မ့ၢ်နဒိၣ်တုာ်ခိၣ်ပှဲၤ ဒ်ခရံာ်အသိးလံဧါ
“တုၤပတုၤလၢ . . . ပဒိၣ်တုာ်ခိၣ်ပှဲၤလၢ တၢ်ထဲသိးဒီး ခရံာ်အနီၢ် အတၢ်လၢတၢ်ပှဲၤ အပူၤလီၤ.”—အ့းဖ့းစူး ၄:၁၃.
တၢ်သးဝံၣ်- ၆၉, ၇၀
၁, ၂. ခရံာ်ဖိကိးဂၤဒဲး အဖီတၢၣ်န့ၣ် ကမ့ၢ်ဝဲ တၢ်မနုၤလဲၣ်. ဟ့ၣ်တၢ်အဒိတက့ၢ်.
ဖဲဟံၣ်ကစၢ်ပိာ်မုၣ်တဂၤ ဃုထၢဝဲတၤသၣ်လၢ အဖျါဂ့ၤ လၢကျးပူၤအခါန့ၣ် အဝဲကကွၢ်ဃုဝဲ တၢ်မနုၤလဲၣ်. အဝဲတကွၢ်ဝဲထဲ တၤသၣ်လၢ အဒိၣ်ကတၢၢ် မ့တမ့ၢ် အပှ့ၤဘၣ်ကတၢၢ်န့ၣ်ဘၣ်. လၢတၢ်န့ၣ်အလီၢ် အဝဲကဃုထၢဝဲ တၤသၣ်လၢအဂ့ၤ, လၢအနၢမူနၢဆှီ, လၢအတအုၣ်တကျၣ်ဘၣ် ဒီးလၢအအီၣ်ဝဲသ့ တဘျီဃီန့ၣ်လီၤ. အဝဲအဲၣ်ဒိးဝဲ တၤသၣ်လၢ ကဘၣ်ပှၢ်ဒီး မံဘီဝဲန့ၣ်လီၤ.
၂ ဖဲပှၤတဂၤ မၤလိဘၣ် ယဟိဝၤယွၤအဂ့ၢ်ဒီး ဆၢတဲာ်လီၤအသးလၢ ကဘျၢထံအဆၢကတီၢ်န့ၣ် အတၢ်ရ့လိာ်အသးဒီး ကစၢ်ယွၤ ကဒိၣ်ထီၣ်ဝဲ ကွ့ၢ်ကွ့ၢ်လီၤ. အဖီတၢၣ်န့ၣ် မ့ၢ်ဝဲ ကကဲထီၣ် ခရံာ်ဖိတဂၤ လၢအဒိၣ်တုာ်ခိၣ်ပှဲၤ လၢနီၢ်သးတခီန့ၣ်လီၤ. တၢ်ဒိၣ်တုၤခိၣ်ပှဲၤန့ၣ် တအဲၣ်ဒိးစံးဝဲလၢ အသးပှၢ်ထီၣ်လၢ နီၢ်ခိတကပၤဘၣ်. အဲၣ်ဒိးစံးဝဲလၢ နီၢ်သး အတၢ်ဒိၣ်ထီၣ်ထီထီၣ်, အတၢ်ရ့လိာ်သး ဒီးယဟိဝၤယွၤ ဘူးဘူးတံၢ်တံၢ်န့ၣ်လီၤ. တၢ်မၢဖိစီၤပီလူး အဲၣ်ဒိးလၢ ခရံာ်ဖိလၢ အ့းဖ့းစူးသ့ၣ်တဖၣ် ကကဲထီၣ် ပှၤလၢ အဒိၣ်တုာ်ခိၣ်ပှဲၤန့ၣ်လီၤ. စီၤပီလူး ဟ့ၣ်ဂံၢ်ဟ့ၣ်ဘါ ခရံာ်ဖိလၢ အ့းဖ့းစူးတဖၣ် ဒ်သိးအဝဲသ့ၣ်ကအိၣ်ဒီး တၢ်စူၢ်တၢ်နာ် တမံၤဃီ ဒီးမၢအဝဲသ့ၣ်မၤလိအါထီၣ် ဘၣ်ဃး ယ့ၣ်ၡူးအဂ့ၢ်လၢက “ဒိၣ်တုာ်ခိၣ်ပှဲၤလၢ တၢ်ထဲသိးဒီး ခရံာ်အနီၢ် အတၢ်လၢတၢ်ပှဲၤ အပူၤလီၤ.”—အ့းဖ့းစူး ၄:၁၃.
၃. မုၢ်မဆါတနံၤအံၤ ယဟိဝၤယွၤအခ့အပှၤဒီး အ့းဖ့းစူး တၢ်အိၣ်ဖှိၣ်ဖိတဖၣ်န့ၣ် ပထိၣ်သတြီၤအီၤကသ့ဒ်လဲၣ်.
၃ ဖဲစီၤပီလူး ကွဲးလံာ်ဆူ အ့းဖ့းစူး အတၢ်အိၣ်ဖှိၣ်ဖိတဖၣ် အအိၣ်အခါ တၢ်အိၣ်ဖှိၣ်အံၤ သူၣ်ထီၣ်အသး တဘျုးနံၣ်လံ. ပှၤအါဒံအါဂၤလၢ တၢ်အိၣ်ဖှိၣ်ပူၤန့ၣ် မ့ၢ်ခရံာ်ဖိလၢ အဒိၣ်တုာ်ခိၣ်ပှဲၤဒီး အိၣ်ဒီး တၢ်လဲၤခီဖျိတဖၣ်န့ၣ်လီၤ. ဘၣ်ဆၣ်လၢ အဝဲသ့ၣ်အကျါ တနီၤန့ၣ် လိၣ်ဘၣ်ဒံးလၢ အတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤ ဒိၣ်ထီၣ်ဝဲန့ၣ်လီၤ. ဒ်န့ၣ်အသိး မုၢ်မဆါတနံၤအံၤ ဒီပုၢ်ဝဲၢ်မုၣ် ဒီပုၢ်ဝဲၢ်ခွါလၢ အမၤယဟိဝၤယွၤ အတၢ်မၤ ယံာ်တ့ၢ်လံဒီး ကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် အိၣ်ဝဲအါမးလီၤ. ဘၣ်ဆၣ် တနီၤနီၤန့ၣ် တတုၤထီၣ်ထီၣ်ဘး တဝၢ်ဒံးဘၣ်. အဒိ ကိးနံၣ်ဒဲး ပှၤဘျၢထံလၢ အကထိတဖၣ် သနာ်က့ လိၣ်ဝဲလၢအဝဲသ့ၣ် ကဒိၣ်တုာ်ခိၣ်ပှဲၤဒံးန့ၣ်လီၤ. မ့မ့ၢ် နၤတခီမီၣ်.—ကလီးစဲ ၂:၆, ၇.
