တၢ်မၤလိ ၁၇
စီၤပီလူး “သိၣ်လိအဝဲသ့ၣ် တၢ်ကွဲးအသးတဖၣ်”
ဒ်သိးပကကဲထီၣ် ပှၤသိၣ်လိတၢ်ဖိဂ့ၤဂ့ၤအဂီၢ် ပတၢ်သိၣ်လိန့ၣ် ကဘၣ်ဒိးသန့ၤထီၣ်သးလၢ လံာ်စီဆှံ. ပှၤဘ့းရံၤဖိ ပာ်လီၤတၢ်ဒိတၢ်တဲာ် လၢအဂ့ၤ
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁၇:၁-၁၅
၁, ၂. မတဂၤသ့ၣ်တဖၣ် အိၣ်လၢဝ့ၢ်ဖံလံးပံၤ ဒီးလဲၤတၢ်လၢ ဝ့ၢ်သ့းစၤလနံလဲၣ် ဒီးအဝဲသ့ၣ် ကဆိကမိၣ်ထီၣ်ဝဲ တၢ်ဂ့ၢ်မနုၤလဲၣ်.
စီၤပီလူး ဒီးအသကိး စီၤစံလၤဒီးစီၤတံၤမသ့းန့ၣ် အဝဲသ့ၣ် အိၣ်လၢဝ့ၢ်ဖံလံးပံၤ ဒီးကလဲၤဝဲလၢ ဝ့ၢ်သ့းစၤလနံ. အဝဲသ့ၣ် အတၢ်လဲၤအံၤ ကယံၤဝဲ အမံးလာ် ၈၀ (၁၃၀ ကံလိမံထၢၣ်) ညါ ဒီးအဝဲသ့ၣ် ဘၣ်လဲၤတၢ်လၢ ကစၢ်ကလိအကျါ. အဝဲသ့ၣ် လဲၤဘၣ်လၢကျဲလၢ ပှၤရိမ့ၤဖိတ့ထီၣ်ဝဲဂ့ၤဂ့ၤ. တကးဒံးဘၣ် ပှၤအဂၤဒ်သိးဒီး ပှၤသုးဖိ, ပှၤမၤစံပွါယ့ ဒီးပှၤစုသ့ဖိတဖၣ်စ့ၢ်ကီး လဲၤတၢ်က့ၤတၢ်အါမး. လၢကျဲပူၤန့ၣ် အဝဲသ့ၣ် နၢ်ဟူဘၣ်ဝဲ ပှၤတဲသကိးတၢ်, ဆၣ်ဖိကီၢ်ဖိကလုၢ်သီၣ် ဒီးလ့ၣ်ကဟၣ်အပၣ်သီၣ်ဝဲ. တကးဒံးဘၣ် စီၤပီလူး ဒီးစီၤစံလၤန့ၣ် ဖဲအဝဲသ့ၣ်အိၣ်လၢ ဝ့ၢ်ဖံလံးပံၤအခါ ပှၤတီၢ်အဝဲသ့ၣ်အဃိ အတၢ်ပူၤလီၢ် တဘျါဂ့ၤဂ့ၤဒံးဘၣ်. အဃိ တၢ်လဲၤတဘျီအံၤ တညီလၢအဝဲသ့ၣ်အဂီၢ်ဘၣ်.—မၤတၢ် ၁၆:၂၂, ၂၃.
၂ အဝဲသ့ၣ် ဘၣ်ဟးလၢကျဲ ဖးယံၤညါအဃိ အဝဲသ့ၣ်ကလီၤဘှံးလီၤတီၤ. ဘၣ်ဆၣ် ခီဖျိလၢ အဝဲသ့ၣ် တဲသကိးတၢ်အဃိ အဝဲသ့ၣ် လဲၤတၢ်လၢတၢ်သးခု ဒီးလဲၤတၢ်မုာ်မုာ်. ဒီးအဝဲသ့ၣ် ကနီၣ်ဘၣ်က့ၤဝဲ တၢ်လဲၤခီဖျိတခါ လၢအကဲထီၣ်သး ဖဲဝ့ၢ်ဖံလံးပံၤအပူၤ ဘၣ်ဃးဒီး ပှၤခိးဃိာ်ဖိ ဒီးအဟံၣ်ဖိဃီဖိ ကဲထီၣ်ပှၤစူၢ်က့ၤနာ်က့ၤတၢ်အဃိ ကကဲထီၣ် တၢ်ဂံၢ်တၢ်ဘါ လၢအဝဲသ့ၣ်အဂီၢ်ဒိၣ်မး. ခီဖျိလၢ တၢ်လဲၤခီဖျိတခါအံၤအဃိ အဝဲသ့ၣ် ဆၢတဲာ်လီၤအသးလၢ အကဆဲးစံၣ်တဲၤတဲလီၤတၢ်အါထီၣ်. သနာ်က့ ဖဲအဝဲသ့ၣ် လဲၤဘူးထီၣ်ကတုၤလၢ ဝ့ၢ်သ့းစၤလနံအခါ အဝဲသ့ၣ် ဆိကမိၣ်ထီၣ်ဝဲလၢ ပှၤယူဒၤဖိ လၢအအိၣ်လၢ ဝ့ၢ်တဖျၢၣ်န့ၣ်အပူၤန့ၣ် ကရ့ဒီးအဝဲသ့ၣ်ဒ်လဲၣ်. မ့ၢ်ပှၤဝ့ၢ်ဖိတဖၣ် ကထီဒါအဝဲသ့ၣ် ဒီးတီၢ်အဝဲသ့ၣ် ဒ်သိးဒီး ဖဲအဝဲသ့ၣ် လဲၤလၢ ဝ့ၢ်ဖံလံးပံၤအခါန့ၣ်ဧါ.
၃. စီၤပီလူး အတၢ်သးဒူကအိၣ်ထီၣ်အဂီၢ် အမၤဝဲဒ်လဲၣ် ဒီးပကွၢ်လိအီၤ ကသ့ဒ်လဲၣ်.
၃ လၢခံန့ၣ် စီၤပီလူး ကွဲးဖျါထီၣ် အတၢ်တူၢ်ဘၣ် ဖဲအကွဲးန့ၢ်လံာ်လၢ ခရံာ်ဖိလၢအအိၣ်လၢ ဝ့ၢ်သ့းစၤလနံအပူၤ. အကွဲးဝဲလၢ “ဒ်သုသ့ၣ်ညါအသိး လၢဝ့ၢ်ဖံလံးပံၤအပူၤန့ၣ် ပတူၢ်ဘၣ်တၢ်နးတၢ်ဖှီၣ် ဒီးပှၤမၤမဲာ်ဆှးပှၤနးမးလီၤ. ဒီးဖဲပလဲၤလၢသုအိၣ်အခါ ပှၤထီဒါပှၤအါမး သနာ်က့ ကစၢ်ယွၤ ဟ့ၣ်ပှၤတၢ်သူၣ်ဒူသးဒူ ဒ်သိးပကတဲဘၣ်သုလၢ ကစၢ်ယွၤ အတၢ်သးခုကစီၣ်အဂီၢ်.” (၁ သ့း ၂:၂) ခီဖျိလၢ တၢ်ကဲထီၣ်သးဒီး စီၤပီလူး လၢဝ့ၢ်ဖံလံးပံၤအဃိ ဖျါလီၤဂာ်လၢ စီၤပီလူး ကလဲၤလၢ ဝ့ၢ်သ့းစၤလနံအဂီၢ် အဝဲဘၣ်ယိၣ်တၢ်ဒံး. စီၤပီလူး ဘၣ်ယိၣ်တၢ်န့ၣ် ပနၢ်ပၢၢ်အီၤသ့. မ့မ့ၢ်နၤမီၤ နကလဲၤစံၣ်တဲၤတဲလီၤ တၢ်သးခုကစီၣ်အဂီၢ် နထံၣ်ဘၣ် တၢ်အိၣ်သး လၢအကီအခဲဒ်န့ၣ် အိၣ်တဘျီဘျီဧါ. စီၤပီလူးန့ၣ် ဒ်သိးအကအိၣ်ဒီး တၢ်ဂံၢ်တၢ်ဘါ ဒီးတၢ်သးဒူအဂီၢ် အသန့ၤအသးလၢ ယဟိဝၤယွၤ. အဃိ ပမ့ၢ်မၤလိ စီၤပီလူး အဒိအတဲာ်န့ၣ် ကမၤစၢၤပှၤ ဒ်သိးပက သန့ၤပသးလၢ ယဟိဝၤယွၤစ့ၢ်ကီး.—၁ ကရံၣ် ၄:၁၆.
