တၢ်မၤလိ ၂၂
အဝဲလဲၤခီဖျိတၢ်မၤကွၢ်တဖၣ်လၢ တၢ်သးတီအပူၤ
၁, ၂. ဖဲယ့ၣ်ၡူးစံၣ်တဲၤတဲလီၤတၢ်လၢ ဝ့ၢ်ကပ့းရနီၣ်အခါန့ၣ် စီၤပ့းတရူးမုၢ်လၢ်ဝဲဒ်လဲၣ်, ဘၣ်ဆၣ်တၢ်မၤအသးဒ်လဲၣ်.
ဘၣ်တဘျီန့ၣ် ယ့ၣ်ၡူးစံၣ်တဲၤတဲလီၤတၢ်လၢဘူၣ်ဘျီၣ်လၢ ဝ့ၢ်ကပ့းရနီၣ်အပူၤလီၤ. ဒီးစီၤပ့းတရူး ကွၢ်တရံးဝဲပှၤဂီၢ်မုၢ်လၢ အဒိကနၣ်တၢ်တဖၣ်န့ၣ်လီၤ. စီၤပ့းတရူးအဟံၣ်အိၣ်ဝဲလၢ ဝ့ၢ်တဖျၢၣ်အံၤအပူၤဒီး အဝဲမၤအီၣ်ညၣ်ဖဲအံၤလီၤ. တကးဒံးဘၣ် ဖဲအံၤန့ၣ် အတံၤသကိး, အဘူးအတံၢ် ဒီးပှၤလၢအမၤသကိးတၢ်ဒီးအီၤတဖၣ် အိၣ်ဝဲအါဂၤန့ၣ်လီၤ. လၢတၢ်န့ၣ်အဃိ စီၤပ့းတရူးကမုၢ်လၢ်ဝဲသပှၢ်ကတၢၢ်လၢ ပှၤဝ့ၢ်ဖိတဖၣ်အံၤ ကတူၢ်လိာ်ယ့ၣ်ၡူး ဒီးကသးအိၣ်မၤလိ ယွၤအဘီအမုၢ်အဂ့ၢ် ဒ်အဝဲတူၢ်လိာ်ဝဲအသိးလီၤ. ဘၣ်ဆၣ် အတၢ်မုၢ်လၢ်အခီၣ်တပျာ်ဝဲလီၤ.
၂ ပှၤအါဂၤ ဒိကနၣ်ဝဲတမုာ်လၢၤဘၣ်. ဒီးတၢ်ကဒူးကဒ့ၣ်သီၣ်ထီၣ်ဝဲလံ. ဘၣ်ဆၣ် တၢ်လၢအမၤတံာ်တာ်စီၤပ့းတရူးအသး အဒိၣ်ကတၢၢ်န့ၣ် မ့ၢ်ဝဲယ့ၣ်ၡူးအပျဲၢ်အဘီၣ်တနီၤ အတၢ်ပာ်သူၣ်ပာ်သးန့ၣ်လီၤ. ဖျါလၢအဝဲသ့ၣ် တအိၣ်ဒီးတၢ်သူၣ်ဖှံသးညီလၢၤဘၣ်. တကးဒံးဘၣ် အဝဲသ့ၣ်အမဲာ်ထီၣ်လါလံ. ဒီးပှၤတနီၤ တဲဝဲလၢယ့ၣ်ၡူးအတၢ်ကတိၤတဖၣ်န့ၣ် တလၢကွံာ်အခၢးလံ. အဝဲသ့ၣ်ဟးထီၣ်ဝဲလၢ ဘူၣ်ဘျီၣ်ပူၤ ဒီးတပိာ်ယ့ၣ်ၡူးအခံလၢၤဘၣ်.—ဖး ယိၤဟၣ် ၆:၆၀, ၆၆ တက့ၢ်.
၃. စီၤပ့းတရူးအတၢ်နာ်မၤစၢၤအီၤဒ်လဲၣ်.
