ပှၤအါဂၤတဲဝဲလၢ အနာ်ကစၢ်ယွၤ. ဘၣ်ဆၣ်​ နမ့ၢ်သံကွၢ်အဝဲသ့ၣ်လၢ ကစၢ်ယွၤမ့ၢ် မတၤလဲၣ်အခါ အဝဲသ့ၣ်​ အတၢ်စံးဆၢတဖၣ်တဒ်သိးလိာ်အသးဘၣ်. ပှၤတနီၤတဲဝဲလၢ ကစၢ်ယွၤမ့ၢ်ပှၤလၢ အစံၣ်ညီၣ်တၢ်ဆူၣ်တလၢ ဒီးဃုထဲပှၤတၢ်ကမၣ်လီၤ. အဂၤတနီၤတဲဝဲလၢ ကစၢ်ယွၤအဲၣ်ပှၤ ဒီးသးအိၣ်ပျၢ်တၢ်ကမၣ်ထီဘိလီၤ. ဘၣ်ဆၣ်​ ပှၤအိၣ်ဒံးတနီၤ အနာ်ဝဲလၢ ကစၢ်ယွၤအိၣ်ယံၤဒီးပှၤ ဒီးတသးအိၣ်ပှၤဘၣ်. ခီဖျိလၢတၢ်ဂ့ၢ်တဖၣ်အံၤအဃိ ပှၤအါဂၤဆိကမိၣ်ဝဲလၢ ကစၢ်ယွၤမ့ၢ် မတၤလဲၣ်န့ၣ်​ ပသ့ၣ်ညါအီၤတသ့ဘၣ်.

တၢ်သ့ၣ်ညါယွၤန့ၣ်​ အရ့ဒိၣ်ဧါ. အရ့ဒိၣ်ဝဲလီၤ. ပမ့ၢ်သ့ၣ်ညါကစၢ်ယွၤန့ၣ်​ ကကဲဘျုးလၢပတၢ်အိၣ်မူအဂီၢ်လီၤ. (မၤတၢ် ၁၇:၂၆-၂၈) နမ့ၢ်သုးဘူးနသးဆူယွၤအအိၣ်​ ဒံးအါထီၣ်န့ၣ်​ နကဒိးန့ၢ်ဘၣ်အတၢ်အဲၣ်​ ဒီးအတၢ်မၤစၢၤဒံးအါထီၣ်စ့ၢ်ကီးလီၤ. (ယၤကိာ် ၄:၈) ပမ့ၢ်သ့ၣ်ညါကစၢ်ယွၤ အဂ့ၢ်လီၤတံၢ်လီၤဆဲးန့ၣ်​ ပကဒိးန့ၢ်ဘၣ်တၢ်မူအထူအယိာ်လီၤ.—ယိၤဟၣ်​ ၁၇:၃.

နသ့ၣ်ညါထီၣ်ကစၢ်ယွၤ ကသ့လၢကျဲဒ်လဲၣ်. ဆိကမိၣ်ကွၢ် နအိၣ်ဒီးတံၤသကိးလၢနရ့ဒီးအီၤဘူးဘူးတံၢ်တံၢ်တဂၤအသိးတက့ၢ်. နကဲထီၣ်အတံၤသကိးဒ်လဲၣ်. ခီဖျိလၢ နသ့ၣ်ညါအမံၤ, အတၢ်ပာ်သူၣ်ပာ်သး, တၢ်လၢအဘၣ်သူၣ်ဘၣ်သးဝဲ ဒီးတၢ်လၢအတဘၣ်သူၣ်ဘၣ်သးဝဲတဖၣ်, တၢ်လၢအမၤတ့ၢ်ဝဲတဖၣ်​ ဒီးတၢ်လၢအကမၤဝဲတဖၣ်န့ၣ်လီၤ. ဒ်နသ့ၣ်ညါအါထီၣ်အဂ့ၢ်အသိး နတၢ်ရ့လိာ်သးဒီးအီၤစ့ၢ်ကီး ကဂၢၢ်ကျၢၤထီၣ်ဝဲလီၤ.

ဒ်န့ၣ်အသိး ပသ့ၣ်ညါထီၣ် ကစၢ်ယွၤအဂ့ၢ်သ့ ခီဖျိပဆိကမိၣ်ထံ တၢ်သံကွၢ်တဖၣ်အံၤ–

• ကစၢ်ယွၤန့ၣ်​ အမံၤဒ်လဲၣ်.

• ယွၤမ့ၢ် ကစၢ်ဒ်လဲၣ်တဂၤလဲၣ်.

• ကစၢ်ယွၤမၤတ့ၢ် တၢ်မနုၤတဖၣ်လဲၣ်.

• ကစၢ်ယွၤကမၤန့ၢ်ပှၤ တၢ်မနုၤတဖၣ်လဲၣ်.

• နမ့ၢ်သ့ၣ်ညါ ကစၢ်ယွၤန့ၣ်​ ကကဲဘျုးလၢနဂီၢ်ဒ်လဲၣ်.

လံာ်တဘ့ၣ်အံၤ ပာ်ဖျါထီၣ်ဝဲ တၢ်သံကွၢ်တဖၣ်အံၤ အတၢ်စံးဆၢလၢ လံာ်စီဆှံအပူၤလီၤ. တၢ်မၤလိတဖၣ်အံၤန့ၣ်​ ကမၤစၢၤနၤဒ်သိး နကသ့ၣ်ညါထီၣ်​ ကစၢ်ယွၤမ့ၢ် မတၤလဲၣ်​ ဒီးနမ့ၢ်ကဲထီၣ်​ ယွၤအတံၤသကိးန့ၣ်​ နကဒိးန့ၢ်ဘၣ်အဘျုးအဖှိၣ်မနုၤတဖၣ်လဲၣ်​ အဂ့ၢ်န့ၣ်လီၤ.