စီၤပီလူး “သိၣ်လိအဝဲသ့ၣ် တၢ်ကွဲးအသးတဖၣ်” (မၤတၢ် ၁၇:၁-၃)
၄. ဘၣ်မနုၤအဃိ ပတဲလၢ စီၤပီလူး အိၣ်လၢ ဝ့ၢ်သ့းစၤလနံ အါန့ၢ်သၢနွံဒံးလဲၣ်.
၄ လံာ်မၤတၢ် ပာ်ဖျါထီၣ်ဝဲလၢ ဖဲစီၤပီလူး အိၣ်လၢ ဝ့ၢ်သ့းစၤလနံအခါ အစံၣ်တဲၤတဲလီၤတၢ်လၢ ဘူၣ်ဘျီၣ်ပူၤ လၢမုၢ်အိၣ်ဘှံးနံၤ သၢနွံညါ. အဃိ မ့ၢ်စီၤပီလူး အိၣ်လၢ ဝ့ၢ်တဖျၢၣ်န့ၣ်အပူၤ ထဲသၢနွံလီၤဧါ. တမ့ၢ်ဘၣ်. ဖဲစီၤပီလူး လဲၤတုၤလၢ ဝ့ၢ်သ့းစၤလနံအခါ ဘၣ်သ့ၣ်သ့ၣ် အတလဲၤလၢ ဘူၣ်ဘျီၣ်ပူၤ တဘျီဃီဘၣ်. တကးဒံးဘၣ် စီၤပီလူး အလံာ်ပရၢ လၢအကွဲးဝဲ ဖဲအအိၣ်လၢ ဝ့ၢ်သ့းစၤလနံအခါန့ၣ် ပာ်ဖျါထီၣ်ဝဲလၢ အီၤဒီးအသကိးတဖၣ် ဘၣ်မၤတၢ်မၤ ဒ်သိးကလုၢ်အီၣ် အသးသမူအဂီၢ်. (၁ သ့း ၂:၉; ၂ သ့း ၃:၇, ၈) ဒီးဖဲစီၤပီလူး အိၣ်လၢဝ့ၢ်သ့းစၤလနံအခါ အန့ၢ်ဘၣ်ဝဲ တၢ်မၤစၢၤလၢ ဒီပုၢ်ဝဲၢ်မုၣ်ခွါလၢ အအိၣ်လၢ ဝ့ၢ်ဖံလံးပံၤအအိၣ်န့ၣ် ခံဘျီညါ. (ဖံလံး ၄:၁၆) အဃိ ဖျါလီၤဂာ်လၢ စီၤပီလူး အိၣ်လၢ ဝ့ၢ်သ့းစၤလနံ အါန့ၢ်သၢနွံဒံး.
၅. ဒ်သိး စီၤပီလူး အတၢ်စံၣ်တဲၤတဲလီၤ ကထုးန့ၢ်ပှၤသးအဂီၢ် အမၤဝဲဒ်လဲၣ်.
၅ ပှၤလၢအအိၣ်လၢ ဘူၣ်ဘျီၣ်ပူၤန့ၣ် စီၤပီလူး စံၣ်တဲၤတဲလီၤ အဝဲသ့ၣ်ဒူဒူ. ဒီးဒ်ညီနုၢ်အသိး စီၤပီလူး “သိၣ်လိအဝဲသ့ၣ် တၢ်ကွဲးအသးတဖၣ်, စီၤပီလူး တဲနၢ်ပၢၢ်အဝဲသ့ၣ် တကးဒံးဘၣ် အသူဝဲ တၢ်ကွဲးအသးတဖၣ် ဒ်သိး ကပာ်ဖျါထီၣ်ဝဲလၢ ခရံာ်ဘၣ်တူၢ် တၢ်နးတၢ်ဖှီၣ်ဒီး ဂဲၤဆၢထၢၣ်လၢ တၢ်သံအဂ့ၢ်လီၤ. ဒီးအဝဲတဲဝဲလၢ ‘ယ့ၣ်ၡူးလၢ ယစံၣ်တဲၤတဲလီၤသု အဂ့ၢ်တဂၤန့ၣ် မ့ၢ်ဝဲခရံာ်လီၤ.’” (မၤတၢ် ၁၇:၂, ၃) ဖဲအံၤန့ၣ် ပထံၣ်ဘၣ်လၢ စီၤပီလူး တဲတၢ်ဒ်သိး ပှၤဒိကနၣ်တၢ်ဖိတဖၣ် ကဘၣ်သူၣ်ဘၣ်သးဝဲ တကးဒံးဘၣ် အမၤစၢၤအဝဲသ့ၣ်ဒ်သိး အဝဲသ့ၣ် ကဆိကမိၣ်ထံ တၢ်လၢအတဲဝဲတဖၣ်. အသ့ၣ်ညါဝဲလၢ ပှၤလၢအလဲၤလၢ ဘူၣ်ဘျီၣ်န့ၣ် အဝဲသ့ၣ် သ့ၣ်ညါ ဒီးပာ်လုၢ်ပာ်ပှ့ၤ တၢ်ကွဲးအသးတဖၣ်လံ. သနာ်က့ အဝဲသ့ၣ်တနၢ်ပၢၢ် တၢ်ကွဲးအသးတဖၣ်ဘၣ်. အဃိ စီၤပီလူး သိၣ်လိအဝဲသ့ၣ်, တဲနၢ်ပၢၢ်အဝဲသ့ၣ် ဒီးအသူဝဲ တၢ်ကွဲးအသးတဖၣ် ဒ်သိးကပာ်ဖျါထီၣ်ဝဲလၢ ပှၤနစၤရံဖိ ယ့ၣ်ၡူးန့ၣ် အကဲဝဲ မ့းၡံအၤ လၢအမ့ၢ်ခရံာ်.
၆. ဖဲယ့ၣ်ၡူး သိၣ်လိအပျဲၢ်အဘီၣ်အခါ ဒ်သိးအကထုးန့ၢ် အဝဲသ့ၣ်အသးအဂီၢ် အမၤဝဲဒ်လဲၣ် ဒီးအကဲဘျုးဒ်လဲၣ်.
