣ်န့ၣ် အဝဲသ့ၣ်လိၣ်ဘၣ် တၢ်ဆၢကတီၢ်လီၤ. ယသ့ၣ်ညါလၢ ထဲဒၣ်လံာ်စီဆှံ ဒီးယဟိဝၤယွၤအသးစီဆှံန့ၣ် ကမၤစၢၤပှၤလၢ ကဆီတလဲအတၢ်ဆိကမိၣ်ဒီး ကနၢ်ပၢၢ်ထီၣ်တၢ်မ့ၢ်တၢ်တီအဂီၢ်လီၤ. (ဧ့ၤဘြံၤ ၄:၁၂) ယဝၤ ဘၢဘနံဒိၣ် လၢအမ့ၢ်တ့ၢ် ပၢၤကီၢ်တဂၤန့ၣ် ဒိးဘျၢအသးလၢထံဖဲ ၁၉၇၉ လီၤ. ဒီးယမိၢ်စးထီၣ် မၤလိလံာ်စီဆှံ ဖဲအတချုးသံဒံးဘၣ်န့ၣ်လီၤ.

အရၣ်စံလံး– ဖဲယစးထီၣ်မၤလိလံာ်စီဆှံဒီး ယဟိဝၤပှၤအုၣ်အသးအခါ ယဆိကမိၣ်လၢ ယနာ်အီၣ်အဝဲသ့ၣ်တသ့ဘၣ်. ဘၣ်ဆၣ် ဒ်တၢ်ဆၢကတီၢ် လဲၤပူၤကွံာ်ဝဲအသိး ယတၢ်ထံၣ်တအိၣ်ဒ်န့ၣ်လၢၤဘၣ်. ယဟိဝၤပှၤအုၣ်အသးတဖၣ်န့ၣ် တမ့ၢ်ထဲသိၣ်လိယၤလံာ်စီဆှံဘၣ် အဝဲသ့ၣ်အိၣ်မူထွဲဝဲဒ် လံာ်စီဆှံ အတၢ်သိၣ်တၢ်သီအသိးလီၤ. ယတၢ်နာ်ယဟိဝၤယွၤ ဒိၣ်ထီၣ်ဝဲဒီး ယအိၣ်ဒီးတၢ်သူၣ်ခုသးခုလီၤ. ပှၤလၢယခိၣ်ယဃၢၤတနီၤ ပာ်သူၣ်ပာ်သး ယတၢ်ဆီတလဲအဃိ စံးဘၣ်ယၤလၢ, “အရၣ်စံလံးဧၢ, တၢ်လၢနဃုထၢန့ၣ် ဆဲးမၤနီ.”

ယသ့ၣ်နီၣ်ထီၣ်ဒံး ယတၢ်ထုကဖၣ်လၢယစံး “ယဟိဝၤယွၤဧၢ နတလဲၤသဒၣ်ယၤ ဒီးနဟ့ၣ်ယၤ တၢ်ခွဲးတၢ်ယာ်အါမံၤ လၢယကဃုတၢ်မ့ၢ်တၢ်တီ ဘၣ်ဃးဒီးလံာ်စီဆှံအဃိ ယစံးဘျုးဘၣ်နၤလီၤ.” ယဃ့ဝံသးစူၤ ယနီဖလံစၤ လၢကပျၢ်ယတၢ်ကမၣ် မ့ၢ်လၢယတဲကမၣ်ဘၣ်အီၤအဃိလီၤ. စးထီၣ်ဖဲန့ၣ် ပတဲသကိးလံာ်စီဆှံအဂ့ၢ်လၢ တၢ်သူၣ်ခုသးခုအပူၤလီၤ. ပတတဲအါလိာ်ပသးလၢၤဘၣ်. ယဒိးဘျၢထံဖဲ ယသးအိၣ် ၆၁ နံၣ်ဖဲ ၁၉၈၉ နံၣ်န့ၣ်လီၤ.

ဖလံစၤ– ခဲအံၤယအိၣ် ၉၁ နံၣ်ဒီးယဝၤသံလံ. ယကမၤကစၢ်ယွၤအတၢ်မၤ ဒ်သိးလၢညါဒု တန့ၢ်လၢၤဘၣ်. ဘၣ်ဆၣ် ယဖးလံာ်စီဆှံ ကိးနံၤဒဲး ဒီးယလဲၤထီၣ် တၢ်အိၣ်ဖှိၣ်ရိဖှိၣ် ဒီးယလဲၤစံၣ်တဲၤတဲလီၤတၢ် တသ့ဖဲအသ့လီၤ.