၃ တၢ်အိၣ်အသးတဖၣ်အံၤ ကဲထီၣ်ဝဲတၢ်မၤကွၢ်လၢ စီၤပ့းတရူးဒီး တၢ်မၢဖိအဂၤတဖၣ်အဂီၢ်လီၤ. တၢ်လၢယ့ၣ်ၡူးတဲဝဲတဖၣ်န့ၣ် စီၤပ့းတရူးတနၢ်ပၢၢ်ဝဲလီၤတံၢ်လီၤဆဲးဘၣ်. ဘၣ်ဆၣ် ဘၣ်မနုၤအဃိ ယ့ၣ်ၡူးအတၢ်ကတိၤတဖၣ်အံၤ မၤသးထီၣ်ပှၤတနီၤလဲၣ်န့ၣ် စီၤပ့းတရူးနၢ်ပၢၢ်ဝဲလံ. စီၤပ့းတရူးကမၤဝဲဒ်လဲၣ်. မ့ၢ်အဝဲကတီဒီးအကစၢ်ယ့ၣ်ၡူးဒံးဧါ. စီၤပ့းတရူးအတၢ်သးတီ ဘၣ်တၢ်မၤကွၢ်အီၤ တဘျီညါအံၤန့ၣ် တမ့ၢ်တၢ်လၢအဆိကတၢၢ်တဘျီဘၣ်, ဒီးတမ့ၢ်အလီၢ်ခံကတၢၢ်တဘျီစ့ၢ်ကီးဘၣ်. စီၤပ့းတရူးအတၢ်နာ်မၤစၢၤအီၤဒ်သိး အဝဲကလဲၤခီဖျိတၢ်မၤကွၢ်တဖၣ်လၢ တၢ်သးတီအပူၤဒ်လဲၣ်န့ၣ် ပကကွၢ်သကိးလီၤ.
အိၣ်ဒီးတၢ်သးတီဖဲပှၤဂၤအသးတတီဘၣ်အခါ
၄, ၅. တၢ်လၢယ့ၣ်ၡူးတဲဝဲဒီး မၤဝဲတဖၣ်န့ၣ် ဒုးကမၢကမၣ် ပှၤဂၤတဖၣ်ဒ်လဲၣ်.
၄ တၢ်လၢယ့ၣ်ၡူးတဲဝဲဒီးမၤဝဲ တဘျီဝံၤတဘျီန့ၣ် တလဲၤအသးဒ်ပှၤအါဂၤ မုၢ်လၢ်ဝဲအသိးဘၣ်. ဒီးစီၤပ့းတရူးစ့ၢ်ကီး ကမၢကမၣ်ဝဲတဘျုးဘျီညါ. အဒိ ပူၤကွံာ်တသီန့ၣ် ယ့ၣ်ၡူးမၤဝဲတၢ်လီၤလးခီဖျိလၢ အဝဲဒုးအီၣ်ဒုးအီဝဲ ပှၤလၢအကထိတဖၣ်လီၤ. ဖဲန့ၣ်အဆၢကတီၢ် အဝဲသ့ၣ်အဲၣ်ဒိးဒုးကဲထီၣ်အီၤလၢ စီၤပၤန့ၣ်လီၤ. ဘၣ်ဆၣ် ခီဖျိလၢ ယ့ၣ်ၡူးဟးထီၣ်ကွံာ်ဝဲလၢ ပှၤဂီၢ်မုၢ်အံၤအကျါအဃိ အဝဲသ့ၣ်ကမၢကမၣ်ဝဲလီၤ. ယ့ၣ်ၡူးမၢအပျဲၢ်အဘီၣ်တဖၣ် ဒိးထီၣ်ချံ ဒီးလဲၤဝဲဆူဝ့ၢ်ကပ့းရနီၣ်န့ၣ်လီၤ. ဖဲယ့ၣ်ၡူးအပျဲၢ်အဘီၣ်တဖၣ်အံၤ လဲၤတၢ်လၢ ပီၣ်လဲၣ်ကၤလံၤလါလၢမုၢ်နၤခီန့ၣ် ယ့ၣ်ၡူးဒုးကမၢကမၣ်အဝဲသ့ၣ် ခီဖျိလၢ အဝဲဟးဝဲလၢထံဖံးခိၣ်လီၤ. တကးဒံးဘၣ် အဝဲဟ့ၣ်စီၤပ့းတရူးတၢ်မၤလိလၢ အရ့ဒိၣ်တခါန့ၣ်လီၤ.
