ယၡါယၤ ၆၀:၁-၂၂
၆၀ “အိ ပိာ်မုၣ်ဧၢ,+ နတၢ်ကပီၤ ဟဲလံ အဃိ ဂဲၤဆၢထၢၣ် ကပီၤထီၣ်တက့ၢ်.
ယဟိဝၤယွၤ အလၤကပီၤ ဆဲးကပီၤလီၤ လၢနလိၤလီၤ.+
၂ တၢ်ခံး ကကျၢၢ်ဘၢ ဟီၣ်ခိၣ်ဒီးတၢ်ခံးသူ ကကျၢၢ်ဘၢ ပှၤကလုာ်တဖၣ်လီၤ.
ဘၣ်ဆၣ် ယဟိဝၤယွၤ ကဆဲးကပီၤလီၤ လၢနလိၤဒီးပှၤကထံၣ်ဘၣ် အလၤကပီၤလၢ နလိၤလီၤ.
၃ ပှၤကလုာ်တဖၣ် ကလဲၤဝဲလၢ နတၢ်ကပီၤအအိၣ်+ဒီးစီၤပၤတဖၣ်+ ကလဲၤဝဲလၢ နတၢ်ကပီၤလၢအကပြုၢ်ကပြီၤ အအိၣ်လီၤ.+
၄ ကွၢ်တရံးတၢ်တက့ၢ်.
နဖိခွါတဖၣ် လၢအအိၣ်လၢ တၢ်လီၢ်ဖးယံၤန့ၣ် ဟဲက့ၤဝဲလံ+ဒီးနဖိမုၣ်တဖၣ်န့ၣ် ပှၤဟဲက့ၤစိာ်အီၤလၢ ပှၤစုလိၤလီၤ.+
အဝဲသ့ၣ် ပာ်ဖှိၣ်ထီၣ်အသး ဒီးဟဲက့ၤလၢ နအိၣ်လံ.
၅ ဖဲန့ၣ်အခါ နကထံၣ်ဘၣ် ဒီးနကပှဲၤဒီးတၢ်သးခု,+နကသူၣ်ပိၢ်သးဝး ဒီးနကသူၣ်ဖှံသးညီ,မ့ၢ်လၢ ပီၣ်လဲၣ် အတၢ်ထူးတၢ်တီၤ ကဘၣ်တၢ်ဆှၢအီၤ လၢနအိၣ်ဒီးပှၤကလုာ်တဖၣ် အတၢ်ထူးတၢ်တီၤ ကဟဲလၢ နအိၣ်အဃိလီၤ.+
၆ ကီၤလၤအူးအဖုတဖၣ် လၢအမ့ၢ် ကီၤလၤအူးဖါလၢ အဂံၢ်ဆူၣ်တဖၣ်လၢအအိၣ်ဟဲလၢ ကီၢ်မံးဒယၣ် ဒီးကီၢ်ဧ့ၤဖၣ်န့ၣ် ကအိၣ်လၢ နကီၢ်ပူၤ ပှဲၤပှဲၤလီၤ.+
ပှၤလၢ အအိၣ်လၢ ၡဘၤဘီမုၢ်န့ၣ် ကဟဲစ့ၢ်ကီးဒီးအဝဲသ့ၣ် ကဟဲစိာ်ဒီး ထူဒီးလီၢ်ဘၣ်ဒီးအဝဲသ့ၣ် ကစံးထီၣ်ပတြၢၤ ယဟိဝၤယွၤ လၢပှၤမဲာ်ညါလီၤ.+
၇ စီၤက့ဒၢ်+ အသိအဖုတဖၣ်န့ၣ် ပှၤကပာ်ဖှိၣ်အီၤ ဒီးပှၤကလဲၤဆှၢအီၤ လၢနအိၣ်ဒီးစီၤနဘါယိး+ အသိဖါတဖၣ် ကမၤလၢပှဲၤ နတၢ်လိၣ်ဘၣ်တဖၣ်လီၤ.
ဆၣ်ဖိကီၢ်ဖိတဖၣ်အံၤ ကဘၣ်တၢ်လုၢ်ထီၣ်အီၤလၢ ယတၢ်လုၢ်လီၢ် အဖီခိၣ် ဒီးယကတူၢ်လိာ်အီၤ+ဒီးယဟံၣ်လၢ အပှဲၤဒီး အလၤကပီၤန့ၣ် ယကမၤဃံမၤလၤထီၣ် အီၤလီၤ.+
၈ ပှၤလၢ အဟဲဒ်သိးဒီး တၢ်အၢၣ်ဒီးအလီၤဂာ်ဒ် ထိၣ်လွံၢ် လၢအက့ၤယူၤ လၢအသွံန့ၣ် မ့ၢ်မတၤသ့ၣ်တဖၣ်လဲၣ်.
