ဝဲၤတြၢ် လၢကီၢ်ဖြၣ်စ့ၣ် မၢဝဲဒီပုၢ်ဝဲၢ်ခွါနံၣ်ခိလဲး ဒီးဒီပုၢ်ဝဲၢ်မုၣ်စလံ လဲၤပၠီလၢ တၢ်အိၣ်ဖှိၣ်အသီတဖျၢၣ် ဒီးအဝဲသ့ၣ် တူၢ်လိာ်ဝဲမူဒါအံၤ. အဝဲသ့ၣ် ထံၣ်ဘၣ်စ့ၢ်ကီး တၢ်အိၣ်သးအသီ ဒီးတဲဝဲလၢ “ခီၣ်ထံးခါန့ၣ် ပသးခုဒိၣ်မး, ဘၣ်ဆၣ် လၢခံဘျီ ပသးသယုၢ်ဘၣ် ပသကိးတဖၣ်. မ့ၢ်ဘၣ်တဲတီတီန့ၣ် ပတရ့လိာ်ဘၣ်သးဒီး ဒီပုၢ်ဝဲၢ်မုၣ်ခွါ လၢပတၢ်အိၣ်ဖှိၣ် အသီတဖျၢၣ်အံၤ ဘူးဘူးတံၢ်တံၢ်ဒံးဘၣ်.” a လၢတၢ်လဲၤခီဖျိအံၤ ပသ့ၣ်ညါဘၣ်လၢ ပမ့ၢ်လဲၤပၠီလၢ တၢ်အိၣ်ဖှိၣ် အသီတဖျၢၣ်န့ၣ် ပကထံၣ်ဘၣ် တၢ်အိၣ်သးအသီ ဒီးအကကီဝဲ. ဘၣ်ဆၣ် ဒ်သိး ပကဆဲးအိၣ်ဒီး တၢ်သးခု ဒီးပမၤတၢ် ကကဲထီၣ်လိၣ်ထီၣ်အဂီၢ် တၢ်မနုၤ ကမၤစၢၤပှၤလဲၣ်. ပှၤဂၤမၤစၢၤပှၤ ကသ့ဒ်လဲၣ်. ဒီးလၢတၢ်အိၣ်ဖှိၣ် အသီတဖျၢၣ်န့ၣ် ပကဲထီၣ် တၢ်ဟ့ၣ်ဂံၢ်ဟ့ၣ်ဘါ လၢပှၤဂၤအဂီၢ် ဒီးပဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ ကသ့ဒ်လဲၣ်.

နလဲၤခီဖျိ တၢ်အိၣ်သးအသီ ကသ့အဂီၢ် လံာ်စီဆှံ အတၢ်ဟ့ၣ်ကူၣ် လွံၢ်ခါလၢ ကမၤစၢၤနၤ

၁. သန့ၤနသးလၢ ယဟိဝၤယွၤ. (စံး ၃၇:၅) ဒီပုၢ်ဝဲၢ်မုၣ်ခးစူမံးန့ၣ် အအိၣ်လၢ ကီၢ်ယပၣ် ဒီးတချုး အပၠီလၢ တၢ်အိၣ်ဖှိၣ်အသီတဖျၢၣ် ဒံးဘၣ်န့ၣ် အအိၣ်လၢ အတၢ်အိၣ်ဖှိၣ်လီၢ်လံၤ န့ၢ်အနံၣ် ၂၀ ညါ. အဝၤ န့ၢ်ဘၣ်တၢ်မၤလၢ တၢ်လီၢ်အဂၤတတီၤအဃိ အဘၣ်လဲၤပၠီလၢ တၢ်အိၣ်ဖှိၣ်အသီတဖျၢၣ်. အဃိ ဒီပုၢ်ဝဲၢ်မုၣ်ခးစူမံး “ပျဲယဟိဝၤယွၤ ဟံးစုနဲၣ်ကျဲ [အီၤ]” ဒ်လဲၣ်. အတဲဝဲလၢ “ယဃ့ထုကဖၣ်လၢ ယဟိဝၤယွၤအအိၣ် တလီၢ်လီၢ် ဒီးတဲဘၣ်အီၤ ယတၢ်ပျံၤတၢ်ဖုး, ယတၢ်ဘၣ်ယိၣ် ဒီးတၢ်သယုၢ်သညိ လၢယတူၢ်ဘၣ်. ဒီးယထံၣ်ဘၣ်လၢ ယဟိဝၤယွၤ စံးဆၢယၤ ဒီးဟ့ၣ်ယၤ တၢ်ဂံၢ်တၢ်ဘါလၢ ယလိၣ်ဘၣ် ကိးဘျီဒဲး.”