၅ လၢဂီၤခီန့ၣ် ယ့ၣ်ၡူးဒီးအပျဲၢ်အဘီၣ်တဖၣ်ထံၣ်ဘၣ်ဝဲလၢ ပှၤဂီၢ်မုၢ်တဖၣ်ဟဲလူၤပိာ်အဝဲသ့ၣ်အခံလီၤ. ဘၣ်ဆၣ် တမ့ၢ်လၢအဝဲသ့ၣ် သၣ်ဝံၤနီၢ်သးတၢ်အီၣ်တၢ်အီအဃိဘၣ်. အဝဲသ့ၣ်အဲၣ်ဒိးဝဲလၢ ယ့ၣ်ၡူးကမၤဝဲတၢ်လီၤလးလၢ အသီတဘျီဒီးဒုးအီၣ်ဒုးအီအဝဲသ့ၣ်န့ၣ်လီၤ. ယ့ၣ်ၡူးသိၣ်ပှၤဂီၢ်မုၢ်တဖၣ်အံၤ ခီဖျိလၢအဝဲသ့ၣ်အသးစၢၢ်ဆၢထဲ တၢ်လၢနီၢ်ခိတခီအဃိလီၤ. (ယိၤဟၣ် ၆:၂၅-၂၇) ယ့ၣ်ၡူးဆဲးတဲတၢ်ဂ့ၢ်အံၤ ဖဲဘူၣ်ဘျီၣ်လၢ ဝ့ၢ်ကပ့းရနီၣ်အပူၤ ဒီးပာ်ဖျါထီၣ်ဝဲ တၢ်မ့ၢ်တၢ်တီအရ့ဒိၣ်တခါလၢ အဒုးကမၢကမၣ်ပှၤလၢ အဒိကနၣ်တၢ်တဖၣ်န့ၣ်လီၤ.
၆. ယ့ၣ်ၡူးဟ့ၣ်တၢ်အဒိဒ်လဲၣ်, ဒီးပှၤလၢအဒိကနၣ်တၢ်တဖၣ်န့ၣ် မၤဆၢဝဲဒ်လဲၣ်.
၆ ယ့ၣ်ၡူးတအဲၣ်ဒိးလၢ ပှၤကဟဲဆူအအိၣ် ခီဖျိလၢ အဝဲဒုးအီၣ်ဒုးအီအဝဲသ့ၣ် သ့ဝဲအဃိဘၣ်. ယ့ၣ်ၡူးအဲၣ်ဒိးလၢ အဝဲသ့ၣ်ကသ့ၣ်ညါဘၣ်ဝဲလၢ ကစၢ်ယွၤကဟ့ၣ်အီၤ တၢ်မူအထူအယိာ်ထဲလၢ အဝဲသ့ၣ်မ့ၢ်နာ် ယ့ၣ်ၡူးအတၢ်လုၢ်ထီၣ်အသးဒီး ပိာ်အခံန့ၣ်လီၤ. လၢတၢ်န့ၣ်အဃိ ယ့ၣ်ၡူးဟ့ၣ်ဝဲတၢ်အဒိတခါ ခီဖျိအဝဲထိၣ်သတြီၤလီၤအသးလၢ ကိၣ်မၤနၤလၢအမ့ၢ် ကိၣ်လၢအဟဲလီၤလၢမူခိၣ် ဖဲစီၤမိၤၡ့အစိၤန့ၣ်လီၤ. ဖဲပှၤတနီၤနီၤ ဂ့ၢ်လိာ်ယ့ၣ်ၡူးအတၢ်ကတိၤ အဆၢကတီၢ်န့ၣ် အဝဲသူဝဲတၢ်အဒိဒီးတဲဖျါထီၣ်ဝဲလၢ ပှၤမ့ၢ်အဲၣ်ဒိးဒိးန့ၢ်ဘၣ် တၢ်မူအထူအယိာ်န့ၣ် အဝဲသ့ၣ်ကဘၣ်အီၣ်အညၣ်ဒီး အီအသွံၣ်န့ၣ်လီၤ. ဖဲန့ၣ်အဆၢကတီၢ်အဝဲသ့ၣ် အသးပှံၢ်ထီၣ်ဒီးတဲဝဲလၢ “တၢ်သိၣ်လိသီလိအံၤ တလၢကွံာ်အခၢးလီၤ. မ့ၢ်မတၤတူၢ်လိာ်အီၤကသ့တဂၤလဲၣ်.” ဒီးယ့ၣ်ၡူးအပျဲၢ်အဘီၣ်အါဂၤဒၣ်လဲာ် တအဲၣ်ဒိးပိာ်အခံလၢၤဘၣ်. *—ယိၤဟၣ် ၆:၄၈-၆၀, ၆၆, ခ့ခါစှီၤကျိာ်.
၇, ၈. (က) ဘၣ်ဃးဒီး ယ့ၣ်ၡူးအမူဒါန့ၣ် စီၤပ့းတရူးတနၢ်ပၢၢ်ဝဲ တၢ်မနုၤလဲၣ်. (ခ) ဖဲယ့ၣ်ၡူးသံကွၢ် အတၢ်မၢဖိတဖၣ်အခါ စီၤပ့းတရူးစံးဆၢက့ၤဝဲဒ်လဲၣ်.
