လူၤကၣ် ၈:၁-၅၆
-
ပိာ်မုၣ်တဖၣ်လၢ အပိာ်ယ့ၣ်ၡူးအခံ (၁-၃)
-
တၢ်ကတိၤဒိဘၣ်ဃးဒီး ပှၤဖှံတၢ်ချံ (၄-၈)
-
ဘၣ်မနုၤအဃိ ယ့ၣ်ၡူးသူ တၢ်ကတိၤဒိတဖၣ်လဲၣ် (၉, ၁၀)
-
တၢ်ကတိၤဒိဘၣ်ဃးဒီး ပှၤဖှံတၢ်ချံ အခီပညီ (၁၁-၁၅)
-
မ့ၣ်အူဒၢ တဘၣ်တၢ်ကးဘၢအီၤဘၣ် (၁၆-၁၈)
-
ယ့ၣ်ၡူးအမိၢ် ဒီးအဒီပုၢ်ဝဲၢ်ခွါတဖၣ် (၁၉-၂၁)
-
ယ့ၣ်ၡူးမၤပတုာ် ကလံၤမုၢ် (၂၂-၂၅)
-
ယ့ၣ်ၡူးနီလီၤ တၢ်ဝံတၢ်နါတဖၣ်ဆူ ထီးတဖုအပူၤ (၂၆-၃၉)
-
စီၤယၤအ့ၤရူးအဖိမုၣ် ဒီးပိာ်မုၣ်တဂၤလၢ အထိးဝဲယ့ၣ်ၡူးအဆ့ကၤအနွံ (၄၀-၅၆)
၈ လၢခံ တယံာ်ဘၣ်န့ၣ် ယ့ၣ်ၡူးလဲၤလၢ ဝ့ၢ်တဝ့ၢ်ဘၣ်တဝ့ၢ် ဒီးသဝီတဖျၢၣ်ဘၣ်တဖျၢၣ် ဒီးစံၣ်တဲၤတဲလီၤ ကစၢ်ယွၤအဘီမုၢ် တၢ်သးခုကစီၣ်လီၤ.+ ဒီးပှၤတဆံခံဂၤန့ၣ် လဲၤတၢ်ဒီးအီၤလီၤ.
၂ တကးဒံးဘၣ် ပိာ်မုၣ်တဖၣ်လၢ တၢ်ဝံတၢ်နါ အိၣ်လၢအလိၤ ဒီးအိၣ်ဒီး တၢ်ဆူးတၢ်ဆါတဖၣ် လၢအဘၣ် တၢ်မၤဘျါက့ၤအီၤန့ၣ် လဲၤတၢ်ဒီးယ့ၣ်ၡူးစ့ၢ်ကီးလီၤ. အဝဲသ့ၣ်န့ၣ် မ့ၢ်ဝဲ နီၢ်မၤရံ လၢပှၤကိးအီၤလၢ မၤကဒၤလ့ၣ်လၢ တၢ်ဝံတၢ်နါနွံဒု ဟးထီၣ်ကွံာ်ဝဲလၢအပူၤ,
၃ စီၤဟ့ၤရိာ် အပှၤဘၣ်မူဘၣ်ဒါ စီၤဃူၤစါအမါ နီၢ်ယိၤအၣ်နၣ်,+ နီၢ်စူၤစၣ်နၤ ဒီးပိာ်မုၣ်အါဂၤလၢ အသူဝဲ အနီၢ်ကစၢ် အတၢ်စုလီၢ်ခီၣ်ခိၣ်+ ဒ်သိးကမၤစၢၤ ယ့ၣ်ၡူးဒီးအတၢ်မၢဖိတဖၣ် အဂီၢ်လီၤ.