၆ ယ့ၣ်ၡူးန့ၣ် ဖဲအသိၣ်လိတၢ်အခါ အဒိးသန့ၤထီၣ် အတၢ်သိၣ်လိလၢ တၢ်ကွဲးအသးတဖၣ်ထီဘိ. အဃိ ဖဲစီၤပီလူး သိၣ်လိတၢ်အခါ အကွၢ်လိဝဲ ယ့ၣ်ၡူးအဒိအတဲာ်. အဒိ ယ့ၣ်ၡူး တဲဘၣ်အပျဲၢ်အဘီၣ်တဖၣ်လၢ ဒ်တၢ်ကွဲးအသးအိၣ်ဝဲအသိး ပှၤကညီဖိခွါအံၤ ပှၤကမၤအၢမၤနးအီၤ, ပှၤကမၤသံအီၤ ဒီးအကဂဲၤဆၢထၢၣ် သမူထီၣ်က့ၤ. (မး ၁၆:၂၁) ဒီးယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ အလီၣ်ဖျါထီၣ်အသးလၢ အပျဲၢ်အဘီၣ်တဖၣ်အမဲာ်ညါ. အဃိ ဖဲအပျဲၢ်အဘီၣ်တဖၣ် ထံၣ်အီၤအခါ အဝဲသ့ၣ် နာ်ဝဲသပှၢ်တၢၢ်လၢ ယ့ၣ်ၡူးတဲတၢ်မ့ၢ်တၢ်တီ. တကးဒံးဘၣ် ယ့ၣ်ၡူး တဲဘၣ်အါထီၣ်အဝဲသ့ၣ်လၢ တၢ်အုၣ်သးဒံး. ယ့ၣ်ၡူး သိၣ်လိအပျဲၢ်အဘီၣ် ဒ်လဲၣ်န့ၣ် လံာ်စီဆှံ ပာ်ဖျါထီၣ်ဝဲလၢ “ယ့ၣ်ၡူးတဲနၢ်ပၢၢ် အဝဲသ့ၣ် တၢ်ခဲလၢာ်လၢ တၢ်ကွဲးအသးတဲဝဲ ဘၣ်ဃးဒီး အနီၢ်ကစၢ်အဂ့ၢ် စးထီၣ်လၢ စီၤမိၤၡ့ အတၢ်ကွဲးအသး တုၤလီၤလၢ ဝံအတၢ်ကွဲးအသး ခဲလၢာ်.” အဃိ ယ့ၣ်ၡူးအပျဲၢ်အဘီၣ်တဖၣ် ကမၢကမၣ်ဒိၣ်မး ဒီးအဝဲသ့ၣ်တဲဝဲလၢ “ဖဲအတဲတၢ်ဒီးပှၤလၢကျဲ ဒီးတဲနၢ်ပၢၢ်ပှၤ တၢ်ကွဲးအသးအခါ ပသူၣ်ဟူးသးဂဲၤဒိၣ်မး တမ့ၢ်ဧီၤ.”—လူၤ ၂၄:၁၃, ၂၇, ၃၂.
၇. ဘၣ်မနုၤအဃိ အရ့ဒိၣ်လၢ ပကဒိးသန့ၤထီၣ် ပတၢ်သိၣ်လိ လၢလံာ်စီဆှံလဲၣ်.
၇ လံာ်စီဆှံ အတၢ်ကစီၣ်န့ၣ် အိၣ်ဒီးအစိအကမီၤ. (ဧ့ၤ ၄:၁၂) အဃိ ဒ်ယ့ၣ်ၡူး, စီၤပီလူး ဒီးတၢ်မၢဖိတဖၣ်အသိး ပဝဲခရံာ်ဖိလၢ မုၢ်မဆါတနံၤအံၤ ဖဲပသိၣ်လိတၢ်အခါ ပဒိးသန့ၤထီၣ် ပတၢ်သိၣ်လိ လၢလံာ်စီဆှံ. တကးဒံးဘၣ် လံာ်စီဆှံ အတၢ်ကစီၣ် လၢပတဲဘၣ်ပှၤဂၤန့ၣ် တမ့ၢ်ပတၢ်ကစီၣ်ဘၣ်. အဃိ ပမၤစၢၤပှၤဂၤဒ်သိး ကနၢ်ပၢၢ်ထီၣ် လံာ်စီဆှံအဆၢ, တဲနၢ်ပၢၢ်အဝဲသ့ၣ် ဒီးမၤစၢၤအဝဲသ့ၣ် ဒ်သိးအဝဲသ့ၣ် ကသ့ၣ်ညါလၢ တၢ်လၢပသိၣ်လိတဖၣ်န့ၣ် ဒိးသန့ၤထီၣ်သး လၢလံာ်စီဆှံ. ခီဖျိလၢ ပသူလံာ်စီဆှံအဆၢ ထီဘိအဃိ ပှၤလၢပစံၣ်တဲၤတဲလီၤအီၤတဖၣ် သ့ၣ်ညါထီၣ်ဝဲလၢ တၢ်လၢပသိၣ်လိတဖၣ်န့ၣ် တမ့ၢ်ပနီၢ်ကစၢ် တၢ်ဆိကမိၣ်ဘၣ်, ဘၣ်ဆၣ် အကဲဝဲ ကစၢ်ယွၤ အတၢ်ဆိကမိၣ်. ဒီးထီဘိန့ၣ် ပသ့ၣ်နီၣ်ထီၣ်လၢ တၢ်ကစီၣ် လၢပတဲတဖၣ်န့ၣ် အဒိးသန့ၤထီၣ်သး လၢလံာ်စီဆှံအဃိ ပနာ်န့ၢ်အီၤသ့နီၢ်ကီၢ်. ပသ့ၣ်ညါဘၣ်လၢ လံာ်စီဆှံ အတၢ်ကစီၣ် လၢပတဲတဖၣ်န့ၣ် ပနာ်န့ၢ်အီၤသ့နီၢ်ကီၢ်အဃိ ဒ်စီၤပီလူးအသိး ပစံၣ်တဲၤတဲလီၤတၢ်ဒူဒူ ဒီးပတပျံၤတၢ်ဘၣ်.
“ပှၤတနီၤ . . . ကဲထီၣ် ပှၤစူၢ်က့ၤနာ်က့ၤတၢ်” (မၤတၢ် ၁၇:၄-၉)
၈-၁၀. (က) ပှၤလၢအအိၣ်လၢ ဝ့ၢ်သ့းစၤလနံအပူၤန့ၣ် နၢ်ဟူဘၣ်တၢ်သးခုကစီၣ်ဝံၤဒီး အဝဲသ့ၣ်မၤဝဲဒ်လဲၣ်. (ခ) ဘၣ်မနုၤအဃိ ပှၤယူဒၤဖိတနီၤ သးက့ၣ်စီၤပီလူးလဲၣ်. (ဂ) ပှၤယူဒၤဖိ လၢအထီဒါတၢ်တဖၣ်န့ၣ် မၤဝဲမနုၤလဲၣ်.
၈ ယ့ၣ်ၡူး တဲဝဲလၢ “ကုၢ်န့ၣ်တဒိၣ်န့ၢ် အကစၢ်ဘၣ်. အဃိ အဝဲသ့ၣ် မ့ၢ်မၤအၢမၤနးယၤန့ၣ် အဝဲသ့ၣ် ကမၤအၢမၤနးသု စ့ၢ်ကီးလီၤ. ဒီးအဝဲသ့ၣ် မ့ၢ်ဒိကနၣ် ယကလုၢ်န့ၣ် အဝဲသ့ၣ် ကဒိကနၣ် သုကလုၢ်စ့ၢ်ကီးလီၤ.” (ယိၤ ၁၅:၂၀) စီၤပီလူး ထံၣ်ဘၣ်ဝဲ တၢ်မၤအၢမၤနးလံအဃိ အသ့ၣ်ညါဝဲလၢ ယ့ၣ်ၡူး အတၢ်ကတိၤအံၤ အဘၣ်ဝဲနီၢ်ကီၢ်. ဖဲစီၤပီလူး အိၣ်လၢဝ့ၢ်သ့းစၤလနံအခါ အထံၣ်ဘၣ်ဝဲလၢ ပှၤတနီၤန့ၣ် သးအိၣ်ဒိကနၣ် တၢ်လၢအတဲဝဲ ဒီးအဂၤတနီၤန့ၣ် တတူၢ်လိာ်ဝဲဘၣ်. ဘၣ်ဃးဒီး ပှၤလၢအတူၢ်လိာ် တၢ်လၢစီၤပီလူးတဲဝဲန့ၣ် စီၤလူၤကၣ် ကွဲးဝဲလၢ “ပှၤတနီၤလၢ အဝဲသ့ၣ် [ယူဒၤ] အကျါန့ၣ် ကဲထီၣ် ပှၤစူၢ်က့ၤနာ်က့ၤတၢ် [ခရံာ်ဖိ] ဒီးမၤသကိးတၢ်ဒီး စီၤပီလူး ဒီးစီၤစံလၤလီၤ. တကးဒံးဘၣ် ပှၤကြံးဖိအါဂၤလၢ အဘူၣ်ထီၣ်ဘါထီၣ်ယွၤ ဒီးပှၤပိာ်မုၣ်လၢ အမံၤဟူသၣ်ဖျါ တဘျုးဂၤညါ မၤဝဲဒ်န့ၣ်စ့ၢ်ကီးလီၤ.” (မၤတၢ် ၁၇:၄) ပထံၣ်ဘၣ်လၢ ယ့ၣ်ၡူး အပျဲၢ်အဘီၣ် လၢအသီတဖၣ်အံၤ နၢ်ပၢၢ်ထီၣ်တၢ်ကွဲးအသး လီၤတံၢ်လီၤဆဲးအဃိ အဝဲသ့ၣ် သးခုဒိၣ်မး.