၇ စီၤပ့းတရူးစ့ၢ်ကီး အခိၣ်နူာ်ဘံဘူထီၣ်ဝဲလံ. အဝဲကမၤဝဲဒ်လဲၣ်. ဒ်သိးကမၤလၢပှဲၤကစၢ်ယွၤ အတၢ်ဘၣ်သးအဂီၢ် ယ့ၣ်ၡူးကဘၣ်တူၢ်သံအသးန့ၣ် စီၤပ့းတရူးတနၢ်ပၢၢ်ဝဲဘၣ်. မ့ၢ်အဝဲကမၤဝဲဒ်သိး ယ့ၣ်ၡူးအပျဲၢ်အဘီၣ်တဖၣ်လၢ အကဒံကဒါဝဲဒီး ဒံဝ့ၤဒံဝီၤဒ် ဖ့လၢကလံၤကျါအသိးဧါ. လ့ၤတက့ၤ အဝဲတမၤဝဲဘၣ်. ဘၣ်မနုၤအဃိ စီၤပ့းတရူးန့ၣ် တဒ်သိးဒီးပှၤသ့ၣ်တဖၣ်အံၤလဲၣ်. အဝဲအိၣ်ဒီးတၢ်ဂ့ၤတၢ်ဝါ မနုၤတခါလဲၣ်.
၈ ယ့ၣ်ၡူးဃၣ်ဃီၤအသးဆူ အတၢ်မၢဖိတဖၣ်အအိၣ်ဒီးတဲဝဲလၢ– “သုကက့ၤကဒါက့ၤစ့ၢ်ကီးဧါ.” (ယိၤဟၣ် ၆:၆၇) တၢ်သံကွၢ်တဖျၢၣ်အံၤ ယ့ၣ်ၡူးသံကွၢ်ဝဲအတၢ်မၢဖိ ၁၂ ဂၤလၢာ်လီၤ. ဘၣ်ဆၣ် လၢအဝဲသ့ၣ်အကျါန့ၣ် စီၤပ့းတရူးစံးဆၢက့ၤအီၤလီၤ. ဘၣ်သ့ၣ်သ့ၣ် စီၤပ့းတရူး ကမ့ၢ်ပှၤလၢအသးပှၢ်န့ၢ်ဒံး အဝဲသ့ၣ်ခဲလၢာ်အဃိ အါဘျီန့ၣ် အဝဲတဲဆိတၢ်လၢ အဝဲသ့ၣ်အမဲာ်ညါလီၤ. ဒ်လဲၣ်ဂ့ၤဒ်လဲၣ်ဂ့ၤ အဝဲမ့ၢ်ပှၤလၢအတဲတၢ်ဒူဒူဒီး တပာ်ခူသူၣ် တၢ်အိၣ်လၢ အသးပူၤဘၣ်. စီၤပ့းတရူးအတၢ်စံးဆၢန့ၣ် လီၤစံးပတြၢၤဒီး ပတိၢ်နီၣ်အီၤညီဝဲလီၤ. အဝဲစံးဆၢယ့ၣ်ၡူးလၢ– “ကစၢ်ဧၢ, ပကလဲၤဆူမတၤတဂၤအအိၣ်လဲၣ်. တၢ်မူအထူအယိာ်အတၢ်ကတိၤန့ၣ် အိၣ်ဒီးနၤလီၤ.”—ယိၤဟၣ် ၆:၆၈.
၉. စီၤပ့းတရူးပာ်ဖျါထီၣ် အတၢ်သးတီဒီးယ့ၣ်ၡူး လၢကျဲဒ်လဲၣ်.
၉ စီၤပ့းတရူးအတၢ်ကတိၤန့ၣ် ထုးန့ၢ်နသးတမ့ၢ်ဘၣ်ဧါ. ခီဖျိလၢ စီၤပ့းတရူးအိၣ်ဒီး တၢ်နာ်ယ့ၣ်ၡူးအဃိ အသးတီဒီးအီၤလီၤ. တၢ်သးတီန့ၣ် မ့ၢ်တၢ်ဂ့ၤတၢ်ဝါလၢအလုၢ်ဒိၣ်ပှ့ၤဒိၣ်တခါန့ၣ်လီၤ. စီၤပ့းတရူးသ့ၣ်ညါဘၣ်ဝဲလၢ ယ့ၣ်ၡူးမ့ၢ်တၢ်အုၣ်က့ၤခီၣ်က့ၤကစၢ်ထဲတဂၤဧိၤ လၢယဟိဝၤယွၤဟ့ၣ်လီၤ ပှၤဟီၣ်ခိၣ်ဖိလီၤ. ဒီးအဝဲသ့ၣ်ညါစ့ၢ်ကီးဝဲလၢ ယ့ၣ်ၡူးမၤထူၣ်ဖျဲးပှၤသ့ ခီဖျိလၢအတၢ်သိၣ်လိ ဘၣ်ဃးဒီးယွၤအဘီအမုၢ်အဂ့ၢ်လီၤ. တကးဒံးဘၣ် စီၤပ့းတရူးသ့ၣ်ညါဝဲလၢ အဝဲမ့ၢ်တနၢ်ပၢၢ်တၢ်ဂ့ၢ်တနီၤနီၤဘၣ်ဆၣ် ဒ်သိးအဝဲကဒိးန့ၢ်ဘၣ် ယွၤအတၢ်ဘၣ်သးဒီး တၢ်မူအထူအယိာ်အဂီၢ်န့ၣ် ကျဲလၢအဂၤတအိၣ်ဝဲ နီတဘိဘၣ်. အဝဲကဘၣ်ဆဲးပိာ်ဝဲယ့ၣ်ၡူးအခံန့ၣ်လီၤ.