ခရံာ်ဖိတဂၤ ဒိၣ်ထီၣ်ထီထီၣ်လၢ နီၢ်သးတခီ ကသ့ဒ်လဲၣ်
၄, ၅. ပှၤဒိၣ်တုာ်ခိၣ်ပှဲၤလၢ နီၢ်သးတခီန့ၣ် လီၤဆီလိာ်အသး တဂၤဒီးတဂၤဒ်လဲၣ်, ဘၣ်ဆၣ် အဝဲသ့ၣ် အတၢ်လီၤဂာ်လိာ်သး မ့ၢ်တၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိ အခီၣ်ထံးတက့ၢ်.)
၄ ဖဲနဃုထၢ တၤသၣ်အမံလၢ ကျးပူၤအခါ နကထံၣ်ဘၣ်လၢ တၤသၣ် တဖျၢၣ်ဒီးတဖျၢၣ် တလီၤဂာ်လိာ် အသးဘၣ်. ဘၣ်ဆၣ် နနီၤဖး တၤသၣ်လၢ အမံဒီး တမံဘၣ်တဖၣ် သ့ဝဲန့ၣ်လီၤ. ဒ်န့ၣ်အသိး နနီၤဖး ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ ဒီးတဒိၣ်တုာ်ခိၣ်ပှဲၤလၢ နီၢ်သးတခီ သ့ဝဲစ့ၢ်ကီးန့ၣ်လီၤ. အဝဲသ့ၣ် တဂၤဒီးတဂၤ တလီၤဂာ်လိာ်အသးဘၣ်. အဝဲသ့ၣ်ဟဲလၢ ထံကီၢ်လၢ အလီၤဆီလိာ်အသးဒီး တၢ်အိၣ်သးစ့ၢ်ကီး တဒ်သိးလိာ်အသး အဃိန့ၣ်လီၤ. ဒီးအဝဲသ့ၣ် အသးအနံၣ်အလါ, အတၢ်ဘၣ်သူၣ်ဘၣ်သး ဒီးအတၢ်တဘၣ်သူၣ်ဘၣ်သးန့ၣ် တလီၤဂာ်လိာ်အသးဘၣ်. ဘၣ်ဆၣ် ကယဲၢ်ပှၤလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် အိၣ်ဒီးအတၢ်ဂ့ၤတၢ်ဝါ လီၤဆီလၢ ပသ့ၣ်ညါ နီၤဖးအီၤသ့ ဒ်အမ့ၢ် ပှၤလၢအဒိၣ်တုာ်ခိၣ်ပှဲၤတဂၤ အသိးန့ၣ်လီၤ. အဝဲသ့ၣ်အိၣ်ဒီး တၢ်ဂ့ၤတၢ်ဝါ မနုၤတဖၣ်လဲၣ်.
၅ ပှၤလၢအဒိၣ်တုာ်ခိၣ်ပှဲၤ လၢနီၢ်သးတခီန့ၣ် ကွၢ်လိမၤဒိးဝဲယ့ၣ်ၡူး ဒီးယီၢ်ဝဲ “အခီၣ်လီၢ်” လီၤ. (၁ ပ့းတရူး ၂:၂၁) ယ့ၣ်ၡူးစံးဝဲ တၢ်အရ့ဒိၣ်ကတၢၢ်လၢ ပှၤတဂၤအဂီၢ်န့ၣ် မ့ၢ်ဝဲ ကဘၣ်အဲၣ် ယဟိဝၤယွၤလၢ အသူၣ်ကံၢ်သးလဲ, အသးဒီဖျၢၣ်ညါ, အတၢ်ကူၣ်တၢ်ဆးတုၤအလၢာ်ဒီး အဲၣ်ပှၤလၢအဃၢၤ ဒ်အဲၣ်လီၤအနီၢ်ကစၢ်သး အသိးန့ၣ်လီၤ. (မးသဲ ၂၂:၃၇-၃၉) ခရံာ်ဖိလၢ အဒိၣ်တုာ်ခိၣ်ပှဲၤတဂၤ ကဘၣ်ဂုာ်ကျဲးစၢး ဒိကနၣ်ဝဲ တၢ်ဟ့ၣ်ကူၣ်ဟ့ၣ်ဖး အဝဲအံၤန့ၣ်လီၤ. ဒီးအဝဲအတၢ်အိၣ်မူ အကျဲတဖၣ်န့ၣ် ပာ်ဖျါထီၣ်ဝဲလၢ အတၢ်ရ့လိာ်သးဒီး ယဟိဝၤယွၤ ဒီးအတၢ်အဲၣ်ပှၤလၢအဃၢၤန့ၣ် မ့ၢ်တၢ်အရ့ဒိၣ်ကတၢၢ် လၢအဂီၢ်န့ၣ်လီၤ.