၉ ပှၤတနီၤန့ၣ် ဘၣ်သူၣ်ဘၣ်သးဝဲ တၢ်လၢစီၤပီလူးသိၣ်လိဝဲ သနာ်က့ ပှၤအဂၤတနီၤန့ၣ် သးပှံၢ်ထီၣ် စီၤပီလူးဒိၣ်မး. တကးဒံးဘၣ် “ပှၤကြံးဖိအါဂၤ” တူၢ်လိာ်ဝဲ တၢ်လၢစီၤပီလူးသိၣ်လိဝဲအဃိ ပှၤယူဒၤဖိတနီၤ လၢအအိၣ်လၢ ဝ့ၢ်သ့းစၤလနံအပူၤန့ၣ် အဝဲသ့ၣ် သးက့ၣ်စီၤပီလူး. ပှၤယူဒၤဖိတဖၣ်န့ၣ် အဝဲသ့ၣ် ဘၣ်သးဝဲလၢ ပှၤကြံးဖိတဖၣ် ကတူၢ်လိာ် ပှၤယူဒၤဖိ အတၢ်စူၢ်တၢ်နာ် ဒီးဘၣ်သးဝဲလၢ ပှၤကြံးဖိတဖၣ် ကဟဲနုာ်လီၤလၢ အဝဲသ့ၣ် အတၢ်ဘူၣ်တၢ်ဘါအပူၤ. အဃိ အဝဲသ့ၣ် သိၣ်လိပာ်စၢၤဝဲ ပှၤကြံးဖိတဖၣ်လၢ လံာ်စီဆှံလၢဧ့ၤဘြံၤတကတြူၢ် ဒီးအဝဲသ့ၣ် ထံၣ်ဝဲလၢ ပှၤကြံးဖိတဖၣ်န့ၣ် ကဲဝဲအဝဲသ့ၣ် အပျဲၢ်အဘီၣ်. သနာ်က့ စီၤပီလူး လဲၤလၢ ပှၤယူၤဒၤဖိ အဘူၣ်ဘျီၣ်ပူၤ ဒီးမၤစၢၤ ပှၤကြံးဖိတဖၣ် ဒ်သိးကကဲထီၣ်ခရံာ်ဖိ ဒီးတဲနၢ်ပၢၢ် အဝဲသ့ၣ်လၢ အဝဲသ့ၣ် တလိၣ်မၤထွဲ ပှၤယူဒၤဖိ အတၢ်သိၣ်တၢ်သီလၢၤဘၣ်. အဃိ ပှၤယူဒၤဖိတဖၣ် သးပှံၢ်ထီၣ်တၢ်ဒိၣ်မး.
“အဝဲသ့ၣ် . . . ကိးထီၣ် စီၤပီလူး ဒီးစီၤစံလၤလၢ ပှၤဂီၢ်မုၢ်တဒူၣ်န့ၣ် အမဲာ်ညါ.”—မၤတၢ် ၁၇:၅
၁၀ ဘၣ်ဃးဒီး တၢ်ကဲထီၣ်သးလၢခံန့ၣ် စီၤလူၤကၣ် တဲဝဲလၢ “မ့မ့ၢ် ပှၤယူဒၤဖိတဖၣ်န့ၣ် အသးက့ၣ်တၢ်အဃိ ကိးဖှိၣ် ပှၤအၢပှၤသီတနီၤလၢ အအိၣ်ကလီလၢ တၢ်ဆါတၢ်ပှ့ၤအလီၢ် ဒီးဒုးအိၣ်ဖှိၣ် ပှၤဂီၢ်မုၢ်တဒူၣ်လၢ အကမၤတၢထီၣ်တၢလီၤတၢ်လၢ ဝ့ၢ်ပူၤလီၤ. အဝဲသ့ၣ် နုာ်လီၤန့ၢ်ဆူၣ်ဝဲလၢ စီၤယါစီၣ်အဟံၣ်ပူၤ ဒ်သိးကကိးထီၣ် စီၤပီလူး ဒီးစီၤစံလၤလၢ ပှၤဂီၢ်မုၢ်တဒူၣ်န့ၣ် အမဲာ်ညါလီၤ. အဝဲသ့ၣ်ဃု စီၤပီလူးဒီးစီၤစံလၤ တဘၣ်ဘၣ်အဃိ အဝဲသ့ၣ်တွံၢ်ထီၣ် စီၤယါစီၣ်ဒီး ဒီပုၢ်ဝဲၢ်ခွါတနီၤ လၢဝ့ၢ်အပှၤခိၣ်ပှၤနၢ်တဖၣ် အမဲာ်ညါ ဒီးကိးပသူထီၣ်ဝဲလၢ ‘ပိာ်ခွါလၢ အမၤတၢထီၣ် တၢလီၤတၢ်လၢ တၢ်လီၢ်ဝးဝးန့ၣ် ဟဲတုၤဖဲအံၤလံ. ဒီးစီၤယါစီၣ် တူၢ်လိာ်မုာ် အဝဲသ့ၣ်လၢ အဟံၣ်လီၤ. ပှၤတဖၣ်အံၤခဲလၢာ် ထီဒါကဲစၢ် အတၢ်သိၣ်တၢ်သီတဖၣ် ခီဖျိတဲဝဲလၢ စီၤပၤအိၣ်ဒံးဝဲတဂၤလၢ အမ့ၢ်ယ့ၣ်ၡူးလီၤ.’” (မၤတၢ် ၁၇:၅-၇) ခီဖျိလၢ ပှၤမၤတၢထီၣ်တၢလီၤတၢ်အဃိ တၢ်ကကဲထီၣ်သးဒီး စီၤပီလူး ဒီးအသကိးတဖၣ်ဒ်လဲၣ်.
၁၁. စီၤပီလူး ဒီးအသကိးတဖၣ်န့ၣ် ပှၤပာ်ဒ့ၣ်ပာ်ကမၣ် အဝဲသ့ၣ်ဒ်လဲၣ် ဒီးပှၤထီဒါတၢ်တဖၣ်အံၤ သူဝဲတၢ်သိၣ်တၢ်သီလၢ ကထီဒါ အဝဲသ့ၣ်ဒ်လဲၣ်. (ကွၢ်တၢ်ဂ့ၢ်အဘျဲၣ်.)