နၤမီၤ, နမၤအါထီၣ် နတၢ်နာ်န့ၢ် ယဟိဝၤယွၤ ကသ့ဒ်လဲၣ်. အဒိ ဒ်သိး တၢ်မုၢ်တၢ်ဘိတထူၣ် ကဒိၣ်ထီၣ် အါထီၣ်အဂီၢ် အကလိၣ်ဘၣ် ထံဒီးတၢ်ဂံၢ်တၢ်ဘါလၢ ဟီၣ်ခိၣ်ညၣ်အကျါ. ဒ်န့ၣ်အသိး ပတၢ်နာ် ကဒိၣ်ထီၣ်အဂီၢ် ပကဘၣ် မၤဂၢၢ်ကျၢၤထီၣ်အီၤလၢ ကစၢ်ယွၤ အကလုၢ်ကထါ လၢအလီၤဂာ်ဒီး ထံဒီးတၢ်အီၣ်လၢ အန့ၢ်ဂံၢ်န့ၢ်ဘါ ထီဘိ. ဒီပုၢ်ဝဲၢ်ခွါနံၣ်ခိလဲး လၢပဖးဘၣ် အဂ့ၢ်န့ၣ် အတဲဝဲလၢ အဆိကမိၣ်ထံ ပှၤလၢအသးအိၣ်ဟ့ၣ်လီၤသး လၢကမၤ ကစၢ်ယွၤအတၢ်ဘၣ်သး ဒ်သိးဒီး စီၤအၤဘြၤဟၣ်, ယ့ၣ်ၡူး ဒီးစီၤပီလူးအဂ့ၢ်. အဆိကမိၣ်ထံ ပှၤတဖၣ်အံၤ အဂ့ၢ်အဃိ အတၢ်နာ်လၢ ယဟိဝၤယွၤအဖီခိၣ် ဂၢၢ်ကျၢၤထီၣ်ဝဲ ဒီးအနာ်သပှၢ်တၢၢ်လၢ ယဟိဝၤယွၤ ကမၤစၢၤအီၤ. နၤစ့ၢ်ကီး နမ့ၢ်မၤ နီၢ်ကစၢ် တၢ်မၤလိလံာ်စီဆှံ ထီဘိန့ၣ် ကမၤစၢၤနၤဒ်သိး နလဲၤခီဖျိ တၢ်အိၣ်သးအသီလၢ နတၢ်အိၣ်မူပူၤကန့ၢ်. တကးဒံးဘၣ် တၢ်ဂ့ၢ်တၢ်ကျိၤလၢ နမၤလိဘၣ်န့ၣ် နသူအီၤဒ်သိး ကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါလၢ နတၢ်အိၣ်ဖှိၣ်အသီတဖျၢၣ် အပူၤသ့.