ခရံာ်ဖိလၢအသးပှၢ်တဖၣ်န့ၣ် ကွၢ်လိယ့ၣ်ၡူးအတၢ်ဆီၣ်လီၤသး ခီဖျိအဝဲသ့ၣ် ဆီၣ်ထွဲဒီပုၢ်ဝဲၢ်သးစၢ်တဖၣ်လၢ အတီခိၣ်ရိၣ်မဲတၢ်န့ၣ်လီၤ (ကွၢ်လံာ်အဆၢ ၆)
၆, ၇. (က) ခရံာ်ဖိတဂၤလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် အိၣ်ဒီး တၢ်ဂ့ၤတၢ်ဝါ မနုၤတဖၣ်လဲၣ်. (ခ) ပကြၢး သံကွၢ်လီၤပသး ဒ်လဲၣ်.
၆ တၢ်အဲၣ်တၢ်ကွံန့ၣ် မ့ၢ်တၢ်ဂ့ၤတၢ်ဝါတခါလၢ ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီ ပာ်ဖျါထီၣ်ဝဲန့ၣ်လီၤ. (ကလၤတံ ၅:၂၂, ၂၃) တကးဒံးဘၣ် အဝဲသ့ၣ် ပာ်ဖျါထီၣ်စ့ၢ်ကီး တၢ်ဆီၣ်လီၤသး, တၢ်ကီၤသူၣ်ကီၤသးဒီး တၢ်ဝံသးစူၤန့ၣ်လီၤ. တၢ်ဂ့ၤတၢ်ဝါသ့ၣ်တဖၣ်အံၤ မၤစၢၤအဝဲသ့ၣ် ဒ်သိးကအိၣ်ဒီး တၢ်သူၣ်စူၤသးစူၤ ဖဲကွၢ်ဆၢၣ်မဲာ်ဘၣ် တၢ်ကီတၢ်ခဲတဖၣ် အဆၢကတီၢ်န့ၣ်လီၤ. တကးဒံးဘၣ် ဖဲအဝဲသ့ၣ် ကွၢ်ဆၢၣ်မဲာ်ဘၣ် တၢ်လၢအလီၤသူၣ်အုးသးအုး အဆၢကတီၢ်ဒၣ်လဲာ် အတၢ်မုၢ်လၢ် တလီၤမၢ်ဝဲဘၣ်. လၢအနီၢ်ကစၢ် အတၢ်မၤလိ လံာ်စီဆှံပူၤန့ၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ ကဃုသ့ၣ်ညါဝဲ လံာ်စီဆှံတၢ်သိၣ်တၢ်သီမိၢ်ပှၢ်တဖၣ် လီၤတံၢ်လီၤဆဲး ဒ်သိး ကမၤစၢၤအီၤလၢ ကသ့ၣ်ညါတၢ်လၢ အဘၣ်ဒီး တၢ်လၢအကမၣ်အဂီၢ်န့ၣ်လီၤ. တၢ်န့ၣ်အလီၢ်ခံ အဝဲကမၤထွဲဝဲ ခရံာ်ဖိအသးလၢ အသ့ၣ်ညါဒၣ်တၢ် ဒီးကဆၢတဲာ်တၢ်လၢ တၢ်ကူၣ်သ့အပူၤန့ၣ်လီၤ. ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အိၣ်ဒီး တၢ်ဆီၣ်လီၤသးအဃိ အဝဲနာ်ဝဲလၢ ယဟိဝၤယွၤ အတၢ်ဟံးစုနဲၣ်ကျဲဒီး အတၢ်ဘျၢတဖၣ်န့ၣ် ဂ့ၤဒိၣ်န့ၢ်ဒံး အနီၢ်ကစၢ် အတၢ်ကူၣ်တၢ်ဆးန့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ဒီးအဝဲစံၣ်တဲၤတဲလီၤ တၢ်သးခုကစီၣ်လၢ တၢ်သူၣ်ဆူၣ်သးဆူၣ်အပူၤ ဒီးဂုာ်ကျဲးစၢးမၤစၢၤ တၢ်အိၣ်ဖှိၣ် ဒ်သိးကအိၣ်ဒီး တၢ်ဃူတၢ်ဖိး အဂီၢ်န့ၣ်လီၤ.
၇ ပမ့ၢ်မၤတ့ၢ် ယဟိဝၤယွၤ အတၢ်မၤ ယံာ်ထဲလဲၣ် ထဲလဲၣ်သနာ်က့ ပကြၢးသံကွၢ်လီၤပသးလၢ ‘ဒ်သိး ယကွၢ်လိ ယ့ၣ်ၡူး အဒိအတဲာ် ကသ့အဂီၢ် မ့ၢ်ယကဘၣ်ဆီတလဲတၢ် အိၣ်ဝဲတမံၤမံၤဧါ, ဒ်သိး ယကလဲၤထီၣ်လဲၤထီ လၢနီၢ်သးတခီအဂီၢ် မ့ၢ်ယကဘၣ်မၤတၢ် အိၣ်ဒံးတမံၤမံၤဧါ.’
“တၢ်အီၣ်အသံးအကာ်န့ၣ် မ့ၢ်လၢ ပှၤဒိၣ်တုာ်ခိၣ်ပှဲၤအဂီၢ်”
၈. ယ့ၣ်ၡူး သ့ၣ်ညါနၢ်ပၢၢ်ဝဲ ယွၤအကလုၢ်ကထါ ထဲလဲၣ်.
၈ ယ့ၣ်ၡူးန့ၣ် သ့ၣ်ညါနၢ်ပၢၢ်ဝဲ ယွၤအကလုၢ်ကထါဂ့ၤဂ့ၤလီၤ. ဖဲအသးအိၣ် ၁၂ နံၣ်အခါန့ၣ် အဝဲတဲသကိးတၢ်ဒီး သရၣ်သ့ၣ်တဖၣ် လၢတၢ်လုၢ်ဟံၣ်ပူၤ ဒီးသူဝဲ လံာ်စီဆှံအဆၢတဖၣ်န့ၣ်လီၤ. “ပှၤနၢ်ဟူဝဲတဖၣ်န့ၣ်, ပာ်အသး ကမၢကမၣ် ခဲလၢာ်လီၤ.” (လူၤကၣ် ၂:၄၆, ၄၇) လၢခံန့ၣ် ဖဲယ့ၣ်ၡူး စံၣ်တဲၤတဲလီၤတၢ်အခါ အဝဲသူဝဲ ကစၢ်ယွၤ အကလုၢ်ကထါ ဒ်သိး ပှၤလၢအထီဒါအီၤသ့ၣ်တဖၣ် ကအိၣ်ဘှီၣ်ကလာ် အဂီၢ်န့ၣ်လီၤ.—မးသဲ ၂၂:၄၁-၄၆.