ယ့ၣ်ၡူးအတၢ်သိၣ်လိတဖၣ် မ့ၢ်တလဲၤအသးဒ် ပမုၢ်လၢ်တၢ်အသိး မ့တမ့ၢ် မ့ၢ်တဘၣ်ပသးန့ၣ် ပကဘၣ်အိၣ်ဒီးတၢ်သးတီလီၤ
၁၀. မုၢ်မဆါတနံၤညါအံၤ ပကွၢ်လိမၤဒိး စီၤပ့းတရူးအတၢ်သးတီကသ့ဒ်လဲၣ်.
၁၀ မ့ၢ်နတူၢ်ဘၣ်ဒ်န့ၣ်စ့ၢ်ကီးဧါ. လီၤသးအုးဒိၣ်မးလၢ မုၢ်မဆါတနံၤညါအံၤ ပှၤအါဂၤန့ၣ် စံးဝဲလၢအအဲၣ်ယ့ၣ်ၡူးဘၣ်ဆၣ် အဝဲသ့ၣ်တတီဒီးအီၤဘၣ်. ပမ့ၢ်အဲၣ်ဒိးတီဒီးယ့ၣ်ၡူးနီၢ်ကီၢ်န့ၣ် ဒ်စီၤပ့းတရူးအသိး ပကဘၣ်အဲၣ်ယ့ၣ်ၡူး အတၢ်သိၣ်လိတဖၣ်လီၤ. ပကဘၣ်ဃုသ့ၣ်ညါ နၢ်ပၢၢ်ထီၣ် ယ့ၣ်ၡူးအတၢ်သိၣ်လိတဖၣ်အံၤ ဒီးအိၣ်မူမၤထွဲအီၤလီၤ. တကးဒံးဘၣ် ယ့ၣ်ၡူးအတၢ်သိၣ်လိတဖၣ်န့ၣ် မ့မ့ၢ်တၢ်လၢအဒုးကမၢကမၣ်ပှၤမ့ၢ်ဂ့ၤ, တလီၤပလိာ်လိာ်အသး ဒီးပနီၢ်ကစၢ်အတၢ်ဘၣ်သးမ့ၢ်ဂ့ၤ မ့တမ့ၢ် ပမ့ၢ်တနၢ်ပၢၢ်အီၤလီၤတံၢ်လီၤဆဲးဒၣ်လဲာ် ပကဘၣ်မၤထွဲအီၤလီၤ. ပမ့ၢ်အိၣ်ဒီးတၢ်သးတီဒ်အံၤန့ၣ် ပဒိးန့ၢ်ဘၣ်တၢ်မူလီၤထူလီၤယိာ်သ့ဝဲလီၤ.—စံးထီၣ်ပတြၢၤ ၉၇:၁၀.
တူၢ်လိာ်တၢ်သိၣ်က့ၤသီက့ၤလၢ တၢ်သးတီအပူၤ
၁၁. ယ့ၣ်ၡူးလဲၤကိးဝဲအပျဲၢ်အဘီၣ်တဖၣ် လၢတၢ်လီၢ်ဖဲလဲၣ်.