အရၣ်စံလံး– မ့ၢ်လၢယမ့ၢ်တ့ၢ် ဖံဝါတဂၤအဃိ ယသးအိၣ်တဲဘၣ် ခဲသလံးအတၢ်ဘူၣ်တၢ်ဘါ ခိၣ်နၢ် ဒီးဖံဝါခဲလၢာ်လၢ ယဟိဝၤယွၤအဂ့ၢ်လီၤ. ယတဲသကိးဘၣ်တၢ်ဒီး အဝဲသ့ၣ်အကျါအါဂၤန့ၣ် တူၢ်လိာ်ဝဲ လံာ်ဒီးမဲးကစံလီၤ. လီၤဆီဒၣ်တၢ် ယသ့ၣ်နီၣ်ထီၣ်ဘၣ်က့ၤ ခဲးသလံးအစီၤသီတဂၤလီၤ. ဖဲယတဲသကိးဘၣ်တၢ်ဒီးအီၤ စှၤဘျီဝံၤအလီၢ်ခံ အဝဲတူၢ်လိာ် တၢ်လၢယတဲအီၤတဖၣ်န့ၣ်လီၤ. ဒီးတဲဘၣ်ယၤလၢ– “ယသးပှၢ်လံန့ၣ် ယသါကမၤအီၣ်မၤအီဒ်လဲၣ်. ယတၢ်အိၣ်ဖှိၣ်ဖိ ဒီးယဟံၣ်ဖိဃီဖိတဖၣ် ကထံၣ်ဝဲဒ်လဲၣ်.” ယတဲဆၢက့ၤအီၤလၢ- “မ့မ့ၢ် ကစၢ်ယွၤမီၣ် ကထံၣ်ဝဲဒ်လဲၣ်.” အဝဲသ့ၣ်ညါဝဲလၢ ယတဲတၢ်န့ၣ်ဘၣ်လီၤ. ယထံၣ်အမဲာ်လီၤသပှၢ်ဒီး အသးအုးလီၤ. ဘၣ်ဆၣ် ဖျါလၢအဝဲတအိၣ်ဒီး တၢ်သးဒူလၢကဆီတလဲအသးဘၣ်.

ဘၣ်တဘျီ ဖဲယဝၤစံးဘၣ်ယၤလၢ အဝဲအဲၣ်ဒိးလဲၤထီၣ် တၢ်အိၣ်ဖှိၣ်ရိဖှိၣ်ဒီးယၤန့ၣ် ယတသးပ့ၤနီၣ် နီတဘျီဘၣ်. ဖဲအဝဲဟဲထီၣ် တၢ်အိၣ်ဖှိၣ်ရိဖှိၣ် အဆိကတၢၢ်တဘျီန့ၣ် အသးအိၣ် ၈၀ ဘျဲၣ်လံဒီးစးထီၣ်ဖဲန့ၣ်န့ၣ် အဝဲလဲၤထီၣ် တၢ်အိၣ်ဖှိၣ်ရိဖှိၣ်ထီဘိလီၤ. အဝဲမၤလိလံာ်စီဆှံ ဒီးစးထီၣ်စံၣ်တဲၤတဲလီၤတၢ်လီၤ. ဖဲပလဲၤစံၣ်တဲၤတဲလီၤတၢ် ဒ်သိးသိးအခါန့ၣ် တၢ်လၢယသးပ့ၤနီၣ်တန့ၢ်ဘၣ်တဖၣ် အိၣ်ဝဲအါမးလီၤ. အဝဲသံကွံာ်ဝဲဖဲ တချုးလၢကဘျၢထံခံလါန့ၣ်လီၤ.

ဖလံစၤ– ဖဲယစးထီၣ်မၤယဟိဝၤယွၤ အတၢ်မၤအခါ ယဒ့မုၣ်သၢဂၤ ထီဒါယၤလီၤ. ဘၣ်ဆၣ် လၢခံအဝဲသ့ၣ်စ့ၢ်ကီး တူၢ်လိာ်တၢ်မ့ၢ်တၢ်တီလီၤ. တၢ်အံၤမ့ၢ် တၢ်အဂ့ၤကတၢၢ်လၢ အကဲထီၣ်တ့ၢ်အသးဒီးယၤလီၤ. တၢ်န့ၣ်ဝံၤအလီၢ်ခံ ပထံၣ်လိာ်သကိးပသးဒီး ပဟံးန့ၢ်တၢ်ဆၢကတီၢ်လၢ ပကတဲသကိး ပပၢ်ယဟိဝၤယွၤအဂ့ၢ်ဒီး အကလုၢ်ကထါန့ၣ်လီၤ. လၢခံကတၢၢ်န့ၣ် ပဝဲခဲလၢာ် ပဘူၣ်ထီၣ်ဘါထီၣ်ဘၣ် ယဟိဝၤယွၤဒ်သိးသိးလီၤ. *