မံကၤ ၅:၁-၁၅
၅ “ပှၤအိၣ်လၢ ဝ့ၢ်လၢပှၤကဝီၤဃာ်အီၤသ့ၣ်ဧၢ,ခဲအံၤ သုကူးလီၤက့ၤ သုနီၢ်ကစၢ်အသးလံ.
ပှၤဟဲကဝီၤဃာ်ပှၤလံ.+
ဒီးအဝဲသ့ၣ်တီၢ်ဝဲ အံၣ်စရ့လး အပှၤစံၣ်ညီၣ်ကွီၢ်တဂၤ အဘိးပၤလၢ နီၣ်တီၢ်လီၤ.+
၂ အိ ဘ့ၤသလ့ဃ့ၣ် အ့ဖရးသးဧၢ,+နပၣ်ဃုာ်လၢ ယူဒၤအဝ့ၢ်လၢ အဆံးကတၢၢ်တဖၣ်အကျါ ဘၣ်ဆၣ်ပှၤတဂၤလၢ အကပၢအံၣ်စရ့လး လၢယဂီၢ်န့ၣ် ကဟဲထီၣ်လၢ နပူၤလီၤ.+
ပှၤတဂၤန့ၣ် အခီၣ်ထံးခီၣ်ဘိ အိၣ်ပာ်စၢၤလၢပျၢၤ ဖးယံာ်လံ.
၃ ကစၢ်ယွၤ ကပာ်တ့ၢ်ကွံာ် အပှၤဂီၢ်မုၢ်တုၤလီၤလၢ ပိာ်မုၣ်* လၢကအိၣ်ဖျဲၣ်ထီၣ်အဖိ တဂၤန့ၣ် အိၣ်ဖျဲၣ်ထီၣ်ဝဲ တစုလီၤ.
မ့မ့ၢ် ပှၤပၢတၢ်တဂၤ အဒီပုၢ်ဝဲၢ်အဂၤတဖၣ်န့ၣ် ကဟဲက့ၤဘၣ်လၢ ပှၤအံၣ်စရ့လးဖိ အအိၣ်လီၤ.
၄ ဒီးပှၤပၢတၢ်တဂၤန့ၣ် ကဆၢထၢၣ် ဒီးဒ်ပှၤကွၢ်သိတဂၤအသိး အကအံးထွဲကွၢ်ထွဲ အပှၤဂီၢ်မုၢ်လၢ ယဟိဝၤယွၤ အတၢ်ဂံၢ်တၢ်ဘါ အပူၤ+ဒီးလၢ တၢ်စိတၢ်ကမီၤလၢ အဒိးန့ၢ်ဘၣ်ဝဲလၢ အကစၢ် ယဟိဝၤယွၤ အမံၤအပူၤလီၤ.
ဒီးအဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢလီၤ.+
ဖဲန့ၣ်အခါ ပှၤပၢတၢ်တဂၤန့ၣ် အတၢ်ပၢ ကတုၤလၢ ဟီၣ်ခိၣ်အနၢၣ် အကတၢၢ်လီၤ.+
၅ အဝဲ ကဒုးအိၣ်ထီၣ် တၢ်ဃူတၢ်ဖိးလီၤ.+
ပှၤအၤၡူၢ်ဖိတဖၣ် မ့ၢ်နုာ်လီၤဆူၣ်လၢ ပကီၢ်ပူၤ ဒီးယီၢ်လီၤ ပတၢးလၢ အကျၢၤတဖၣ်န့ၣ်+ပကဃုထၢထီၣ် ပှၤကွၢ်သိ လၢအမ့ၢ်ပှၤခိၣ်ပှၤနၢ်နွံဂၤ ဃိးဂၤ လၢပှၤပိာ်ခွါတဖၣ်အကျါ လၢကထီဒါက့ၤ ပှၤအၤၡူၢ်ဖိ အဂီၢ်လီၤ.
၆ အဝဲသ့ၣ် ကစံၣ်ညီၣ် ကီၢ်အၤၡူၢ် လၢနးတဘ့ၣ်+ဒီးကစံၣ်ညီၣ် စီၤနံးမရိး အကီၢ်+ ဖဲကီၢ်အကျဲနုာ်လီၤတဖၣ်အလီၢ်လီၤ.
