ဖဲပှၤလၢပအဲၣ်ဘၣ်အီၤတဂၤ ဆိးက့ဘူးထီၣ်ကသံအခါ
ဖဲဒိရံၤသ့ၣ်ညါဘၣ်ဝဲလၢ အဝၤ ဝဲစလံၤ အခိၣ်နူာ်အိၣ်ဒီး တၢ်ကိၣ်လိၣ်အခါ အသးလီၤကတုၤဝဲလီၤ. * ဝဲစလံၤ အသးအိၣ်ထဲ ၅၄ နံၣ်သနာ်က့ ကသံၣ်သရၣ်တဲဝဲလၢ အကအိၣ်မူဘၣ်က့ၤထဲ စှၤကိာ်လါလီၤ. ဒိရံၤတဲဝဲလၢ ‘တလီၤနာ်နီတစဲးဘၣ်. လၢအနွံတဖၣ်အတီၢ်ပူၤ ယမၤတၢ်တဘၣ်နီတမံၤလၢၤဘၣ်. ယတဆိကမိၣ်လၢ ယဟံၣ်ဖိဃီဖိကတူၢ်ဘၣ် တၢ်သူၣ်အုးသးအုး ဒ်အံၤနီတဘျီဘၣ်.’
ခီဖျိလၢ တၢ်ဂ့ၢ်ဒ်အံၤဟဲကဲထီၣ်အသးဒီး ပှၤကိးဂၤဒဲးသ့ဝဲအဃိ ပှၤအါဂၤတူၢ်ဘၣ်တၢ်ဒ်ဒိရံၤအသိးလီၤ. ဖဲပှၤအါဂၤသ့ၣ်ညါဝဲလၢ အဟံၣ်ဖိဃီဖိတဂၤ ဆိးက့ဘူးထီၣ်ကသံအခါန့ၣ် အဝဲသ့ၣ်အါဂၤဆၢတဲာ်လီၤအသးလၢ ကကွၢ်ထွဲအီၤလၢဟံၣ်လီၤ. ခီဖျိလၢ အဝဲသ့ၣ်မၤဝဲဒ်အံၤအဃိ လီၤစံးပတြၢၤဒိၣ်မးလီၤ. ဘၣ်ဆၣ် ပမ့ၢ်ဘၣ်ကွၢ်ထွဲ ပဟံၣ်ဖိဃီဖိလၢ အဆိးက့ဘူးကသံတဂၤန့ၣ် တမ့ၢ်တၢ်လၢအညီဘၣ်. ဖဲပဟံၣ်ဖိဃီဖိဆိးက့ ဘူးထီၣ်ကသံအခါ ပမၤမုာ်ထီၣ်အသးဒီး ကွၢ်ထွဲအဝဲသ့ၣ်လၢအဂ့ၤကတၢၢ် ကသ့ဒ်လဲၣ်. ပမ့ၢ်ဘၣ်ကွၢ်ထွဲပှၤလၢ အဆိးက့ဘူးထီၣ်လၢကသံန့ၣ် ပလဲၤခီဖျိတၢ်ကိၢ်တၢ်ဂီၤကသ့ဒ်လဲၣ်. ဖဲအဝဲဘူးထီၣ်ကသံအခါ ပကကွၢ်ဆၢၣ်မဲာ်ဘၣ်ဒီး တၢ်မနုၤလဲၣ်. အဆိကတၢၢ်န့ၣ် ပကဆိကမိၣ်ကွၢ် တၢ်ဂ့ၢ်တခါလီၤ. မုၢ်မဆါတနံၤအံၤ ပမ့ၢ်ဘၣ်ကွၢ်ထွဲပှၤဆါ လၢအဘူးထီၣ်ကသံတဂၤန့ၣ် ဘၣ်မနုၤအဃိ ကဲထီၣ်တၢ်ကီတၢ်ခဲလဲၣ်.