၂. ထိၣ်သတြီၤ နတၢ်အိၣ်ဖှိၣ်အလီၢ်လံၤ ဒီးနတၢ်အိၣ်ဖှိၣ်အသီတဂ့ၤ. (စံၣ် ၇:၁၀) အဒိ ဒီပုၢ်ဝဲၢ်ခွါကၠူန့ၣ် အအိၣ်လၢကီၢ်ဘဲနံ ဒီးဖဲအလဲၤပၠီလၢ ကီၢ်အမဲရကၤအခါ အထံၣ်ဘၣ် တၢ်အိၣ်သးအသီ ဖးဒိၣ်တခါ ဘၣ်ဃးဒီး လုၢ်လၢ်ဒီးတၢ်ဆဲးတၢ်လၤ. အတဲဝဲလၢ “ယမ့ၢ်ထံၣ်လိာ်သးဒီး ပှၤအသီ တဂၤဂ့ၤ တဂၤဂ့ၤန့ၣ် ယတူၢ်ဘၣ်လၢ ယကဘၣ် တဲပၠးအဝဲသ့ၣ်လၢ ယဂ့ၢ်ယကျိၤ.” မ့မ့ၢ်လၢ ဒီပုၢ်ဝဲၢ်ခွါကၠူ အိၣ်တၢ်လီၢ်န့ၣ် လုၢ်လၢ် ဒီးတၢ်ဆဲးတၢ်လၤ တအိၣ်ဒ်န့ၣ်ဘၣ်အဃိ အမ့ၢ်ထံၣ် ဒီပုၢ်ဝဲၢ်မုၣ်ခွါ တဂၤဂၤန့ၣ် အဟးဆှဲးဝဲ. သနာ်က့ ဒီပုၢ်ဝဲၢ်ခွါကၠူ ရ့လိာ်သးဒီး ဒီပုၢ်ဝဲၢ်မုၣ်ခွါ ဒီးသ့ၣ်ညါအါထီၣ် အဝဲသ့ၣ်အဂ့ၢ်အဃိ မၤစၢၤအီၤလၢ အကဆီတလဲက့ၤ အတၢ်ထံၣ်. အတဲဝဲလၢ “ခဲအံၤ ယသ့ၣ်ညါဘၣ်လၢ ပမ့ၢ်အိၣ် တၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ ပကဲပှၤဟီၣ်ခိၣ်ဖိ ဒ်သိးသိး. တၢ်လၢအလီၤဆီန့ၣ် အိၣ်ဒၣ်ပတဲတၢ် ဒီးပမၤတၢ်လီၤ. အဃိ ပှၤတဂၤ အတၢ်ပာ်သူၣ်ပာ်သး မ့ၢ်လီၤဆီဒီးပှၤ သနာ်က့ အရ့ဒိၣ်လၢ ပကဆဲးရ့ဒီးအီၤ.” လၢတၢ်လဲၤခီဖျိအံၤ ပသ့ၣ်ညါဘၣ်လၢ ပတဘၣ်ထိၣ်သတြီၤ ပတၢ်အိၣ်ဖှိၣ်အလီၢ်လံၤ ဒီးပတၢ်အိၣ်ဖှိၣ်အသီဘၣ်. ဒီပုၢ်ဝဲၢ်မုၣ်အဲလံး လၢအကဲပှၤလဲၤလၢညါန့ၣ် တဲဝဲလၢ “ယပၠီလၢ တၢ်လီၢ်အသီန့ၣ် ခီဖျိလၢ ယဘၣ်သး မၤလိန့ၢ်တၢ်အသီ. အဃိ ယသ့ၣ်ညါလၢ တၢ်အိၣ်သးခဲလၢာ် တဒ်သိးဒီး ယအိၣ်တၢ်လီၢ် လၢအပူၤကွံာ်ဘၣ်.”

