ယိၤဟၣ် ၈:၁၂-၅၉
၈ ၁၂ ယ့ၣ်ၡူး တဲကဒီးတၢ်ဒီးအဝဲသ့ၣ် ဒီးတဲဝဲလၢ “ယမ့ၢ်ဟီၣ်ခိၣ် အတၢ်ကပီၤလီၤ.+ ပှၤလၢ အပိာ်ယခံန့ၣ် လ့ၤတက့ၤ တဟးဘၣ်လၢ တၢ်ခံးအကျါဘၣ် ဒီးကအိၣ်ဒီး တၢ်မူအတၢ်ကပီၤလီၤ.”+
၁၃ အဃိ ပှၤဖၤရံၤၡဲတဖၣ် တဲအီၤလၢ “နအုၣ်နသးလၢ နနီၢ်ကစၢ်အဂ့ၢ်အဃိ နတၢ်အုၣ်သးန့ၣ် တမ့ၢ်တတီဘၣ်.”
၁၄ ယ့ၣ်ၡူးတဲဆၢက့ၤ အဝဲသ့ၣ်လၢ “ယမ့ၢ်အုၣ်ယသးလၢ ယနီၢ်ကစၢ်အဂ့ၢ်ဒၣ်လဲာ် ယတၢ်အုၣ်သးန့ၣ် မ့ၢ်ဝဲတီဝဲ ခီဖျိ ယသ့ၣ်ညါလၢ ယအိၣ်ဟဲဖဲလဲၣ် ဒီးယကလဲၤဖဲလဲၣ်အဃိလီၤ.+ ဘၣ်ဆၣ် ယအိၣ်ဟဲဖဲလဲၣ် ဒီးယကလဲၤဖဲလဲၣ်န့ၣ် သုတသ့ၣ်ညါဘၣ်.
၁၅ သုစံၣ်ညီၣ်တၢ်ဒ် ပှၤဟီၣ်ခိၣ်ဖိ အတၢ်ထံၣ် အိၣ်ဝဲအသိးလီၤ.+ မ့မ့ၢ်ယၤန့ၣ် ယတစံၣ်ညီၣ် ပှၤနီတဂၤဘၣ်.
၁၆ ဒီးယမ့ၢ်စံၣ်ညီၣ်တၢ် သနာ်က့ ယတၢ်စံၣ်ညီၣ်န့ၣ် မ့ၢ်ဝဲတီဝဲ မ့ၢ်လၢ ယတအိၣ်ထဲတဂၤဘၣ် ဒီးပၢ်လၢ အဆှၢလီၤယၤန့ၣ် အိၣ်ဒီးယၤအဃိလီၤ.+
၁၇ တကးဒံးဘၣ် လၢသု တၢ်သိၣ်တၢ်သီအပူၤန့ၣ် တၢ်ကွဲးအသး အိၣ်ဝဲစ့ၢ်ကီးလၢ ‘ပှၤခံဂၤ အတၢ်အုၣ်အသးန့ၣ် မ့ၢ်ဝဲတီဝဲလီၤ.’+
၁၈ ယအုၣ်ယသးလၢ ယနီၢ်ကစၢ်အဂ့ၢ် ဒီးပၢ်လၢ အဆှၢလီၤယၤန့ၣ် အုၣ်အသးလၢ ယဂ့ၢ်လီၤ.”+
၁၉ အဃိ အဝဲသ့ၣ် သံကွၢ်အီၤလၢ “နပၢ်အိၣ်ဖဲလဲၣ်.” ယ့ၣ်ၡူး တဲဆၢဝဲလၢ “ယၤမ့ၢ်ဂ့ၤ, ယပၢ်မ့ၢ်ဂ့ၤ,+ သုတသ့ၣ်ညါဘၣ်. သုမ့ၢ်သ့ၣ်ညါယၤန့ၣ် သုကသ့ၣ်ညါ ယပၢ်စ့ၢ်ကီးလီၤ.”+
၂၀ ဖဲယ့ၣ်ၡူး သိၣ်လိတၢ်လၢ တၢ်လုၢ်ဟံၣ်ပူၤ ဒီးအိၣ်လၢ တၢ်လုၢ်ဒိၣ်ပှ့ၤဒိၣ်အလီၢ်+ အခါ အဝဲတဲတၢ်ကတိၤတဖၣ်န့ၣ်လီၤ. ဘၣ်ဆၣ် မ့ၢ်လၢ အတၢ်ဆၢကတီၢ် တဘၣ်ဒံးဘၣ်အဃိ ပှၤဖီၣ်အီၤ တန့ၢ်နီတဂၤဘၣ်.+
၂၁ အဃိအဝဲတဲကဒီး အဝဲသ့ၣ်လၢ “ယကလဲၤတၢ် ဒီးသုကဃုယၤလီၤ. ဘၣ်ဆၣ် သုကသံလၢ သုတၢ်ဒဲးဘးအပူၤလီၤ.+ တၢ်လီၢ်လၢ ယကလဲၤန့ၣ် သုလဲၤတသ့ဘၣ်.”+
၂၂ ပှၤယူဒၤဖိတဖၣ် တဲဝဲလၢ “အဝဲတဲလၢ ‘တၢ်လီၢ်လၢ ယကလဲၤန့ၣ် သုလဲၤတသ့ဘၣ်’ အဃိ မ့ၢ်အဝဲ ကမၤသံလီၤအသးဟီဧါ.”