၉. (က) ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အိၣ်ဝဲဒီး တၢ်မၤလိလံာ်စီဆှံ အတၢ်ရဲၣ်တၢ်ကျဲၤ ဒ်လဲၣ်. (ခ) ဘၣ်မနုၤအဃိ ပကဘၣ်မၤလိ လံာ်စီဆှံလဲၣ်.
၉ ပှၤလၢအဲၣ်ဒိး ကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် ကဘၣ်ကွၢ်လိ ယ့ၣ်ၡူးဒီး ကဘၣ်ဃုသ့ၣ်ညါ အါထီၣ် လံာ်စီဆှံအဂ့ၢ်န့ၣ်လီၤ. ခီဖျိလၢ အဝဲသ့ၣ်ညါဝဲလၢ “တၢ်အီၣ်အသံးအကာ်န့ၣ် မ့ၢ်လၢ ပှၤဒိၣ်တုာ်ခိၣ်ပှဲၤအဂီၢ်” အဃိ အဝဲကဃုသ့ၣ်ညါ လံာ်စီဆှံ အတၢ်မ့ၢ်တၢ်တီ လၢအဒိၣ်အယိာ်တဖၣ်ထီဘိန့ၣ်လီၤ. (ဧ့ၤဘြံၤ ၅:၁၄) ခရံာ်ဖိတဂၤ လၢအဒိၣ်တုာ်ခိၣ်ပှဲၤ လၢနီၢ်သးတခီန့ၣ် အဝဲအဲၣ်ဒိး ဒိးန့ၢ်ဘၣ် “တၢ်သ့ၣ်ညါ” လံာ်စီဆှံ လီၤတံၢ်လီၤဆဲးန့ၣ်လီၤ. (အ့းဖ့းစူး ၄:၁၃) လၢတၢ်န့ၣ်အဃိ နကဘၣ်သံကွၢ်လီၤ နသးလၢ– ‘မ့ၢ်ယဖးလံာ်စီဆှံ ကိးနံၤဒဲးဧါ, မ့ၢ်ယအိၣ်ဒီး နီၢ်ကစၢ် တၢ်မၤလိလံာ်စီဆှံ တၢ်ရဲၣ်တၢ်ကျဲၤဧါ, မ့ၢ်ယအိၣ်ဒီး ဟံၣ်ဖိဃီဖိ တၢ်မၤလိလံာ်စီဆှံ ကိးနွံဒဲးဧါ.’ ဖဲနမၤလိလံာ်စီဆှံအခါ နကဘၣ်ဃုသ့ၣ်ညါ တၢ်သိၣ်တၢ်သီမိၢ်ပှၢ်တဖၣ် လၢကမၤစၢၤနၤ ဒ်သိး နကသ့ၣ်ညါအါထီၣ် ယဟိဝၤယွၤ အတၢ်ပာ်သူၣ်ပာ်သး ဒီးအတၢ်ဆိကမိၣ် အဂ့ၢ်န့ၣ်လီၤ. တၢ်လၢ နမၤလိဘၣ်အီၤသ့ၣ်တဖၣ်န့ၣ် သူအီၤဖဲ နဘၣ်ဆၢတဲာ်တၢ် အခါန့ၣ်တက့ၢ်. တၢ်အံၤ ကမၤစၢၤနၤလၢ နကသုးဘူးနသးဆူ ယဟိဝၤယွၤ အအိၣ်လီၤ.
၁၀. ဘၣ်ဃးဒီး ကစၢ်ယွၤ အတၢ်ဟ့ၣ်ကူၣ်ဟ့ၣ်ဖး ဒီးအတၢ်သိၣ်တၢ်သီမိၢ်ပှၢ်တဖၣ်န့ၣ် ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီ ကဘၣ်ထံၣ်ဝဲဒ်လဲၣ်.
၁၀ ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် သ့ၣ်ညါဝဲထဲ တၢ်လၢလံာ်စီဆှံ စံးဝဲန့ၣ် တကးဒံးဘၣ် အဝဲကဘၣ်အဲၣ် ကစၢ်ယွၤ အတၢ်ဟ့ၣ်ကူၣ်ဟ့ၣ်ဖး ဒီးအတၢ်သိၣ်တၢ်သီမိၢ်ပှၢ်တဖၣ်န့ၣ်လီၤ. ဒီးအဝဲမ့ၢ်အိၣ်ဒီး တၢ်အဲၣ်ယွၤန့ၣ် အဝဲကသးအိၣ်မၤ ယဟိဝၤယွၤ အတၢ်ဘၣ်သး အါန့ၢ်ဒံး အနီၢ်ကစၢ် အတၢ်ဘၣ်သးလီၤ. လၢတၢ်န့ၣ်အဃိ အဝဲကဆီတလဲဝဲ အတၢ်အိၣ်မူသကဲာ်ပဝး, အတၢ်ဆိကမိၣ်ဒီး အတၢ်ဖံးတၢ်မၤလၢ တဘၣ်ယွၤအသး သ့ၣ်တဖၣ်န့ၣ်လီၤ. အဒိ အဝဲကကွၢ်လိ ယ့ၣ်ၡူးဒီး ကကူထီၣ်သိးထီၣ် နီၢ်အသီလၢအ “တ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီဆှံနီၢ်နီၢ် အပူၤလီၤ.” (ဖး အ့းဖ့းစူး ၄:၂၂-၂၄ တက့ၢ်.) အရ့ဒိၣ်လၢ အဝဲ ကဘၣ်သ့ၣ်နီၣ်ထီၣ်က့ၤဝဲလၢ ကစၢ်ယွၤ သူဝဲအသးစီဆှံ ဒ်သိးကနဲၣ်လိဝဲ ပှၤလၢအကွဲးလံာ်စီဆှံ တဖၣ်န့ၣ်လီၤ. ဖဲခရံာ်ဖိတဂၤ မၤလိလံာ်စီဆှံအခါ ကစၢ်ယွၤ အသးစီဆှံ ကမၤစၢၤအီၤဒ်သိး အတၢ်သ့ၣ်ညါ ကအါထီၣ်, အတၢ်အဲၣ် ကဒိၣ်ထီၣ်ဒီး အတၢ်ရ့လိာ်သးဒီး ကစၢ်ယွၤ ကဂၢၢ်ကျၢၤထီၣ် အဂီၢ်လီၤ.
