နမ့ၢ်သ့ၣ်ညါလၢ ကစၢ်ယွၤသးအိၣ်နၤန့ၣ် ကကဲဘျုးလၢနဂီၢ်ဒ်လဲၣ်
ကစၢ်ယွၤတ့လီၤ ပနီၢ်ခိမိၢ်ပှၢ်ဒ်သိး ဖဲပဘၣ်ဒိဘၣ်ထံးအခါ ဘျါက့ၤဝဲလၢ အနီၢ်ကစၢ်ကသ့အဂီၢ်လီၤ. (ကၠီဟီၣ်ပခၢၤ တၢ်ဆါဟံၣ်အဖၠၣ်စိမိၤကၠိ) ပာ်ဖျါထီၣ်ဝဲလၢ ဖဲပကျီဘၣ်ပစု, ပဖံးဘ့ၣ်ဘၣ်ကွး မ့တမ့ၢ် ပပူၤလီၢ်ထီၣ်အခါ “ပနီၢ်ခိမိၢ်ပှၢ်ရဲၣ်ကျဲၤဝဲဒ်သိး ပတၢ်ပူၤလီၢ်ဒိၣ်မ့ၢ်ဂ့ၤဆံးမ့ၢ်ဂ့ၤ ကဘျါက့ၤဝဲအဂီၢ်လီၤ.” တဘျီဃီန့ၣ် ပမိၢ်ပှၢ်ရဲၣ်ကျဲၤဝဲဒ်သိး ပသွံၣ်ယွၤလီၤကပတုာ်, ပသွံၣ်ကျိၤတဖၣ်ကလဲၢ်ထီၣ်, ပတၢ်ပူၤလီၢ်ကဘျါက့ၤ ဒီးပညၣ်ကဟဲဆှိၣ်ထီၣ်က့ၤအဂီၢ်လီၤ.
ဆိကမိၣ်ကွၢ်. တၢ်ဘၣ်တ့ကစၢ် တ့လီၤပနီၢ်ခိမိၢ်ပှၢ်လၢ အမၤဘျါက့ၤ ပတၢ်ပူၤလီၢ်သ့ဝဲအ ဃိ ပနာ်စ့ၢ်ကီးကစၢ်ယွၤ အတၢ်အၢၣ်လီၤအီလီၤလၢ ကမၤစၢၤပှၤဒ်သိး ပတၢ်သူၣ်ဘၣ်ဒိသးဘၣ်ဒိတဖၣ် ကဘျါက့ၤဝဲအဂီၢ်လီၤ. ဒ်ပှၤကွဲးထါစံးထီၣ်ပတြၢၤတဂၤ တဲဝဲအသိး “အဝဲဒၣ် မၤဘျါက့ၤ ပှၤအသူၣ်ကၢ်အသးလီၤ, ဒီးဘိၣ်ထီၣ် အပူၤလီၢ်တဖၣ်လီၤ.” (စံးထီၣ်ပတြၢၤ ၁၄၇:၃) ဘၣ်ဆၣ် နသးမ့ၢ်ဘၣ်ဒိလၢ နတၢ်လဲၤခီဖျိလၢ အပူၤကွံာ်မ့ၢ်ဂ့ၤ, နတၢ်အိၣ်မူလၢ ခဲအံၤမ့ၢ်ဂ့ၤ နနာ်သ့လၢကစၢ်ယွၤ ကဘိၣ်ထီၣ်နပူၤလီၢ်တဖၣ် လၢဆၢကတီၢ်ခဲအံၤဒီး ခါဆူညါသ့ဝဲလီၤ.
