ဧ့ၤဘြံၤ ၃:၁-၁၉
၃ အဃိ ဒီပုၢ်ဝဲၢ်စီဆှံ လၢအမ့ၢ် ပှၤလၢ အဘၣ်တၢ်ကိးန့ၢ်အီၤလၢ ကလဲၤထီၣ်ဆူ မူခိၣ်သ့ၣ်ဧၢ,+ ဆိကမိၣ်ထံ ယ့ၣ်ၡူးလၢအမ့ၢ်+ တၢ်မၢဖိ ဒီးပှၤလုၢ်တၢ်ခိၣ် အဒိၣ်ကတၢၢ်လၢ ပအၢၣ်လီၤတူၢ်လိာ်အီၤ တဂၤအဂ့ၢ်တက့ၢ်.
၂ အဝဲတီဒီး ကစၢ်ယွၤလၢ အဃုထၢထီၣ်အီၤတဂၤန့ၣ်+ ဒ်စီၤမိၤၡ့တီဒီး ကစၢ်ယွၤ ဖဲအမၤတၢ်လၢ ကစၢ်ယွၤ အဟံၣ်ပူၤအခါအသိးလီၤ.+
၃ နီၢ်ကီၢ်န့ၣ် ပှၤလၢ အတ့ထီၣ်ဟံၣ်တဂၤ အိၣ်ဒီးတၢ်လၤကပီၤ ဒိၣ်န့ၢ်ဒံးဟံၣ်လီၤ.*+ အဃိ အဝဲ* ကြၢးအိၣ်ဒီး တၢ်လၤကပီၤ ဒိၣ်န့ၢ်ဒံးစီၤမိၤၡ့လီၤ.
၄ ဒီးဟံၣ်ကိးဖျၢၣ်ဒဲးန့ၣ် ပှၤလၢအတ့ထီၣ်အီၤ အိၣ်ဝဲလီၤ. ဘၣ်ဆၣ် ပှၤလၢ အတ့တၢ်ခဲလၢာ်တဂၤန့ၣ် မ့ၢ်ဝဲကစၢ်ယွၤလီၤ.
၅ ဒီးဒ်တၢ်အခ့အပှၤတဂၤအသိး စီၤမိၤၡ့ ကဲပှၤလၢအတီ လၢကစၢ်ယွၤ အဟံၣ်ပူၤ ဒီးတၢ်လၢအဝဲမၤဝဲန့ၣ် ကဲတၢ်အုၣ်အသးဘၣ်ဃးဒီး တၢ်လၢအကဘၣ် တၢ်ပာ်ဖျါထီၣ်အီၤ လၢခါဆူညါလီၤ.
၆ မ့မ့ၢ်ခရံာ်န့ၣ် ဒ်ဖိခွါတဂၤအသိး အကဲပှၤလၢအတီလၢ+ ကစၢ်ယွၤအဟံၣ် အဖီခိၣ်လီၤ. ဒီးပဝဲဒၣ်အံၤ ပမ့ၢ်ဆဲးတဲတၢ်လၢ တၢ်သးဒူအပူၤ ဒီးဟံးဃာ် ပတၢ်မုၢ်လၢ်လၢ တၢ်သးခုအပူၤ ဂၢၢ်ဂၢၢ်ကျၢၤကျၢၤ တုၤလၢအကတၢၢ်န့ၣ် ပမ့ၢ်ကစၢ်ယွၤအဟံၣ်လီၤ.+
၇ လၢတၢ်န့ၣ်အဃိ ဒ်သးစီဆှံတဲဝဲအသိး+ “မုၢ်တနံၤအံၤ သုမ့ၢ်ဒိကနၣ် ယကလုၢ်န့ၣ်
၈ တဘၣ်မၤကိၤသုခိၣ် ဒ်သုမိၢ်ပၢ်ဖံဖု လၢပျၢၤတဖၣ် မၤသးထီၣ်ယၤ ဖဲမုၢ်တနံၤလၢ အဝဲသ့ၣ်မၤကွၢ်ယၤလၢ ပှၢ်မုၢ်ကနၢအပူၤန့ၣ်တဂ့ၤ.+
၉ သုမိၢ်ပၢ်ဖံဖု လၢပျၢၤတဖၣ် ထံၣ်ဘၣ် တၢ်လၢယမၤတဖၣ် အိၣ်ဝဲအနံၣ် ၄၀ ညါ. ဘၣ်ဆၣ် အဝဲသ့ၣ် မၤကွၢ်ယၤဒံးလီၤ.+
၁၀ အဃိ ယသးဘၣ်အၢ ပှၤတစိၤအံၤ ဒီးယတဲလၢ ‘အဝဲသ့ၣ်အသး အိၣ်ယံၤဒီးယၤထီဘိ ဒီးအဝဲသ့ၣ် တသ့ၣ်ညါထီၣ် ယကျဲတဖၣ်ဘၣ်.’
