တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ် | ကစၢ်ယွၤအတၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်အံၤ မ့ၢ်နတူၢ်လိာ်ဧါ
ဘၣ်မနုၤအဃိ ကစၢ်ယွၤအတၢ်ဟ့ၣ်န့ၣ် မ့ၢ်တၢ်ဟ့ၣ်လၢအလုၢ်ဒိၣ်ပှ့ၤဒိၣ်ကတၢၢ်လဲၣ်
တၢ်ဟ့ၣ်လၢအလုၢ်ဒိၣ်ပှ့ၤဒိၣ်ကတၢၢ်လၢ နဂီၢ်န့ၣ်မ့ၢ်တၢ်ဟ့ၣ်ဒ်လဲၣ်. ပကဃုသ့ၣ်ညါ တၢ်ဂ့ၢ်လွံၢ်ခါအံၤလီၤ– (၁) မတၤတဂၤ ဟ့ၣ်နၤတၢ်ဟ့ၣ်တခါအံၤလဲၣ် (၂) ဘၣ်မနုၤအဃိ အဝဲဟ့ၣ်နၤလဲၣ် (၃) လၢအဝဲကဟ့ၣ်နၤ တၢ်ဟ့ၣ်အံၤအဂီၢ် အဝဲဘၣ်တူၢ်ၡူဝဲတၢ်မနုၤလဲၣ် ဒီး (၄) မ့ၢ်တၢ်ဟ့ၣ်တခါအံၤ မၤလၢပှဲၤနတၢ်လိၣ်ဘၣ်တမံၤမံၤဧါ. ပမ့ၢ်ဆိကမိၣ်ထံ တၢ်ဂ့ၢ်လွံၢ်ခါအံၤန့ၣ် ကမၤစၢၤပှၤဒ်သိး ပကပာ်လုၢ်ပာ်ပှ့ၤ ကစၢ်ယွၤအတၢ်ဟ့ၣ်လၢအမ့ၢ် တၢ်ပှ့ၤက့ၤန့ၣ်လီၤ.
မတၤတဂၤ ဟ့ၣ်ပှၤတၢ်ဟ့ၣ်လဲၣ်
တၢ်ဟ့ၣ်တနီၤန့ၣ် ပဒိးန့ၢ်ဘၣ်အီၤလၢ ပှၤလၢအအိၣ်ဒီးတၢ်စိတၢ်ကမီၤ မ့တမ့ၢ် ပှၤလၢပပာ်ကဲအီၤတဂၤအအိၣ်အဃိ အတၢ်ဟ့ၣ်အံၤ မ့ၢ်တၢ်လုၢ်ဒိၣ်ပှ့ၤဒိၣ်လၢပဂီၢ်လီၤ. တၢ်ဟ့ၣ်လၢ အဂၤတနီၤန့ၣ် ပဒိးန့ၢ်ဘၣ်လၢ ပဟံၣ်ဖိဃီဖိအအိၣ် မ့တမ့ၢ် လၢပတံၤသကိးအအိၣ်အဃိ ပကပာ်လုၢ်ပာ်ပှ့ၤတၢ်ဟ့ၣ်အံၤလီၤ. ဒ်တၢ်ဂ့ၢ်လၢအခီၣ်ထံး ပာ်ဖျါထီၣ်ဝဲအသိး ကၠီဒၢၣ် ဒိးန့ၢ်ဘၣ်ဝဲတၢ်ဟ့ၣ် ဆံးဆံးဖိတခါလၢ ရးစၢၤ အအိၣ်ဘၣ်ဆၣ် ကၠီဒၢၣ် ပာ်လုၢ်ပာ်ပှ့ၤဝဲတၢ်ဟ့ၣ်အံၤလီၤ. တၢ်ဂ့ၢ်အံၤဘၣ်ထွဲလိာ်သး ဒီးတၢ်ပှ့ၤက့ၤလၢကျဲဒ်လဲၣ်.
