ယၡါယၤ ၄၈:၁-၂၂
၄၈ စီၤယၤကိာ် အစၢၤအသွဲၣ်သ့ၣ်ဧၢ, ကနၣ်လၢအံၤ.
သုကိးလီၤသုသးလၢ အံၣ်စရ့လးအမံၤ+ဒီးသုဟဲလီၤစၢၤလီၤသွဲၣ်လၢ စီၤယူဒၤလီၤ.*
သုအၢၣ်လီၤတၢ်လၢ ယဟိဝၤယွၤအမံၤ+ဒီးသုကိးထီၣ် အံၣ်စရ့လး အကစၢ်ယွၤဘၣ်ဆၣ် သုတမၤဒ်န့ၣ်လၢ တၢ်မ့ၢ်တၢ်တီ ဒီးတၢ်သူၣ်တီ သးလိၤအပူၤဘၣ်.+
၂ သုတဲလီၤသုသးလၢ သုမ့ၢ်ပှၤလၢ အဟဲလၢ ဝ့ၢ်စီဆှံ+ဒီးသုတဲလၢ သုဃုတၢ်မၤစၢၤလၢ အံၣ်စရ့လး အကစၢ်ယွၤလၢ+အမံၤမ့ၢ်ဝဲ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အအိၣ်လီၤ.
၃ “လၢပျၢၤလံၤလံၤ ယတဲဆိပာ်စၢၤ တၢ်လၢအကမၤအသးတဖၣ်လီၤ.
တၢ်ဂ့ၢ်တဖၣ်အံၤ ဟဲထီၣ်လၢ ယထးခိၣ်ဒီးယဒုးသ့ၣ်ညါ ပှၤဂၤလၢ တၢ်ဂ့ၢ်တဖၣ်အံၤလီၤ.+
ဒီးယစးထီၣ်မၤအီၤ သတူၢ်ကလာ် ဒီးယဒုးကဲထီၣ်အီၤလီၤ.+
၄ သုခိၣ်ကိၤထဲလဲၣ်န့ၣ် ယသ့ၣ်ညါ ပာ်စၢၤလံ.
သုကိာ်ဘိ လီၤဂာ်ဒ်သိးဒီးထး ဒီးသု မဲာ်တူၢ်ခိၣ် လီၤဂာ်ဒ်သိးဒီး တိၢ်ဘီလီၤ.+
၅ လၢတၢ်န့ၣ်အဃိ ယတဲပာ်စၢၤသု လၢပျၢၤလံၤလံၤလံ.
တချုးလၢ အဟဲကဲထီၣ်အသးဒံးဘၣ်န့ၣ် ယဒုးနၢ်ဟူဆိသု
ဒ်သိးသု သုတတဲလၢ ‘ပတၢ်ဂီၤတၢ်ဖှီၣ် မၤဝဲတၢ်သ့ၣ်တဖၣ်အံၤ,
ပတၢ်ဂီၤစိးပျၤ ဒီးပတၢ်ဂီၤတၢ်ဖှီၣ်ထး တဲဆိတၢ်ဂ့ၢ်တဖၣ်အံၤ’ တဂ့ၤ အဂီၢ်လီၤ.
၆ သုနၢ်ဟူ ဒီးသုထံၣ်ဘၣ် တၢ်ဂ့ၢ်တဖၣ်န့ၣ် ခဲလၢာ်လံ.သုတတဲဖျါထီၣ်အီၤဧီၤ.+
စးထီၣ်ခဲအံၤ ယကတဲဖျါထီၣ်န့ၢ်သု တၢ်ဂ့ၢ်အသီတဖၣ်+ဒီးတၢ်ဂ့ၢ်တဖၣ်န့ၣ် မ့ၢ်ဝဲ တၢ်ခူသူၣ်တဖၣ်လၢ သုတသ့ၣ်ညါအီၤဘၣ်.
၇ လၢပျၢၤန့ၣ် တၢ်သ့ၣ်တဖၣ်န့ၣ် တဟဲကဲထီၣ်အသးဘၣ် သနာ်က့ ယဒုးကဲထီၣ်အီၤ လၢဆၢကတီၢ် ခဲအံၤလီၤ.
တချုးလၢ တနံၤအံၤဒံးဘၣ်န့ၣ် သုတနၢ်ဟူ တၢ်ဂ့ၢ်တဖၣ်အံၤ နီတဘျီဘၣ်.
အဃိ သုတဲလၢ ‘တၢ်ဂ့ၢ်တဖၣ်အံၤ ယသ့ၣ်ညါပာ်စၢၤလံ’ န့ၣ်တသ့ဘၣ်.