၄ ဖဲပှၤဂီၢ်မုၢ်ဖးဒိၣ် ဒီးပှၤလၢ အလဲၤတၢ်ဒီးယ့ၣ်ၡူး လၢဝ့ၢ်တဝ့ၢ်ဘၣ်တဝ့ၢ် အိၣ်ဝဲတပူၤဃီအခါ ယ့ၣ်ၡူးတဲဘၣ် အဝဲသ့ၣ် တၢ်ကတိၤဒိတခါလီၤ.+ အတဲဝဲလၢ
၅ “ပှၤဖှံတၢ်ချံတဂၤ လဲၤဖှံလီၤတၢ်ချံလီၤ. ဖဲအဝဲဖှံတၢ်အခါ တၢ်ချံတနီၤန့ၣ် လီၤဘၣ်လၢကျဲကပၤ ဒီးဘၣ်တၢ်ယီၢ်တံၢ်အီၤ ဒီးထိၣ်လၢမူခိၣ်တဖၣ်န့ၣ် ဟဲအီၣ်ကွံာ်ဝဲလီၤ.+
၆ တနီၤန့ၣ် လီၤဘၣ်လၢ လၢၢ်ခိၣ် ဒီးဖဲအဟဲမဲထီၣ်အခါ မ့ၢ်လၢ ထံတအိၣ်ဘၣ်အဃိ အဃ့ထီကွံာ်ဝဲလီၤ.+
၇ ဒီးတၢ်ချံအဂၤတနီၤန့ၣ် လီၤဘၣ်လၢ တၤဆှုၣ်တၤမဲအကျါ အဃိ ဖဲအမဲထီၣ်အခါ တၤဆှုၣ်တၤမဲ မဲထီၣ်ဒ်သိးသိးဒီးအီၤ ဒီးခဲဘၢကွံာ်အီၤလီၤ.+
၈ ဘၣ်ဆၣ် အဂၤတနီၤန့ၣ် လီၤဘၣ်လၢ ဟီၣ်ခိၣ်ညၣ်လၢ အဂ့ၤအဖီခိၣ် ဒီးမဲထီၣ်ဝဲ ဒီးသၣ်ထီၣ်ဝဲတၤသၣ် အါန့ၢ်အလီၢ်အစး ၁၀၀ လီၤ.”+ အဝဲတဲ တၢ်ဂ့ၢ်တဖၣ်န့ၣ်ဝံၤဒီး မၤဒိၣ်ထီၣ် အကလုၢ်ဒီးတဲဝဲလၢ “ပှၤလၢ အနၢ်ဟူတၢ်သ့န့ၣ် မ်အဒိကနၣ်တၢ် ထံထံတက့ၢ်.”+
၉ ဘၣ်ဆၣ် အပျဲၢ်အဘီၣ်တဖၣ် သံကွၢ်အီၤလၢ တၢ်ကတိၤဒိတခါအံၤ အခီပညီဒ်လဲၣ်.+
၁၀ ဒီးယ့ၣ်ၡူးတဲဝဲလၢ “သုဝဲသ့ၣ်အံၤ တၢ်ဟ့ၣ်လီၤသုအခွဲးလၢ သုကနၢ်ပၢၢ် တၢ်ခူသူၣ်စီဆှံတဖၣ် လၢအဘၣ်ဃးဒီး ကစၢ်ယွၤအဘီမုၢ်လီၤ. မ့မ့ၢ်ပှၤအဂၤတဖၣ်န့ၣ် ဖဲယတဲတၢ်ဒီး အဝဲသ့ၣ်အခါ ယသူတၢ်ကတိၤဒိတဖၣ်+ ဒ်သိးအဝဲသ့ၣ် ကကွၢ်ဝဲဘၣ်ဆၣ် တထံၣ်ဝဲဘၣ် ဒီးကနၢ်ဟူတၢ်ဘၣ်ဆၣ် တနၢ်ပၢၢ်ဝဲ အခီပညီဘၣ်.+
၁၁ တၢ်ကတိၤဒိအံၤ အခီပညီအိၣ်ဒ်အံၤလီၤ. တၢ်ချံန့ၣ် မ့ၢ်ဝဲကစၢ်ယွၤ အကလုၢ်ကထါလီၤ.+
၁၂ တၢ်ချံလၢ အလီၤဘၣ်လၢ ကျဲကပၤန့ၣ် လီၤဂာ်ဒ်သိးဒီး ပှၤလၢ အနၢ်ဟူဘၣ်တၢ် ဘၣ်ဆၣ် မုၣ်ကီၤလံၢ် ဟဲထုးထီၣ်ကွံာ်ဝဲ ကစၢ်ယွၤ အကလုၢ်ကထါလၢ အဝဲသ့ၣ်အသးပူၤ ဒ်သိးအသုတနာ်တၢ် ဒီးပူၤဖျဲးတဂ့ၤအဂီၢ်လီၤ.+