တၢ, လံာ်စီဆှံတဲဝဲလၢ “ယွၤမၢလီၤအဖိခွါတဂၤဃီ ဆူဟီၣ်ခိၣ်ချၢ, ဒ်သိးပကမူလၢအဃိလီၤ.” (၁ ယိၤဟၣ် ၄:၉) လၢတၢ်ဂ့ၢ်တခါအံၤအဃိ တၢ်ဟ့ၣ်လၢအမ့ၢ်တၢ်ပှ့ၤက့ၤန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်လီၤ. ပှၤလၢအတၢ်စိတၢ်ကမီၤကအိၣ်ထဲသိးဒီး ကစၢ်ယွၤန့ၣ် တအိၣ်ဝဲနီတဂၤဘၣ်. ဘၣ်ဃးဒီးကစၢ်ယွၤန့ၣ် ပှၤကွဲးထါစံးထီၣ်ပတြၢၤတဂၤ ကွဲးဝဲလၢ– “နဲဒၣ်တဂၤဃီလၢနမံၤမ့ၢ်ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါအဖီခိၣ်လီၤ.” (စံးထီၣ်ပတြၢၤ ၈၃:၁၈) အဃိ တၢ်ဟ့ၣ်လၢအမ့ၢ် တၢ်ပှ့ၤက့ၤန့ၣ် ပဒိးန့ၢ်ဘၣ်အီၤလၢ ပှၤလၢအအိၣ်ဒီးတၢ်စိတၢ်ကမီၤ အဒိၣ်ကတၢၢ်တဂၤအအိၣ်လီၤ.
အဂၤတမံၤန့ၣ် ကစၢ်ယွၤမ့ၢ် “ပပၢ်လီၤ.” (ယၡါယၤ ၆၃:၁၆) လၢကျဲဒ်လဲၣ်. ကစၢ်ယွၤဟ့ၣ်လီၤပှၤသးသမူလီၤ. တကးဒံးဘၣ် ပသ့ၣ်ညါဘၣ်လၢအဝဲ အံးထွဲကွၢ်ထွဲပှၤဒ်ပၢ်လၢ အအိၣ်ဒီးတၢ်အဲၣ်တၢ်ကွံတဂၤ ကွၢ်ထွဲအဖိအသိးလီၤ. ဘၣ်တဘျီ ကစၢ်ယွၤကိးဝဲအခ့အပှၤတနီၤ လၢအ့ဖရဲၣ် ဒီးသံကွၢ်အဝဲသ့ၣ်လၢ– “အ့ဖရဲၣ်မ့ၢ်ယဖိခွါသးဘိဧါ, မ့ၢ်ဖိသၣ်လၢအဘၣ်ယသးဧါ . . . ယသးအိၣ်အီၤလီၤ. ယကသးကညီၤအီၤသပှၢ်ပှၢ်” လီၤ. (ယံးရမံယၤ ၃၁:၂၀) ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိး မုၢ်မဆါတနံၤအံၤ ကစၢ်ယွၤသူၣ်အိၣ်သးအိၣ် ဒီးအဲၣ်ဝဲပှၤလၢအဘူၣ်ထီၣ်ဘါထီၣ်အီၤလီၤ. ကစၢ်ယွၤတမ့ၢ်ထဲ သ့တၢ်လၢာ်ကစၢ်ဘၣ်. အဝဲမ့ၢ်စ့ၢ်ကီးပတံၤသကိး ဒီးပပၢ်လၢအတီဒီးပှၤလီၤ. လၢတၢ်န့ၣ်အဃိ ကယဲၢ်တၢ်ဟ့ၣ်တခါဂ့ၤတခါဂ့ၤလၢ အဟဲလၢကစၢ်ယွၤအအိၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢပဂီၢ်လီၤ.
