▪ ယ့ၣ်ၡူး​သိၣ်လိ​ပှၤဂၤ​လၢ ပှၤ​က​​ဘၣ်​ဂုာ်ကျဲးစၢး အိၣ်ဃူအိၣ်ဖိးလိာ်သး. ဘၣ်ဆၣ်​ဘၣ်တဘျီန့ၣ်​ ယ့ၣ်ၡူး​တဲဘၣ်​ အတၢ်မၢဖိတဖၣ်​လၢ “တ​​ဘၣ်​ဆိကမိၣ်လၢ ယ​ဟဲ​မၤဃူမၤဖိးတၢ် လၢ​ဟီၣ်ခိၣ်ချၢအံၤ​တဂ့ၤ. ယတဟဲ​မၤဃူမၤဖိးတၢ်​ဘၣ်. လၢတၢ်န့ၣ်အလီၢ် ယ​ဟဲစိာ်​နးတဘ့ၣ်​လီၤ. ယ​ဟဲ​ဒ်သိး ယ​က​မၤလီၤမုၢ်လီၤဖးတၢ်​လီၤ. အဃိ ဖိခွါန့ၣ်​က​ထီဒါ​အပၢ်, ဖိမုၣ်န့ၣ်​က​ထီဒါ​အမိၢ် ဒီး​ဒဲၣ်မုၣ်န့ၣ်​က​ထီဒါ အမံၤပှၢ်​ပိာ်မုၣ်.” (မးသဲ ၁၀:​၃၄, ၃၅) ယ့ၣ်ၡူး အဲၣ်ဒိး​တဲဝဲ အခီပညီ​ဒ်လဲၣ်.

ယ့ၣ်ၡူးန့ၣ်​ တအဲၣ်ဒိး မၤ​လီၤဖး ပှၤဂၤ​အဟံၣ်ဖိဃီဖိဘၣ်. ဘၣ်ဆၣ်​ အသ့ၣ်ညါ​ပာ်စၢၤ​​ဝဲ​လၢ ပှၤ​တနီၤ​လၢ အတူၢ်လိာ် အတၢ်သိၣ်လိတဖၣ်န့ၣ်​ တမ့ၢ်​လၢ အဝဲသ့ၣ်​အဟံၣ်ဖိဃီဖိ ကဘၣ်သးဝဲဘၣ်, အဃိ တၢ်လီၤမုၢ်လီၤဖး ကအိၣ်ထီၣ်​လၢ အဝဲသ့ၣ်​ဟံၣ်ဖိဃီဖိ​အပူၤ. အဃိ ပှၤလၢ အဆၢတဲာ်လီၤအသး လၢ​က​ကဲထီၣ်​ ယ့ၣ်ၡူး​အပျဲၢ် ဒီး​ဒိးဘျၢထံတဖၣ်န့ၣ်​ အဝဲသ့ၣ်​ က​​ဘၣ်​သ့ၣ်ညါပာ်စၢၤ တၢ်လၢ​အက ဟဲ​ကဲထီၣ်အသး လၢ​အဝဲသ့ၣ်​ တၢ်ဆၢတဲာ်​အဃိ. အဒိ ဘၣ်သ့ၣ်သ့ၣ်​ အဝဲသ့ၣ်​ အသးသမူ​တံၤသကိး မ့တမ့ၢ် အဝဲသ့ၣ်​ဟံၣ်ဖိဃီဖိတဖၣ်​ က​ထီဒါ​အီၤ. အဃိ အဝဲသ့ၣ်​က​မၤထွဲ ယ့ၣ်ၡူး​အတၢ်သိၣ်လိ​အဂီၢ် ကကီထီၣ်ဝဲ.

လံာ်စီဆှံ ဟ့ၣ်ဂံၢ်ဟ့ၣ်ဘါ ခရံာ်​ဖိတဖၣ်​လၢ အဝဲသ့ၣ်​က “အိၣ်ဃူအိၣ်ဖိး​ဒီး ပှၤ​ကိးဂၤဒဲး.” (ရိမ့ၤ ၁၂:၁၈) ဘၣ်ဆၣ်​ ယ့ၣ်ၡူး အတၢ်သိၣ်လိတဖၣ်န့ၣ်​ လီၤဂာ်​ဒ်သိးဒီး “နးတဘ့ၣ်” လၢ​ပှၤ​တနီၤ အဟံၣ်ဖိဃီဖိ အပူၤ​ဒ်လဲၣ်. အဒိ ဘၣ်သ့ၣ်သ့ၣ်န့ၣ်​ ပှၤ​တဂၤ​ကတူၢ်လိာ်ဝဲ ယ့ၣ်ၡူး​အတၢ်သိၣ်လိ ဘၣ်ဆၣ်​ အဟံၣ်ဖိဃီဖိတဖၣ်​ တတူၢ်လိာ်ဝဲဘၣ်​ ဒီး​က​ထီဒါဝဲ. ဖဲန့ၣ်​အခါ ပှၤတဂၤန့ၣ်​ အဟံၣ်ဖိဃီဖိတဖၣ်​ က​ကဲထီၣ်​ဒ်သိးဒီး “အဒုၣ်အဒါ.”​—⁠မးသဲ ၁၀:⁠၃၆.

