ယိၤဟၣ် ၁၇:၁-၂၆
၁၇ ယ့ၣ်ၡူး တဲတၢ်ဂ့ၢ်တဖၣ်အံၤ ဝံၤဒီးကွၢ်ထီၣ်တၢ် ဆူမူခိၣ် ဒီးတဲဝဲလၢ “ပၢ်ဧၢ, တၢ်ဆၢကတီၢ် ဘၣ်လံအဃိ မၤလၤကပီၤနဖိခွါ ဒ်သိးနဖိခွါ မၤလၤကပီၤနၤ ကသ့အဂီၢ်တက့ၢ်.+
၂ နဟ့ၣ်လီၤနဖိခွါ တၢ်စိတၢ်ကမီၤလၢ ပှၤဟီၣ်ခိၣ်ဖိခဲလၢာ်အဖီခိၣ်+ ဒ်သိး နဖိခွါကဟ့ၣ် တၢ်မူအထူအယိာ်+ ဆူပှၤခဲလၢာ်လၢ နဟ့ၣ်လီၤလၢ နဖိခွါအအိၣ်လီၤ.+
၃ ဒ်သိး ပှၤကန့ၢ်ဘၣ် တၢ်မူအထူအယိာ်အဂီၢ်+ အဝဲသ့ၣ် ကဘၣ်သ့ၣ်ညါထီၣ်နၤ* လၢအမ့ၢ် ကစၢ်ယွၤ အမ့ၢ်အတီထဲ တဂၤဧိၤ+ ဒီးယ့ၣ်ၡူးခရံာ်လၢ နဆှၢလီၤအီၤ တဂၤန့ၣ်လီၤ.+
၄ တၢ်မၤလၢ နဟ့ၣ်လီၤယၤန့ၣ် ယမၤအီၤဝံၤလံအဃိ+ ယမၤလၤကပီၤနၤ လၢဟီၣ်ခိၣ်ချၢလံ.+
၅ အဃိ ပၢ်ဧၢ, ခဲအံၤ ပျဲယအိၣ်လၢ နကပၤဒီး ဟ့ၣ်ယၤတၢ်လၤကပီၤ လၢအအိၣ်ဒီးယၤ ဖဲယအိၣ်လၢ နကပၤ တချုးလၢ ဟီၣ်ခိၣ်ကဲထီၣ်ဒံးဘၣ် အခါတက့ၢ်.+
၆ “ပှၤလၢအဘၣ်ဃးတ့ၢ်ဒီးဟီၣ်ခိၣ် လၢနဟ့ၣ်လီၤယၤန့ၣ် ယပာ်ဖျါထီၣ်န့ၢ်အဝဲသ့ၣ်လၢ နမံၤလံ.+ အဝဲသ့ၣ်တဖၣ်န့ၣ် ကဲနတၢ်ဒီး နဟ့ၣ်လီၤအဝဲသ့ၣ် လၢယအိၣ် ဒီးအဝဲသ့ၣ်မၤထွဲ နတၢ်ကတိၤလီၤ.
၇ ခဲအံၤ အဝဲသ့ၣ် သ့ၣ်ညါထီၣ်လၢ တၢ်ခဲလၢာ်လၢ နဟ့ၣ်လီၤယၤန့ၣ် ဟဲလၢနအိၣ်,
၈ မ့ၢ်လၢ ယတဲဘၣ် အဝဲသ့ၣ်တၢ်လၢ နတဲဘၣ်ယၤတဖၣ်အဃိလီၤ.+ ဒီးအဝဲသ့ၣ် တူၢ်လိာ်ဝဲ တၢ်ဂ့ၢ်တဖၣ်အံၤ ဒီးသ့ၣ်ညါဝဲဂ့ၤဂ့ၤလၢ ယဟဲဒ် နပှၤခၢၣ်စးတဂၤအသိး+ ဒီးအဝဲသ့ၣ်နာ်လၢ နဆှၢလီၤယၤလီၤ.+
၉ ယဃ့တၢ်လၢ အဝဲသ့ၣ်အဂီၢ်လီၤ. ယတဃ့တၢ်လၢ ဟီၣ်ခိၣ်အဂီၢ်ဘၣ်. ယဃ့တၢ်လၢ ပှၤလၢနဟ့ၣ်လီၤယၤတဖၣ်အံၤအဂီၢ်, မ့ၢ်လၢ အဝဲသ့ၣ်န့ၣ် မ့ၢ်နတၢ်အဃိလီၤ.