ဘၣ်မနုၤအဃိ အဝဲဟ့ၣ်လီၤပှၤလဲၣ်
အဒိ ပှၤတဂၤသူၣ်အိၣ်သးအိၣ်နၤဒီး ဟ့ၣ်နၤတၢ်ဟ့ၣ်လၢ တၢ်သးအိၣ်အဃိ တၢ်ဟ့ၣ်အံၤအလုၢ်ပှ့ၤဒိၣ်ဝဲလၢနဂီၢ်လီၤ. ပှၤလၢအအဲၣ်ဒိးဟ့ၣ်တၢ်လၢ အသးဒီဖျၢၣ်န့ၣ် အဝဲတမုၢ်လၢ်ဝဲလၢ အကဒိးန့ၢ်ဘၣ်က့ၤ တၢ်တမံၤမံၤလၢပှၤဂၤအအိၣ်ဘၣ်.
မ့ၢ်လၢကစၢ်ယွၤအဲၣ်ပှၤအဃိ အဝဲဟ့ၣ်လီၤပှၤအဖိခွါလီၤ. လံာ်စီဆှံတဲဝဲလၢ “ယွၤအတၢ်အဲၣ်တၢ်ကွံအိၣ်ဖျါဝဲလၢပဂီၢ် လၢတၢ်အံၤ, ယွၤမၢလီၤအဖိခွါတဂၤဃီ” လီၤ. ဒီးဘၣ်မနုၤအဃိ ကစၢ်ယွၤဘၣ်ဟ့ၣ်လီၤပှၤလၢ အဖိခွါလဲၣ်. မ့ၢ်လၢကစၢ်ယွၤအဲၣ်ဒိးဝဲလၢ “ပကမူလၢအဃိလီၤ.” (၁ ယိၤဟၣ် ၄:၉) မ့ၢ်ကစၢ်ယွၤအိၣ်ဒီး မူဒါလၢကဟ့ၣ်လီၤပှၤအဖိခွါဧါ. တအိၣ်ဘၣ်. လံာ်စီဆှံပာ်ဖျါထီၣ်ဝဲလၢ “ယ့ၣ်ၡူးခရံာ်အတၢ်ပှ့ၤက့ၤ” န့ၣ်ပာ်ဖျါထီၣ်ဝဲ ကစၢ်ယွၤ “အဘျုးအဖှိၣ်” လီၤ.—ရိမ့ၤ ၃:၂၄.
ဘၣ်မနုၤအဃိ ပတဲသ့လၢ တၢ်ဟ့ၣ်အံၤမ့ၢ် “ယွၤအဘျုးအဖှိၣ်” လဲၣ်. လံာ်စီဆှံတဲနၢ်ပၢၢ်ပှၤလၢ– “ဖဲပမ့ၢ်ပှၤတၢ်ဒဲးဘးဖိအဖၢမုၢ်ဒီး, ခရံာ်ဒိးသံအသးလၢ ပဂီၢ်သတးဒီး, ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤလီၤ.” (ရိမ့ၤ ၅:၈) ခီဖျိလၢကစၢ်ယွၤအိၣ်ဒီး တၢ်အဲၣ်နီၢ်နီၢ်အဃိ အသးအိၣ်ဝဲပှၤတၢ်ဒဲးဘးဖိလၢ အဂံၢ်စၢ်ဘါစၢ် လၢအလိၣ်ဘၣ်တၢ်မၤစၢၤန့ၣ်လီၤ. ပတကြၢးဒီးကစၢ်ယွၤအတၢ်အဲၣ်အံၤဘၣ်. ဒီးပဟ့ၣ်ဆၢက့ၤကစၢ်ယွၤ တန့ၢ်ဘၣ်. လၢတၢ်ဟ့ၣ်ခဲလၢာ်အကျါန့ၣ် တၢ်ပှ့ၤက့ၤပာ်ဖျါထီၣ်ဝဲ ကစၢ်ယွၤအတၢ်အဲၣ်လၢအဒိၣ်ကတၢၢ်န့ၣ်လီၤ.