ဘၣ်ဃးဒီး ကစၢ်ယွၤအတၢ်အဲၣ်န့ၣ် လံာ်စီဆှံသိၣ်လိပှၤဒ်လဲၣ်
ကစၢ်ယွၤအၢၣ်လီၤပှၤလၢ “ပျံၤတၢ်တဂ့ၤ. အဂ့ၢ်ဒ်အံၤ, ယအိၣ်ဒီးနၤလီၤ. ကွၢ်တရံးတၢ်တဂ့ၤ, အဂ့ၢ်ဒ်အံၤ, ယမ့ၢ်နကစၢ်လီၤ. ယဒုးဆူၣ်ထီၣ်လံနဂံၢ်နဘါလံ, မ့ၢ်မးယမၤစၢၤလံနၤလံ.” (ယၡါယၤ ၄၁:၁၀) ပှၤတဂၤမ့ၢ်သ့ၣ်ညါဝဲလၢ ယဟိဝၤယွၤ သူၣ်အိၣ်သးအိၣ်အီၤန့ၣ် အဝဲကအိၣ်ဒီးတၢ်သူၣ်မံသးမုာ် ဒီးကဒိးန့ၢ်ဘၣ်တၢ်ဂံၢ်တၢ်ဘါ ဒ်သိးကလဲၤခီဖျိတၢ်မၤကွၢ် အကလုာ်ကလုာ်အဂီၢ်လီၤ. တၢ်မၢဖိပီလူးကိးဝဲ တၢ်သူၣ်မံသးမုာ် တကလုာ်အံၤလၢ “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါ နၢ်ပၢၢ်တၢ်” ဒီးအဝဲတဲစ့ၢ်ကီးဝဲလၢ “ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ် ယဂံၢ်ယဘါတဂၤအပူၤလီၤ.”—ဖံလံးပံၤ ၄:၄-၇, ၉, ၁၃.
လံာ်စီဆှံမၤစၢၤပှၤလၢ ပကမၤဂၢၢ်ကျၢၤထီၣ် ပတၢ်နာ် ဘၣ်ဃးဒီး ယဟိဝၤယွၤ အတၢ်အၢၣ်လီၤလၢ ခါဆူညါအဂီၢ်လီၤ. အဒိ လီၣ်ဖျါ ၂၁:၄, ၅ တဲနၢ်ပၢၢ်ပှၤလၢ ကစၢ်ယွၤကမၤဝဲ တၢ်မနုၤလဲၣ် ဒီးဘၣ်မနုၤအဃိ ပနာ်အီၤသ့လဲၣ်.
-
“ယွၤကထွါကွံာ် [ပှၤဟီၣ်ခိၣ်ဖိ] မဲာ်ထံခဲလၢာ်” လၢအမဲာ်လီၤ. ပတၢ်နးတၢ်ဖှီၣ်, ပတၢ်သူၣ်ကိၢ်သးဂီၤတဖၣ် ဒိၣ်မ့ၢ်ဂ့ၤဆံးမ့ၢ်ဂ့ၤ ကစၢ်ယွၤ ကမၤလီၤမၢ်ကွံာ်ဝဲခဲလၢာ်လီၤ.
-
တၢ်ဘၣ်တ့ကစၢ် “ဆ့ၣ်နီၤလၢလီၢ်ပစိာ်အဖီခိၣ်” ဒီးကသူဝဲအတၢ်စိတၢ်ကမီၤ ဒ်သိးပတၢ်ကီတၢ်ခဲ သုတကဲထီၣ်တဂ့ၤအဂီၢ်လီၤ. တကးဒံးဘၣ် အဝဲကဟ့ၣ်လီၤပှၤ တၢ်မၤစၢၤလၢ ပလိၣ်ဘၣ်တဖၣ်လီၤ.
-
ယဟိဝၤယွၤ ပာ်ဖျါထီၣ်ဝဲလီၤတံၢ်လီၤဆဲးလၢ အတၢ်အၢၣ်လီၤတဖၣ်န့ၣ် “မ့ၢ်အမ့ၢ်အတီ, ဒီးအကလုၢ်တီလီၤ.” အဲၣ်ဒိးတဲဝဲလၢ အဝဲမ့ၢ်ယွၤလၢအမ့ၢ်အတီ ဒီးအမံၤဂ့ၤသၣ်ဂ့ၤဧါန့ၣ် ဒိးသန့ၤထီၣ်အသးလၢ အတၢ်အၢၣ်လီၤအီလီၤအဖီခိၣ်လီၤ.