၁၃ တၢ်ချံလၢ အလီၤဘၣ်လၢ လၢၢ်ခိၣ်န့ၣ် လီၤဂာ်ဒ်သိးဒီး ပှၤလၢ အနၢ်ဟူဘၣ် ကစၢ်ယွၤ အကလုၢ်ကထါ ဒီးတူၢ်လိာ်ဝဲလၢ တၢ်သးခုအပူၤ ဘၣ်ဆၣ် အဂံၢ်တစဲၤလီၤအသးဘၣ်. အဝဲသ့ၣ် နာ်တၢ်ထဲတစိၢ်ဖိ ဘၣ်ဆၣ် ဖဲအထံၣ်ဘၣ် တၢ်မၤကွၢ် အဆၢကတီၢ်န့ၣ် အလီၤဃံၢ်ဝဲလီၤ.+
၁၄ မ့မ့ၢ်တၢ်ချံလၢ အလီၤဘၣ်လၢ တၤဆှုၣ်တၤမဲအကျါန့ၣ် လီၤဂာ်ဒ်သိးဒီး ပှၤလၢ အနၢ်ဟူဘၣ်တၢ် ဘၣ်ဆၣ် မ့ၢ်လၢတၢ်သူၣ်ကိၢ်သးဂီၤ, တၢ်ထူးတၢ်တီၤ+ ဒီးတၢ်မုာ်တၢ်ပၠီၣ်လၢ ဆၢကတီၢ်ခဲအံၤ+ ခဲဘၢကွံာ် အဝဲသ့ၣ် ဘၢဘၢအဃိ တသၣ်ထီၣ်ဝဲ တၤသၣ်လၢအဂ့ၤဘၣ်.+
၁၅ မ့မ့ၢ်တၢ်ချံလၢ အလီၤဘၣ်လၢ ဟီၣ်ခိၣ်ညၣ်လၢ အဂ့ၤအလိၤန့ၣ် လီၤဂာ်ဒ်သိးဒီး ပှၤလၢ အဒိကနၣ် ကစၢ်ယွၤ အကလုၢ်ကထါ လၢတၢ်သးဘျၢအပူၤ+ ဒီးတိၢ်န့ၢ်ဖံးဃာ်ဝဲလၢ အသးပူၤ ဒီးသၣ်ထီၣ်လၢ တၢ်တူၢ်န့ၢ်ခီၣ်ကဲ အပူၤလီၤ.+
၁၆ “ပှၤလၢ အဒွဲၣ်ထီၣ်မ့ၣ်အူဒၢဝံၤ ကးဘၢဝဲလၢသပၢၤ မ့တမ့ၢ် ပာ်ဝဲလၢ လီၢ်မံခးအဖီလာ်န့ၣ် တအိၣ်နီတဂၤဘၣ်. အဝဲကပာ်ထီၣ်ဝဲလၢ မ့ၣ်အူဒၢအလီၢ် ဒ်သိးပှၤလၢ အဟဲနုာ်လီၤတဖၣ် ကထံၣ်တၢ်ကပီၤ အဂီၢ်လီၤ.+
၁၇ တၢ်ခူသူၣ်လၢ အတဘၣ် တၢ်မၤဖျါထီၣ်အီၤဘၣ်န့ၣ် တအိၣ်ဘၣ် နီတမံၤဘၣ်. ဒီးတၢ်တမံၤဂ့ၤ တမံၤဂ့ၤလၢ တၢ်ပာ်ခူသူၣ်အီၤ ဘၢဘၢန့ၣ် ကဖျါထီၣ်ဝဲ ဒီးတၢ်ကသ့ၣ်ညါထီၣ် အီၤလီၤ.+
၁၈ ပှၤလၢအအိၣ်ဒီး တၢ်သ့ၣ်ညါနၢ်ပၢၢ်န့ၣ် အကန့ၢ်ဘၣ်အါထီၣ်ဝဲ+ ဘၣ်ဆၣ် ပှၤလၢ အတအိၣ်ဒီး တၢ်သ့ၣ်ညါနၢ်ပၢၢ်ဘၣ်န့ၣ် တၢ်သ့ၣ်ညါနၢ်ပၢၢ်လၢ အိၣ်ဒီးအီၤဒၣ်လဲာ် ကလီၤမၢ်ကွံာ်ဝဲလီၤ.+ အဃိ သုကဘၣ်ဒိကနၣ်တၢ် ထံထံလီၤ.”