၈ နီၢ်ကီၢ်န့ၣ် သုတနၢ်ဟူဘၣ်ဘၣ်,+ သုတသ့ၣ်ညါဘၣ်ဘၣ်ဒီးလၢညါန့ၣ် သုတအဲၣ်ဒိး ဒိကနၣ်တၢ်ဘၣ်.
ယသ့ၣ်ညါလၢ သုသးတတီ နီတစဲးဘၣ်+ဒီးစးထီၣ်လၢ သုအိၣ်ဖျဲၣ်ထီၣ် လံၤလံၤန့ၣ် ပှၤကိးသုလၢ ပှၤမၤကမၣ်တၢ်ဖိလီၤ.+
၉ ဘၣ်ဆၣ် လၢယမံၤအဃိ ယကပၢၤဃာ် ယတၢ်သးထီၣ်လီၤ.+
ဒီးလၢယတၢ်လၤကပီၤအဃိ ယကဝံသးစူၤသုဒီးယတမၤဟးဂီၤသုဘၣ်.+
၁၀ ယပှံၢ်စီသု ဝံၤလံ ဘၣ်ဆၣ် တမ့ၢ်ဒ်စ့ညၣ် အသိးဘၣ်.+
ဒ်ပှၤမၤပှံၢ်လီၤထးလၢ ဖၣ်ကပူၤအသိး ယပျဲလၢ သုကဘၣ်နး ဘၣ်ဖှီၣ် ဒ်သိး ယကမၤကဆှီထီၣ်သု အဂီၢ်လီၤ.+
၁၁ လၢယမံၤအဃိ ယကမၤတၢ် သပှၢ်တၢၢ်လီၤ.+
ယပျဲလၢ ယမံၤကဘၣ်တၢ်မၤဘၣ်အၢအီၤ ကသ့ဒ်လဲၣ်.+
တၢ်လၤကပီၤလၢ ယကြၢးဒိးန့ၢ်ဘၣ်န့ၣ် ယတပျဲလၢ ပှၤအဂၤ ကဒိးန့ၢ်ဘၣ်အီၤ နီတဂၤဘၣ်.
၁၂ အိ စီၤယၤကိာ် အစၢၤအသွဲၣ် ဒီးပှၤအံၣ်စရ့လးဖိဧၢ, ယဃုထၢသုလီၤ.
ကနၣ်လၢအံၤ, ယမ့ၢ် ပှၤအလီၢ်လီၢ်တဂၤလီၤ.+ ယမ့ၢ် ပှၤအဆိကတၢၢ် ဒီးပှၤအလီၢ်ခံ ကတၢၢ်လီၤ.+
၁၃ ယပာ်လီၤ ဟီၣ်ခိၣ်အခီၣ်ထံး+ဒီးယစုထွဲ သလၣ်ထီၣ် မူခိၣ်လီၤ.+
ဖဲယကိးထီၣ် အဝဲသ့ၣ်* အခါ အဝဲသ့ၣ် ဆၢထၢၣ် တပူၤဃီလီၤ.
၁၄ သုဝဲခဲလၢာ်သ့ၣ်ဧၢ, ပာ်ဖှိၣ်ထီၣ်သုသး ဒီးကနၣ်တက့ၢ်.
လၢယွၤတဖၣ်အကျါန့ၣ် မတဂၤတဲဆိပာ်စၢၤ တၢ်ဂ့ၢ်တဖၣ်အံၤလဲၣ်.
ပှၤလၢ ယၤ, ယဟိဝၤယွၤ အဲၣ်အီၤ* တဂၤန့ၣ်+အကမၤလၢပှဲၤထီၣ် ယတၢ်ဘၣ်သး ဘၣ်ဃးဒီး ဘၤဘူၤလိၣ်+ဒီးအကထီဒါ ပှၤက့ၤစ့းဖိလီၤ.+
၁၅ ယမ့ၢ်ပှၤတဂၤလၢ အတဲပာ်စၢၤတၢ် ဒီးကိးန့ၢ်အီၤလီၤ.+
ယဆှၢအီၤ ဒီးတၢ်လၢ အဝဲကမၤန့ၣ် ကကဲထီၣ်လိၣ်ထီၣ်လီၤ.+
၁၆ ဟဲဘူးဒီးယၤ ဒီးကနၣ်တက့ၢ်.