၁၁ ပှၤမၤတၢထီၣ်တၢလီၤတၢ်တဖု မ့ၢ်ပာ်ဖှိၣ်ထီၣ်သး ဒီးမၤသကိးတၢ်န့ၣ် အဝဲသ့ၣ် ဒုးအိၣ်ထီၣ် တၢ်ကီတၢ်ခဲအါမး. အဝဲသ့ၣ် မၤအၢမၤသီတၢ် ဒီးအဝဲသ့ၣ်န့ၣ် အလီၤဂာ်ဒ်သိးဒီး ထံဒိၣ်ထီၣ်လၢပှၤတြီဝဲတန့ၢ်ဘၣ်. အဃိ ပှၤယူဒၤဖိမၢဝဲ ပှၤမၤတၢထီၣ်တၢလီၤတၢ်တဖုအံၤ ထီဒါစီၤပီလူး ဒီးစီၤစံလၤ. လၢခံ ဖဲပှၤယူဒၤဖိ “မၤ တၢထီၣ်တၢလီၤတၢ်လၢ ဝ့ၢ်ပူၤ” ဝံၤအလီၢ်ခံ အဝဲသ့ၣ်တဲဘၣ် ဝ့ၢ်အပှၤခိၣ်ပှၤနၢ်တဖၣ်လၢ စီၤပီလူး ဒီးအသကိးတဖၣ်န့ၣ် ဒုးအိၣ်ထီၣ် တၢ်ကီတၢ်ခဲအဃိ ပှၤကဘၣ်စံၣ်ညီၣ်အဝဲသ့ၣ်. အဆိကတၢၢ်န့ၣ် အဝဲသ့ၣ် ပာ်ဒ့ၣ်ပာ်ကမၣ် စီၤပီလူး ဒီးအသကိးတဖၣ် ဒီးတဲဝဲလၢ အဝဲသ့ၣ် စံၣ်တဲၤတဲလီၤတၢ် ဒီး “မၤတၢထီၣ် တၢလီၤတၢ်လၢ တၢ်လီၢ်ဝးဝး.” ဘၣ်ဆၣ် နီၢ်ကီၢ်န့ၣ် စီၤပီလူး ဒီးအသကိးတဖၣ် တမၤတၢထီၣ်တၢလီၤတၢ်လၢ ဝ့ၢ်သ့းစၤလနံအပူၤဘၣ်. တၢ်ဂ့ၢ်ခံထံၣ်တထံၣ်လၢ ပှၤယူဒၤဖိ တဲဝဲလၢ စီၤပီလူး ဒီးအသကိးတဖၣ် မၤကမၣ်တၢ်န့ၣ် နးန့ၢ်ဒံး တၢတထံၣ်ဒံး. အဝဲသ့ၣ် တဲဝဲလၢ စီၤပီလူး ဒီးအသကိးတဖၣ်န့ၣ် စံၣ်တဲၤတဲလီၤဝဲ ဘၣ်ဃးဒီး စီၤပၤအဂၤတဂၤ လၢအမ့ၢ် ယ့ၣ်ၡူးအဂ့ၢ် အဃိ အဝဲသ့ၣ် တဲဝဲလၢ စီၤပီလူး ဒီးအသကိးတဖၣ်န့ၣ် မၤကမၣ်ဝဲ ကဲစၢ် အတၢ်သိၣ်တၢ်သီ. a
၁၂. ခရံာ်ဖိလၢ ဝ့ၢ်သ့းစၤလနံအပူၤန့ၣ် ပှၤပာ်ဒ့ၣ်ပာ်ကမၣ် အဝဲသ့ၣ်အဃိ တၢ်ဘၣ်ယိၣ် အိၣ်ထီၣ်လၢ အဝဲသ့ၣ်အဂီၢ်ဒ်လဲၣ်.
၁၂ ဘၣ်သ့ၣ်သ့ၣ် နကနီၣ်ဘၣ်က့ၤလၢ တၢ်ဘူၣ်တၢ်ဘါခိၣ်နၢ်တဖၣ် ပာ်ဒ့ၣ်ပာ်ကမၣ် ယ့ၣ်ၡူး ဒ်န့ၣ်စ့ၢ်ကီး. အဝဲသ့ၣ် တဲဘၣ် စီၤပံၤလးလၢ “ပထံၣ်လၢပှၤတဂၤအံၤ ကွဲန့ၢ်လွဲန့ၢ် ပပှၤကလုာ်တဖၣ်, တြီဝဲလၢ ပှၤကဟ့ၣ်တၢ်ခိတၢ်သွဲလၢ ကဲစၢ်အအိၣ် ဒီးအတဲလီၤအသးလၢ အမ့ၢ်ခရံာ် ဒီးစီၤပၤတဂၤ.” (လူၤ ၂၃:၂) စီၤပံၤလး ဘၣ်ယိၣ်ဝဲလၢ ရိမ့ၤဘီမုၢ်စီၤပၤ ကဆိကမိၣ်ကမၣ်အီၤ လၢအထီဒါက့ၤအီၤအဃိ အဝဲမၢ ပှၤမၤသံကွံာ်ယ့ၣ်ၡူး. ဒ်န့ၣ်အသိး ခရံာ်ဖိလၢ ဝ့ၢ်သ့းစၤလနံအပူၤန့ၣ် ပှၤပာ်ဒ့ၣ်ပာ်ကမၣ် အဝဲသ့ၣ်ဒ်န့ၣ်အဃိ တၢ်ဘၣ်ယိၣ် အိၣ်ထီၣ်လၢ အဝဲသ့ၣ်အဂီၢ်သ့. လံာ်တဘ့ၣ်လၢ အတဲဘၣ်ဃးဒီး လံာ်မၤတၢ်အဂ့ၢ်န့ၣ် ပာ်ဖျါထီၣ်ဝဲလၢ “တၢ်ပာ်ဒ့ၣ်ပာ်ကမၣ်တခါအံၤ လီၤပျံၤလီၤဖုးဒိၣ်မး. ပှၤမ့ၢ်ဆိကမိၣ်လၢ ပှၤတဂၤဂၤ ထီဒါက့ၤဝဲ ရိမ့ၤဘီမုၢ်စီၤပၤန့ၣ် ပှၤမၤသံအီၤတဘျီဃီသ့.” သနာ်က့ ပှၤယူဒၤဖိ အတၢ်ကူၣ်လၢအအၢအသီအံၤ ကကဲထီၣ်နီၢ်ကီၢ်ဧါ. ပကဆဲးကွၢ်သကိး.
၁၃, ၁၄. (က) ဘၣ်မနုၤအဃိ ပှၤမၤတၢထီၣ်တၢလီၤတၢ်တဖု ထီဒါတၢ်န့ၣ် တကဲထီၣ်ဝဲဘၣ်လဲၣ်. (ခ) စီၤပီလူး မၤထွဲဝဲဒ် ယ့ၣ်ၡူးတဲဝဲအသိးဒ်လဲၣ် ဒီးပကွၢ်လိစီၤပီလူး အဒိအတဲာ်ကသ့ဒ်လဲၣ်.