တၢ်ကီတၢ်ခဲလၢ မုၢ်မဆါတနံၤအံၤ
လၢအပူၤကွံာ် အနံၣ်တကယၤန့ၣ် ပှၤမ့ၢ်အိၣ်လၢ ထံကီၢ်လၢအလဲၤထီၣ်လဲၤထီ သနာ်က့ အဝဲသ့ၣ်အါဒၣ်တက့ၢ် အိၣ်မူဝဲတယံာ်ထဲသိးဒီး ပှၤခဲအံၤဘၣ်. ဒီးတၢ်ဆါမ့ၢ်ဘၣ်ကူဘၣ်ဂာ် အဝဲသ့ၣ်မ့ၢ်ဂ့ၤ မ့တမ့ၢ်လၢတၢ်ဘၣ်အတီၤအဃိမ့ၢ်ဂ့ၤ အဝဲသ့ၣ်သံချ့ဝဲလီၤ. ဖဲန့ၣ်အဆၢကတီၢ် တၢ်ဆါဟံၣ်အိၣ်စှၤဝဲအဃိ ပှၤအါတက့ၢ်ကွၢ်ထွဲ ပှၤဆါလၢအဟံၣ်ဒီး ပှၤဆါန့ၣ် သံဝဲလၢဟံၣ်လီၤ.
မုၢ်မဆါတနံၤအံၤ မ့ၢ်လၢကသံၣ်ကသီလဲၤထီၣ်လဲၤထီအဃိ ပှၤအါဂၤမ့ၢ်အိၣ်ဒီးတၢ်ဆါနးမး သနာ်က့ ကသံၣ်သရၣ်မ့ၢ်ဒုးအီၣ်အီၤ ကသံၣ်န့ၣ်ဒုးထီၣ်ထီ အသးသမူသ့ဝဲလီၤ. အဒိ လၢညါန့ၣ်တၢ်ဆူးတၢ်ဆါတနီၤ မၤသံပှၤချ့သဒံးလီၤ. မ့မ့ၢ် မုၢ်မဆါတနံၤအံၤန့ၣ် ခီဖျိလၢ ကသံၣ်ကသီလဲၤထီၣ်လဲၤထီအဃိ အဝဲသ့ၣ်ဆဲးအိၣ်မူသ့ တဘျုးနံၣ်ညါလီၤ. ဘၣ်ဆၣ် တမ့ၢ်လၢအဝဲသ့ၣ်အတၢ်ဆါဘျါက့ၤ အနီၢ်ကီၢ်ဘၣ်. အဝဲသ့ၣ်ဆိးက့နးမးဒီး ကွၢ်ထွဲလီၤအသးတသ့လၢၤဘၣ်. တကးဒံးဘၣ် ဒ်သိးဟံၣ်ဖိဃီဖိတဖၣ် ကကွၢ်ထွဲပှၤဆါတဖၣ်အံၤလၢဟံၣ်အဂီၢ်န့ၣ် ကီဒိၣ်မးလီၤ.
လၢတၢ်န့ၣ်အဃိ ပှၤအါဒၣ်တက့ၢ်တသံလၢ ဟံၣ်ပူၤလၢၤဘၣ်, လၢတၢ်န့ၣ်အလီၢ် အဝဲသ့ၣ်သံလၢ တၢ်ဆါဟံၣ်ပူၤလီၤ. တကးဒံးဘၣ် ပှၤအါတက့ၢ် တကွၢ်ထွဲပှၤဆါတုၤလၢအသံဘၣ်, ဒီးတထံၣ်ဘၣ် ပှၤသံနီတဘျီဘၣ်. ခီဖျိလၢ တၢ်ဂ့ၢ်သ့ၣ်တဖၣ်အံၤအဃိ ပှၤမ့ၢ်ဘၣ်ကွၢ်ထွဲ အဟံၣ်ဖိဃီဖိလၢ အဆိးက့နးမးန့ၣ် အဝဲသ့ၣ်ကဘၣ်ယိၣ်တၢ်ဒိၣ်မးလီၤ. တၢ်မနုၤကမၤစၢၤအဝဲသ့ၣ်လဲၣ်.