၁၉ ဒီးယ့ၣ်ၡူးအမိၢ် ဒီးအဒီပုၢ်ဝဲၢ်ခွါတဖၣ်+ ဟဲလၢအအိၣ် ဘၣ်ဆၣ် မ့ၢ်လၢ ပှၤဂီၢ်မုၢ်တဖၣ်အဃိ အဝဲသ့ၣ် လဲၤဃီၤလၢ အအိၣ်တသ့ဘၣ်.+
၂၀ အဃိ ပှၤတဲဘၣ်အီၤလၢ “နမိၢ်ဒီး နဒီပုၢ်ဝဲၢ်ခွါတဖၣ် ဆၢထၢၣ်လၢတၢ်ချၢ ဒီးအဲၣ်ဒိးထံၣ်လိာ်သးဒီးနၤလီၤ.”
၂၁ ယ့ၣ်ၡူးတဲဆၢက့ၤ အဝဲသ့ၣ်လၢ “ပှၤလၢအနၢ်ဟူ ကစၢ်ယွၤ အကလုၢ်ကထါ ဒီးမၤထွဲဝဲတဖၣ်အံၤန့ၣ် မ့ၢ်ဝဲယမိၢ် ဒီးယဒီပုၢ်ဝဲၢ်ခွါတဖၣ်လီၤ.”+
၂၂ ဘၣ်တနံၤန့ၣ် ယ့ၣ်ၡူးဒီး အပျဲၢ်အဘီၣ်တဖၣ် ဒိးထီၣ်ကဘီလီၤ. ယ့ၣ်ၡူးတဲဘၣ် အဝဲသ့ၣ်လၢ “ပကလဲၤခီဃီၤလၢ ပီၣ်လဲၣ်အဝၢ်ဘးခီနီၤ.” အဃိ အဝဲသ့ၣ်လဲၤဝဲလီၤ.+
၂၃ ဘၣ်ဆၣ် ဖဲအဝဲသ့ၣ် လဲၤတၢ်အခါ ယ့ၣ်ၡူးမံဘၣ်အသးလီၤ. ဒီးကလံၤမုၢ်ဖးဒိၣ် လီၤဝဲလၢပီၣ်လဲၣ်ပူၤ ဒီးထံနုာ်လီၤလၢ အဝဲသ့ၣ် အကဘီပူၤ ဘူးကပှဲၤဝဲအဃိ တၢ်ဘၣ်ယိၣ်အိၣ်ဝဲလီၤ.+
၂၄ အဝဲသ့ၣ် လဲၤကိးပၢၢ်ထီၣ်အီၤ ဒီးတဲဝဲလၢ “သရၣ်ဧၢ, သရၣ်ဧၢ, ပကသံလီၤ.” ယ့ၣ်ၡူးဂဲၤဆၢထၢၣ် ဒီးမၢကလံၤ ဒီးလပီအိၣ်ဂၢၢ်အဃိ ကလံၤမုၢ် ပတုာ်ဝဲဒီး တၢ်ခဲလၢာ် အိၣ်ဂၢၢ်က့ၤဝဲလီၤ.+
၂၅ ဝံၤဒီးယ့ၣ်ၡူးတဲဘၣ် အဝဲသ့ၣ်လၢ “သုတၢ်နာ်အိၣ်ဖဲလဲၣ်.” ဘၣ်ဆၣ် အဝဲသ့ၣ် ပျံၤတၢ်ဒိၣ်မး ဒီးကမၢကမၣ်ဝဲ အဃိတဲလိာ်အသး တဂၤဒီးတဂၤလၢ “အဝဲမ့ၢ် မတဂၤလဲၣ်. အဝဲဟ့ၣ်လီၤ တၢ်ကလုၢ်ဒီး ကလံၤဒီးထံမး ဒိကနၣ် အကလုၢ်ဒံး.”+
၂၆ ဒီးအဝဲသ့ၣ် လဲၤတုၤလၢ ကရၤစံၤဟီၣ်ကဝီၤ+ အပီၣ်လဲၣ်နံၤ လၢအအိၣ်လၢ ကၤလံၤလါ အဝၢ်ဘးခီလီၤ.