၁၁ တၢ်မၤအသးတဖၣ်အံၤဝံၤအလီၢ်ခံ ယ့ၣ်ၡူးလဲၤကိးဝဲ အတၢ်မၢဖိတဖၣ်ဒီး အပျဲၢ်အဘီၣ်တနီၤ လၢတၢ်ဒ့ၣ်စၢၤယံၤ ဆူကလံၤစိးတခီန့ၣ်လီၤ. ပှၤမ့ၢ်ဟးလိၣ်ကွဲလၢ ပီၣ်လဲၣ်ကၤလံၤလါန့ၣ် တဘျီတခီၣ်အဝဲသ့ၣ်ထံၣ်စိဝဲ ကစၢၢ်ဃ့ရမိၣ်အဒီခိၣ် လၢဘၣ်တၢ်လုၢ်ဘၢအီၤလၢ မူခိၣ်ဖီန့ၣ်သ့ဝဲလီၤ. ဒီးကစၢၢ်ဃ့ရမိၣ်အိၣ်ဝဲလၢ ကီၢ်တၢ်စံးပာ်အကတၢၢ်လၢ ကလံၤစိးတခီလီၤ. ဖဲယ့ၣ်ၡူးဒီးအပျဲၢ်အဘီၣ်လဲၤထီၣ်ဝဲဆူ ဖံလံးပံၤကဲၤစါရံၤ အသဝီတဖၣ်အခါ အဝဲသ့ၣ်လဲၤဒံးယံာ်ဒံးဘူးထီၣ်ဒီး ကစၢၢ်ဃ့ရမိၣ်အဃိ ကစၢၢ်န့ၣ်ဖျါထီထီၣ်ထီထီၣ်ဝဲလီၤ. တၢ်လီၢ်ထီၣ်ထီအံၤ မ့ၢ်တၢ်လီၢ်လၢအဃံလၤဒိၣ်မး ဒီးပှၤအိၣ်ဖဲအံၤတဖၣ် ကွၢ်စိဝဲကီၢ်တၢ်စံးပာ်ကလံၤထံးတခီဖျါဝဲလီၤ. ဖဲန့ၣ်န့ၣ် ယ့ၣ်ၡူးသံကွၢ်အပျဲၢ်အဘီၣ်တဖၣ်လၢ တၢ်သံကွၢ်အရ့ဒိၣ်တခါလီၤ.
၁၂, ၁၃. (က) ဘၣ်မနုၤအဃိ ယ့ၣ်ၡူးသံကွၢ်ဝဲဘၣ်ဃးဒီး ပှၤဂီၢ်မုၢ်တဖၣ်အတၢ်ဆိကမိၣ်လဲၣ်. (ခ) ဖဲစီၤပ့းတရူးစံးဆၢက့ၤ ယ့ၣ်ၡူးအခါ အဝဲပာ်ဖျါထီၣ် အတၢ်နာ်ဒ်လဲၣ်.
၁၂ ယ့ၣ်ၡူးသံကွၢ်အဝဲသ့ၣ်လၢ “ပှၤဂီၢ်မုၢ်စံးဝဲလၢ ယမ့ၢ်မတၤတဂၤလဲၣ်.” ထံၣ်ကမှံကွၢ်လၢစီၤပ့တရူး ကွၢ်ဝဲယ့ၣ်ၡူးအမဲာ်သၣ်တီတီဒီး နၢ်ပၢၢ်ဝဲလၢအကစၢ်ယ့ၣ်ၡူးန့ၣ် အိၣ်ဒီးတၢ်အဲၣ်တၢ်ကွံဒီးတၢ်ကူၣ်သ့ လၢလၢပှဲၤပှဲၤန့ၣ်တက့ၢ်. ယ့ၣ်ၡူးအဲၣ်ဒိးသ့ၣ်ညါဝဲလၢ ပှၤဒိကနၣ်တၢ်ဖိတဖၣ် ဆိကမိၣ်အီၤလၢ အမ့ၢ်မတၤဂၤလဲၣ်န့ၣ်လီၤ. ဖဲယ့ၣ်ၡူးအပျဲၢ်အဘီၣ်တဖၣ် စံးဆၢက့ၤအီၤအဆၢကတီၢ်န့ၣ် အဝဲသ့ၣ်တဲဖျါထီၣ်ဝဲ ပှၤအါဂၤ အတၢ်ဆိကမိၣ်လၢအကမၣ်တဖၣ်န့ၣ်လီၤ. ဘၣ်ဆၣ် ယ့ၣ်ၡူးအဲၣ်ဒိးသ့ၣ်ညါဝဲ အါန့ၢ်အန့ၣ်လီၤ. မ့ၢ်အပျဲၢ်အဘီၣ်တဖၣ်အံၤ ဆိကမိၣ်ကမၣ်ဝဲဒ်န့ၣ်စ့ၢ်ကီးဧါ. ယ့ၣ်ၡူးသံကွၢ်ကဒီးအီၤလၢ “မ့မ့ၢ်သုဝဲသ့ၣ်အံၤ သုစံးလၢယမ့ၢ်မတၤတဂၤလဲၣ်.”—လူၤကၣ် ၉:၁၈-၂၀.