၁၃ ပှၤမၤတၢထီၣ်တၢလီၤတၢ်တဖုအံၤ မၤပတုာ်ဝဲ တၢ်စံၣ်တဲၤတဲလီၤတၢ်မၤ လၢဝ့ၢ်သ့းစၤလနံအပူၤ တန့ၢ်ဘၣ်. ဘၣ်မနုၤအဃိလဲၣ်. အဆိကတၢၢ်န့ၣ် စီၤပီလူး ဒီးစီၤစံလၤ အိၣ်ဖဲလဲၣ်န့ၣ် ပှၤတသ့ၣ်ညါဝဲဘၣ်. ဒီးဖျါလီၤဂာ်လၢ ဝ့ၢ်အပှၤခိၣ်ပှၤနၢ်တဖၣ် တနာ်အီၣ်ဝဲ တၢ်ပာ်ဒ့ၣ်ပာ်ကမၣ် တခါအံၤဘၣ်. တကးဒံးဘၣ် စီၤယါစီၣ် ဒီးဒီပုၢ်ဝဲၢ်အဂၤတဖၣ် “ဟ့ၣ်လီၤစ့လၢ အကဘၣ်ဟ့ၣ်လီၤဝဲ” ဝံၤအလီၢ်ခံ ဝ့ၢ်အပှၤခိၣ်ပှၤနၢ်တဖၣ် ပျၢ်ထီၣ်ကွံာ် အဝဲသ့ၣ်. (မၤတၢ် ၁၇:၈, ၉) ယ့ၣ်ၡူး ဟ့ၣ်ကူၣ် အပျဲၢ်အဘီၣ်တဖၣ်လၢ အဝဲသ့ၣ်ကဘၣ် “ကူၣ်တၢ်သ့ ဒ်ဂုၢ်အသိး ဒီးလီၤဂာ်ဒ် ထိၣ်လွံၢ်လၢ ပှၤဃုအတၢ်ကမၣ် တဘၣ်ဘၣ်အသိး.” (မး ၁၀:၁၆) ဒီးပထံၣ်ဘၣ်လၢ ဒ်သိး စီၤပီလူး ကဆဲးစံၣ်တဲၤတဲလီၤဘၣ်တၢ် လၢတၢ်လီၢ်အဂၤအဂီၢ် အမၤထွဲဝဲ ယ့ၣ်ၡူးအတၢ်ဟ့ၣ်ကူၣ်အံၤဂ့ၤဂ့ၤ. စီၤပီလူးန့ၣ် အအိၣ်ဒီး တၢ်သးဒူ ဘၣ်ဆၣ် အအိၣ်ဒီး တၢ်ပလီၢ်သးစ့ၢ်ကီး. အဃိ ခရံာ်ဖိလၢ ဆၢကတီၢ်ခဲအံၤစ့ၢ်ကီး ကွၢ်လိ စီၤပီလူးအဒိအတဲာ် ကသ့ဒ်လဲၣ်.
၁၄ မုၢ်မဆါတနံၤအံၤ ခရံာ်ဖိလၢအဂၤတဖၣ် အတၢ်ဘူၣ်တၢ်ဘါခိၣ်နၢ်အါဂၤန့ၣ် ဆီၣ်ထွဲဝဲ ပှၤမၤတၢထီၣ်တၢလီၤတၢ်တဖၣ် ဒ်သိးကထီဒါဝဲ ယဟိဝၤပှၤအုၣ်အသးတဖၣ်. ပထံၣ်ဘၣ်လၢ တၢ်ဘူၣ်တၢ်ဘါခိၣ်နၢ် အါမးန့ၣ် ပာ်ဒ့ၣ်ပာ်ကမၣ်ဝဲ ယဟိဝၤပှၤအုၣ်အသးတဖၣ် ဒီးတဲဝဲလၢ အဝဲသ့ၣ်အတၢ်ဖံးတၢ်မၤန့ၣ် ထီဒါပဒိၣ် ဒီးတဲဝဲလၢ ယဟိဝၤပှၤအုၣ်အသးန့ၣ် တဆီၣ်ထွဲအထံအကီၢ်ဘၣ်. အဝဲသ့ၣ်တၢၣ်ဝဲပဒိၣ်ဒ်အံၤ ဒ်သိးပဒိၣ်ပပှၢ်တဖၣ် ကမၤအၢမၤနး ယဟိဝၤပှၤအုၣ်သးတဖၣ်အဂီၢ်. ဒ်တၢ်မၢဖိအစိၤအသိး ပှၤထီဒါတၢ်တဖၣ်အံၤ မၤဝဲဒ်န့ၣ် ခီဖျိလၢ အဝဲသ့ၣ်သးက့ၣ်ပှၤအဃိ. ဒီးဖဲပလဲၤစံၣ်တဲၤတဲလီၤတၢ်အခါ အဝဲသ့ၣ် မ့ၢ်သးပှံၢ်ထီၣ်ပှၤ ဒီးမ့ၢ်မၤကီမၤခဲပှၤ ဘၣ်ဆၣ် ဒ်ပမ့ၢ်ခရံာ်ဖိ အမ့ၢ်အတီအသိး ပတမၤဆၢက့ၤ အဝဲသ့ၣ်ဘၣ်. ပကျဲးစၢး ဟးဆှဲးအဝဲသ့ၣ် ဒီးဖဲတၢ်အိၣ်သး ခုၣ်လီၤက့ၤအခါမၣ် ပဟဲက့ၤစံၣ်တဲၤတဲလီၤတၢ်လၢ တၢ်လီၢ်ဖဲန့ၣ်.
အဝဲသ့ၣ်န့ၣ် “အတၢ်ပာ်သူၣ်ပာ်သး ဂ့ၤ” (မၤတၢ် ၁၇:၁၀-၁၅)
၁၅. ပှၤဘ့းရံၤဖိတဖၣ် နၢ်ဟူဘၣ် တၢ်သးခုကစီၣ် ဝံၤဒီး အဝဲသ့ၣ်မၤဝဲဒ်လဲၣ်.
၁၅ ဒ်သိးစီၤပီလူး ဒီးစီၤစံလၤ အသးသမူ ကပူၤဖျဲးအဂီၢ် ဒီပုၢ်ဝဲၢ်မုၣ်ခွါတဖၣ် ဆှၢဖျိးအဝဲသ့ၣ်လၢ ဝ့ၢ်ဘ့းရံၤ လၢအယံၤဝဲ အမံးလာ် ၄၀ (၆၅ ကံလိမံထၢၣ်). ဖဲအဝဲသ့ၣ်လဲၤတုၤ ဖဲန့ၣ်အခါ စီၤပီလူးလဲၤနုာ်လီၤဝဲလၢ ဘူၣ်ဘျီၣ်ပူၤ ဒီးစံၣ်တဲၤတဲလီၤဝဲ ပှၤအိၣ်လၢဘူၣ်ဘျီၣ်ပူၤ. ဒီးဖဲန့ၣ် စီၤပီလူး ထံၣ်ဘၣ်ဝဲ ပှၤလၢအဘၣ်သး နၢ်ဟူ တၢ်သးခုကစီၣ်တဖၣ် အဃိ အသးခုဒိၣ်မး. ဒီးစီၤလူၤကၣ် ကွဲးဖျါထီၣ်ဝဲလၢ ပှၤယူဒၤဖိ လၢအအိၣ်လၢ ဝ့ၢ်ဘ့းရံၤအပူၤန့ၣ် “အတၢ်ပာ်သူၣ်ပာ်သး ဂ့ၤဒိၣ်န့ၢ်ဒံး ပှၤသ့းစၤလနံဖိလီၤ. အဝဲသ့ၣ်တူၢ်လိာ် ကစၢ်ယွၤ အကလုၢ်ကထါလၢ တၢ်သးဆူၣ်အပူၤ ဒီးတနံၤဘၣ်တနံၤန့ၣ် အဝဲသ့ၣ်ဃုကွၢ်ဝဲ တၢ်ကွဲးအသးတဖၣ် လီၤတံၢ်လီၤဆဲး ဒ်သိး ကသ့ၣ်ညါဝဲ တၢ်လၢအဝဲသ့ၣ် နၢ်ဟူဝဲတဖၣ်န့ၣ် မ့ၢ်အဘၣ်ဧါ တဘၣ်ဧါလီၤ.” (မၤတၢ် ၁၇:၁၀, ၁၁) တၢ်ကတိၤအံၤ တအဲၣ်ဒိးတဲဝဲလၢ ပှၤသ့းစၤလနံဖိတဖၣ် အတၢ်ပာ်သူၣ်ပာ်သး တအိၣ်ဒ်အံၤ ကိးဂၤဒဲးဘၣ်. ဘၣ်မနုၤအဃိ ပတဲဒ်န့ၣ်လဲၣ်. လၢခံ စီၤပီလူး ကွဲးန့ၢ်က့ၤ ပှၤသ့းစၤလနံဖိလၢ “ပစံးဘျုး ကစၢ်ယွၤထီဘိလီၤ. ဖဲသုဒိးန့ၢ်ဘၣ် ကစၢ်ယွၤ အကလုၢ်ကထါလၢ သုနၢ်ဟူဘၣ်အီၤလၢ ပအိၣ်အခါ သုတူၢ်လိာ်အီၤ ဒ်တၢ်လၢအမ့ၢ် တၢ်အနီၢ်ကီၢ်အသိး လၢအမ့ၢ် ယွၤအကလုၢ်ကထါ ဒီးတမ့ၢ်ဒ် ပှၤဟီၣ်ခိၣ်ဖိ အတၢ်ကတိၤဘၣ်. ကစၢ်ယွၤ အကလုၢ်ကထါအံၤ မၤတၢ်လၢသုဝဲလၢ အမ့ၢ်ပှၤစူၢ်က့ၤနာ်က့ၤတၢ်တဖၣ် အပူၤစ့ၢ်ကီး.” (၁ သ့း ၂:၁၃) ပှၤယူဒၤဖိလၢ အအိၣ်လၢ ဝ့ၢ်ဘ့းရံၤအပူၤန့ၣ် အတၢ်ပာ်သူၣ်ပာ်သး ဂ့ၤမး. ဘၣ်မနုၤအဃိလဲၣ်.