၂၇ ဖဲယ့ၣ်ၡူးဟးထီၣ်လၢ ကဘီပူၤအခါ ပှၤဝ့ၢ်ဖိတဂၤလၢ တၢ်ဝံတၢ်နါ အိၣ်လၢအလိၤန့ၣ် ဟဲသဂၢၢ်အီၤလီၤ. အဝဲတသိး ဆ့ကူဆ့ကၤဘၣ် ဖးယံာ်လံ. ဒီးအဝဲတအိၣ်လၢ ဟံၣ်ပူၤဘၣ်, အိၣ်ဝဲလၢ တၢ်သွၣ်ခိၣ်လီၤ.*+
၂၈ ဖဲအဝဲထံၣ် ယ့ၣ်ၡူးအခါ အကိးပသူထီၣ်ဝဲ ဒီးထိၣ်လီၤပှီၤအသးလၢ ယ့ၣ်ၡူးအမဲာ်ညါ ဒီးတဲထီၣ်ဝဲလၢ အကလုၢ်ဖးဒိၣ်လၢ “ကစၢ်ယွၤလၢ အထီကတၢၢ်တဂၤ အဖိခွါယ့ၣ်ၡူးဧၢ, နၤဒီးယၤန့ၣ် ပဘၣ်ဃးလိာ်သးဒ်လဲၣ်. ယဃ့ကညးနၤလၢ တဘၣ်မၤနးမၤဖှီၣ်ယၤတဂ့ၤ.”+
၂၉ (အဝဲတဲဝဲဒ်န့ၣ် မ့ၢ်လၢ ယ့ၣ်ၡူး မၤလိာ်တၢ်ဝံတၢ်နါလၢ ကဟးထီၣ်ကွံာ်လၢ အလိၤအဃိလီၤ. လၢညါ တၢ်ဝံတၢ်နါအံၤဒိးအီၤ အါဘျီအဃိ*+ ပှၤစၢဃာ်အီၤလၢ ပျံၤထးဒီးထးကွီၤ အဘျီတဖၣ်အဘျီ ဒီးပှၤခိးကွၢ်အီၤလီၤ. ဘၣ်ဆၣ် အဝဲမၤထီၣ်တဲာ်ကွံာ်ဝဲ ဒီးတၢ်ဝံတၢ်နါ ဆှၢထီၣ်အီၤလၢ တၢ်လီၢ်လၢ ပှၤတအိၣ်ဘၣ်လီၤ.)
၃၀ ယ့ၣ်ၡူး သံကွၢ်အီၤလၢ “နမံၤဒ်လဲၣ်.” မ့ၢ်လၢ တၢ်ဝံတၢ်နါအါဒု အိၣ်လၢအလိၤ အဃိ အဝဲတဲဝဲလၢ “လ့းကူၣ်” လီၤ.
၃၁ ဒီးအဝဲသ့ၣ် ဆဲးဃ့ကညးယ့ၣ်ၡူး ဒ်သိး အသုတမၤလိာ် အဝဲသ့ၣ်လၢ ကလဲၤအိၣ်လၢ တၢ်ပူၤယိာ်တဂ့ၤအဂီၢ်လီၤ.+
၃၂ ဒီးထီးဖးအါတဖု+ အီၣ်အဆၣ်လၢ ကစၢၢ်ခိၣ်ဖဲန့ၣ် စ့ၢ်ကီးလီၤ. အဃိ အဝဲသ့ၣ် ဃ့ကညးယ့ၣ်ၡူးလၢ ကဟ့ၣ်အဝဲသ့ၣ်အခွဲးလၢ ကလဲၤနုာ်လီၤလၢ ထီးတဖုန့ၣ် အပူၤလီၤ. ဒီးယ့ၣ်ၡူးဟ့ၣ် အဝဲသ့ၣ်အခွဲးလီၤ.+
၃၃ ဒီးတၢ်ဝံတၢ်နါတဖၣ် ဟးထီၣ်ကွံာ်လၢ ပိာ်ခွါတဂၤန့ၣ်အလိၤ ဒီးလဲၤနုာ်လီၤဝဲလၢ ထီးတဖုန့ၣ် အပူၤလီၤ. ဒီးထီးတဖုန့ၣ် လဲၤဃ့ၢ်ဝဲလၢ ကၢၢ်ဖးထီအလိၤ ဒီးလီၤတဲာ်ဝဲလၢ ပီၣ်လဲၣ်ပူၤဒီး လီၤအုးသံဝဲလီၤ.