“ဒီးယွၤကထွါကွံာ် အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢ အခီၣ်ထံးတဖၣ်ပူၤကွံာ်လံ. ဒီးပှၤဆ့ၣ်နီၤလၢ လီၢ်ပစိာ်အဖီခိၣ်တဂၤန့ၣ် စံးဝဲဒၣ်, ကွၢ်ကွၢ်, ယမၤတၢ်အသီခဲလၢာ်လီၤ. ဒီးစံးဘၣ်ယၤ, ကွဲးတၢ်တက့ၢ်. အဂ့ၢ်ဒ်အံၤ, တၢ်ကတိၤအံၤမ့ၢ်အမ့ၢ်အတီ, ဒီးအကလုၢ်တီလီၤ.”—လီၣ်ဖျါ ၂၁:၄, ၅.
လံာ်စီဆှံ ဒီးတၢ်ဘၣ်တ့သ့ၣ်တဖၣ်န့ၣ် ပာ်ဖျါထီၣ်ဝဲ ပပၢ်လၢမူခိၣ် အတၢ်ဂ့ၤတၢ်ဝါသ့ၣ်တဖၣ်လီၤ. တၢ်ဘၣ်တ့တဖၣ် ထိၣ်ဟူးထိၣ်ဂဲၤထီၣ်ပသးလၢ ပကကဲထီၣ်ယွၤအတံၤသကိး ဒီးမ့မ့ၢ်လံာ်စီဆှံန့ၣ် ကွဲမုာ်ပှၤလၢ “သုးဘူးသုသးဆူယွၤအအိၣ်တက့ၢ်, ဒီးကသုးဘူးအသးဆူသုအိၣ်လီၤ.” (ယၤကိာ် ၄:၈) မၤတၢ် ၁၇:၂၇ တဲဝဲလၢ ကစၢ်ယွၤ “အိၣ်တယံၤဘၣ်ဒီးပှၤနီတဂၤဘၣ်.”
သုမ့ၢ်ဟံးန့ၢ်တၢ်ဆၢကတီၢ် ဒီးဃုသ့ၣ်ညါအါထီၣ် ကစၢ်ယွၤအဂ့ၢ်န့ၣ် သုကနာ်လၢ “အသးအိၣ်သုလီၤ.” (၁ ပ့းတရူး ၅:၇) ပမ့ၢ်နာ်န့ၢ် ယဟိဝၤယွၤန့ၣ် ပကဒိးန့ၢ်ဘၣ်အဘျုးဒ်လဲၣ်.
ပကဆိကမိၣ်ကွၢ် ထိရူၤ လၢအအိၣ်လၢကီၢ်ယပၣ် အဂ့ၢ်လီၤ. အမိၢ်လၢအမ့ၢ်ခရံာ်ဖိတဂၤ ကွၢ်လုၢ်ဒိၣ်ထီၣ်အီၤ, ဘၣ်ဆၣ် အဝဲနုာ်လီၤလၢ ယပၣ်ပှၤအၢပှၤသီ (Mafia) တဖုအကျါ လၢအမ့ၢ် ယါခူစၤ (yakuza) န့ၣ်လီၤ. အဝဲတဲဝဲလၢ “ဖဲယထံၣ်ဘၣ်ယသကိးလၢ အဘူးဒီးယၤတဖၣ်သံ, လီၤဆီဒၣ်တၢ် ပှၤလၢယအဲၣ်ဘၣ်အီၤသံအခါန့ၣ် ယတူၢ်ဘၣ်လၢ ကစၢ်ယွၤစံၣ်ညီၣ်ယၤလီၤ. အဃိ ယဆိကမိၣ်လၢ ကစၢ်ယွၤသးဟ့ယၤလီၤ.” ထိရူၤ အၢၣ်လီၤဝဲလၢ ယအိၣ်ဘၣ်လၢ ပှၤအၢပှၤသီအကျါ ဒီးတၢ်ပာ်သူၣ်ပာ်သးလၢ အတဂ့ၤအိၣ်ဝးတရံးယၤထီဘိအဃိ “ယကဲထီၣ်ပှၤမၢးသံလၢ တအိၣ်ဒီးတၢ်ဒိသူၣ်ဒိသးတဂၤလီၤ.” ဘၣ်ဃးဒီး အတၢ်အိၣ်မူတၢ်ပညိၣ်န့ၣ် အဝဲတဲဝဲလၢ “ယအဲၣ်ဒိးမၤသံပှၤလၢ အမံၤဟူသၣ်ဖျါန့ၢ်ယၤ ဒ်သိးယမံၤကဟူသၣ်ကဖျါန့ၢ်ဒံးအလီၢ် ဝံၤအလီၢ်ခံ ယအဲၣ်ဒိးသံဖဲယသးစၢ်ဒံးအခါလီၤ.”