ဒုးအိၣ်ထီၣ် တၢ်ဃူတၢ်ဖိး
၁၁. ဖဲယ့ၣ်ၡူးဟဲလၢ ဟီၣ်ခိၣ်ချၢအခါ ထံၣ်ဘၣ်ဝဲတၢ်မနုၤသ့ၣ်တဖၣ်လဲၣ်.
၁၁ ယ့ၣ်ၡူးမ့ၢ်ပှၤလၢ အလၢအပှဲၤတဂၤလီၤ. ဖဲအဝဲအိၣ်လၢ ဟီၣ်ခိၣ်ချၢအခါ ပှၤလၢ အတလၢတပှဲၤဘၣ်တဖၣ် အိၣ်ဝးတရံးအီၤလီၤ. အမိၢ်အပၢ်ဒီး အဒီပုၢ်ဝဲၢ်တဖၣ် တလၢတပှဲၤစ့ၢ်ကီးဘၣ်. ယ့ၣ်ၡူး အပျဲၢ်အဘီၣ်တဖၣ် လၢအရ့ဒီးအီၤဘူးဘူးတံၢ်တံၢ်ဒၣ်လဲာ် ပာ်ဖျါထီၣ်ဝဲ တၢ်ပာ်ထီၣ်ထီသးဒီး တၢ်အဲၣ်လီၤထဲအသးန့ၣ်လီၤ. အဒိ, ဖဲတချုး ယ့ၣ်ၡူး သံဒံးဘၣ်အနၤန့ၣ် အပျဲၢ်အဘီၣ်တဖၣ် တဲအါလိာ်သးလၢ “မ့ၢ်မတၤမတၤလၢ အကျါကဘၣ်တၢ်ပာ်အီၤလၢ အဒိၣ်ကတၢၢ်တဂၤ” လဲၣ်အဂ့ၢ်န့ၣ်လီၤ. (လူၤကၣ် ၂၂:၂၄) အပျဲၢ်အဘီၣ်တဖၣ် အတၢ်ထံၣ်တလၢတပှဲၤဒၣ်လဲာ် ယ့ၣ်ၡူးသ့ၣ်ညါဝဲလၢ တယံာ်လၢၤဘၣ်န့ၣ် အဝဲသ့ၣ်ကကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီ ဒီးအဝဲသ့ၣ် ကဒုးအိၣ်ထီၣ်တၢ်အိၣ်ဖှိၣ်လၢ အပှဲၤဒီးတၢ်ဃူတၢ်ဖိးန့ၣ်လီၤ. ဖဲနၤအဝဲန့ၣ် ယ့ၣ်ၡူးဃ့ဘါထုကဖၣ်တၢ်ဒ်သိး အဝဲသ့ၣ်ကအိၣ်ဃူဃူဖိးဖိးအဂီၢ်လီၤ. ဒီးအဝဲဃ့တၢ်ဆူအပၢ်အအိၣ် ဒ်သိးအပျဲၢ်အဘီၣ်တဖၣ် ကအိၣ်ဃူအိၣ်ဖိး ဒီးစံးဝဲလၢ “ပၢ်ဧၢ, ဒ်နအိၣ်လၢယပူၤ, ဒီးယအိၣ်လၢနပူၤအသိး . . . ဒ်သိးအဝဲသ့ၣ်ကမ့ၢ်တၢ်တမံၤဃီ, ဒ်ပမ့ၢ်တၢ်တမံၤဃီအသိးလီၤ.”—ယိၤဟၣ် ၁၇:၂၁, ၂၂.
၁၂, ၁၃. (က) ဒ်ပမ့ၢ်ခရံာ်ဖိတဂၤအသိး ပဖီတၢၣ်ကဘၣ်မ့ၢ်တၢ်မနုၤလဲၣ်. (ခ) ဒီပုၢ်ဝဲၢ်ခွါတဂၤသ့ၣ်ညါဘၣ်လၢ အဝဲကဘၣ်မၤအါထီၣ်တၢ်ဃူတၢ်ဖိး လၢကျဲဒ်လဲၣ်.