၃၄ ဖဲပှၤကွၢ်ထီးတဖၣ် ထံၣ်ဝဲ တၢ်မၤအသးအံၤအခါ အဝဲသ့ၣ်ဃ့ၢ်ကွံာ်ဝဲ ဒီးတဲဘၣ်ဝဲ တၢ်မၤအသးတဖၣ်အံၤ လၢဝ့ၢ်ပူၤ ဒီးလၢအခိၣ်အဃၢၤတဖၣ်လီၤ.
၃၅ ဒီးပှၤဟဲဝဲဒ်သိး ကထံၣ်ဝဲ တၢ်မၤအသးဒ်လဲၣ်လီၤ. အဝဲသ့ၣ်ဟဲလၢ ယ့ၣ်ၡူးအအိၣ် ဒီးထံၣ်ဝဲ ပှၤလၢတၢ်ဝံတၢ်နါ ဟးထီၣ်ကွံာ်လၢ အလိၤတဂၤန့ၣ် သိးဝဲတၢ်ကူတၢ်သိး, အသးဘၣ်လီၢ်ဘၣ်စးက့ၤဝဲ ဒီးအဆ့ၣ်နီၤဝဲလၢ ယ့ၣ်ၡူးအခီၣ်ထံးအဃိ အဝဲသ့ၣ်ပျံၤတၢ်လီၤ.
၃၆ ဒီးပှၤလၢအထံၣ်တ့ၢ် တၢ်မၤအသးအံၤန့ၣ် တဲဘၣ် အဝဲသ့ၣ်လၢ ပှၤလၢတၢ်ဝံတၢ်နါ အိၣ်လၢအလိၤတဂၤ ဂ့ၤထီၣ်က့ၤဝဲဒ်လဲၣ်န့ၣ်လီၤ.
၃၇ ဒီးပှၤအါဂၤလၢ အအိၣ်လၢ ကရၤစံၤဟီၣ်ကဝီၤ အခိၣ်အဃၢၤတဖၣ်န့ၣ် ပျံၤတၢ်ဒိၣ်မးအဃိ အဝဲသ့ၣ် မၢယ့ၣ်ၡူးဟးထီၣ်ကွံာ်လၢ အဝဲသ့ၣ်အအိၣ်လီၤ. ဒီးယ့ၣ်ၡူးဒိးထီၣ်ကဘီ ဒ်သိးကဟးထီၣ်ကွံာ်ဝဲလီၤ.
၃၈ ဘၣ်ဆၣ် ပှၤလၢတၢ်ဝံတၢ်နါ ဟးထီၣ်ကွံာ်လၢ အလိၤတဂၤန့ၣ် ဃ့ကညးယ့ၣ်ၡူးလၢ ကပိာ်အခံလီၤ. ဘၣ်ဆၣ် ယ့ၣ်ၡူးမၢအက့ၤ ဒီးတဲအီၤလၢ+
၃၉ “က့ၤလၢနအိၣ်တၢ်လီၢ် ဒီးတဲဘၣ် ပှၤဂၤတဖၣ်တၢ်လၢ ကစၢ်ယွၤ မၤန့ၢ်နၤ တက့ၢ်.” အဃိ အဝဲလဲၤလၢ ဝ့ၢ်ဒီတဖျၢၣ်အပူၤ ဒီးစံၣ်တဲၤတဲလီၤဝဲ တၢ်လၢယ့ၣ်ၡူး မၤန့ၢ်အီၤလီၤ.