တၢ်အိၣ်ဖှိၣ်သးပှၢ်စ့ၢ်ကီး တဘၣ်ထိၣ်သတြီၤ အတၢ်အိၣ်ဖှိၣ်အလီၢ်လံၤ ဒီးအတၢ်အိၣ်ဖှိၣ်အသီဘၣ်. အဒိ နကထံၣ်ဘၣ်လၢ ဒီပုၢ်ဝဲၢ်လၢ နတၢ်အိၣ်ဖှိၣ်အသီတဖျၢၣ် မၤတၢ် အကျိၤအကျဲန့ၣ် လီၤဆီဒီး နတၢ်အိၣ်ဖှိၣ်လီၢ်လံၤအဃိ ဘၣ်သ့ၣ်သ့ၣ် နကဆိကမိၣ်လၢ အဝဲသ့ၣ် မၤတၢ်န့ၣ် တဘၣ်ဘၣ်. ဘၣ်ဆၣ် တချုးလၢ နတဲဖျါထီၣ် နတၢ်ထံၣ်ဒံးဘၣ်န့ၣ် ဃုသ့ၣ်ညါဆိ လီၢ်ကဝီၤတၢ်အိၣ်သး ဝံၤမၣ်တဲဖျါထီၣ်. (စံၣ် ၃:၁, ၇) တကးဒံးဘၣ် နမ့ၢ်ပာ်လီၤ တၢ်ဒိတၢ်တဲာ်အဂ့ၤ လၢဒီပုၢ်ဝဲၢ်မုၣ်ခွါအဂီၢ်န့ၣ် အဂ့ၤဒိၣ်န့ၢ်ဒံး နမၢဆူၣ်အဝဲသ့ၣ်လၢ ကမၤထွဲ နတၢ်ထံၣ်ဒံး.—၂ ကရံၣ် ၁:၂၄.

၃. မၤသကိးတၢ်ဒီး ဒီပုၢ်ဝဲၢ်မုၣ်ခွါလၢ နတၢ်အိၣ်ဖှိၣ်အသီ အါအါ. (ဖံလံး ၁:၂၇) နမ့ၢ်ပၠီတၢ်လီၢ်န့ၣ် နတၢ်ဆၢကတီၢ် ဒီးတၢ်ဂံၢ်တၢ်ဘါ ကလၢာ်အါမး. သနာ်က့ မ့ၢ်သ့န့ၣ် ဂုာ်ကျဲးစၢး လဲၤထီၣ်တၢ်အိၣ်ဖှိၣ်လၢ နတၢ်အိၣ်ဖှိၣ်အသီ ဒီးလဲၤထီၣ်လၢ တၢ်အိၣ်ဖှိၣ်လီၢ်. ဒီပုၢ်ဝဲၢ်မုၣ်ခွါလၢ နတၢ်အိၣ်ဖှိၣ်အသီ မ့ၢ်တထံၣ်နၤ နီတဘျီဘၣ် မ့တမ့ၢ် ထံၣ်နၤထဲ တဘျီတခီၣ်န့ၣ် အဝဲသ့ၣ် ရ့ဒီးနၤ ဒီးမၤစၢၤနၤ ကသ့ဒ်လဲၣ်. ဒီပုၢ်ဝဲၢ်မုၣ်လူၤစ့ဒၤ ဃုာ်ဒီးအဖိမုၣ်ခံဂၤ လဲၤပၠီလၢ ဝ့ၢ်ဖးဒိၣ်တဖျၢၣ်လၢ ကလံၤထံး အၤဖြံၤကၤ. အနီၣ်ဘၣ်က့ၤဝဲ အသကိးတၢ်ကတိၤ ဒီးတဲဝဲလၢ “ယသကိး ဟ့ၣ်ကူၣ်ယၤလၢ ယကရ့ဒီး ဒီပုၢ်ဝဲၢ်မုၣ်ခွါလၢ ယတၢ်အိၣ်ဖှိၣ်အသီ အါအါ, လဲၤစံၣ်တဲၤတဲလီၤတၢ်ဒီး အဝဲသ့ၣ် ဒီးဟ့ၣ်ထီၣ် တၢ်စံးဆၢ ဖဲယထီၣ်တၢ်အိၣ်ဖှိၣ်အခါ. တကးဒံးဘၣ် ပပျဲစ့ၢ်ကီးလၢ ဒီပုၢ်ဝဲၢ်မုၣ်ခွါကဟဲမၤ တၢ်အိၣ်ဖှိၣ်လၢ တၢ်စံၣ်တဲၤတဲလီၤတၢ်အဂီၢ် လၢပဟံၣ်.”

