ပှၤအါတက့ၢ်န့ၣ်​ ထံၣ်တမှံကွၢ်ဝဲလၢ ဖဲတၢ်စံၣ်ညီၣ်အမုၢ်နံၤန့ၣ်​ ပှၤလၢ အကကွဲၢ်တဖၣ်အကကွဲၢ်န့ၣ်​ ကဟဲဆၢထၢၣ်ဝဲလၢ ကစၢ်ယွၤလီၢ်ပစိာ်အမဲာ်ညါ ဒ်သိးတၢ်ကစံၣ်ညီၣ်​ အဝဲသ့ၣ်တဂၤစုာ်စုာ် ဒ်တၢ်လၢအမၤတ့ၢ်ဝဲ အသိးလီၤ. ဒီးဖဲန့ၣ်ပှၤတနီၤနီၤန့ၣ်​ ကလဲၤထီၣ်ဘၣ်လၢမူခိၣ်​ ဒီးမ့မ့ၢ်အဂၤတနီၤနီၤခီန့ၣ်​ ကလဲၤလီၤဘၣ်လၢ လၢၢ်ရာ်အပူၤလီၤ. ဘၣ်ဆၣ်​ မ့မ့ၢ်လံာ်စီဆှံန့ၣ်​ ပာ်ဖျါထီၣ်န့ၣ်ပှၤလၢ တၢ်စံၣ်ညီၣ်အမုၢ်နံၤန့ၣ်​ မ့ၢ်ဝဲမုၢ်နံၤလၢ ကစၢ်ယွၤကမၤပူၤဖျဲးထီၣ်ကွံာ် ပှၤဟီၣ်ခိၣ်ဖိသ့ၣ်တဖၣ်လၢ တၢ်တတီတလိၤအပူၤလီၤ. (စံးထီၣ်ပတြၢၤ ၉၆:၁၃) ဒီးကစၢ်ယွၤဃုထၢထီၣ်ဝဲ ယ့ၣ်ၡူးလၢစံၣ်ညီၣ်ကွီၢ် ဒီးအဝဲကစံၣ်ညီၣ်န့ၢ်တၢ်လၢ ပှၤဟီၣ်ခိၣ်ဖိအဂီၢ် တီတီလိၤလိၤလီၤ.​—ဖး ယၡါယၤ ၁၁:၁-၅; မၤတၢ် ၁၇:၃၁.

ပှၤပိာ်ခွါအဆိကတၢၢ်တဂၤ လၢအမ့ၢ်စီၤအၤဒၣ်န့ၣ်​ တဒိကနၣ်ဝဲ ကစၢ်ယွၤအကလုၢ်ဘၣ်အဃိ အစၢၤအသွဲၣ်ခဲလၢာ်န့ၣ်​ ကဲထီၣ်ဝဲပှၤတၢ်ဒဲးဘးဖိတဖၣ်လီၤ. လၢတၢ်န့ၣ်အဃိ အစၢၤအသွဲၣ်ခဲလၢာ်န့ၣ်​ တူၢ်ဘၣ်တၢ်နးတၢ်ဖှီၣ်ဒီး ဘၣ်သံဝဲလီၤ. (ရိမ့ၤ ၅:၁၂) ဒ်သိးတၢ်ကီတၢ်ခဲအံၤ ကဘၣ်ဂီၢ်ထီၣ်က့ၤအဂီၢ် ယ့ၣ်ၡူးကမၤသမူထီၣ်က့ၤ ပှၤသံလၢအကကွဲၢ်လၢ အကထိတဖၣ်အကထိလီၤ. လံာ်လီၣ်ဖျါ ပာ်ဖျါထီၣ်ဝဲလၢ တၢ်သ့ၣ်တဖၣ်အံၤ ကကဲထီၣ်အသးဖဲ ယ့ၣ်ၡူးပၢတၢ် အနံၣ်တကထိအခါလီၤ.​—ဖး လီၣ်ဖျါ ၂၀:၄, ၁၁, ၁၂.