လၢကဟ့ၣ်တၢ်ဟ့ၣ်အံၤအဂီၢ် အဝဲကဘၣ်တူၢ်ၡူဝဲ တၢ်မနုၤလဲၣ်
အဒိ တၢ်ဟ့ၣ်တနီၤန့ၣ် အလုၢ်ဒိၣ်ပှ့ၤဒိၣ် မ့ၢ်လၢပှၤလၢအဟ့ၣ်ပှၤတၢ်ဟ့ၣ်တဂၤအံၤ ဘၣ်တူၢ်ၡူဝဲတၢ်ဖးအါညါအဃိလီၤ. ဒီးပှၤတဂၤမ့ၢ်ဘၣ်တူၢ်ၡူကွံာ် တၢ်လုၢ်ဒိၣ်ပှ့ၤဒိၣ်လၢအဂီၢ်တမံၤမံၤ ခီဖျိလၢအဟ့ၣ်ပှၤတၢ်ဟ့ၣ်အဃိန့ၣ် ပကပာ်လုၢ်ပာ်ပှ့ၤတၢ်ဟ့ၣ်အံၤလီၤ.
ကစၢ်ယွၤ “ဟ့ၣ်လီၤကွံာ်အဖိခွါအိၣ်တဂၤဃီ” လီၤ. (ယိၤဟၣ် ၃:၁၆) ကစၢ်ယွၤဟ့ၣ်လီၤ ပှၤလၢအအဲၣ်ဝဲဒိၣ်ကတၢၢ်တဂၤ လၢပဂီၢ်လီၤ. ဖဲကစၢ်ယွၤတ့လီၤမူခိၣ်ဒီးဟီၣ်ခိၣ်အခါ ယ့ၣ်ၡူးမၤသကိးတၢ်ဒီးအီၤလၢ အနံၣ်ဖးယံာ်ဒီး အဝဲကဲထီၣ် “တၢ်သူၣ်ဖှံသးညီ” လၢကစၢ်ယွၤအဂီၢ်လီၤ. (ကတိၤဒိ ၈:၃၀) ယ့ၣ်ၡူးမ့ၢ်ယွၤ “အဖိခွါလၢအအဲၣ်” ဝဲတဂၤ ဒီး “ယွၤ, လၢပှၤထံၣ်အီၤတသ့ဘၣ်တဂၤအက့ၢ်အဂီၤ” လီၤ. (ကလီးစဲ ၁:၁၃-၁၅) ပှၤလၢအအိၣ်ဒီးတၢ်ရ့လိာ်သး ဘူးဘူးတံၢ်တံၢ်ထဲသိးဒီး ကစၢ်ယွၤဒီးယ့ၣ်ၡူးန့ၣ် တအိၣ်ဝဲနီတဂၤဘၣ်.
ကစၢ်ယွၤ “တဟံးဃာ်က့ၤ အဖိခွါဒၣ်ဝဲဒၣ်လဲာ်ဘၣ်.” (ရိမ့ၤ ၈:၃၂, ခ့ခါစှီၤကျိာ်) တၢ်အဂ့ၤကတၢၢ်လၢအအိၣ်ဒီး ယဟိဝၤယွၤန့ၣ် အဝဲဟ့ၣ်လီၤပှၤလီၤ.
မ့ၢ်တၢ်ဟ့ၣ်တခါအံၤ မၤလၢပှဲၤ ပတၢ်လိၣ်ဘၣ် တမံၤမံၤဧါ
တၢ်ဟ့ၣ်တနီၤန့ၣ် အလုၢ်ဒိၣ်ပှ့ၤဒိၣ်လၢပဂီၢ် မ့ၢ်လၢပလိၣ်ဘၣ်အီၤဒီး မၤလၢပှဲၤထီၣ်ပတၢ်လိၣ်ဘၣ်အဃိလီၤ. အဒိ နဆိးက့နးမး ဒီးနမ့ၢ်တလဲၤကူစါယါဘျါနသးလၢ တၢ်ဆါဟံၣ်န့ၣ် နကသံလီၤ. နလိးတၢ်ဆါဟံၣ်အပှ့ၤ မ့ၢ်တန့ၢ် ဒီးပှၤတဂၤဂၤမ့ၢ်လိးန့ၢ်နၤအပှ့ၤန့ၣ် နကစံးဘျုးက့ၤအီၤထဲလဲၣ်. တၢ်ဟ့ၣ်အံၤမ့ၢ်တၢ်ဟ့ၣ်လၢ အလုၢ်ဒိၣ်ပှ့ၤဒိၣ်လၢနဂီၢ် ဒီးနသးပ့ၤနီၣ်အီၤတန့ၢ်နီတဘျီဘၣ်.