၁၂ ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် ဂုာ်ကျဲးစၢးဝဲလၢ ကမၤအါထီၣ် တၢ်ဃူတၢ်ဖိးလၢ တၢ်အိၣ်ဖှိၣ်အပူၤန့ၣ်လီၤ. (ဖး အ့းဖ့းစူး ၄:၁-၆, ၁၅, ၁၆ တက့ၢ်.) ဒ်ပမ့ၢ်ခရံာ်ဖိတဖၣ်အသိး ပဖီတၢၣ်န့ၣ်မ့ၢ်ဝဲလၢ ပက “ဒုးတံၢ်လိာ်ပနီၢ်ဒီဂၤညါအဆၢ” န့ၣ်လီၤ. တၢ်အံၤ အဲၣ်ဒိးစံးဝဲ တၢ်မၤသကိးတၢ်လၢ တၢ်ဃူတၢ်ဖိးအပူၤန့ၣ်လီၤ. ဒ်သိးပကအိၣ်ဒီး တၢ်ဃူတၢ်ဖိးဒ်အံၤအဂီၢ် ခရံာ်ဖိကိးဂၤဒဲးကဘၣ်ဆီၣ်လီၤအသးလီၤ. ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီ မ့ၢ်တူၢ်ဘၣ်ဝဲတၢ်သးအုး ခီဖျိလၢ ပှၤဂၤအတၢ်တလၢတပှဲၤဘၣ် အဃိဒၣ်လဲာ် အဝဲကဂုာ်ကျဲးစၢးဝဲဒ်သိး တၢ်အိၣ်ဖှိၣ် ကအိၣ်ဒီးတၢ်ဃူတၢ်ဖိးအဂီၢ်လီၤ. လၢတၢ်န့ၣ်အဃိ သံကွၢ်လီၤက့ၤနသးလၢ– ‘ဖဲယဒီပုၢ်ဝဲၢ်မုၣ် မ့တမ့ၢ် ဒီပုၢ်ဝဲၢ်ခွါတဖၣ် မၤကမၣ်ဘၣ်တၢ်အခါန့ၣ် မ့ၢ်ယထံၣ်အဝဲသ့ၣ်ဒ်လဲၣ်. ဖဲပှၤတဂၤဂၤ မၤဘၣ်ဒိယသးအခါန့ၣ် မ့ၢ်ယမၤဆၢက့ၤအီၤဒ်လဲၣ်. မ့ၢ်ယတကတိၤတၢ်ဒီးအီၤ လၢၤဘၣ်ဧါ. မ့တမ့ၢ် မ့ၢ်ယဂုာ်ကျဲးစၢးမၤဂ့ၤထီၣ်က့ၤ ယတၢ်ရ့လိာ်သးဒီးအီၤစ့ၢ်ကီးဧါ.’ ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် ကဂုာ်ကျဲးစၢးမၤဂ့ၤထီၣ်က့ၤအတၢ်ရ့လိာ်သး ဒီးတအဲၣ်ဒိးဝဲလၢ တၢ်သဘံၣ်သဘုၣ်အိၣ်ထီၣ်ဝဲလၢ ဒီပုၢ်ဝဲၢ်သ့ၣ်တဖၣ်အကျါဘၣ်.
၁၃ ပကကွၢ်သကိး ဒီပုၢ်ဝဲၢ်ခွါအူဝံၣ် အဒိအတဲာ်လီၤ. လၢအပူၤကွံာ်န့ၣ် အဝဲသးထီၣ်ဘၣ်တၢ်ခီဖျိလၢ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် အတၢ်ဂံၢ်စၢ်ဘါစၢ်အဃိန့ၣ်လီၤ. ဒီးအဝဲဖးဝဲလံာ်စီဆှံဒီး မၤလိဝဲ စီၤဒၤဝံးအဂ့ၢ်အကျိၤလၢ Insight on hte Scriptures အပူၤလီၤ. ဘၣ်မနုၤအဃိ ဘၣ်မၤလိဝဲစီၤဒၤဝံးအဂ့ၢ်လဲၣ်. မ့ၢ်လၢစီၤဒၤဝံးစ့ၢ်ကီး ဘၣ်ကွၢ်ဆၢၣ်မဲာ်ဒီး တၢ်သဘံၣ်သဘုၣ်လၢ အဟဲကဲထီၣ်အသးလၢ ယွၤအခ့အပှၤအကျါန့ၣ်လီၤ. အဒိ စီၤပၤစီၤစီလူး ဂုာ်ကျဲးစၢးမၤသံ စီၤဒၤဝံး ဒီးမ့မ့ၢ်ပှၤအဂၤတနီၤန့ၣ် အဲၣ်ဒိးကွံာ်သံစီၤဒၤဝံးလၢလၢၢ်လီၤ. စီၤဒၤဝံးအမါဒၣ်လဲာ် နံၤဘၣ်ဖၣ်လဲအီၤလီၤ. (၁ ၡမူၤအ့လး ၁၉:၉-၁၁; ၃၀:၁-၆; ၂ ၡမူၤအ့လး ၆:၁၄-၂၂) ပှၤမၤအီၤဒ်လဲၣ်ဒ်လဲၣ်သနာ်က့ စီၤဒၤဝံးအဲၣ်ကစၢ်ယွၤဒီး သန့ၤအသးလၢအီၤလီၤ. တကးဒံးဘၣ် စီၤဒၤဝံးပာ်ဖျါထီၣ် တၢ်သးကညီၤလၢ ပှၤဂၤအဖီခိၣ်လီၤ. ဖဲဒီပုၢ်ဝဲၢ်ခွါအူဝံၣ် မၤလိဘၣ်တၢ်ဂ့ၢ်တဖၣ်အံၤ အဆၢကတီၢ် အဝဲသ့ၣ်ညါလီၤက့ၤအသးလၢ အဝဲကဘၣ်မၤဒ် စီၤဒၤဝံးအသိးန့ၣ်လီၤ. ခီဖျိလၢအမၤလိဘၣ်တၢ်လၢ လံာ်စီဆှံအပူၤအဃိ အဝဲနၢ်ပၢၢ်ထီၣ်လၢ အဝဲကဘၣ်ဆီတလဲအတၢ်ထံၣ် ဘၣ်ဃးဒီးဒီပုၢ်ဝဲၢ်တဖၣ်အတၢ်လီၤတူာ်လီၤကာ်လီၤ. အဝဲတဘၣ်သ့ၣ်နီၣ်ထီၣ်က့ၤ ဒီပုၢ်ဝဲၢ်အတၢ်ကမၣ်တဖၣ်ဘၣ်, ဒီးကဘၣ်မၤအါထီၣ် တၢ်ဃူတၢ်ဖိးလၢ တၢ်အိၣ်ဖှိၣ်အပူၤလီၤ. နၤစ့ၢ်ကီး မ့ၢ်နကမၤဒ်န့ၣ်ဧါ.