၂၃ အဝဲတဲကဒီး အဝဲသ့ၣ်လၢ “သုအိၣ်ဟဲလၢ လာ်ခီ ဘၣ်ဆၣ် မ့မ့ၢ်ယၤန့ၣ် ယအိၣ်ဟဲလၢ ထးခီလီၤ.+ သုအိၣ်ဟဲလၢ ဟီၣ်ခိၣ်အံၤ ဘၣ်ဆၣ် မ့မ့ၢ်ယၤန့ၣ် ယတအိၣ်ဟဲလၢ ဟီၣ်ခိၣ်အံၤဘၣ်.
၂၄ အဃိ ယတဲသုလၢ သုကသံလၢ သုတၢ်ဒဲးဘးအပူၤလီၤ. သုမ့ၢ်တနာ်လၢ ယမ့ၢ်ပှၤတဂၤန့ၣ်ဘၣ်န့ၣ် သုကသံလၢ သုတၢ်ဒဲးဘးအပူၤလီၤ.”
၂၅ အဝဲသ့ၣ် သံကွၢ်ယ့ၣ်ၡူးလၢ “နမ့ၢ်မတဂၤလဲၣ်.” ယ့ၣ်ၡူးတဲဆၢက့ၤ အဝဲသ့ၣ်လၢ “ယမ့ၢ်တဲတၢ်ဒီးသု သနာ်က့ အဘျုးကအိၣ်ဧါ.
၂၆ ယကဘၣ်တဲ တၢ်ဂ့ၢ်လၢ အဘၣ်ဃးဒီးသု အိၣ်ဝဲအါမံၤ ဒီးစံၣ်ညီၣ်တၢ် အါမံၤလီၤ. ဒီးပှၤလၢ အမၢလီၤယၤန့ၣ် မ့ၢ်ပှၤလၢ အကလုၢ်တီလီၤ. တၢ်လၢ ယနၢ်ဟူလၢ အအိၣ်န့ၣ် ယတဲဘၣ် ပှၤဟီၣ်ခိၣ်ဖိလီၤ.”+
၂၇ ယ့ၣ်ၡူးတဲတၢ် ဘၣ်ဃးဒီး အပၢ်အဂ့ၢ်န့ၣ် အဝဲသ့ၣ် တနၢ်ပၢၢ်ဝဲဘၣ်.
၂၈ ယ့ၣ်ၡူးတဲဝဲလၢ “သုဘျးထီၣ် ပှၤကညီဖိခွါအံၤ မ့ၢ်ဝံၤအလီၢ်ခံ+ သုကသ့ၣ်ညါလၢ ယမ့ၢ်မတဂၤလဲၣ်+ ဒီးယတမၤတၢ် ဖဲဒၣ်ယသး နီတမံၤဘၣ်.+ ဒီးတၢ်လၢယတဲန့ၣ် မ့ၢ်တၢ်လၢ ပၢ်သိၣ်လိယၤလီၤ.
၂၉ ဒီးပှၤလၢ အဆှၢလီၤယၤန့ၣ် အိၣ်ဒီးယၤလီၤ. ဒီးမ့ၢ်လၢ ယမၤအတၢ်ဘၣ်သး ထီဘိအဃိ အဝဲတပာ်တ့ၢ်ယၤ ထဲတဂၤဘၣ်.”+
၃၀ ဖဲအဝဲတဲ တၢ်ဂ့ၢ်တဖၣ်န့ၣ်အခါ ပှၤအါဂၤ စူၢ်က့ၤနာ်က့ၤအီၤလီၤ.