“ဒ်ပှၤခဲလၢာ်သံဝဲလၢ စီၤအၤဒၣ်အပူၤအသိးန့ၣ်, ပှၤခဲလၢာ်ကဘၣ်တၢ်မၤမူထီၣ်က့ၤအီၤ လၢခရံာ်အပူၤ, ဒ်န့ၣ်အသိးလီၤ.” (၁ ကရံၣ်သူး ၁၅:၂၂) ခီဖျိလၢပဟဲလီၤစၢၤလီၤသွဲၣ်လၢ စီၤအၤဒၣ်အဃိ ပဘၣ် “သံ” လီၤ. ပထူၣ်ဖျဲးထီၣ်လၢတၢ်ဆူးတၢ်ဆါ ဒီးတၢ်သံတသ့ဘၣ်. ဒီးပမၤဘၣ်လိာ်က့ၤ ပတၢ်ရ့လိာ်သးဒီးကစၢ်ယွၤ ဒီးပထူၣ်ဖျဲးထီၣ်လၢတၢ်ကမၣ် တသ့စ့ၢ်ကီးဘၣ်. မ့ၢ်လၢပမ့ၢ်ပှၤဟီၣ်ခိၣ်ဖိအဃိ ပ “မၤမူထီၣ်က့ၤ” ပနီၢ်ကစၢ်ဒီး ပှၤဂၤတသ့ဝဲဘၣ်. လံာ်စီဆှံပာ်ဖျါထီၣ်ဝဲလၢ– “ပှၤကညီပှ့ၤက့ၤအဒီပုၢ်ဝဲၢ် တသ့ဘၣ်လ့ၤတက့ၤဘၣ်. ဟ့ၣ်တၢ်မၤပူၤဖျဲးအီၤလၢယွၤတသ့ဘၣ် . . . ဆိတ့ၢ်ဝဲလီၤထူလီၤယိာ်” လီၤ. (စံးထီၣ်ပတြၢၤ ၄၉:၇, ၈) ပလိၣ်ဘၣ်တၢ်မၤစၢၤသပှၢ်ကတၢၢ် မ့ၢ်လၢပလိးက့ၤတၢ်ပှ့ၤက့ၤတသ့ဘၣ်အဃိလီၤ. မ့တမ့ၢ်လၢကစၢ်ယွၤအတၢ်မၤစၢၤန့ၣ် ပတၢ်မုၢ်လၢ်တအိၣ်ဘၣ်.