နၤစ့ၢ်ကီး နမ့ၢ် “မၤသကိးတၢ် ဃူဃူဖိးဖိး” လၢယဟိဝၤယွၤအတၢ်မၤ ဃုာ်ဒီး ဒီပုၢ်ဝဲၢ်မုၣ်ခွါ လၢနတၢ်အိၣ်ဖှိၣ်အသီန့ၣ် ကမၤစၢၤနၤ ဒီးဒီပုၢ်ဝဲၢ်မုၣ်ခွါလၢ သုကဆဲးအိၣ်ဒီး “တၢ်နာ်ဘၣ်ဃးဒီး တၢ်သးခုကစီၣ်.” ဒီပုၢ်ဝဲၢ်မုၣ်အဲလံး အတၢ်အိၣ်ဖှိၣ်သးပှၢ် ဟ့ၣ်ကူၣ်အီၤလၢ အကဂုာ်ကျဲးစၢး လဲၤစံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်ခွါကိးဂၤဒဲး လၢအတၢ်အိၣ်ဖှိၣ်အသီ. အမၤဝဲဒ်န့ၣ်အဃိ  ကဲဘျုးဒ်လဲၣ်. အတဲဝဲလၢ “ယမၤဒ်အံၤအဃိ ယတူၢ်ဘၣ်လၢ ယကဲတၢ်အိၣ်ဖှိၣ်ဖိ လၢယတၢ်အိၣ်ဖှိၣ်အသီ တဖျၢၣ်အံၤအပူၤ ချ့မး.” တကးဒံးဘၣ် နမ့ၢ်သးအိၣ် မၤစၢၤတၢ်လၢ တၢ်မၤကဆှဲကဆှီ ဒီးတၢ်ကွၢ်ထွဲကတီၤ ဘီမုၢ်ဘျီၣ်ဒိၣ်န့ၣ် နပာ်ဖျါန့ၢ် ဒီပုၢ်ဝဲၢ်မုၣ်ခွါတဖၣ်လၢ နကဲတၢ်အိၣ်ဖှိၣ်ဖိ လၢတၢ်အိၣ်ဖှိၣ်အသီ တဖျၢၣ်အံၤအပူၤ. နမ့ၢ်မၤသကိးတၢ်ဒီး ဒီပုၢ်ဝဲၢ်မုၣ်ခွါ အါအါန့ၣ် အဝဲသ့ၣ် ရ့နၤကဘူၣ်ဒိၣ်ထီၣ် ဒီးနကတူၢ်ဘၣ်လၢ အဝဲသ့ၣ်ကဲဝဲ နဟံၣ်ဖိဃီဖိလၢ နီၢ်သးတခီ.

၄. ဃုအါထီၣ်သကိးအသီ. (၂ ကရံၣ် ၆:၁၁-၁၃) ဒီပုၢ်ဝဲၢ်မုၣ်ခွါ မ့ၢ်သ့ၣ်ညါလၢ နသးအိၣ် အဝဲသ့ၣ်န့ၣ် အဝဲသ့ၣ် ရ့နၤကဘူၣ်ဒိၣ်ထီၣ်. အဃိဒ်သိး နကရ့လိာ်သး ဒီးတဲသကိးဘၣ်တၢ်ဒီး ဒီပုၢ်ဝဲၢ်မုၣ်ခွါအဂီၢ် ဟဲထီၣ်တၢ်အိၣ်ဖှိၣ်ဆိဆိ ဒီးအိၣ်တုၤလၢ တၢ်အိၣ်ဖှိၣ်ဝံၤ. ဒီးဂုာ်ကျဲးစၢး တိၢ်နီၣ်ဃာ် ဒီပုၢ်ဝဲၢ်မုၣ်ခွါအမံၤ. နမ့ၢ်ဂုာ်ကျဲးစၢး တိၢ်နီၣ်ဃာ်ပှၤမံၤ ဒီးသးအိၣ်ရ့ဒီးပှၤဂၤန့ၣ် ပှၤဟဲရ့နၤကဘူၣ် ဒီးလၢခံန့ၣ် နသကိး ကအိၣ်ဒီဒူၣ်.