စးထီၣ်လၢ အခီၣ်ထံးန့ၣ် ယတဲတၢ် ပျီပျီ ဒီးယတတဲတၢ်လၢ တၢ်ခူသူၣ်အပူၤဘၣ်.+
ဒီးဖဲအကဲထီၣ်အသးအခါ ယအိၣ်ဖဲန့ၣ်လီၤ.”
ဒီးတၢ်ပၢကစၢ် ယဟိဝၤယွၤ ဆှၢလီၤယၤဒီး* အသးစီဆှံလီၤ.
၁၇ ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤလၢ အစီဆှံတဂၤ လၢအပှ့ၤက့ၤသုန့ၣ် တဲဝဲလၢ+“ယမ့ၢ် သုကစၢ် ယဟိဝၤယွၤလီၤ.
ယမ့ၢ်ပှၤတဂၤလၢ အသိၣ်လိသုလၢ တၢ်လၢအဂ့ၤကတၢၢ်လၢသုဂီၢ်*+ဒီးပှၤတဂၤလၢ အဟံးစုနဲၣ်ကျဲသုလၢ ကျဲလၢ သုကြၢးလဲၤလီၤ.+
၁၈ ယမုၢ်လၢ်လၢ သုကဒိကနၣ် ယတၢ်မၤလိာ်တဖၣ်လီၤ.+
သုမ့ၢ်မၤဒ်န့ၣ်မး သုတၢ်ဃူတၢ်ဖိး* ကမၤအသးဒ်သိးဒီး ထံကျိတဘိ+ဒီးသုတၢ်တီတၢ်လိၤ ကမၤအသးဒ်သိးဒီး ပီၣ်လဲၣ် အလပီတဖၣ်လီၤ.+
၁၉ သုချံသုသၣ် ဒီးသုစၢၤသုသွဲၣ်ကအါဝဲ ထဲသိးဒီးမဲးလီၤ.+
အဝဲသ့ၣ် အမံၤန့ၣ် ကအိၣ်ဝဲလၢ ယမဲာ်ညါ ဒီးတလီၤမၢ်ကွံာ် နီတဘျီဘၣ်.”
၂၀ ဟးထီၣ်လၢ ဘၤဘူၤလိၣ်အပူၤ+ဒီးဃ့ၢ်ထီၣ်ကွံာ်လၢ ပှၤက့ၤစ့းဖိ အကျါတက့ၢ်.
လၢတၢ်သးခုအပူၤန့ၣ် တဲဖျါထီၣ် ဒီးဘိးဘၣ်သ့ၣ်ညါ တၢ်ကစီၣ် လၢလာ်အံၤ+ဒီးဒုးသ့ၣ်ညါပှၤဂၤလၢ တၢ်ကစီၣ်အံၤ တုၤလၢ ဟီၣ်ခိၣ်အနၢၣ် အကတၢၢ်တဖၣ်တက့ၢ်.+
တဲလၢ “ယဟိဝၤယွၤ ပှ့ၤက့ၤ အခ့အပှၤ စီၤယၤကိာ် အစၢၤ အသွဲၣ်လံ.+
၂၁ ဖဲကစၢ်ယွၤ ဆှၢအဝဲသ့ၣ်လၢ မဲးမုၢ်ခိၣ်အခါ အဝဲသ့ၣ် တလီၤဒိထံဘၣ်.+
ကစၢ်ယွၤ ဒုးဖျိးထီၣ်ထံလၢ အဝဲသ့ၣ်အဂီၢ် လၢလၢၢ်ပူၤ,အမၤသ့ၣ်ဖးလၢၢ် ဒီးဒုးဟဲထီၣ်ထံလီၤ.”+
၂၂ ယဟိဝၤယွၤ တဲဝဲလၢ “ပှၤအၢပှၤသီန့ၣ် တအိၣ်ဒီး တၢ်ဃူတၢ်ဖိးဘၣ်.”*+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဟဲလၢ စီၤယူဒၤအထံတဖၣ်.”
^ မ့ၢ်ဝဲ မူခိၣ် ဒီးဟီၣ်ခိၣ်.
^ မ့ၢ်ဝဲ စီၤကိရ့ၣ်.
^ မ့ၢ်စ့ၢ်ကီး “ဃုာ်ဒီး.”
^ မ့ၢ်စ့ၢ်ကီး “သုကဘၣ်ဘျုးဘၣ်ဖှိၣ်အဂီၢ်.”
^ မ့ၢ်စ့ၢ်ကီး “တၢ်သူၣ်မံသးမုာ်.”
^ မ့ၢ်စ့ၢ်ကီး “တၢ်သူၣ်မံသးမုာ်.”