၁၀ ဒီးတၢ်လၢ အအိၣ်ဒီးယၤ ခဲလၢာ်န့ၣ် မ့ၢ်နတၢ်ဒီး နတၢ်န့ၣ် မ့ၢ်ယတၢ်လီၤ.+ ဒီးယဘၣ် တၢ်မၤလၤကပီၤယၤလၢ အဝဲသ့ၣ်အကျါလီၤ.
၁၁ “ယတအိၣ်လၢ ဟီၣ်ခိၣ်ချၢလၢၤဘၣ်. ဘၣ်ဆၣ် အဝဲသ့ၣ်အိၣ်လၢ ဟီၣ်ခိၣ်ချၢလီၤ.+ မ့မ့ၢ်ယၤန့ၣ် ယကက့ၤလၢ နအိၣ်လီၤ. ပၢ်စီဆှံဧၢ, ဒ်သိးအဝဲသ့ၣ် ကကဲထီၣ် တၢ်တမံၤဃီ ဒ်ပမ့ၢ်တၢ်တမံၤဃီအသိးအဂီၢ်+ ဒီသဒၢအဝဲသ့ၣ်+ လၢနမံၤလၢနဟ့ၣ်လီၤယၤ အဃိန့ၣ်တက့ၢ်.
၁၂ ဖဲယအိၣ်ဒီး အဝဲသ့ၣ်အခါ ယဒီသဒၢ အဝဲသ့ၣ်လၢ နမံၤလၢ နဟ့ၣ်လီၤယၤ အဃိလီၤ.+ ဒီးယဒီသဒၢ အဝဲသ့ၣ် ဒီးအဝဲသ့ၣ် တလီၤမၢ်နီတဂၤဘၣ်.+ လီၤမၢ်ထဲဒၣ် တၢ်ဟးဂီၤအဖိခွါတဂၤ+ ဒ်သိးတၢ်ကွဲးအသး ကလၢထီၣ်ပှဲၤထီၣ် အဂီၢ်လီၤ.+
၁၃ ဘၣ်ဆၣ် ခဲအံၤ ယကက့ၤလၢနအိၣ်လီၤ. ဒီးယတဲတၢ်ဂ့ၢ်တဖၣ်အံၤ လၢဟီၣ်ခိၣ်ချၢ ဒ်သိး ယတၢ်သးခုန့ၣ် ကအိၣ်လၢ အဝဲသ့ၣ်အပူၤ လၢလၢပှဲၤပှဲၤ အဂီၢ်လီၤ.+
၁၄ ယဟ့ၣ် အဝဲသ့ၣ်လၢ နကလုၢ်ကထါ ဘၣ်ဆၣ် မ့ၢ်လၢ အဝဲသ့ၣ် တဘၣ်ဃးဒီးဟီၣ်ခိၣ်+ ဒ်ယတဘၣ်ဃးဒီး ဟီၣ်ခိၣ်ဘၣ်အဃိ ဟီၣ်ခိၣ်သးဟ့ အဝဲသ့ၣ်လီၤ.
၁၅ “ယတဃ့လၢ နကထုးထီၣ်ကွံာ် အဝဲသ့ၣ်လၢ ဟီၣ်ခိၣ်ချၢဘၣ်. ဘၣ်ဆၣ် ဒီသဒၢ အဝဲသ့ၣ်လၢ မုၣ်ကီၤလံၢ်* အစုပူၤတက့ၢ်.+
၁၆ ဒ်ယတဘၣ်ဃးဒီး ဟီၣ်ခိၣ်ဘၣ်အသိး+ အဝဲသ့ၣ် တဘၣ်ဃးဒီး ဟီၣ်ခိၣ်ဘၣ်.+
၁၇ ပာ်စီဆှံအဝဲသ့ၣ်လၢ တၢ်မ့ၢ်တၢ်တီတက့ၢ်.+ နကလုၢ်ကထါန့ၣ် မ့ၢ်တၢ်မ့ၢ်တၢ်တီလီၤ.+
၁၈ ဒ်နဆှၢလီၤယၤလၢ ပှၤဟီၣ်ခိၣ်ဖိအကျါအသိး ယဆှၢလီၤ အဝဲသ့ၣ်လၢ ပှၤဟီၣ်ခိၣ်ဖိအကျါစ့ၢ်ကီးလီၤ.+
၁၉ ဒီးယပာ်စီဆှံ ယသးလၢ အဝဲသ့ၣ်အဂီၢ် ဒ်သိး အဝဲသ့ၣ်စ့ၢ်ကီး ကဘၣ်တၢ်ပာ်စီဆှံအီၤလၢ တၢ်မ့ၢ်တၢ်တီ အဃိလီၤ.