ပှၤသံလၢ အဂဲၤဆၢထၢၣ်သမူထီၣ်က့ၤသ့ၣ်တဖၣ်န့ၣ်​ တၢ်တစံၣ်ညီၣ်အီၤဒ် တၢ်လၢ အဝဲသ့ၣ်မၤတ့ၢ်ဝဲ တချုးဖဲအသံအခါန့ၣ်ဘၣ်. လၢတၢ်န့ၣ်အလီၢ် ဒ်လီၣ်ဖျါ ၂၀ ပာ်ဖျါထီၣ်ဝဲအသိး တၢ်စံၣ်ညီၣ်အံၤ ကဒိးသန့ၤထီၣ်အသးလၢ ဖဲအဝဲသ့ၣ်​ ဂဲၤဆၢထၢၣ်သမူထီၣ်က့ၤအခါ မ့ၢ်အမၤထွဲဝဲဒ် တၢ်အိၣ်လၢ “လံာ်ထူတဖၣ်အပူၤ”ဧါ မ့တမ့ၢ် တမၤထွဲဝဲဘၣ်ဧါလီၤ. (ရိမ့ၤ ၆:၇) ဒ်စီၤပီလူးတဲဝဲအသိး ပှၤလၢ ကဂဲၤဆၢထၢၣ်သမူထီၣ်က့ၤတဖၣ်​ အကျါန့ၣ်​ ကပၣ်ဃုာ်ဒီး “ပှၤတီပှၤလိၤ ဒီးပှၤတတီတလိၤ” ဒီးအဝဲသ့ၣ်တဖၣ်န့ၣ်​ ကန့ၢ်ဘၣ်တၢ်ခွဲးတၢ်ယာ်လၢ ကမၤလိဘၣ်​ ယဟိဝၤယွၤအဂ့ၢ်.​—ဖး မၤတၢ် ၂၄:၁၅.

ပှၤတဖၣ်လၢအသံ တချုးလၢ အသ့ၣ်ညါယဟိဝၤယွၤ ဒီးတမၤဘၣ်ယွၤအတၢ်မၤ ဒံးဘၣ်တဖၣ်န့ၣ်​ ဖဲအဂဲၤဆၢထၢၣ်သမူထီၣ်က့ၤအခါ ကန့ၢ်ဘၣ်ဝဲတၢ်ခွဲးတၢ်ယာ်လၢ ကဆီတလဲ အတၢ်အိၣ်မူဒီး ကမၤတၢ်ဂ့ၤလီၤ. အဝဲသ့ၣ်မ့ၢ်မၤ တၢ်ဂ့ၤန့ၣ်​ အတၢ်ဂဲၤဆၢထၢၣ်သမူထီၣ်က့ၤန့ၣ်​ ကမ့ၢ်ဝဲ “တၢ်ဂဲၤဆၢထၢၣ်​ သမူထီၣ်က့ၤ ဆူတၢ်မူ” ဘၣ်ဆၣ်​ ပှၤလၢအဂဲၤဆၢထၢၣ်သမူထီၣ်က့ၤတဖၣ်​ မ့ၢ်တအဲၣ်ဒိးမၤဒ် တၢ်ဘၣ်ယဟိဝၤယွၤအသးဘၣ်န့ၣ်​ အတၢ်ဂဲၤဆၢထၢၣ်သမူထီၣ်က့ၤန့ၣ်​ ကမ့ၢ်ဝဲ “တၢ်ဂဲၤဆၢထၢၣ်​ သမူထီၣ်က့ၤ ဆူတၢ်စံၣ်ညီၣ်လီၤ.”​—ဖး ယိၤဟၣ်​ ၅:၂၈, ၂၉; ယၡါယၤ ၂၆:၁၀; ၆၅:၂၀.