၄၀ မ့ၢ်လၢပှၤဂီၢ်မုၢ်တဖၣ် ခိးကွၢ်လၢ်ဝဲယ့ၣ်ၡူးအဃိ+ ဖဲအဝဲဟဲက့ၤလၢ ကၤလံၤလါအခါ အဝဲသ့ၣ် တူၢ်လိာ်အီၤဂ့ၤဂ့ၤလီၤ.
၄၁ ဖဲန့ၣ်စီၤယၤအ့ၤရူး လၢအမ့ၢ် ဘူၣ်ဘျီၣ်အခိၣ်တဂၤ ဟဲချံးလီၤအခီၣ်လၢ ယ့ၣ်ၡူးအခီၣ်ထံး ဒီးဃ့ကညးယ့ၣ်ၡူးဒ်သိး ယ့ၣ်ၡူးကဟဲလၢအဟံၣ်,+
၄၂ မ့ၢ်လၢအဖိမုၣ်လၢ အအိၣ်ထဲတဂၤ လၢအသးနံၣ်အိၣ် ၁၂ နံၣ်န့ၣ် ဘူးထီၣ်လၢ အကသံအဃိလီၤ.
ဖဲယ့ၣ်ၡူးလဲၤဝဲအခါ ပှၤဂီၢ်မုၢ်တဖၣ် ဟဲဘၣ်တိဘၣ်ထံးအီၤလီၤ.
၄၃ ဒီးပိာ်မုၣ်လၢ အအိၣ်ဒီး သွံၣ်လီၤတၢ်ဆါ+ ယံာ်ဝဲ ၁၂ နံၣ်တဂၤ အိၣ်ဝဲဖဲန့ၣ်လီၤ. လၢညါ အဝဲဟးကူစါယါဘျါအသး လၢပှၤအိၣ် ဘၣ်ဆၣ် ပှၤမၤဘျါအီၤ တန့ၢ်နီတဂၤဘၣ်.+
၄၄ အဝဲဟဲလၢ ယ့ၣ်ၡူးအလီၢ်ခံ ဒီးထိးဝဲ ယ့ၣ်ၡူးအဆ့ကၤအနွံ+ ဒီးအသွံၣ်လီၤ ပတုာ်ကွံာ်ဝဲ တဘျီဃီလီၤ.
၄၅ အဃိ ယ့ၣ်ၡူးတဲဝဲလၢ “မတဂၤထိးဘၣ်ယၤလဲၣ်.” ဒီးအဝဲသ့ၣ်ခဲလၢာ် တဲဝဲလၢ တမ့ၢ်ယၤဘၣ်. ဖဲန့ၣ်အခါ စီၤပ့းတရူးတဲဝဲလၢ “သရၣ်ဧၢ, ပှၤဂီၢ်မုၢ် အိၣ်ဝးတရံးနၤ ဒီးဘၣ်တိဘၣ်ထံးနၤလီၤ.”+
၄၆ ဘၣ်ဆၣ် ယ့ၣ်ၡူးတဲဝဲလၢ “ယတၢ်စိတၢ်ကမီၤ+ ဟးထီၣ်လၢ ယပူၤအဃိ ယသ့ၣ်ညါလၢ ပှၤတဂၤဂၤ ထိးဘၣ်ယၤလီၤ.”
၄၇ ဒီးပိာ်မုၣ်တဂၤန့ၣ် သ့ၣ်ညါဝဲလၢ အပာ်ခူသူၣ်အသး တဘၢလၢၤဘၣ်အဃိ အဟဲဒီးကနိးကစုာ်ဝဲ ဒီးထိၣ်လီၤပှီၤအသးလၢ ယ့ၣ်ၡူးအမဲာ်ညါလီၤ. ဒီးလၢ ပှၤခဲလၢာ်အမဲာ်ညါန့ၣ် အဝဲတဲဖျါထီၣ်ဝဲလၢ ဘၣ်မနုၤအဃိ အထိးဘၣ်ယ့ၣ်ၡူးလဲၣ် ဒီးအဘျါက့ၤဝဲ တဘျီဃီ ဒ်လဲၣ် အဂ့ၢ်လီၤ.