ဃုထၢတံၤသကိးတဖၣ်လၢ အမၤတၢ်ဘၣ်ယွၤအသး
၁၄. ယ့ၣ်ၡူးဃုထၢ အတံၤသကိးဒ်လဲၣ်.
၁၄ ယ့ၣ်ၡူးခရံာ်န့ၣ် ရ့လိာ်အသးဒီး ပှၤကိးဂၤဒဲးလီၤ. လၢတၢ်န့ၣ်အဃိ ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ ဖိသၣ်မ့ၢ်ဂ့ၤ သးစၢ်မ့ၢ်ဂ့ၤ သးပှၢ်မ့ၢ်ဂ့ၤန့ၣ် ရ့ဒီးကစၢ်ခရံာ်ဘူၣ်ဝဲလီၤ. ဘၣ်ဆၣ်ယ့ၣ်ၡူးန့ၣ် ဃုထၢအတံၤသကိးတဖၣ် လီၤတံၢ်လီၤဆဲးလီၤ. အဝဲစံးဘၣ်အတၢ်မၢဖိတဖၣ်လၢ– “ဖဲဒၣ်ယမၤလိာ်သုတဖၣ်န့ၣ်, သုမ့ၢ်မၤဒီး, သုမ့ၢ်ယတံၤယသကိးလီၤ.” (ယိၤဟၣ် ၁၅:၁၄) ယ့ၣ်ၡူးအတံၤသကိးတဖၣ်န့ၣ် မ့ၢ်ပှၤလၢအအဲၣ်ယဟိဝၤယွၤဒီး မၤအတၢ်မၤတဖၣ်န့ၣ်လီၤ. မ့ၢ်နဃုထၢ နတံၤသကိးတဖၣ်လၢ အအဲၣ်ယဟိဝၤယွၤလၢ အသူၣ်ဒီဖျၢၣ်သးဒီဖျၢၣ်စ့ၢ်ကီးဧါ. ဘၣ်မနုၤအဃိ အရ့ဒိၣ်လၢ နကဃုထၢ နတံၤသကိးဒ်အံၤလဲၣ်.
၁၅. ပှၤသးစၢ်တဖၣ်လၢရ့လိာ်အသး ဒီးခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် ကဒိးန့ၢ်ဘၣ်ဝဲတၢ်ဘျုးတၢ်ဖှိၣ်မနုၤတဖၣ်လဲၣ်.
၁၅ တၤသူတၤသၣ် အါတက့ၢ်မံဝဲချ့ဖဲ အဘၣ်ဒီးမုၢ်တၢ်ကပီၤန့ၣ်လီၤ. ဒ်န့ၣ်အသိး ပဒီပုၢ်ဝဲၢ်မုၣ်ဒီပုၢ်ဝဲၢ်ခွါ အတၢ်အဲၣ်တဖၣ်န့ၣ် မၤစၢၤပှၤဒ်သိး ပကကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ်လီၤ. နမ့မ့ၢ်သးစၢ်တဂၤန့ၣ် မ့ၢ်နဂုာ်ကျဲးစၢးဆၢတဲာ်လီၤနသးလၢ နကမၤတၢ်တမံၤမံၤ လၢနတၢ်အိၣ်မူအပူၤဧါ. နမ့ၢ်ဃုထၢနတံၤသကိးလၢ အမၤယဟိဝၤယွၤအတၢ်မၤဒီး မၤအါထီၣ်တၢ်ဃူတၢ်ဖိးလၢ တၢ်အိၣ်ဖှိၣ်အပူၤန့ၣ် မ့ၢ်နအိၣ်ဒီးတၢ်ကူၣ်သ့န့ၣ်လီၤ. ဘၣ်သ့ၣ်သ့ၣ် အဝဲသ့ၣ်တဖၣ်န့ၣ် ကွၢ်ဆၢၣ်မဲာ်ဘၣ်တၢ်ကီတၢ်ခဲလၢ အတၢ်အိၣ်မူပူၤဒီး တူၢ်ဘၣ်ဝဲတၢ်မၤကွၢ်တဖၣ် ဖဲအမၤယွၤအတၢ်မၤအခါန့ၣ်လီၤ. အဝဲသ့ၣ်ကမၤစၢၤနၤဒ်သိး နကဃုထၢတၢ်အိၣ်မူအကျဲလၢ အဂ့ၤကတၢၢ်န့ၣ်လီၤ. ဖဲနရ့လိာ်သးဒီးအဝဲသ့ၣ်အခါ ကမၤစၢၤနၤဒ်သိး နကဆၢတဲာ်တၢ်လၢအဂ့ၤ ဒီးနကအိၣ်မူဒ်ခရံာ်ဖိတဂၤအသိးလီၤ.—ဖး ဧ့ၤဘြံၤ ၅:၁၄ တက့ၢ်.
၁၆. ဒီပုၢ်ဝဲၢ်လၢအသးပှၢ်တဖၣ် မၤစၢၤဒီပုၢ်ဝဲၢ်မုၣ်သးစၢ်တဂၤဒ်လဲၣ်.