၃၁ ပှၤယူဒၤဖိလၢ အနာ်ယ့ၣ်ၡူးန့ၣ် ယ့ၣ်ၡူး တဲအဝဲသ့ၣ်လၢ “သုမ့ၢ်မၤထွဲ ယတၢ်ကတိၤတဖၣ် ထီဘိန့ၣ် သုမ့ၢ်ယပျဲၢ်ယဘီၣ်တဖၣ် အနီၢ်ကီၢ်လီၤ.
၃၂ ဒီးသုကသ့ၣ်ညါ တၢ်မ့ၢ်တၢ်တီ+ ဒီးတၢ်မ့ၢ်တၢ်တီ ကမၤထူၣ်ဖျဲးထီၣ်သုလီၤ.”+
၃၃ အဝဲသ့ၣ် တဲဆၢက့ၤအီၤလၢ “ပမ့ၢ်စီၤအၤဘြၤဟၣ် အစၢၤအသွဲၣ် ဒီးပတကဲဘၣ် ပှၤကုၢ် နီတဘျီဘၣ်. အဃိ နတဲလၢ ပကထူၣ်ဖျဲးထီၣ် သ့ဒ်လဲၣ်.”
၃၄ ယ့ၣ်ၡူးတဲဆၢက့ၤ အဝဲသ့ၣ်လၢ “ယကတဲဘၣ်သု တီတီလၢ ပှၤလၢ အမၤတၢ်ဒဲးဘးန့ၣ် မ့ၢ်ဝဲတၢ်ဒဲးဘး အကုၢ်လီၤ.+
၃၅ ဒီးတၢ်လၢကုၢ်န့ၣ် တအိၣ်ဘၣ်လၢ ဟံၣ်ပူၤလီၤထူလီၤယိာ်ဘၣ်. မ့မ့ၢ်ဖိခွါန့ၣ် ကအိၣ်ဘၣ်ဝဲ လီၤထူလီၤယိာ်လီၤ.
၃၆ အဃိ ဖိခွါ မ့ၢ်မၤထူၣ်ဖျဲးထီၣ်သုန့ၣ် သုကထူၣ်ဖျဲးထီၣ် နီၢ်ကီၢ်လီၤ.
၃၇ သုမ့ၢ်စီၤအၤဘြၤဟၣ် အစၢၤအသွဲၣ်န့ၣ် ယသ့ၣ်ညါလီၤ. ဘၣ်ဆၣ် မ့ၢ်လၢ သုတတူၢ်လိာ် ယတၢ်ကတိၤဘၣ်အဃိ သုအဲၣ်ဒိး မၤသံယၤလီၤ.
၃၈ တၢ်လၢ ယထံၣ်ဘၣ် ဖဲယအိၣ်ဒီး ယပၢ်အခါန့ၣ် ယတဲဖျါထီၣ်အီၤလီၤ.+ ဘၣ်ဆၣ် သုမၤတၢ်လၢ သုနၢ်ဟူဘၣ်လၢ သုပၢ်အအိၣ်လီၤ.”
၃၉ အဝဲသ့ၣ် တဲဆၢက့ၤအီၤလၢ “ပပၢ်န့ၣ် မ့ၢ်စီၤအၤဘြၤဟၣ်လီၤ.” ယ့ၣ်ၡူး တဲအဝဲသ့ၣ်လၢ “သုမ့မ့ၢ် စီၤအၤဘြၤဟၣ် အဖိအလံၤန့ၣ်+ သုကမၤဒ် စီၤအၤဘြၤဟၣ် မၤတ့ၢ်ဝဲအသိးသၢၤ.
၄၀ ဘၣ်ဆၣ် ခဲအံၤ သုဃုမၤသံယၤ လၢအမ့ၢ် ပှၤလၢအတဲဘၣ်သု တၢ်မ့ၢ်တၢ်တီ လၢအနၢ်ဟူဘၣ်လၢ ကစၢ်ယွၤ အအိၣ်လီၤ.+ မ့မ့ၢ် စီၤအၤဘြၤဟၣ်န့ၣ် တမၤဒ်န့ၣ်ဘၣ်.