၁၃ တဘျီညါအံၤစ့ၢ်ကီး စီၤပ့းတရူးစံးဆၢဝဲချ့ချ့လီၤ. ယ့ၣ်ၡူးအပျဲၢ်အဘီၣ်တဖၣ် ကဆိကမိၣ်ဝဲထဲလၢအသးပူၤဘၣ်ဆၣ် စီၤပ့းတရူးတဲဝဲဒူဒူလၢ “နဲဒၣ်အံၤ, နမ့ၢ်ခရံာ်, ယွၤလၢအမူဝဲတဂၤ အဖိခွါလီၤ.” ထံၣ်ကမှံကွၢ်လၢ ယ့ၣ်ၡူးနံၤကမှံထီၣ်ဝဲဒီး စံးပတြၢၤဝဲစီၤပ့းတရူးန့ၣ်တက့ၢ်. ဒီးယ့ၣ်ၡူးဒုးသ့ၣ်နီၣ်ထီၣ်က့ၤ စီၤပ့းတရူးလၢယဟိဝၤယွၤ ပာ်ဖျါထီၣ်ဝဲတၢ်မ့ၢ်တၢ်တီတခါအံၤ ဆူပှၤလၢအအိၣ်ဒီးတၢ်နာ်နီၢ်နီၢ်န့ၣ်လီၤ. လၢတၢ်န့ၣ်အဃိ စီၤပ့းတရူးနၢ်ပၢၢ်ထီၣ်ဝဲ တၢ်မ့ၢ်တၢ်တီ လၢအရ့ဒိၣ်ကတၢၢ်တခါအံၤလီၤ. အဝဲနၢ်ပၢၢ်ဝဲလၢ ယ့ၣ်ၡူးန့ၣ်မ့ၢ်မ့းၡံအၤ မ့တမ့ၢ် ခရံာ်လၢဘၣ်တၢ်စံးပာ်အီၤဖးယံာ်လံန့ၣ်လီၤ.—ဖး မးသဲ ၁၆:၁၆, ၁၇ တက့ၢ်.
၁၄. ယ့ၣ်ၡူးဟ့ၣ်လီၤဝဲ စီၤပ့းတရူးမူဒါလၢ အရ့ဒိၣ်မနုၤတဖၣ်လဲၣ်.
၁၄ ဝံအတၢ်စံးပာ် ဒိလီၤဝဲယ့ၣ်ၡူးဒ် လၢၢ်တဖျၢၣ်လၢ ပှၤသူၣ်ထီၣ်တၢ်ဖိတဖၣ် စူးကွံာ်ဝဲန့ၣ်လီၤ. (စံး. ၁၁၈:၂၂; လူၤကၣ် ၂၀:၁၇) လၢတၢ်န့ၣ်အဃိ ယ့ၣ်ၡူးပာ်ဖျါထီၣ်ဝဲလၢ ယဟိဝၤယွၤကသူၣ်ထီၣ်ဝဲ တၢ်အိၣ်ဖှိၣ်လၢ လၢၢ်တဖျၢၣ်န့ၣ်အဖီခိၣ်လီၤ. ဝံၤဒီးယ့ၣ်ၡူးဟ့ၣ်လီၤစီၤပ့းတရူး မူဒါလၢအရ့ဒိၣ်တဖၣ်န့ၣ်လီၤ. ဘၣ်ဆၣ် ဒ်ပှၤတနီၤဆိကမိၣ်ကမၣ်ဝဲအသိး ယ့ၣ်ၡူးတဟ့ၣ်ဝဲစီၤပ့းတရူး တၢ်အလီၢ်အလၤလၢ အပတီၢ်ထီန့ၢ်ဒံး တၢ်မၢဖိအဂၤသ့ၣ်တဖၣ်ဘၣ်. မ့ၢ်ဒၣ်အဝဲဟ့ၣ်လီၤစီၤပ့းတရူးလၢ “မူခိၣ်အဘီအမုၢ်အနီၣ်ဝံာ်” လီၤ. (မး. ၁၆:၁၉) အခီပညီအဲၣ်ဒိးစံးဝဲ စီၤပ့းတရူးဒိးန့ၢ်ဘၣ်ဝဲမူဒါလၢ အဝဲကဒုးအိၣ်ထီၣ်ဝဲ ပှၤသၢဒူၣ်အတၢ်မုၢ်လၢ်လၢ ကနုာ်လီၤဝဲလၢယွၤအဘီအမုၢ်အပူၤလီၤ. ပှၤသၢဒူၣ်အံၤမ့ၢ်ဝဲ ပှၤယူဒၤဖိ, ပှၤၡၤမရံဖိ ဒီးအလီၢ်ခံကတၢၢ်န့ၣ် မ့ၢ်ဝဲပှၤတခီဘီမုၢ်ဖိလီၤ.