၁၆ ဒီပုၢ်ဝဲၢ်မုၣ်ဟဲကၣ် သ့ၣ်နီၣ်ထီၣ်ဝဲလၢ ဖဲအထီၣ်ကၠိအလီၢ်ခံကတၢၢ်တနံၣ်န့ၣ် အသကိးတဖၣ် တဲဝဲလၢ အဝဲသ့ၣ်အိၣ်ဒီးဖီတၢၣ်လၢ ခါဆူညါအဂီၢ်လီၤ. လၢအဝဲသ့ၣ်အကျါအါဂၤန့ၣ် အဲၣ်ဒိးထီၣ်ဝဲဖၠၣ်စိမိၤ ဒ်သိးကမၤန့ၢ်ဝဲ တၢ်မၤဂ့ၤဂ့ၤအဂီၢ်န့ၣ်လီၤ. ဘၣ်ဆၣ်မ့မ့ၢ် ဒီပုၢ်ဝဲၢ်မုၣ်ဟဲကၣ်န့ၣ် အဝဲတဲသကိးတၢ်ဒီး အသကိးတဖၣ် လၢတၢ်အိၣ်ဖှိၣ်အပူၤ လၢအဒိၣ်တုာ်ခိၣ်ပှဲၤလၢနီၢ်သးတခီန့ၣ်လီၤ. အဝဲစံးဝဲလၢ– “အဝဲသ့ၣ်တဖၣ်န့ၣ် အညါပှၢ်န့ၢ်ယၤဘၣ်ဆၣ် အဝဲသ့ၣ်မၤစၢၤယၤလီၤ. အဝဲသ့ၣ်ဟ့ၣ်ဂံၢ်ဟ့ၣ်ဘါယၤလၢ ယကမၤကစၢ်ယွၤအတၢ်မၤလၢ ဆၢကတီၢ်လၢပှဲၤန့ၣ်လီၤ. လၢတၢ်န့ၣ်အဃိ ယမၤဘၣ်ဝဲပှၤလဲၤလၢညါအတၢ်မၤ ယဲၢ်နံၣ်ညါလီၤ. တၢ်အံၤပူၤကွံာ်ဝဲ အါနံၣ်လံဘၣ်ဆၣ် ဖဲယသးစၢ်အခါ ယမၤဘၣ် ယဟိဝၤယွၤအတၢ်မၤ လၢလၢပှဲၤပှဲၤအဃိ ယသးခုဒိၣ်မးန့ၣ်လီၤ. ခီဖျိလၢယမၤဘၣ်ဒ်န့ၣ်အဃိ ယသးတအုး နီတစဲးဘၣ်.”
၁၇, ၁၈. ပမၤကစၢ်ယွၤအတၢ်မၤလၢ အဂ့ၤကတၢၢ်ကသ့ဒ်လဲၣ်.
၁၇ ပမ့ၢ်ကွၢ်လိယ့ၣ်ၡူးန့ၣ် ပကဒိၣ်ထီၣ်ထီထီၣ်ဒီး ကကဲထီၣ်ခရံာ်ဖိလၢအဒိၣ်တုာ်ခိၣ်ပှဲၤလၢနီၢ်သးတခီလီၤ. ပကသုးဘူးပသးဆူ ယဟိဝၤယွၤအအိၣ်ဒီး ပကအဲၣ်ဒိးမၤအါထီၣ် အတၢ်မၤစ့ၢ်ကီးန့ၣ်လီၤ. ပှၤတဂၤလၢ အဒိၣ်တုာ်ခိၣ်ပှဲၤန့ၣ် ကမၤကစၢ်ယွၤအတၢ်မၤလၢ အဂ့ၤကတၢၢ်န့ၣ်လီၤ. ယ့ၣ်ၡူးဟ့ၣ်ဂံၢ်ဟ့ၣ်ဘါ အပျဲၢ်အဘီၣ်တဖၣ်လၢ– “သုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီအမဲာ်ညါ ဒ်သိးအကထံၣ်ဘၣ် သုမၤတၢ်ဂ့ၤ, ဒီးကစံးထီၣ်ပတြၢၤ သုပၢ်အိၣ်လၢမူခိၣ်န့ၣ်တက့ၢ်.”—မးသဲ ၅:၁၆.
၁၈ ပသ့ၣ်ညါဘၣ်လၢ ခရံာ်ဖိတဖၣ်လၢအဒိၣ်တုာ်ခိၣ်ပှဲၤလၢနီၢ်သးတခီ အတၢ်မၤစၢၤန့ၣ် ကဲဘျုးကဲဖှိၣ်လၢ တၢ်အိၣ်ဖှိၣ်အဂီၢ်လီၤ. ကျဲလၢခရံာ်ဖိတဂၤ သူဝဲအသးလၢအသ့ၣ်ညါဒၣ်တၢ်န့ၣ် ပာ်ဖျါထီၣ်ဝဲလၢအမ့ၢ် ပှၤဒိၣ်တုာ်ခိၣ်ပှဲၤတဂၤန့ၣ်လီၤ. ပသးလၢအသ့ၣ်ညါဒၣ်တၢ်န့ၣ် မၤစၢၤပှၤဒ်သိး ပကဆၢတဲာ်တၢ်လၢအဂ့ၤကသ့ဒ်လဲၣ်. ဒီးပပာ်ဖျါထီၣ် တၢ်ပာ်ကဲ ပှၤဂၤအသးလၢအသ့ၣ်ညါဒၣ်တၢ်ကသ့ဒ်လဲၣ်. ပကစံးဆၢတၢ်သံကွၢ်တဖၣ်အံၤလၢ တၢ်မၤလိလၢခံတခါအပူၤန့ၣ်လီၤ.
^ လံာ်အဆၢ. 6 အဒိ ဒီပုၢ်ဝဲၢ်ခွါလၢအသးပှၢ် ဒီးအတၢ်လဲၤခီဖျိ အိၣ်အါတဖၣ်န့ၣ် ဘၣ်သ့ၣ်သ့ၣ် ကဘၣ်ဟ့ၣ်လီၤက့ၤ အမူဒါတနီၤ ဆူဒီပုၢ်ဝဲၢ်ခွါလၢ အသးစၢ်တဖၣ်န့ၣ်လီၤ. လၢတၢ်န့ၣ်အဃိ အဝဲသ့ၣ်တဖၣ် ကဘၣ်ဆီၣ်ထွဲမၤစၢၤဝဲ ဒီပုၢ်ဝဲၢ် လၢအသးစၢ်တဖၣ် လၢအဒိးန့ၢ်ဘၣ် ဝဲအမူဒါအသီန့ၣ်လီၤ.