ဖဲပှၤအၤၡူၢ်ဖိ နုာ်လီၤဆူၣ်လၢ ပကီၢ်ပူၤ ဒီးယီၢ်လီၢ်လၢ ပဟီၣ်ကဝီၤပူၤအခါပှၤပၢတၢ်တဂၤန့ၣ် ကမၤပူၤဖျဲးပှၤလၢ ပှၤအၤၡူၢ်ဖိတဖၣ် အစုပူၤလီၤ.+
၇ စီၤယၤကိာ် အစၢၤအသွဲၣ်လၢ အအိၣ်တ့ၢ်တဖၣ်န့ၣ် ကအိၣ်ဘၣ်လၢ ပှၤအါဂၤအကျါဒ်ပစီၤထံ လၢအဟဲလၢ ယဟိဝၤယွၤအအိၣ်ဒီးဒ်မူခိၣ်ထံလၢ အစူၤလီၤလၢ တၢ်မုၢ်တၢ်ဘိတဖၣ်အလိၤလီၤ.
ပစီၤထံ ဒီးမူခိၣ်ထံတဖၣ်အံၤန့ၣ် တလိၣ် မုၢ်လၢ်တၢ်လၢ ပှၤဟီၣ်ခိၣ်ဖိအအိၣ်ဘၣ်ဒီးတလိၣ်အိၣ်ခိး ပှၤကညီဘၣ်.
၈ စီၤယၤကိာ် အစၢၤအသွဲၣ်လၢ အအိၣ်တ့ၢ်တဖၣ်န့ၣ် ကအိၣ်လၢ ပှၤကလုာ်တဖၣ်အကျါဒီးပှၤအါဂၤအကျါဒ်ခ့ယုၢ်တဒုလၢ အအိၣ်လၢ ဆၣ်ဖိကီၢ်ဖိလၢ ပှၢ်ပူၤအကျါဒီးဒ်ခ့ယုၢ်ဖိလၢ အအိၣ်လၢ သိအဖုတဖၣ်အကျါလီၤ.
ခ့ယုၢ် ဒီးခ့ယုၢ်ဖိန့ၣ် လဲၤခီဂာ်တၢ်, ပှီၤအီၣ်တၢ် ဒီးအ့ၣ်ဖှီတၢ် တက့တက့လီၤ.
ဒီးပှၤလၢအမၤပူၤဖျဲးတၢ် လၢအစုပူၤန့ၣ် တအိၣ်နီတဂၤဘၣ်.
၉ သုကမၤနၢၤ သုဒုၣ်သုဒါတဖၣ်ဒီးသုဒုၣ်သုဒါန့ၣ် ကဟးဂီၤကွံာ် ခဲလၢာ်လီၤ.”
၁၀ ယဟိဝၤယွၤ တဲဝဲလၢ “ဖဲတၢ်တနံၤန့ၣ်ယကမၤလီၤမၢ်ကွံာ် သုကသ့ၣ်တဖၣ် ဒီးယကမၤဟးဂီၤကွံာ် သုလ့ၣ်ကဟၣ်တဖၣ်လီၤ.
၁၁ ယကမၤဟးဂီၤကွံာ် ဝ့ၢ်လၢအအိၣ်လၢ သုကီၢ်ပူၤဒီးယကမၤလီၤပှီၢ်ကွံာ် သုတၢ်အိၣ်သဒၢအလီၢ် ခဲလၢာ်လီၤ.
၁၂ ယကမၤကတၢၢ်ကွံာ် တၢ်အူတၢ်လိၢ်တၢ် အတၢ်မၤ လၢသုမၤအီၤဒီးပှၤအူတၢ်သမူတၢ်တဖၣ် တအိၣ်တ့ၢ်လၢသုကျါ နီတဂၤလၢၤဘၣ်.+
၁၃ ယကမၤဟးဂီၤကွံာ် သုတၢ်ဂီၤတၢ်ဖှီၣ်တဖၣ် ဒီးသုလၢၢ်ထူၣ်စီဆှံ လၢအအိၣ်လၢ သုကျါလီၤ.
ဒီးသုတဘါလီၤဘၣ် တၢ်လၢသုတ့အီၤလၢ သုစုတဖၣ်လၢၤဘၣ်.+
၁၄ ယကထဲးထီၣ်ကွံာ် သုတၢ်စီဆှံ အထူၣ်တဖၣ်+ လၢအအိၣ် လၢသုကျါဒီးယကမၤဟးဂီၤကွံာ် သုဝ့ၢ်တဖၣ်လီၤ.
၁၅ ပှၤကလုာ်လၢ အတဒိကနၣ်တၢ်တဖၣ်န့ၣ်ယကဟ့ၣ်ကၣ်က့ၤ အဝဲသ့ၣ်လၢ တၢ်သးဒိၣ် ဒီးတၢ်သူၣ်ဒိၣ်သးဖျိး အပူၤလီၤ.”
တၢ်ဂ့ၢ်အဘျဲၣ်တဖၣ်
^ ဖျါလၢအဲၣ်ဒိးတဲဝဲ စံယိၣ်.