ဒ်သိး ပှၤဂၤကဘၣ်သူၣ်ဘၣ်သးနၤအဂီၢ် အိၣ်ဒ်နအိၣ်ညီနုၢ်အသိး ဒီးတဘၣ်ပာ်မၤသးတဂ့ၤ. ဟံးန့ၢ်တၢ်မၤလိလၢ ဒီပုၢ်ဝဲၢ်မုၣ်လူၤစ့ဒၤအအိၣ် လၢအတဲဝဲလၢ “ခီဖျိလၢ ပကွဲဟးဆိပှၤဂၤ လၢပဟံၣ်အဃိ ခဲအံၤ ပတၢ်ရ့လိာ်သးဒီး ပသကိးအသီတဖၣ် ဂ့ၤထီၣ်ဒိၣ်မး.”

“တူၢ်လိာ်လိာ်သး တဂၤဒီးတဂၤ”

ပှၤတနီၤ မ့ၢ်လဲၤနုာ်လၢ တၢ်အိၣ်ဖှိၣ်လီၢ် ဒီးထံၣ်ဘၣ်ထဲ ပှၤလၢအတသ့ၣ်ညါဝဲ နီတဂၤဘၣ်န့ၣ် ဘၣ်သ့ၣ်သ့ၣ် အကဘၣ်ယိၣ်တၢ်. အဃိ နမၤစၢၤ ပှၤလၢအဟဲပၠီလၢ နတၢ်အိၣ်ဖှိၣ် ကသ့ဒ်လဲၣ်. တၢ်မၢဖိပီလူး တဲဘၣ်ပှၤလၢ “ဒ်ခရံာ် တူၢ်လိာ်ပှၤအသိး” ပကဘၣ် “တူၢ်လိာ်လိာ်သး တဂၤဒီးတဂၤ.” (ရိ ၁၅:၇) တကးဒံးဘၣ် တၢ်အိၣ်ဖှိၣ်သးပှၢ်တဖၣ် ကွၢ်လိ ယ့ၣ်ၡူးခရံာ် သ့ခီဖျိ အတူၢ်လိာ်ခီၣ်ဆၢ ပှၤအသီတဖၣ်. (ကွၢ်တၢ်လွံၢ်နၢၣ် လၢအမ့ၢ် “ ဒ်သိး နသုးလီၢ်သုးကျဲ ကလဲၤသးဂ့ၤဂ့ၤအဂီၢ် တၢ်မနုၤ ကမၤစၢၤနၤလဲၣ်.”) သနာ်က့ ဒ်သိး ပှၤလၢအဟဲပၠီလၢ နတၢ်အိၣ်ဖှိၣ် ကတူၢ်ဘၣ်လၢ ပှၤတူၢ်လိာ် အဝဲသ့ၣ်အဂီၢ် တၢ်အိၣ်ဖှိၣ်ဖိခဲလၢာ် ဃုာ်ဒီးဖိသၣ်စ့ၢ်ကီး အိၣ်ဒီးမူဒါလၢ ကမၤစၢၤ ဒီးရ့လိာ်သးဒီး အဝဲသ့ၣ်.

ပတူၢ်လိာ်ပှၤဂၤ သ့ခီဖျိ ပကွဲဟးပှၤဂၤ လၢပဟံၣ် ဒီးမၤစၢၤပှၤဂၤလၢ တၢ်လၢအဝဲသ့ၣ် လိၣ်ဘၣ်ဝဲ တမံၤမံၤ. အဒိ ဒီပုၢ်ဝဲၢ်မုၣ်တဂၤ မၤစၢၤဝဲ ဒီပုၢ်ဝဲၢ်မုၣ်အဂၤတဂၤ လၢအဟဲပၠီလၢ အအိၣ်တၢ်လီၢ် ခီဖျိအပၠးအီၤလၢ အကဘၣ်ဒိးဘၢးစကါ ဒီးလ့ၣ်မ့ၣ်အူဒ်လဲၣ် ဒီးလဲၤဒုးနဲၣ်အီၤ တၢ်လီၢ်တၢ်ကျဲ လၢဝ့ၢ်ပူၤ. ဒီပုၢ်ဝဲၢ်မုၣ် လၢအဟဲပၠီလၢ တၢ်လီၢ်အသီအံၤ အသးမုာ်ဒိၣ်မး ဒီးအတူၢ်ဘၣ်ဝဲလၢ အဒိးန့ၢ်ဘၣ် တၢ်ကဟုကယာ်ဂ့ၤဂ့ၤ.