၄၁ သုမၤဒ်သုပၢ် မၤဝဲအသိးလီၤ.” အဝဲသ့ၣ် တဲအီၤလၢ “ပတအိၣ်ဖျဲၣ်ထီၣ်လၢ တၢ်မၤကမၣ်မုၣ် ကမၣ်ခွါအဃိဘၣ်.* ပပၢ်အိၣ်ထဲတဂၤ လၢအမ့ၢ် ကစၢ်ယွၤလီၤ.”
၄၂ ယ့ၣ်ၡူးတဲဘၣ် အဝဲသ့ၣ်လၢ “ကစၢ်ယွၤ မ့မ့ၢ်သုပၢ်န့ၣ် သုကအဲၣ်ယၤ+ မ့ၢ်လၢ ကစၢ်ယွၤ ဆှၢလီၤယၤ ဒီးယအိၣ်ဖဲအံၤ အဃိလီၤ. ဒီးယတဟဲလၢ ယနီၢ်ကစၢ်အသးဘၣ်, အဝဲ ဆှၢလီၤယၤလီၤ.+
၄၃ ခီဖျိလၢ သုတအဲၣ်ဒိးတူၢ်လိာ် ယတၢ်သိၣ်လိဘၣ် အဃိ သုနၢ်ပၢၢ် တၢ်လၢယတဲတဖၣ် တသ့ဘၣ်.
၄၄ သုဝဲသ့ၣ်အံၤ သုပၢ်မ့ၢ်မုၣ်ကီၤလံၢ်+ ဒီးသုသးအိၣ်မၤ သုပၢ်အတၢ်ဘၣ်သးလီၤ. လၢအခီၣ်ထံးလံၤလံၤန့ၣ် အဝဲမ့ၢ်ပှၤလၢ အမၤသံပှၤကညီ+ ဒီးမ့ၢ်လၢ တၢ်မ့ၢ်တၢ်တီ တအိၣ်လၢ အပူၤဘၣ်အဃိ အဝဲတအိၣ်ဂၢၢ်ဆိးကျၢၤလၢ တၢ်မ့ၢ်တၢ်တီအပူၤဘၣ်. အဝဲမ့ၢ် ပှၤဒ်န့ၣ်တဂၤအဃိ အဝဲတဲလံၣ်တဲလီတၢ်လီၤ. အဝဲ မ့ၢ်ပှၤလံၣ်တၢ်လီတၢ်တဂၤ ဒီးတၢ်လံၣ်တၢ်လီအပၢ်လီၤ.+
၄၅ မ့မ့ၢ်ယၤန့ၣ် ယတဲဘၣ်သု တၢ်မ့ၢ်တၢ်တီ ဘၣ်ဆၣ် သုတနာ်ယၤဘၣ်.
၄၆ သုပာ်ဖျါထီၣ် တၢ်အုၣ်အသးလၢ ယမၤတၢ်ဒဲးဘးန့ၣ် သ့တဂၤဂၤဧါ. ယမ့ၢ်တဲတၢ်မ့ၢ်တၢ်တီန့ၣ် ဘၣ်မနုၤအဃိ သုတနာ်ယၤဘၣ်လဲၣ်.
၄၇ ပှၤလၢအမ့ၢ် ကစၢ်ယွၤ အဖိန့ၣ် ဒိကနၣ်ဝဲ ကစၢ်ယွၤ အကလုၢ်ကထါလီၤ.+ မ့ၢ်လၢ သုတမ့ၢ် ကစၢ်ယွၤ အဖိဘၣ်အဃိ သုတဒိကနၣ်တၢ်ဘၣ်.”+
၄၈ ပှၤယူဒၤဖိတဖၣ် တဲဆၢက့ၤအီၤလၢ “ပတဲလၢ ‘နမ့ၢ်ပှၤၡၤမရံဖိ+ ဒီးတၢ်ဝံတၢ်နါ အိၣ်လၢနလိၤ’+ န့ၣ် အဘၣ်တမ့ၢ်ဧီၤ.”
၄၉ ယ့ၣ်ၡူး တဲဆၢဝဲလၢ “တၢ်ဝံတၢ်နါ တအိၣ်လၢ ယလိၤဘၣ်. ယယူးယီၣ်ပာ်ကဲ ယပၢ် ဘၣ်ဆၣ် သုတယူးယီၣ်ပာ်ကဲယၤဘၣ်.