ရဲၣ်ကျဲၤဆိပာ်စၢၤ
ဖဲပသ့ၣ်ညါထီၣ်လၢ ပှၤလၢပအဲၣ်ဘၣ်တဂၤ ဆိးက့ဘူးထီၣ်ကသံအခါ ပှၤအါဂၤတူၢ်ဘၣ်ဝဲဒ် ဒိရံၤအသိးလီၤ. နမ့ၢ်အိၣ်ဒီးတၢ်ကိၢ်တဂီၤ, တၢ်ပျံၤတၢ်ဖုးဒီး တၢ်သူၣ်အုးသးအုးန့ၣ် တၢ်မနုၤကမၤစၢၤနၤလၢ နကရဲၣ်ကျဲၤဆိပာ်စၢၤတၢ်လၢ ခါဆူညါအဂီၢ်လဲၣ်. လၢညါန့ၣ် ကစၢ်ယွၤအခ့အပှၤလၢအတီတဂၤ ဃ့ဘါထုကဖၣ်ဒ်အံၤ– “နဲၣ်လိပှၤဒ်သိးပကဂံၢ် ပမုၢ်နံၤတဖၣ်ဒီးပကန့ၢ်ဘၣ်သးလၢ အကူၣ်တၢ်သ့န့ၣ်တက့ၢ်.” (စံးထီၣ်ပတြၢၤ ၉၀:၁၂) တၢ်ဆၢကတီၢ် အိၣ်တ့ၢ်ထဲတစဲးဖိလၢ နကရ့ဒီးပှၤလၢ နအဲၣ်အီၤတဂၤအဃိ နကဘၣ်ဂံၢ်နမုၢ်နံၤတဖၣ်ဒ် လံာ်စီဆှံတဆၢအံၤ တဲဝဲအသိးန့ၣ်လီၤ. ဒ်သိးနသူနတၢ်ဆၢကတီၢ် လၢအဂ့ၤကတၢၢ်ကသ့အဂီၢ် နကဘၣ်ဃ့ထုကဖၣ် ဆူကစၢ်ယဟိဝၤယွၤအအိၣ် လၢနကဂံၢ်နမုၢ်နံၤ လၢတၢ်ကူၣ်သ့အပူၤအဂီၢ်လီၤ.
ပှၤလၢနအဲၣ်ဘၣ်တဂၤ တဲတၢ်မ့ၢ်ကဲဒီး မ့ၢ်သးအိၣ်တဲသကိး ဘၣ်ဃးဒီး အတၢ်အိၣ်ဆူၣ်အိၣ်ချ့အဂ့ၢ်န့ၣ် နကဘၣ်တဲသကိးဒီး အီၤလၢအဆိအချ့လီၤ. အဒိ ခါဆူညါဖဲ အဝဲဆၢတဲာ်လီၤအသး တကဲလၢၤဘၣ် အဆၢကတီၢ်န့ၣ် အဝဲအဲၣ်ဒိးမၢမတၤတဂၤ ဆၢတဲာ်န့ၢ်တၢ်လၢအဂီၢ်လဲၣ်. တကးဒံးဘၣ် အဝဲမ့ၢ်သံတယူာ်န့ၣ် အဝဲကမၢပှၤမၤအီၤဒ်လဲၣ်. အလီၢ်မ့ၢ်အိၣ်န့ၣ် အဝဲအဲၣ်ဒိးလဲၤထီၣ်တၢ်ဆါဟံၣ်ဧါ ဒီးမ့ၢ်အအဲၣ်ဒိးတူၢ်လိာ် တၢ်ကူစါယါဘျါ အကျိၤအကျဲမနုၤတဖၣ်လဲၣ်. ခီဖျိသုတဲသကိးဆိ ဘၣ်ဃးဒီးတၢ်ဂ့ၢ်တဖၣ်အံၤအဃိ ခါဆူညါ ဖဲသုကဘၣ်ဆၢတဲာ်တၢ်လၢအဂီၢ်အခါ ကကဲထီၣ်တၢ်မၤစၢၤဒ်သိး တၢ်နၢ်ပၢၢ်ကမၣ်သုတကဲထီၣ် တဂ့ၤအဂီၢ်လီၤ. တကးဒံးဘၣ် ကမၤစၢၤပှၤဆါအဟံၣ်ဖိဃီဖိ ဒ်သိးအသုတတူၢ်ဘၣ်လၢ အအိၣ်ဒီးတၢ်ကမၣ်တဂ့ၤအဂီၢ်လီၤ. လံာ်စီဆှံတဲဝဲလၢ “တၢ်ကူၣ်လိာ်အသး တအိၣ်ဘၣ်ဒီး, တၢ်ကူၣ်ထီၣ်ဖးလီၤန့ၣ် တကဲထီၣ်ဘၣ်.” လၢတၢ်န့ၣ်အဃိ သုမ့ၢ်တဲသကိး တၢ်ဂ့ၢ်တဖၣ်အံၤပျီပျီန့ၣ် ကကဲထီၣ်တၢ်မၤစၢၤဒ်သိး သုကကွၢ်ထွဲပှၤဆါတဂၤအံၤ လၢအဂ့ၤကတၢၢ်န့ၣ်လီၤ.—ကတိၤဒိ ၁၅:၂၂.