၉ ကီးတဖၣ် ကမုၢ်လၢ်တၢ်လၢ ယၤလီၤ.+
ဒ်လၢညါအသိး တၢ်ၡံၣ်အကဘီတဖၣ်ကဟဲက့ၤတီၣ်က့ၤ နဖိခွါတဖၣ် လၢအအိၣ်လၢ တၢ်လီၢ်ဖးယံၤ+ဃုာ်ဒီး အဝဲသ့ၣ် အစ့ညၣ်ဒီးထူဒ်သိး ကကဲထီၣ် တၢ်လၤကပီၤလၢ ယၤ ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤလၢ အစီဆှံတဂၤ အမံၤအဂီၢ်လီၤ.
ယကမၤဃံမၤလၤနၤလီၤ.+
၁၀ လၢညါ ယသိၣ်ဃီၣ်နၤလၢ တၢ်သးထီၣ်အပူၤဘၣ်ဆၣ် ယကပာ်ဖျါထီၣ် တၢ်သးကညီၤ လၢနဖီခိၣ် လၢတၢ်သူၣ်ဂ့ၤသးဝါ အပူၤလီၤ.+
အဃိ ပှၤထံဂၤကီၢ်ဂၤဖိ ကတ့ထီၣ် နတၢ်ဒူၣ်တဖၣ်ဒီးအဝဲသ့ၣ် အစီၤပၤတဖၣ် ကမၤန့ၢ်တၢ်လၢ နဂီၢ်လီၤ.+
၁၁ နတြဲၤတဖၣ် ကအိးထီၣ် အသးထီဘိ+ဒီးလၢမုၢ်ဆါမ့ၢ်ဂ့ၤ, မုၢ်နၤမ့ၢ်ဂ့ၤ အတပံးအသးဘၣ်.
ပှၤကလုာ်တဖၣ် ကဟဲစိာ် အတၢ်ထူးတၢ်တီၤ လၢနအိၣ်ဒီးအဝဲသ့ၣ် အစီၤပၤတဖၣ် ကတီခိၣ်ရိၤမဲဝဲလီၤ.+
၁၂ ပှၤကလုာ် တကလုာ်ဂ့ၤ တကလုာ်ဂ့ၤ ဒီးဘီမုၢ် တခါဂ့ၤ တခါဂ့ၤ လၢအတမၤ နတၢ်ဘၣ်န့ၣ် ကဟးဂီၤကွံာ်ဒီးပှၤကလုာ်တဖၣ် ကဟးဂီၤကွံာ် သပှၢ်တၢၢ်လီၤ.+
၁၃ တၢ်လၢအဂ့ၤကတၢၢ်လၢ လဘၤနိၣ် အကစၢၢ်ကလိကျါန့ၣ် ပှၤကဟဲစိာ်အီၤ လၢနအိၣ်,+ပှၤကဟဲစိာ် သ့ၣ်ကၠူနံးဖၢၤ, သ့ၣ်သ့ထိးအီၣ် ဒီးသ့ၣ်ဆှိတအၤၡူၢ်+ဒ်သိး ကမၤဃံမၤလၤထီၣ် ယတၢ်လုၢ်ဟံၣ် အဂီၢ်လီၤ.
ယကမၤဒ်သိး ယခီၣ်ယီၢ်လီၤအလီၢ် ကအိၣ်ဒီး အလၤကပီၤ အဂီၢ်လီၤ.+
၁၄ ပှၤလၢ အဆီၣ်တံၢ်မၤနၢၤနၤ အဖိခွါတဖၣ် ကဟဲထိၣ်လီၤပှီၤအသး လၢနမဲာ်ညါဒီးပှၤလၢ အတပာ်ကဲနၤဘၣ်တဖၣ် ကထိၣ်လီၤပှီၤအသး လၢ နခီၣ်ထံးလီၤ.
ဒီးအဝဲသ့ၣ် ကကိးနၤလၢ ယဟိဝၤယွၤ အဝ့ၢ်ဒီးအံၣ်စရ့လး အကစၢ်ယွၤလၢ အစီဆှံတဂၤ အဝ့ၢ်စံယိၣ်လီၤ.+
၁၅ လၢညါန့ၣ် ယပာ်တ့ၢ်နၤ, ပှၤသးဟ့နၤ ဒီးပှၤတလဲၤခီဂာ်နၤ နီတဂၤလၢၤဘၣ်.+
ဘၣ်ဆၣ် ယကဒုးကဲထီၣ်နၤလၢ ဝ့ၢ်လၢပှၤစံးပတြၢၤအီၤ လီၤထူလီၤယိာ်လီၤ.