 တၢ်ခွဲးတၢ်ယာ်အိၣ်လၢ နကဒိၣ်ထီၣ်ထီထီၣ် လၢနီၢ်သးတခီ

အဒိ ထိၣ်ဖိလၢ အယူၤလိထီၣ် သီသီတဘ့ၣ် ကပာ်တ့ၢ်အကသွံ ဒီးယူၤဝဲဖးယံၤအဂီၢ် ခီၣ်ထံးခါန့ၣ် အကပျံၤတၢ်. ဘၣ်ဆၣ် အမ့ၢ်စးထီၣ်ယူၤဝဲန့ၣ် အကယူၤဝဲဖးယံၤ. ဒ်န့ၣ်အသိး ဖဲပပၠီလၢ တၢ်အိၣ်ဖှိၣ်အသီအခါ ပကဘၣ်ယိၣ်တၢ်အဃိ ဒ်သိး ပကဆဲး ဒိၣ်ထီၣ်ထီထီၣ် လၢနီၢ်သးတခီအဂီၢ် ပကဘၣ် မၤလီၤမၢ်ကွံာ် ပတၢ်ပျံၤတၢ်ဖုး. ဒီပုၢ်ဝဲၢ်ခွါနံၣ်ခိလဲး ဒီးဒီပုၢ်ဝဲၢ်မုၣ်စလံ တဲဝဲလၢ “ပလဲၤပၠီလၢ တၢ်လီၢ်အသီတတီၤန့ၣ် အကဲဝဲ တၢ်မၤလိအဂ့ၤလၢပဂီၢ်. ဖဲန့ၣ်န့ၣ် ပထံၣ်ဘၣ်ဒီး ပှၤအသီ ဒီးတၢ်အိၣ်သးအသီအဃိ ပကဘၣ်ဒုးအိၣ်ထီၣ် တၢ်ဂ့ၤတၢ်ဝါ လၢအသီတဖၣ်.” ဒီပုၢ်ဝဲၢ်ခွါကၠံခၠါ လၢပဖးဘၣ်အဂ့ၢ် လၢအခီၣ်ထံးန့ၣ် တဲဝဲလၢ အဟံၣ်ဖိဃီဖိ ဒိးန့ၢ်ဘၣ် အဘျုးအါမး. အတဲဝဲလၢ “ပဖိတဖၣ် ဒိၣ်ထီၣ်ထီထီၣ်လၢ နီၢ်သးတခီ ဒီးအဝဲသ့ၣ် တၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ်ဝဲ. ဖဲပပၠီဝံၤစှၤကိာ်လါန့ၣ် ပဖိမုၣ်မၤဝဲ ကၠိဖိမူဒါလၢ နွံဖးဖီတၢ်အိၣ်ဖှိၣ် ဒီးပဖိခွါ ကဲထီၣ်ပှၤစံၣ်တဲၤတဲလီၤတၢ်ဖိလၢ တဒိးဘျၢဘၣ်ထံဒံးဘၣ်.”