ပမၤစၢၤအီၤကသ့ဒ်လဲၣ်
ပှၤလၢအကွၢ်ထွဲ ပှၤဆါတဂၤန့ၣ် ကအဲၣ်ဒိးမၤမုာ်ထီၣ်က့ၤပှၤဆါအသးလီၤ. ပှၤဆါလၢအဘူးထီၣ်ကသံန့ၣ် လိၣ်ဘၣ်ဝဲတၢ်အဲၣ်တၢ်ကဟုကယာ် ဒီးမုၢ်လၢ်ဝဲလၢပှၤကအိၣ်လၢအကပၤထီဘိလီၤ. မ့မ့ၢ်ဒ်န့ၣ်န့ၣ် ပမၤစၢၤအီၤကသ့ဒ်လဲၣ်. ပဟ့ၣ်ဂံၢ်ဟ့ၣ်ဘါအီၤသ့ခီဖျိ ပဖးန့ၢ်အီၤလံာ် မ့တမ့ၢ် သးဝံၣ်န့ၢ်အီၤတၢ်သးဝံၣ်ဒ်သိး ကကဲထီၣ်တၢ်ဂံၢ်တၢ်ဘါ လၢအဂီၢ်လီၤ. ပှၤအါဂၤလၢအဆိးက့န့ၣ် အဟံၣ်ဖိဃီဖိမ့ၢ်ဖီၣ်ဃာ်အစု ဒီးကတိၤတၢ်ဒီးအီၤ ကယီကယီန့ၣ် ကဒိးန့ၢ်ဘၣ်ဝဲ တၢ်သူၣ်မံသးမုာ်လီၤ.
ပှၤလၢကလဲၤအိၣ်သကိး နဟံၣ်ဖိဃီဖိလၢအဘူးထီၣ်ကသံ တဂၤအံၤန့ၣ် နကဘၣ်သ့ၣ်ညါဆိပာ်စၢၤလီၤ. လံာ်တဘ့ၣ်ပာ်ဖျါထီၣ်ဝဲလၢ– ‘ပှၤဆါအါဂၤလၢအဘူးထီၣ်ကသံန့ၣ် မ့ၢ်ဖျါလၢ အဝဲသ့ၣ်ဘံၣ်အမဲာ်ဒီးမံဘၣ်ဆၣ် ဘၣ်သ့ၣ်သ့ၣ် အဝဲသ့ၣ်နၢ်ဟူတၢ်ဒံးလီၤ. အဃိ ဖဲပအိၣ်လၢအကပၤဒီး ကတိၤတၢ်အခါန့ၣ် ပကဘၣ်ပလီၢ်ပသးလၢ ပတၢ်ကတိၤဒ်သိး အသုတကဲထီၣ် တၢ်သးဘၣ်ဒိလၢအဂီၢ်တဂ့ၤလီၤ.’
မ့ၢ်သ့မ့ၢ်ဘၣ်န့ၣ် ဃ့ဘါထုကဖၣ်သကိးတၢ်ဒီး ပှၤဆါတပူၤဃီတက့ၢ်. လံာ်စီဆှံ ပာ်ဖျါထီၣ်ဝဲလၢ ဘၣ်တဘျီန့ၣ် တၢ်မၢဖိပီလူးဒီး အတံၤသကိးတဖၣ် ထံၣ်ဘၣ်တၢ်နးတၢ်ဖှီၣ် လၢအနးကတၢၢ် ဒီးအဝဲသ့ၣ် အသးသမူ လီၤဘၣ်ယိၣ်ဝဲဒိၣ်မးလီၤ. ဖဲန့ၣ်အဆၢကတီၢ် အဝဲသ့ၣ်ဃ့တၢ်မၤစၢၤဒ်လဲၣ်. စီၤပီလူးဃ့ကညး အတံၤသကိးတဖၣ်လၢက “မၤစၢၤဃုာ်စ့ၢ်ကီး လၢတၢ်ထုကဖၣ်” န့ၣ်လီၤ. (၂ ကရံၣ်သူး ၁:၈-၁၁) အဃိ ဖဲပဟံၣ်ဖိဃီဖိတဂၤ ထံၣ်ဘၣ်တၢ်ကိၢ်တၢ်ဂီၤဒီး တၢ်ဆူးတၢ်ဆါနးနးကလဲာ် အဆၢကတီၢ် ပမ့ၢ်ဃ့ဘါထုကဖၣ်တၢ်လၢ ပသးဒီဖျၢၣ်န့ၣ် ကကဲဘျုးဒိၣ်မးလီၤ.