ပှၤတစိၤဘၣ်တစိၤ ကသးခု လၢနဃိလီၤ.+
၁၆ ပှၤကလုာ် ဒီးစီၤပၤတဖၣ် ကဟ့ၣ်နၤ တၢ်လၢနလိၣ်ဘၣ် ကိးမံၤဒဲး+ဒ်မိတဂၤ ဒုးအီအဖိ အနုၢ်ထံ အသိးလီၤ.+
ဒီးနကသ့ၣ်ညါ သပှၢ်တၢၢ်လၢ ယၤ, ယဟိဝၤယွၤအံၤ မ့ၢ်ကစၢ်လၢ အအုၣ်က့ၤခီၣ်က့ၤနၤ+ဒီးယၤ, စီၤယၤကိာ် အကစၢ်ယွၤလၢ အဂံၢ်ဆူၣ်ဘါဆူၣ်တဂၤအံၤ မ့ၢ်ကစၢ်လၢ အမၤပူၤဖျဲး နၤလီၤ.*
၁၇ လၢတိၢ်ဘီအလီၢ်န့ၣ် ယကဆီတလဲက့ၤ လၢထူလၢထးအလီၢ်န့ၣ် ယကဆီတလဲက့ၤ လၢစ့ညၣ်လၢသ့ၣ်အလီၢ်န့ၣ် ယကဆီတလဲက့ၤ လၢတိၢ်ဘီဒီးလၢလၢၢ်အလီၢ်န့ၣ် ယကဆီတလဲက့ၤ လၢထးလီၤ.
ဒီးယကဃုထၢထီၣ် တၢ်ဃူတၢ်ဖိး ဒ်ပှၤကွၢ်ထွဲနၤအသိးဒီးတၢ်တီတၢ်လိၤ ဒ်ပှၤလၢအဟ့ၣ်လီၤနၤ မူဒါအသိးလီၤ.+
၁၈ ပှၤတနၢ်ဟူ တၢ်မၤဆူၣ်မၤစိး လၢနကီၢ်ပူၤလၢၤဘၣ်.
ဒီးပှၤတနၢ်ဟူ တၢ်မၤဟးဂီၤတၢ် ဒီးတၢ်ဟးဂူာ်ဟးဂီၤ လၢနဟီၣ်ကဝီၤပူၤလၢၤဘၣ်.+
ဒီးနကကိး နတၢ်ဒူၣ်တဖၣ်လၢ တၢ်အုၣ်က့ၤခီၣ်က့ၤ+ ဒီးနတြဲၤတဖၣ်လၢ တၢ်စံးထီၣ်ပတြၢၤလီၤ.
၁၉ လၢမုၢ်ဆါခီန့ၣ် မုၢ်တကဲ နတၢ်ကပီၤလၢၤဘၣ်ဒီးလါတဟ့ၣ်နၤ တၢ်ကပီၤလၢၤဘၣ်.
ယဟိဝၤယွၤ ကကဲထီၣ် နတၢ်ကပီၤ အထူအယိာ်+ဒီးနကစၢ်ယွၤ ကကပီၤလီၤဘၣ်နၤ ဒီးကမၤဃံမၤလၤနၤလီၤ.+
၂၀ နမုၢ်တလီၤနုာ်လၢၤဘၣ်ဒီးနလါတလီၤမၢ်လၢၤဘၣ်.
ယဟိဝၤယွၤ ကကဲထီၣ် နတၢ်ကပီၤ အထူအယိာ်+ဒီးနတၢ်သူၣ်အုးသးအုး အမုၢ်နံၤတဖၣ် ကကတၢၢ်ကွံာ်လီၤ.+
၂၁ နပှၤခဲလၢာ် ကမ့ၢ်ပှၤတီပှၤလိၤဒီးအဝဲသ့ၣ် ကန့ၢ်ဘၣ်ကီၢ် လီၤထူလီၤယိာ်လီၤ.
အဝဲသ့ၣ် မ့ၢ်တၢ်အဒ့ဘီၣ်လၢ ယသူၣ်လီၤအီၤဒီးယစုအတၢ်မၤလၢ+ ကကဲထီၣ် တၢ်လၤကပီၤလၢ ယဂီၢ်လီၤ.+
၂၂ ပှၤစှၤကိာ်ဂၤ ကကဲထီၣ် ပှၤတကထိဒီးပှၤဆံးဆံးဖိတဂၤ ကကဲထီၣ် ပှၤဖးဒိၣ်တကလုာ်လီၤ.
ယၤ, ယဟိဝၤယွၤ ကမၤချ့ထီၣ် တၢ်အိၣ်သးတဖၣ်အံၤခဲလၢာ် ဒ်အဆၢကတီၢ်ဒၣ်ဝဲလီၤ.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “အပှ့ၤက့ၤနၤ.”