၁၆. ဘၣ်မနုၤအဃိ စီၤလူၤကၣ် တဲဝဲလၢ ပှၤဘ့းရံၤဖိတဖၣ် “အတၢ်ပာ်သူၣ်ပာ်သး ဂ့ၤ” လဲၣ်.
၁၆ ပှၤဘ့းရံၤဖိတဖၣ် နၢ်ဟူဘၣ် တၢ်ကစီၣ်အသီလၢ စီၤပီလူးအအိၣ် သနာ်က့ အဝဲသ့ၣ်နာ်ဝဲ, အဝဲသ့ၣ် တထီဒါတၢ် ဒီးပာ်ဒ့ၣ်ပာ်ကမၣ် စီၤပီလူးဘၣ်. အဆိကတၢၢ် တၢ်လၢစီၤပီလူးတဲဝဲန့ၣ် အဝဲသ့ၣ်ဒိကနၣ်ဝဲ လီၤတံၢ်လီၤဆဲး. ဝံၤဒီး တၢ်လၢအနၢ်ဟူဘၣ်ဝဲတဖၣ် မ့ၢ်အဘၣ်ဧါ တဘၣ်ဧါန့ၣ် အဝဲသ့ၣ်ဃုကွၢ်ဝဲ တၢ်ကွဲးအသးတဖၣ် လီၤတံၢ်လီၤဆဲး. တကးဒံးဘၣ် အဝဲသ့ၣ်မၤလိကစၢ်ယွၤ အကလုၢ်ကထါန့ၣ် တမ့ၢ်ထဲမုၢ်အိၣ်ဘှံးနံၤဘၣ် ဒီးအဝဲသ့ၣ်မၤလိဝဲ ကိးနံၤဒဲးညါ. အဃိ အဝဲသ့ၣ်တူၢ်လိာ်ဝဲ ကစၢ်ယွၤအကလုၢ်ကထါလၢ “တၢ်သးဆူၣ်အပူၤ.” တကးဒံးဘၣ် ဖဲအဝဲသ့ၣ် နၢ်ပၢၢ်ထီၣ်ဝဲ တၢ်မ့ၢ်တၢ်တီအံၤအခါ အဝဲသ့ၣ် ပာ်ဖျါထီၣ်တၢ်ဆီၣ်လီၤသး ဒီးအိၣ်မူမၤထွဲဝဲအဃိ အဝဲသ့ၣ် “အါဂၤကဲထီၣ် ပှၤလၢအစူၢ်က့ၤနာ်က့ၤတၢ်.” (မၤတၢ် ၁၇:၁၂) အဃိ စီၤလူၤကၣ် တဲဝဲလၢ ပှၤဘ့းရံၤဖိတဖၣ် “အတၢ်ပာ်သူၣ်ပာ်သး ဂ့ၤ” န့ၣ်ဖၣ်ဘၣ်ညါ.
၁၇. ဘၣ်မနုၤအဃိ ပကဘၣ်ကွၢ်လိ ပှၤဘ့းရံၤဖိ အဒိအတဲာ်လဲၣ် ဒီးပအိၣ်လၢ တၢ်မ့ၢ်တၢ်တီအပူၤ မ့ၢ်ယံာ်လံသနာ်က့ ဘၣ်မနုၤအဃိ ပကဘၣ်ဆဲးကွၢ်လိ အဝဲသ့ၣ်ဒံးလဲၣ်.
၁၇ ပှၤဘ့းရံၤဖိတဖၣ်န့ၣ် အတၢ်ပာ်သူၣ်ပာ်သးဂ့ၤမး ဒီးတူၢ်လိာ်ဝဲတၢ်သးခုကစီၣ် ဒီးလၢတၢ်ဃုသ့ၣ်ညါ ကစၢ်ယွၤ အကလုၢ်ကထါ တကပၤစ့ၢ်ကီး အဝဲသ့ၣ်န့ၣ် အဒိအတဲာ်ဂ့ၤမး. ကစၢ်ယွၤ ပာ်ဖျါထီၣ် အဝဲသ့ၣ်အဂ့ၢ်လၢ လံာ်စီဆှံအပူၤန့ၣ် အဝဲသ့ၣ်တသ့ၣ်ညါဝဲဘၣ်. ပှၤဘ့းရံၤဖိတဖၣ် ဃုသ့ၣ်ညါ ကစၢ်ယွၤ အကလုၢ်ကထါ ဒ်စီၤပီလူး ဘၣ်သးဝဲအသိး ဒီးယဟိဝၤယွၤ ဘၣ်သးဝဲလၢ အဝဲသ့ၣ်ကမၤဝဲ ဒ်န့ၣ်စ့ၢ်ကီး. ပဝဲစ့ၢ်ကီး ခီဖျိလၢ ပအဲၣ်ဒိးမၤစၢၤပှၤဂၤ ဒ်သိးအဝဲသ့ၣ် ကဒိးသန့ၤထီၣ် အတၢ်နာ်လၢ ကစၢ်ယွၤ အကလုၢ်ကထါအဃိ ပဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဃုသ့ၣ်ညါလံာ်စီဆှံ လီၤတံၢ်လီၤဆဲး. တကးဒံးဘၣ် ပအိၣ်လၢ တၢ်မ့ၢ်တၢ်တီအပူၤ မ့ၢ်ယံာ်လံသနာ်က့ ပကဘၣ်ဆဲးအိၣ်ဒီး တၢ်ပာ်သူၣ်ပာ်သးလၢအဂ့ၤ ဒ်သိးဒီး ပှၤဘ့းရံၤဖိဒံး. ပကဘၣ် သးဆူၣ်လၢ ပကတူၢ်လိာ် ယဟိဝၤယွၤ အတၢ်သိၣ်လိ ဒီးမၤထွဲအီၤတဘျီဃီ. ပမ့ၢ်မၤဒ်န့ၣ်န့ၣ် ပပျဲလၢ ယဟိဝၤယွၤ ကဘှီဘၣ်ထီၣ်ပှၤ ဒီးသိၣ်လိပှၤ ဒ်အတၢ်ဘၣ်သး အိၣ်ဝဲအသိး. (ၡါ ၆၄:၈) တကးဒံးဘၣ် ယဟိဝၤယွၤ သူပှၤကသ့အါထီၣ် ဒီးပကမၤသးခုအသးနီၢ်ကီၢ်.