တူၢ်လိာ်တၢ်လၢအကဟဲကဲထီၣ်သး
ပသ့ၣ်ညါလၢ ကစၢ်ယွၤတတ့လီၤပှၤ ဒ်သိးပကသံအဂီၢ်ဘၣ်. အဃိ ထဲပဆိကမိၣ်ထီၣ်လၢ ပှၤလၢပအဲၣ်ဘၣ်အီၤတဂၤ ကဘၣ်သံအခါန့ၣ် ပသးဘၣ်ဒိဒိၣ်မးလီၤ. (ရိမ့ၤ ၅:၁၂) ကစၢ်ယွၤအကလုၢ်ကထါ ကိးဝဲတၢ်သံလၢ “ဒုၣ်ဒါ” လီၤ. (၁ ကရံၣ်သူး ၁၅:၂၆) အဃိ ပတအဲၣ်ဒိးဆိကမိၣ်ဘၣ်ဃးဒီး ပှၤလၢပအဲၣ်ဘၣ်အီၤတဂၤ ကသံအဂ့ၢ်ဘၣ်.
တမံၤဂ့ၤတမၠိဂ့ၤ ပမ့ၢ်သ့ၣ်ညါဆိပာ်စၢၤ ဒီးတူၢ်လိာ်တၢ်လၢ ကဟဲကဲထီၣ်သးတဖၣ်န့ၣ် ကကဲထီၣ်တၢ်မၤစၢၤလၢ ဟံၣ်ဖိဃီဖိတဖၣ် အတၢ်ဘၣ်ယိၣ်ဘၣ်ဘှီ ကလီၤစှၤဝဲအဂီၢ်လီၤ. တၢ်လွံၢ်နၢၣ်လၢ အခိၣ်တီမ့ၢ်ဝဲ “ ဖဲပှၤဆါဘူးထီၣ်ကသံအခါ” ပာ်ဖျါထီၣ်ဝဲ တၢ်လၢကဟဲကဲထီၣ်အသးတဖၣ်လီၤ. တၢ်ဂ့ၢ်လၢတၢ်လွံၢ်နၢၣ် ပာ်ဖျါထီၣ်ဝဲန့ၣ် ဘၣ်သ့ၣ်သ့ၣ် ပှၤဆါကိးဂၤဒဲးတတူၢ်ဘၣ်ဝဲ ကိးခါဒဲးဘၣ်. ဘၣ်ဆၣ် ပှၤဆါလၢအဘူးထီၣ်ကသံန့ၣ် ကလဲၤခီဖျိဘၣ်ဝဲတနီၤလီၤ.
ဖဲပှၤလၢပအဲၣ်ဘၣ်အီၤတဂၤ သံဝံၤအလီၢ်ခံန့ၣ် ဒ်သိးပတၢ်တူၢ်ဘၣ်ကကိညၢ်လီၤအဂီၢ် ပကဘၣ်ရ့လိာ်သး ဒီးပတံၤသကိးလၢ အသးအိၣ်မၤစၢၤပှၤန့ၣ်လီၤ. ပှၤသံတဂၤအံၤ အဟံၣ်ဖိဃီဖိဒီး ပှၤလၢအကွၢ်ထွဲအီၤတဖၣ် လိၣ်ဘၣ်တၢ်မၤစၢၤဒ်သိး အဝဲသ့ၣ်ကသ့ၣ်နီၣ်ထီၣ်က့ၤလၢ အဟံၣ်ဖိဃီဖိတဂၤအံၤ တတူၢ်ဘၣ်တၢ်ဆါလၢၤဘၣ်. ဒ်တၢ်ဘၣ်တ့ကစၢ် တဲဝဲအသိး “ပှၤသံန့ၣ်တသ့ၣ်ညါဘၣ်တၢ်နီတမံၤဘၣ်.”—စံၣ်တဲၤတဲလီၤတၢ် ၉:၅.