ယဟိဝၤယွၤအဲၣ်ပှၤဒိၣ်မးအဃိ အဝဲသးအိၣ်လိးန့ၢ်ပှၤတၢ်အပှ့ၤ ဒ်သိးပကဒိးန့ၢ်ဘၣ်တၢ်မူဒီး “ပှၤခဲလၢာ်ကဘၣ်တၢ်မၤမူထီၣ်က့ၤ” အဝဲသ့ၣ်အဂီၢ်လီၤ. ဒ်သိးပကဒိးန့ၢ်ဘၣ်တၢ်မူအဂီၢ် တၢ်ပှ့ၤက့ၤအံၤကဲဘျုးလၢပဂီၢ်ဒ်လဲၣ်. လံာ်စီဆှံတဲဝဲလၢကစၢ်ယွၤ “အဖိခွါယ့ၣ်ၡူးခရံာ်အသွံၣ်န့ၣ် သ့စီကွံာ်ပှၤလၢ ပတၢ်ဒဲးဘးခဲလၢာ်လီၤ.” ပမ့ၢ်နာ်ယ့ၣ်ၡူးအတၢ်ဟ့ၣ်လုၢ်ထီၣ်သးန့ၣ် ကျဲအိးဟိထီၣ်သးလၢ ပတၢ်ဒဲးဘးကပျၢ်ကွံာ်ဒီး ပကဒိးန့ၢ်ဘၣ်တၢ်မူအထူအယိာ်လီၤ. (၁ ယိၤဟၣ် ၁:၇; ၅:၁၃) တၢ်ပှ့ၤက့ၤအံၤကဲထီၣ်တၢ်မၤစၢၤလၢ ပှၤသံတ့ၢ်လၢပအဲၣ်ဘၣ်အီၤတဖၣ်အဂီၢ်ဒ်လဲၣ်. လံာ်စီဆှံတဲဝဲလၢ “မ့ၢ်တၢ်သံအိၣ်ထီၣ်လၢပှၤကညီဒီး, တၢ်ဂဲၤဆၢထၢၣ်က့ၤလၢ တၢ်သံအိၣ်ထီၣ်လၢပှၤကညီ [ယ့ၣ်ၡူး] စ့ၢ်ကီးလီၤ.”—၁ ကရံၣ်သူး ၁၅:၂၁. *
ပှၤလၢအဟ့ၣ်ပှၤ တၢ်ဟ့ၣ်အံၤန့ၣ် မ့ၢ်ပှၤလၢအစိဒိၣ်ကမီၤဒိၣ်ကတၢၢ်တဂၤ ဒီးဖဲအဟ့ၣ်လီၤပှၤအဖိခွါအဆၢကတီၢ် အဝဲပာ်ဖျါထီၣ်အတၢ်အဲၣ်လၢပဖီခိၣ်သပှၢ်ကတၢၢ်လီၤ. ဒီးပှၤလၢအတူၢ်ၡူအသး အါန့ၢ်ယဟိဝၤယွၤန့ၣ် တအိၣ်ဝဲနီတဂၤဘၣ်. တၢ်ဟ့ၣ်အံၤမၤလၢပှဲၤပတၢ်လိၣ်ဘၣ် အဒိၣ်ကတၢၢ်တမံၤလၢ ကမၤထူၣ်ဖျဲးထီၣ်ပှၤလၢ တၢ်သံဒီးတၢ်ဒဲးဘးလီၤ. အဃိ တၢ်ဟ့ၣ်လၢအလုၢ်ဒိၣ်ပှ့ၤဒိၣ် ထဲသိးဒီးတၢ်ပှ့ၤက့ၤအံၤ တအိၣ်ဝဲနီတမံၤဘၣ်.
^ လံာ်အဆၢ. 19 နမ့ၢ်အဲၣ်ဒိးသ့ၣ်ညါအါထီၣ်တၢ်ဂ့ၢ် ဘၣ်ဃးဒီးကစၢ်ယွၤအတၢ်တိာ်ပာ်လၢ ကမၤဂဲၤဆၢထၢၣ်က့ၤပှၤသံတဖၣ်န့ၣ် ကွၢ်တၢ်မၤလိ ၇ လၢလံာ်လၢအမ့ၢ် လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ် လၢယဟိဝၤပှၤအုၣ်အသးတဖၣ် ထုးထီၣ်ဝဲ မ့တမ့ၢ် နဒိးန့ၢ်အီၤသ့စ့ၢ်ကီးလၢ www.ps8318.com/ksw အပူၤလီၤ.
တၢ်ဂ့ၤအဂၤလၢ နကဘၣ်သး
တၢ်သ့ၣ်နီၣ်ထီၣ်က့ၤအမူး
သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ
ပကွဲမုာ်ဘၣ်နၤလၢ နကဟဲထီၣ်မူးပွဲလၢအရ့ဒိၣ်အံၤန့ၣ်လီၤ. နကနၢ်ဟူဘၣ်လၢ ယ့ၣ်ၡူးအတၢ်အိၣ်မူ ဒီးအတၢ်သံန့ၣ် ကဲဘျုးလၢနဂီၢ်ဒ်လဲၣ်န့ၣ်လီၤ.