တၢ်စံၣ်ညီၣ်အမုၢ်နံၤအံၤ ကယံာ်ဝဲ အနံၣ်​ ၁,၀၀၀လီၤ. ဖဲအနံၣ်​ ၁,၀၀၀ အကတၢၢ်န့ၣ်​ ယဟိဝၤယွၤ ကမၤဂ့ၤထီၣ်က့ၤ ပှၤလၢအအိၣ်ဒီး တၢ်ဒိကနၣ်တဖၣ်​ အတၢ်အိၣ်သး ဒ်လၢအခီၣ်ထံး တၢ်လၢတၢ်ပှဲၤ အိၣ်ဝဲအသိးလီၤ. (၁ ကရံၣ်သူး ၁၅:၂၄-၂၈) အဃိ လၢပှၤဟီၣ်ခိၣ်ဖိလၢ အအိၣ်ဒီး တၢ်ဒိကနၣ်တဖၣ်အဂီၢ်န့ၣ်​ တၢ်အံၤမ့ၢ်ဝဲ တၢ်ခွဲးတၢ်ယာ်ဖးဒိၣ်​ တခါညါ. ဖဲအနံၣ်​ ၁,၀၀၀ ပှဲၤထီၣ်ဝံၤ အလီၢ်ခံန့ၣ်​ ကစၢ်ယွၤ ကပျၢ်ထီၣ်ကွံာ် မုၣ်ကီၤလံၢ်လၢ အဘၣ်တၢ်စၢဃာ်အီၤလၢ တၢ်ပူၤယိာ်အပူၤ. ဒီးဖဲန့ၣ်န့ၣ်​ ကမ့ၢ်ဝဲတၢ်မၤကွၢ် အလီၢ်ခံကတၢၢ်တဘျီလၢ မုၣ်ကီၤလံၢ်ကလ့ပစီဝဲ ပှၤဟီၣ်ခိၣ်ဖိတဖၣ်လီၤ. ဖဲန့ၣ်အဆၢကတီၢ် ပှၤလၢအတပိာ် မုၣ်ကီၤလံၢ် အခံဘၣ်တဖၣ်န့ၣ်​ ကအိၣ်မူဘၣ်​ လီၤထူလီၤယိာ်လၢ ဟီၣ်ခိၣ်ချၢလီၤ.—ဖး ယၡါယၤ ၂၅:၈; လီၣ်ဖျါ ၂၀:၇-၉.

လၢလံာ်စီဆှံအပူၤန့ၣ်​ တၢ်ကတိၤလၢအမ့ၢ် “တၢ်စံၣ်ညီၣ်အမုၢ်နံၤ” န့ၣ်​ အဲၣ်ဒိးတဲစ့ၢ်ကီးလၢ တၢ်ကတၢၢ်ဘၣ်ဝဲအခါလီၤ. ဒီးတၢ်စံၣ်ညီၣ်အမုၢ်နံၤအံၤ ကဟဲဝဲသတူၢ်ကလာ် ဒ်ထံလုၢ်ဘၢတၢ်လၢ စီၤနိအၤစိၤအသိး လၢအမၤဟးဂီၤကွံာ် ပှၤအၢပှၤသီခဲလၢာ်လီၤ. တၢ်လၢအလီၤသးခုတခါန့ၣ်​ မ့ၢ်ဝဲ တယံာ်လၢၤဘၣ်န့ၣ်​ ကစၢ်ယွၤကမၤဟးဂီၤကွံာ် “ပှၤလၢအတယူးတယီၣ်ယွၤဘၣ်” တဖၣ်အဃိ ပှၤတီပှၤလိၤတဖၣ်န့ၣ်​ ကအိၣ်မူဘၣ်ဝဲလၢ ဟီၣ်ခိၣ်လၢ အပှဲၤဒီး “တၢ်တီတၢ်လိၤ” လီၤ. —ဖး ၂ ပ့းတရူး ၃:၆, ၇, ၁၃.