ပှၤကွၢ်ထွဲတၢ်လၢအဂ့ၤကတၢၢ်
ပသ့ၣ်ညါဘၣ်လၢ ပကဘၣ်တူၢ်လိာ် ပှၤကိးဂၤဒဲးအတၢ်မၤစၢၤလီၤ
ဖဲပဟံၣ်ဖိဃီဖိဆိးက့ ဘူးကသံအခါ ပကဘၣ်သန့ၤပသးလၢ ကစၢ်ယွၤအအိၣ်လီၤ. တကးဒံးဘၣ် ဖဲအဝဲသံဝံၤအလီၢ်ခံန့ၣ် ပသးအုးဒိၣ်မးအဃိ ပကဘၣ်ဆဲးသန့ၤပသးလၢ ယဟိဝၤယွၤအအိၣ်လီၤ. ဘၣ်သ့ၣ်သ့ၣ် ကစၢ်ယွၤကမၤစၢၤနၤ ခီဖျိလၢ ပှၤဂၤအတၢ်ကတိၤလၢ အကဲထီၣ်တၢ်ဂံၢ်တၢ်ဘါလၢနဂီၢ်လီၤ. ဒိရံၤတဲဝဲလၢ “ယသ့ၣ်ညါဘၣ်လၢ ယကဘၣ်တူၢ်လိာ် ပှၤကိးဂၤဒဲးအတၢ်မၤစၢၤလီၤ. ခီဖျိလၢ ပှၤဂၤအတၢ်မၤစၢၤအဃိ ပတၢ်သူၣ်ကိၢ်သးဂီၤလီၤစှၤဝဲလီၤ. အဃိ ယၤဒီးယဝၤန့ၣ် ပတူၢ်ဘၣ်လၢ ယဟိဝၤယွၤတဲဘၣ်ပှၤလၢ ‘ယအိၣ်ဒီးသုဒီး ယကမၤစၢၤသုထီဘိလီၤ.’ အဃိ ယတသးပ့ၤနီၣ် ယတၢ်လဲၤခီဖျိအံၤနီတဘျီဘၣ်.”
ယဟိဝၤယွၤ မ့ၢ်ကစၢ်တဂၤလၢ အကွၢ်ထွဲပှၤအဂ့ၤကတၢၢ်လီၤ. ခီဖျိလၢ ကစၢ်ယွၤတ့လီၤပှၤအဃိ အဝဲနၢ်ပၢၢ်ပတၢ်တူၢ်ဘၣ်ဒီး ပတၢ်သူၣ်အုးသးအုးလီၤ. ကစၢ်ယွၤသးအိၣ်ဟ့ၣ်ပှၤ တၢ်လၢပလိၣ်ဘၣ် ဒီးဟ့ၣ်ဂံၢ်ဟ့ၣ်ဘါပှၤဒ်သိး ပလဲၤခီဖျိ ပတၢ်ကီတၢ်ခဲကန့ၢ်အဂီၢ်လီၤ. တကးဒံးဘၣ် ကစၢ်ယွၤအၢၣ်လီၤအီလီၤပှၤလၢ တယံာ်လၢၤဘၣ်န့ၣ် အဝဲကမၤလီၤမၢ်ကွံာ် တၢ်သံတၢ်ပှၢ်ခဲလၢာ်ဒီး ကမၤဂဲၤဆၢထၢၣ် သမူထီၣ်က့ၤပှၤသံတ့ၢ်လၢ အကကွဲၢ်လၢအကထိတဖၣ် န့ၣ်လီၤ. (ယိၤဟၣ် ၅:၂၈, ၂၉; လီၣ်ဖျါ ၂၁:၃, ၄) ဖဲန့ၣ်အဆၢကတီၢ် ဒ်စီၤပီလူးအသိးပကတဲလၢ “တၢ်သံဧၢ, နစုကဝဲၤအိၣ်ဖဲလဲၣ်. ပျုၤပူၤဧၢ, နတၢ်မၤနၢၤမၤဃၣ်အိၣ်ဖဲလဲၣ်.”—၁ ကရံၣ်သူး ၁၅:၅၅.
^ လံာ်အဆၢ. 2 ပှၤမံၤတနီၤဘၣ်တၢ်ဆီတလဲအီၤလီၤ.
တၢ်ဂ့ၤအဂၤလၢ နကဘၣ်သး
တၢ်သံကွၢ်တဖၣ်လၢ အတၢ်စံးဆၢအိၣ်လၢ လံာ်စီဆှံပူၤ
နမ့ၢ်အိၣ်ဒီးတၢ်ဆါ ယံာ်ယံာ်ထၢထၢန့ၣ် လံာ်စီဆှံမၤစၢၤနၤသ့ဧါ
သ့ဝဲ. တၢ်ဂ့ၢ်သၢထံၣ်လၢ ကမၤစၢၤနၤလၢ နလဲၤခီဖျိ တၢ်ဆါယံာ်ယံာ်ထၢထၢ ကန့ၢ်ဝဲအဂီၢ်.