၁၁ အဃိ လၢတၢ်သးဒိၣ်ထီၣ်အပူၤ ယအၢၣ်လီၤလၢ ‘အဝဲသ့ၣ် တနုာ်လီၤဘၣ်လၢ ယတၢ်အိၣ်ဘှံးအပူၤဘၣ်.’”+
၁၂ ဒီပုၢ်ဝဲၢ်သ့ၣ်ဧၢ, ဒ်သိးပှၤလၢသုကျါ တဂၤဂ့ၤတဂၤဂ့ၤ သုတဃၣ်ကွံာ်အသးလၢ ကစၢ်ယွၤလၢ အမူဝဲတဂၤအအိၣ် ဒီးအသုတအိၣ်ထီၣ်ဒီးသးလၢ အတအိၣ်ဒီးတၢ်နာ်ဘၣ်တဂ့ၤအဂီၢ် ပလီၢ်သုသးတက့ၢ်.+
၁၃ ဖဲပအိၣ်မူဘၣ်ဒံးလၢ မုၢ်နံၤလၢ အဘၣ်တၢ်ကိးအီၤလၢ “မုၢ်တနံၤအံၤ”+ အဆၢကတီၢ်န့ၣ် ဒ်သိးသုသု တကဲထီၣ်ပှၤလၢ အခိၣ်ကိၤခီဖျိလၢ တၢ်ဒဲးဘးအစိကမီၤလၢ အလံၣ်န့ၢ်လီန့ၢ်တၢ်သ့ နီတဂၤတဂ့ၤအဂီၢ် ဆဲးဟ့ၣ်ဂံၢ်ဟ့ၣ်ဘါလိာ်သုသး ကိးနံၤဒဲးတက့ၢ်.
၁၄ တၢ်လၢပနာ်န့ၢ်အီၤလၢ အခီၣ်ထံးန့ၣ် ပမ့ၢ်ဟံးဃာ်အီၤ ကျၢၤကျၢၤ တုၤလၢအကတၢၢ်မး ပကဒိးန့ၢ်ဘၣ် တၢ်လၢခရံာ်ဒိးန့ၢ်ဘၣ်ဝဲလီၤ.+
၁၅ ဒ်တၢ်ကွဲးအသး အိၣ်ဝဲအသိး “မုၢ်တနံၤအံၤ သုမ့ၢ်ဒိကနၣ် ယကလုၢ်န့ၣ် တဘၣ်မၤကိၤသုခိၣ် ဒ်သုမိၢ်ပၢ်ဖံဖု လၢပျၢၤတဖၣ် မၤသးထီၣ်ယၤ အသိးန့ၣ်တဂ့ၤ.”+
၁၆ မတဂၤ နၢ်ဟူကစၢ်ယွၤအကလုၢ် ဒီးမၤသးထီၣ်အီၤလဲၣ်. နီၢ်ကီၢ်န့ၣ် မ့ၢ်ဝဲပှၤကိးဂၤဒဲးလၢ အဟးထီၣ်လၢ ကီၢ်အဲၤကူပတူးအပူၤ လၢစီၤမိၤၡ့ အတၢ်တီခိၣ်ရိၤမဲ အဖီလာ်န့ၣ် တမ့ၢ်ဘၣ်ဧါ.+
၁၇ တကးဒံးဘၣ် ပှၤလၢ ကစၢ်ယွၤသးဘၣ်အၢအီၤ အနံၣ် ၄၀ န့ၣ်မ့ၢ်မတဂၤလဲၣ်.+ မ့ၢ်ဝဲပှၤလၢ အမၤတၢ်ဒဲးဘး ဒီးသံဝဲလၢ ပှၢ်မုၢ်ကနၢအပူၤ တမ့ၢ်ဘၣ်ဧါ.+
၁၈ ဒီးပှၤလၢ ကစၢ်ယွၤ အၢၣ်လီၤလၢ အတလဲၤနုာ်ဘၣ်လၢ အတၢ်အိၣ်ဘှံးအပူၤဘၣ်န့ၣ် မ့ၢ်မတဂၤလဲၣ်. မ့ၢ်ဝဲပှၤလၢ အတဒိကနၣ်တၢ်ဘၣ်တဖၣ်န့ၣ် တမ့ၢ်ဘၣ်ဧါ.
၁၉ မ့ၢ်လၢ အဝဲသ့ၣ်အတၢ်နာ် တအိၣ်ဘၣ်အဃိ ပထံၣ်ဘၣ်လၢ အဝဲသ့ၣ် လဲၤနုာ်လီၤဝဲ တသ့ဘၣ်.+