ခရံာ်​ဖိတဖၣ်​ လၢအအိၣ်​ဟံၣ်​ တဖျၢၣ်ဃီ​ဒီး အဟံၣ်ဖိဃီဖိ လၢအတၢ်နာ် တဒ်သိးဒီး အဝဲသ့ၣ်ဘၣ်န့ၣ်​ တဘျီတခီၣ်​ အဝဲသ့ၣ်​ က​ထံၣ်ဘၣ်ဒီး တၢ်အိၣ်သး​လၢ အကီအခဲ ဒီး​အဝဲသ့ၣ်​ က​​ဘၣ်​ဆၢတဲာ်ဝဲလၢ မ့ၢ်​အက​မၤသးခု ယဟိဝၤ​ယွၤ ဒီး​ယ့ၣ်ၡူး​အသးဧါ မ့တမ့ၢ် အဝဲသ့ၣ်​ က​မၤသးခု အဟံၣ်ဖိဃီဖိ အသးဧါ. အဒိ အဟံၣ်ဖိဃီဖိ လၢအတၢ်နာ် တဒ်သိးဒီးအီၤဘၣ်တဖၣ်န့ၣ်​ က​မၢန့ၢ်ဆူၣ်​အီၤ​လၢ အက​ပၣ်ဃုာ်လၢ မူးပွဲ​လၢအဘၣ်ဃးဒီး တၢ်ဘူၣ်တၢ်ဘါ​ကမၣ်. တၢ်မ့ၢ်​ကဲထီၣ်အသး ဒ်န့ၣ်န့ၣ်​ အဝဲသ့ၣ်​ က​​ဘၣ်​ဆၢတဲာ်ဝဲလၢ အဝဲသ့ၣ်​က​မၤသးခု မတဂၤအသးလဲၣ်. အဃိ​ယ့ၣ်ၡူး တဲပလီၢ် အပျဲၢ်အဘီၣ်တဖၣ်​လၢ “ပှၤလၢ အအဲၣ်​အမိၢ်​အပၢ် ဒိၣ်န့ၢ်ဒံး အအဲၣ်​ယၤန့ၣ်​ တကြၢး​ဒီး​ယၤ​ဘၣ်.” (မးသဲ ၁၀:၃၇) ဖဲန့ၣ်န့ၣ်​ ယ့ၣ်ၡူး တအဲၣ်ဒိး​တဲဝဲလၢ ဒ်သိး​အပျဲၢ်အဘီၣ်​ က​ကြၢးဒီးအီၤ​အဂီၢ် အဝဲသ့ၣ်​က​​ဘၣ်​အဲၣ်​ အမိအပါ​စှၤန့ၢ်ဒံး လၢညါ​ဘၣ်. ယ့ၣ်ၡူး အဲၣ်ဒိး​တဲဝဲလၢ အပျဲၢ်အဘီၣ်တဖၣ်​ က​​ဘၣ်​ပာ်ဆိ တၢ်လၢ​အရ့ဒိၣ်​လၢညါ. အဃိ ပ​ဟံၣ်ဖိဃီဖိ လၢအတၢ်နာ် တဒ်သိးဒီး​ပှၤတဖၣ်​ မ့ၢ်​ထီဒါ​ပှၤ သနာ်က့ ပ​ဆဲး​အဲၣ်​အဝဲသ့ၣ်​ဒံး, ဘၣ်ဆၣ်​ ပ​က​​ဘၣ်​အဲၣ်​ ယဟိဝၤ​ယွၤ ဒိၣ်န့ၢ်ဒံး တၢ်​အဂၤ​ခဲလၢာ်.

ဘၣ်ဆၣ်​ ပ​မ့ၢ်​တဲ​တီတီန့ၣ်​ ပ​ဟံၣ်ဖိဃီဖိ မ့ၢ်​ထီဒါ​ပှၤန့ၣ်​ ပ​သးဘၣ်ဒိ​ဒိၣ်မး. သနာ်က့ ပ​က​​ဘၣ်​နီၣ်ဘၣ်​ ယ့ၣ်ၡူး​အတၢ်ကတိၤ လၢအ​တဲဝဲ “ပှၤလၢ အတယိးထီၣ်​ အတၢ်​မၤအၢမၤနး အသ့ၣ်တၢၣ်​ ဒီးပိာ်​ယခံဘၣ်န့ၣ်​ တကြၢး​ဒီး​ယၤ​ဘၣ်.” (မးသဲ ၁၀:၃၈) အဃိ ပ​ဟံၣ်ဖိဃီဖိ မ့ၢ်​ထီဒါ​ပှၤန့ၣ်​ ပ​က​​ဘၣ်​ထံၣ်​အီၤ ဒ်သိးဒီး တၢ်​မၤအၢမၤနး​တခါ​လၢ ခရံာ်​ဖိတဖၣ်​ ဘၣ်တူၢ်လိာ်ဝဲ. ဒီး​ထီဘိန့ၣ်​ ပ​က​​ဘၣ်​အိၣ်ဒီး လုၢ်လၢ်​သကဲာ်ပဝး လၢအဂ့ၤ. ဒီး​ပ​မုၢ်လၢ်​လၢ ပ​လုၢ်လၢ်​သကဲာ်ပဝး လၢအဂ့ၤအံၤ က​ထုးန့ၢ် ပ​ဟံၣ်ဖိဃီဖိ လၢအတၢ်နာ် တဒ်သိးဒီး​ပှၤ​ဘၣ်အသး ဒီး​အဝဲသ့ၣ်​ က​အဲၣ်ဒိး မၤလိ​လံာ်စီဆှံ တၢ်မ့ၢ်တၢ်တီ.​—⁠၁ ပ့းတရူး ၃:​၁, ၂.