၅၀ ယတဃု တၢ်လၤကပီၤလၢ ယနီၢ်ကစၢ်အဂီၢ်ဘၣ်.+ ပှၤလၢအအဲၣ်ဒိး ဟ့ၣ်လီၤယၤ တၢ်လၤကပီၤ ဒီးစံၣ်ညီၣ်တၢ်န့ၣ် အိၣ်ဝဲတဂၤလီၤ.
၅၁ ယကတဲဘၣ်သု တီတီလၢ ပှၤတဂၤဂၤ မ့ၢ်မၤထွဲ ယတၢ်ကတိၤန့ၣ် အဝဲတသံနီတဘျီဘၣ်.”+
၅၂ ပှၤယူဒၤဖိတဖၣ် တဲအီၤလၢ “ခဲအံၤ ပသ့ၣ်ညါလၢ တၢ်ဝံတၢ်နါ အိၣ်လၢနလိၤလီၤ. စီၤအၤဘြၤဟၣ် သံလံ ဒီးဝံတဖၣ်သံလံ ဘၣ်ဆၣ် နတဲလၢ ပှၤတဂၤဂၤ မ့ၢ်မၤထွဲ နတၢ်ကတိၤန့ၣ် အဝဲ တသံနီတဘျီဘၣ်.
၅၃ မ့ၢ်နဒိၣ်န့ၢ် ပပၢ်စီၤအၤဘြၤဟၣ်လၢ အသံလံန့ၣ်ဧါ. ဝံတဖၣ်စ့ၢ်ကီးသံလံ. နအဲၣ်ဒိးတဲလၢ နမ့ၢ်မတဂၤလဲၣ်.”
၅၄ ယ့ၣ်ၡူး တဲဆၢဝဲလၢ “ယမ့ၢ်မၤလၤကပီၤ ယနီၢ်ကစၢ်န့ၣ် ယလၤကပီၤ တမ့ၢ်တၢ်နီတမံၤဘၣ်. ယပၢ်လၢ သုတဲလၢအမ့ၢ် သုကစၢ်ယွၤန့ၣ် မ့ၢ်ပှၤလၢ အမၤလၤကပီၤယၤလီၤ.+
၅၅ ယသ့ၣ်ညါအီၤ+ ဘၣ်ဆၣ် သုတသ့ၣ်ညါအီၤဘၣ်.+ ဒီးယမ့ၢ်တဲလၢ ယတသ့ၣ်ညါအီၤဘၣ်န့ၣ် ယကကဲထီၣ် ပှၤလံၣ်တၢ်လီတၢ် ဒ်သိးဒီးသုလီၤ. ဘၣ်ဆၣ် ယသ့ၣ်ညါအီၤဒီး ယမၤထွဲ အတၢ်ကတိၤလီၤ.
၅၆ သုပၢ်စီၤအၤဘြၤဟၣ် မုၢ်လၢ်လၢ အကထံၣ်ဘၣ် မုၢ်နံၤလၢ ယကဟဲအဃိ အသးခုဝဲဒိၣ်မးလီၤ. ဒီးအထံၣ်တမှံကွၢ်ဝဲဒီး သးခုဝဲလီၤ.”+
၅၇ ပှၤယူဒၤဖိတဖၣ် တဲအီၤလၢ “နအိၣ်အနံၣ် ၅၀ မးတပှဲၤထီၣ်ဒံးဒၢး နထံၣ်ဘၣ် စီၤအၤဘြၤဟၣ် ကသ့ဒ်လဲၣ်.”
၅၈ ယ့ၣ်ၡူးတဲဘၣ် အဝဲသ့ၣ်လၢ “ယကတဲဘၣ်သု တီတီလၢ တချုးလၢ စီၤအၤဘြၤဟၣ် အိၣ်ဖျဲၣ်ထီၣ်ဒံးဘၣ်န့ၣ် ယအိၣ်ပာ်စၢၤလံ.”+
၅၉ အဃိ အဝဲသ့ၣ် ဟံးန့ၢ်လၢၢ်တဖၣ် ဒ်သိး ကကွံာ်အီၤလီၤ. ဘၣ်ဆၣ် ယ့ၣ်ၡူးအိၣ်ခူသူၣ် ဒီးဟးထီၣ်ကွံာ်ဝဲလၢ တၢ်လုၢ်ဟံၣ်ပူၤလီၤ.
တၢ်ဂ့ၢ်အဘျဲၣ်တဖၣ်
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