၄၈ ဘၣ်ဆၣ် ယ့ၣ်ၡူးတဲဘၣ်အီၤလၢ “ဖိမုၣ်ဧၢ, နတၢ်နာ်မၤဘျါက့ၤနၤလံ. က့ၤမုာ်မုာ်နီၤ.”+
၄၉ ဖဲအဝဲတဲတၢ်ဒံးအခါ ဘူၣ်ဘျီၣ်အခိၣ် အပှၤခၢၣ်စးတဂၤ ဟဲတဲဝဲဘူၣ်ဘျီၣ်အခိၣ်လၢ “နဖိမုၣ်သံလံ. တဘၣ်မၤတံာ်တာ် သရၣ်လၢၤတဂ့ၤ.”+
၅၀ ဖဲယ့ၣ်ၡူး နၢ်ဟူဝဲဒ်န့ၣ်အခါ အဝဲတဲဆၢဝဲလၢ “ဘၣ်ယိၣ်တၢ်တဂ့ၤ, အိၣ်ဒီးတၢ်နာ်တက့ၢ်. ဒီးအဝဲကမူဝဲလီၤ.”*+
၅၁ ဖဲယ့ၣ်ၡူး လဲၤတုၤလၢ ဟံၣ်အခါ အဝဲတပျဲ ပှၤလဲၤနုာ်လီၤနီတဂၤဘၣ်. ပျဲဝဲထဲ စီၤပ့းတရူး, စီၤယိၤဟၣ်, စီၤယၤကိာ် ဒီးပိာ်မုၣ်ဖိ အမိၢ်အပၢ်လီၤ.
၅၂ ဒီးပှၤခဲလၢာ်ဟီၣ်ဝဲ ဒီးဒဲလီၤအသးနါပှၢ် လၢပိာ်မုၣ်ဖိအံၤအဃိလီၤ. ဒီးယ့ၣ်ၡူးတဲဝဲလၢ “ဟီၣ်လၢၤတဂ့ၤ.+ ပိာ်မုၣ်ဖိအံၤ တသံဘၣ်, မ့ၢ်ဒၣ်အမံလီၤ.”+
၅၃ ဒီးအဝဲသ့ၣ် နံၤဆဲးအဲးအီၤ, မ့ၢ်လၢအဝဲသ့ၣ် သ့ၣ်ညါဝဲလၢ ပိာ်မုၣ်ဖိအံၤ သံလံအဃိလီၤ.
၅၄ ဘၣ်ဆၣ် ယ့ၣ်ၡူးဖီၣ်ထီၣ် ပိာ်မုၣ်ဖိအစုဒီး တဲအီၤလၢ “ဖိဧၢ, ဂဲၤထၢၣ်ဟီ.”+
၅၅ ဒီးပိာ်မုၣ်ဖိအံၤ သမူထီၣ်က့ၤဝဲ*+ ဒီးဂဲၤဆၢထၢၣ်ဝဲ တဘျီဃီလီၤ.+ ဒီးယ့ၣ်ၡူးမၢ ပှၤဒုးအီၣ်အီၤ တၢ်တမံၤမံၤလီၤ.
၅၆ ဒီးပိာ်မုၣ်ဖိ အမိၢ်အပၢ်န့ၣ် သးခုဝဲ ဖးဒိၣ်ညါ. ဘၣ်ဆၣ် ယ့ၣ်ၡူးမၤလိာ် အဝဲသ့ၣ် ဒ်သိး အသုတတဲဘၣ် ပှၤဂၤလၢ တၢ်ဂ့ၢ်အံၤ နီတဂၤတဂ့ၤ အဂီၢ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤခူၣ်လီၤပှၤသံအလီၢ်.”
^ ဘၣ်သ့ၣ်သ့ၣ် ကမ့ၢ် “အိၣ်လၢ အလိၤဖးယံာ်လံ.”
^ အခီပညီလိၤလိၤ “ကပူၤဖျဲး.”
^ မ့ၢ်စ့ၢ်ကီး “အတၢ်မူအသဟီၣ်ဟဲက့ၤ.”