၁၈, ၁၉. (က) ဘၣ်မနုၤအဃိ စီၤပီလူး ဟးထီၣ်လၢ ဝ့ၢ်ဘ့းရံၤအပူၤလဲၣ်. အဆဲးမၤဒံးဝဲ မနုၤလဲၣ် ဒီးပကွၢ်လိအီၤ ကသ့ဒ်လဲၣ်. (ခ) စီၤပီလူး လဲၤစံၣ်တဲၤတဲလီၤတၢ်ဖဲလဲၣ် ဒီးအကဘၣ် စံၣ်တဲၤတဲလီၤဝဲ မတဂၤတဖၣ်လဲၣ်.
၁၈ စီၤပီလူး တအိၣ်လၢ ဝ့ၢ်ဘ့းရံၤအပူၤ ယံာ်ယံာ်ဘၣ်. လံာ်စီဆှံတဲဝဲလၢ “ဖဲပှၤယူဒၤဖိတဖၣ်လၢ အအိၣ်လၢ ဝ့ၢ်သ့းစၤလနံန့ၣ် သ့ၣ်ညါဝဲလၢ စီၤပီလူး စံၣ်တဲၤတဲလီၤ ယွၤအကလုၢ်ကထါလၢ ဝ့ၢ်ဘ့းရံၤအခါ အဝဲသ့ၣ် လဲၤဖဲန့ၣ် ဒ်သိး ကထိၣ်ဟူးထိၣ်ဂဲၤထီၣ် ပှၤဂီၢ်မုၢ်တဖၣ်လၢ ကထီဒါတၢ်အဂီၢ်လီၤ. အဃိ ဒီပုၢ်ဝဲၢ်ခွါတဖၣ် ဆှၢလီၤ စီၤပီလူးလၢ ပီၣ်လဲၣ်နံၤ တဘျီဃီလီၤ. မ့မ့ၢ် စီၤစံလၤ ဒီးစီၤတံၤမသ့းန့ၣ် အိၣ်တ့ၢ်ဝဲဖဲန့ၣ်လီၤ. ဒီးပှၤလၢအလဲၤတၢ်ဒီး စီၤပီလူးန့ၣ် လဲၤဆှၢအီၤတုၤလၢ ဝ့ၢ်အၤသ့ၣ်လီၤ. ဒီးစီၤပီလူးတဲဘၣ် အဝဲသ့ၣ်လၢ အဝဲသ့ၣ် ကဘၣ်မၢစီၤစံလၤ ဒီးစီၤတံၤမသ့း ဟဲလၢအအိၣ်လၢ အဆိအချ့လီၤ. ဝံၤဒီး အဝဲသ့ၣ်က့ၤဝဲလီၤ.” (မၤတၢ် ၁၇:၁၃-၁၅) ပှၤထီဒါတၢ်ဖိတဖၣ်အံၤ တဟ့ၣ်အၡူဘၣ် ဒီးအဝဲသ့ၣ် ပာ်လီၤသးလၢ ကဆဲးမၤကီမၤခဲ ဒီပုၢ်ဝဲၢ်တဖၣ်အံၤ သပှၢ်တၢၢ်. အဝဲသ့ၣ် လဲၤဒုးအိၣ်ထီၣ် တၢ်ကီတၢ်ခဲ လၢစီၤပီလူးအဂီၢ် ဖဲဝ့ၢ်သ့းစၤလနံအပူၤ တကးဒံးဘၣ် အဝဲသ့ၣ် လဲၤစ့ၢ်ကီးလၢ ဝ့ၢ်ဘ့းရံၤ ဒီးမၤတၢထီၣ်တၢလီၤတၢ် ဘၣ်ဆၣ် အဝဲသ့ၣ် အတၢ်မၤန့ၣ် တကဲထီၣ်ဘၣ်. စီၤပီလူး သ့ၣ်ညါဝဲလၢ အတၢ်စံၣ်တဲၤတဲလီၤတၢ် အလီၢ်ကဝီၤန့ၣ် ဖးလဲၢ်ညါအဃိ အလဲၤစံၣ်တဲၤတဲလီၤတၢ်လၢ တၢ်လီၢ်အဂၤတတီၤ. ဆၢကတီၢ်ခဲအံၤစ့ၢ်ကီး ပှၤထီဒါတၢ်တဖၣ် ကျဲးစၢး မၤပတုာ်ဝဲ ပတၢ်စံၣ်တဲၤတဲလီၤတၢ်မၤ ဘၣ်ဆၣ် ပတဘၣ်ပျဲလၢ အဝဲသ့ၣ်အတၢ်မၤ ကကဲထီၣ် နီတစဲးဘၣ်.
၁၉ စီၤပီလူး စံၣ်တဲၤတဲလီၤဝဲ ပှၤယူဒၤဖိ လၢအအိၣ်လၢ ဝ့ၢ်သ့းစၤလနံ ဒီးဝ့ၢ်ဘ့းရံၤ လီၤတံၢ်လီၤဆဲး ဝံၤအလီၢ်ခံ အသ့ၣ်ညါဘၣ်ဝဲလၢ တၢ်ဂ့ၢ်လၢအရ့ဒိၣ်န့ၣ် မ့ၢ်ဝဲ အကဘၣ် စံၣ်တဲၤတဲလီၤတၢ်လၢ တၢ်သးဒူ ဒီးမၤစၢၤပှၤဂၤဒ်သိး အဝဲသ့ၣ် ကနၢ်ပၢၢ်ထီၣ် တၢ်ကွဲးအသးတဖၣ် လီၤတံၢ်လီၤဆဲး. ဒီးပဝဲစ့ၢ်ကီး ခဲအံၤ ပသ့ၣ်ညါထီၣ်ဘၣ် တၢ်ဂ့ၢ်လၢအရ့ဒိၣ်တခါအံၤလံ. သနာ်က့ ခဲအံၤန့ၣ် စီၤပီလူး ကဘၣ်စံၣ်တဲၤတဲလီၤတၢ်လၢ ပှၤကလုာ်အဂၤတဖၣ် လၢအအိၣ်လၢ ဝ့ၢ်အၤသ့ၣ်အပူၤ. မ့ၢ်အဝဲသ့ၣ် ကတူၢ်လိာ် တၢ်သးခုကစီၣ်ဧါ. ပကတဲသကိး တၢ်စံးဆၢ လၢတၢ်မၤလိလၢခံတခါ.
a ပှၤကူၣ်ဘၣ်ကူၣ်သ့တဂၤ တဲဝဲလၢ ဖဲန့ၣ်အဆၢကတီၢ်န့ၣ် ရိမ့ၤဘီမုၢ်စီၤပၤ ဒုးအိၣ်ထီၣ်ဝဲ တၢ်သိၣ်တၢ်သီတခါလၢ ပှၤတဂၤဂၤ မ့ၢ်တဲဆိပာ်စၢၤဝဲ မ့တမ့ၢ် ရၤလီၤဝဲတၢ်ကစီၣ်လၢ စီၤပၤအသီတဂၤ မ့တမ့ၢ် ဘီမုၢ်အသီတဘ့ၣ်ဘ့ၣ် လၢအကထီဒါ မ့တမ့ၢ် ကစံၣ်ညီၣ်ဝဲ ရိမ့ၤဘီမုၢ်စီၤပၤ လၢအပၢတၢ်လၢ အဆၢကတီၢ်ဖဲန့ၣ်န့ၣ် ပှၤတဂၤအံၤ အကဘၣ်တၢ်စံၣ်ညီၣ်. အဃိ ဖျါလီၤဂာ်လၢ ပှၤလၢအထီဒါ စီၤပီလူးန့ၣ် အဝဲသ့ၣ်သူဝဲ တၢ်သိၣ်တၢ်သီတခါအံၤ ဒီးပာ်ဒ့ၣ်ပာ်ကမၣ် စီၤပီလူးလၢ အမၤကမၣ် တၢ်သိၣ်တၢ်သီ တခါအံၤ. ကွၢ်တၢ်လွံၢ်နၢၣ် လၢအမ့ၢ် “ ကဲစၢ်တဖၣ် လၢလံာ်မၤတၢ်အပူၤ.”