ခီဖျိလၢ နတၢ်အိၣ်သးအဃိ နလဲၤပၠီလၢ တၢ်လီၢ်လၢပှၤလိၣ်ဘၣ်တၢ်မၤစၢၤ မ့ၢ်တသ့ဘၣ် သနာ်က့ နမၤမနုၤသ့လဲၣ်. ဖဲနအိၣ်လၢ နတၢ်အိၣ်ဖှိၣ်အလီၢ်လီၢ်အခါ နမၤထွဲတၢ်ဟ့ၣ်ကူၣ်လၢ တၢ်ဂ့ၢ်တခါအံၤ ပာ်ဖျါထီၣ်ဝဲသ့. သန့ၤနသးလၢ ယဟိဝၤယွၤ, မၤသကိး ကစၢ်ယွၤအတၢ်မၤဒီး ဒီပုၢ်ဝဲၢ်မုၣ်ခွါလၢ နတၢ်အိၣ်ဖှိၣ်အပူၤ ခီဖျိ ဟးစံၣ်တဲၤတဲလီၤတၢ် ဒ်သိးသိး, ရ့အါထီၣ်ဒီး အဝဲသ့ၣ် ဒီးကဲထီၣ်တံၤသကိး လၢအဂ့ၤ. ဒီးနမၤစၢၤပှၤအသီ ဒီးပှၤလၢအလိၣ်ဘၣ် တၢ်မၤစၢၤတဖၣ် သ့စ့ၢ်ကီး. နမ့ၢ်မၤစၢၤပှၤဂၤန့ၣ် နပာ်ဖျါထီၣ် ခရံာ်ဖိအမ့ၢ်အတီ အတၢ်ပနီၣ် လၢအမ့ၢ် တၢ်အဲၣ် ဒီးနတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. (ယိၤဟၣ် ၁၃:၃၅) နမ့ၢ်မၤထွဲ တၢ်ဟ့ၣ်ကူၣ်တဖၣ်အံၤန့ၣ် နနာ်သ့လၢ န “တၢ်လုၢ်ဒ်အံၤတဖၣ်န့ၣ် ကစၢ်ယွၤ ဘၣ်သူၣ်ဘၣ်သးဝဲ ဒိၣ်မး.”—ဧ့ၤ ၁၃:၁၆.

ဒီပုၢ်ဝဲၢ်မုၣ်ခွါလၢ အလဲၤပၠီလၢ တၢ်အိၣ်ဖှိၣ်အသီန့ၣ် ထံၣ်ဘၣ်ဝဲ တၢ်အိၣ်သးအသီ သနာ်က့ အဝဲသ့ၣ် လဲၤခီဖျိဝဲန့ၢ်. အဃိ နၤစ့ၢ်ကီး နလဲၤခီဖျိ တၢ်အိၣ်သးအသီ ကန့ၢ်စ့ၢ်ကီး. ဒီပုၢ်ဝဲၢ်မုၣ်အဲလံး တဲဝဲလၢ “ယလဲၤပၠီလၢ တၢ်အိၣ်ဖှိၣ်အသီန့ၣ် မၤစၢၤယၤလၢ ယကအိၣ်ဒီး တၢ်ထံၣ်လၢအလဲၢ်.” မ့မ့ၢ် ဒီပုၢ်ဝဲၢ်မုၣ်ခးစူမံးန့ၣ် အတဲဝဲလၢ “ဖဲယပၠီလၢ တၢ်အိၣ်ဖှိၣ်အသီအခါ ယထံၣ်ဘၣ် ယဟိဝၤယွၤ အတၢ်မၤစၢၤ လၢကျဲအဘိဘိ.” ဒီးမ့မ့ၢ် ဒီပုၢ်ဝဲၢ်ခွါကၠူန့ၣ် အတဲဝဲလၢ “ယသကိးအသီတဖၣ် မၤစၢၤယၤလၢ ယအိၣ်လၢ ယတၢ်အိၣ်ဖှိၣ်အသီကမုာ်. အဃိ ယအိၣ်ဖဲ ယတၢ်အိၣ်ဖှိၣ်အသီအံၤ မုာ်ဒိၣ်မး ဒီးယမ့ၢ်ဘၣ်ပၠီလၢ တၢ်လီၢ်အဂၤဒု ယကသးအုးဖးဒိၣ်.”