၂၀ “ယတဃ့တၢ်ထဲလၢ အဝဲသ့ၣ်အဂီၢ်ဘၣ်. ယဃ့စ့ၢ်ကီးလၢ ပှၤလၢအစူၢ်က့ၤ နာ်က့ၤယၤ ခီဖျိလၢ အဝဲသ့ၣ် အတၢ်ကတိၤအဃိလီၤ.
၂၁ ပၢ်ဧၢ, ယဃ့လၢ အဝဲသ့ၣ်ခဲလၢာ် ကကဲထီၣ် တၢ်တမံၤဃီ+ ဒ်နအိၣ်ဒီးယၤ ဒီးယအိၣ်ဒီးနၤအသိးလီၤ.+ ဒီးယဃ့လၢ အဝဲသ့ၣ်စ့ၢ်ကီး ကအိၣ်ဒီးပှၤ ဒ်သိး ဟီၣ်ခိၣ်ကနာ်လၢ နဆှၢလီၤယၤ အဂီၢ်လီၤ.
၂၂ ယဟ့ၣ်လီၤအဝဲသ့ၣ် တၢ်လၤကပီၤလၢ နဟ့ၣ်လီၤယၤ ဒ်သိးအဝဲသ့ၣ် ကကဲထီၣ် တၢ်တမံၤဃီ ဒ်ပမ့ၢ် တၢ်တမံၤဃီအသိးလီၤ.+
၂၃ ဒ်သိး အဝဲသ့ၣ်ကကဲထီၣ် တၢ်တမံၤဃီ လၢလၢပှဲၤပှဲၤအဂီၢ် ယအိၣ်ဒီး အဝဲသ့ၣ် ဒီးနအိၣ်ဒီးယၤလီၤ. ဒီးလၢတၢ်န့ၣ်အဃိဟီၣ်ခိၣ် ကသ့ၣ်ညါလၢ နဆှၢလီၤယၤ ဒီးနအဲၣ် အဝဲသ့ၣ် ဒ်နအဲၣ်ယၤအသိးလီၤ.
၂၄ ပၢ်ဧၢ, ပှၤလၢနဟ့ၣ်လီၤယၤန့ၣ် ယအဲၣ်ဒိးလၢ အဝဲသ့ၣ် ကအိၣ်ဒီးယၤ ဖဲယအိၣ်အလီၢ်+ ဒ်သိး အဝဲသ့ၣ်ကထံၣ် ယလၤကပီၤလၢ နဟ့ၣ်လီၤယၤလီၤ. တချုးလၢပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ်* နဟ့ၣ်လီၤယၤ တၢ်လၤကပီၤအံၤ ခီဖျိလၢ နအဲၣ်ယၤအဃိလီၤ.+
၂၅ ပၢ်လၢအတီအလိၤ တဂၤဧၢ, ဟီၣ်ခိၣ်တသ့ၣ်ညါနၤဘၣ်.+ ဘၣ်ဆၣ် ယသ့ၣ်ညါနၤ+ ဒီးပှၤလၢနဟ့ၣ်လီၤယၤတဖၣ်အံၤ သ့ၣ်ညါထီၣ်ဝဲလၢ နဆှၢလီၤယၤလီၤ.
၂၆ ယဒုးသ့ၣ်ညါ အဝဲသ့ၣ်လၢနမံၤလံ. ဒီးယကဆဲး ဒုးသ့ၣ်ညါအီၤဒ်သိး+ တၢ်အဲၣ်လၢ နအဲၣ်ယၤန့ၣ် ကအိၣ်လၢ အဝဲသ့ၣ်အပူၤ ဒီးယကအိၣ်ဒီး အဝဲသ့ၣ် အဂီၢ်လီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သ့ၣ်ညါထီၣ်နၤဂ့ၤဂ့ၤ.”
^ အခီပညီလိၤလိၤ “ပှၤအၢပှၤသီတဂၤ.”
^ မ့ၢ်စ့ၢ်ကီး “စးထီၣ်လၢ တၢ်ဒုးအိၣ်ထီၣ်ဟီၣ်ခိၣ်.”