ဖဲထိရူၤ ဒီးအမါ မၤလိဝဲလံာ်စီဆှံအခါ ထိရူၤဆီတလဲထီၣ်အတၢ်အိၣ်မူလီၤ. အမါတဲဝဲလၢ “ယထံၣ်ဘၣ်ယဝၤ ဆီ တလဲအတၢ်အိၣ်မူဖးအါညါ.” ခဲအံၤန့ၣ် ထိရူၤ တဲဝဲလၢ “ကစၢ်ယွၤလၢအကွၢ်ထွဲပှၤန့ၣ် အိၣ်ဝဲတဂၤလီၤ. အဝဲတအဲၣ်ဒိးလၢ ပှၤကသံနီတဂၤဘၣ်. ဒီးအဝဲသးအိၣ်ပျၢ်ကွံာ် ပှၤလၢအပီၢ်ယၢ်လီၤအသးနီၢ်ကီၢ်တဖၣ် အတၢ်ဒဲးဘးလီၤ. တၢ်ဂ့ၢ်တနီၤနီၤန့ၣ် ပတဲပှၤဂၤတသ့နီတဂၤဘၣ် ဒီးတမ့ၢ်လၢအဝဲသ့ၣ် ကနၢ်ပၢၢ်ပှၤစ့ၢ်ကီးဘၣ်. ဘၣ်ဆၣ် ကစၢ်ယွၤန့ၣ် သးအိၣ်ဒိကနၣ်ပှၤ ဒီးနၢ်ပၢၢ်ပှၤလီၤ. ခါဆူညါန့ၣ် ယဟိဝၤယွၤ ကမၤလီၤမၢ်ကွံာ် တၢ်ကီတၢ်ခဲ, တၢ်နးတၢ်ဖှီၣ် ဒီးတၢ်သူၣ်အုးသးအုးခဲလၢာ်လီၤ. ဟီၣ်ခိၣ်တဘ့ၣ်အံၤ ပှဲၤဒီးတၢ်ကီတၢ်ခဲသနာ်က့ နမ့ၢ်နၢ်ပၢၢ်လၢ ကစၢ်ယွၤသးအိၣ်နၤန့ၣ် နလဲၤခီဖျိ တၢ်ကီတၢ်ခဲကန့ၢ်ဝဲလီၤ.”—စံးထီၣ်ပတြၢၤ ၁၃၆:၂၃.
ဒ်ထိရူၤအတၢ်လဲၤခီဖျိ ပာ်ဖျါထီၣ်ဝဲအသိး ပမ့ၢ်သ့ၣ်ညါလၢ ကစၢ်ယွၤကမၤလီၤမၢ်ကွံာ် တၢ်ကီတၢ်ခဲခဲလၢာ် ဒီးထွါကွံာ်ပမဲာ်ထံန့ၣ် ပကအိၣ်ဒီးတၢ်မုၢ်လၢ်လၢခါဆူညါ တကးဒံးဘၣ် မၤစၢၤပှၤလၢခဲအံၤ ပကအိၣ်ဒီးတၢ်အိၣ်မူလၢ အဂ့ၤကတၢၢ်လီၤ. ဟီၣ်ခိၣ်အံၤ ပှဲၤဒီးတၢ်ကီတၢ်ခဲသနာ်က့ နမ့ၢ်သ့ၣ်ညါလၢ ကစၢ်ယွၤအဲၣ်နၤန့ၣ် နဂံၢ်နဘါကဆူၣ်ထီၣ်လီၤ.
တၢ်ဂ့ၤအဂၤလၢ နကဘၣ်သး
တၢးထီခိးတၢ်
မ့ၢ်ပဃုထံၣ်န့ၢ်ယွၤ ကသ့ဧါ
ယွၤအတၢ်ဂ့ၤတၢ်ဝါလၢ ပနၢ်ပၢၢ်တသ့ဘၣ်တဖၣ်န့ၣ် မၤစၢၤနၤသ့လၢ နကသူးဘူးနသးဆူအအိၣ်လီၤ.