၁၅. ဘၣ်မနုၤအဃိ စီၤပ့းတရူးသိၣ်ယ့ၣ်ၡူးလဲၣ်, ဒီးအဝဲတဲဝဲဒ်လဲၣ်.
၁၅ လၢခံန့ၣ်ယ့ၣ်ၡူးတဲဝဲလၢ ပှၤလၢအဘၣ်တၢ်ဟ့ၣ်လီၤအီၤမူဒါအါအါန့ၣ် ကဘၣ်စံးဆၢတၢ်လၢ ကစၢ်ယွၤအအိၣ် အါအါစ့ၢ်ကီးလီၤ. တၢ်လၢစီၤပ့းတရူးလဲၤခီဖျိဝဲတဖၣ် ပာ်ဖျါထီၣ်ဝဲလၢ ယ့ၣ်ၡူးအတၢ်ကတိၤတဖၣ်အံၤ မ့ၢ်ဝဲတီဝဲလီၤ. (လူၤကၣ် ၁၂:၄၈) ဒ်တၢ်ဆၢကတီၢ်လဲၤပူၤကွံာ်ဝဲအသိး ယ့ၣ်ၡူးပာ်ဖျါထီၣ်ဝဲ တၢ်မ့ၢ်တၢ်တီအဂၤတဖၣ်လၢ အဘၣ်ဃးဒီးမ့းၡံအၤဒီး တယံာ်လၢၤဘၣ်န့ၣ် မ့းၡံအၤအံၤ ကဘၣ်တၢ်မၤအၢမၤသီအီၤ ဒီးမၤသံအီၤလၢ ဝ့ၢ်ယရူၤၡလ့ၣ်အပူၤန့ၣ်လီၤ. ဖဲစီၤပ့းတရူးနၢ်ဟူဘၣ်ဝဲ တၢ်ဂ့ၢ်တဖၣ်အံၤအခါ အသးဘၣ်ဒိဝဲဖးဆါညါ. လၢတၢ်န့ၣ်အဃိ အဝဲကိးထီၣ်ယ့ၣ်ၡူးလၢတၢ်ချၢ ဒီးသိၣ်အီၤလၢ– “ကစၢ်ဧၢ, မ်တၢ်သးကညီၤနၤတက့ၢ်. တၢ်အံၤတဘၣ်ဘၣ်နၤ လ့ၤတက့ၤဘၣ်.” —မး. ၁၆:၂၁, ၂၂.
၁၆. ယ့ၣ်ၡူးဘှီဘၣ်ထီၣ်က့ၤ စီၤပ့းတရူးအတၢ်ဆိကမိၣ်ဒ်လဲၣ်, ဒီးယ့ၣ်ၡူးအတၢ်ကတိၤတဖၣ်အံၤ ကဲဘျုးလၢပဂီၢ်ဒ်လဲၣ်.
၁၆ စီၤပ့းတရူး ကဆိကမိၣ်လီၤအသးလၢ အဝဲမၤစၢၤယ့ၣ်ၡူးအဃိ ဖဲယ့ၣ်ၡူးစံးဆၢက့ၤတၢ်အခါ စီၤပ့းတရူး ကကမၢကမၣ်ဝဲဒိၣ်မးလီၤ. ဘၣ်သ့ၣ်သ့ၣ် ယ့ၣ်ၡူးအပျဲၢ်အဘီၣ်အဂၤတဖၣ်စ့ၢ်ကီး ဆိကမိၣ်တၢ်ဒ်စီၤပ့းတရူးအသိးအဃိ ယ့ၣ်ၡူးဃၣ်ဒူချၢအသး လၢစီၤပ့းတရူးအအိၣ် ဒီးကွၢ်ဃီၤတၢ်ဆူအဝဲသ့ၣ်အအိၣ်လီၤ. ဒီးအဝဲတဲဝဲလၢ– “မုၣ်ကီၤလံၢ်ဧၢ, ဟးဖးဒီးယၤတက့ၢ်. နမ့ၢ်ပှၤလၢအမၤတံာ်တာ်ယကျဲလီၤ. အဂ့ၢ်ဒ်အံၤ, နတၢ်ဆိကမိၣ်အံၤ တမ့ၢ်တၢ်ဟဲလၢယွၤအအိၣ်ဘၣ်. မ့ၢ်တၢ်ဘၣ်ဃးဒီး ပှၤကညီလီၤ.” (မး. ၁၆:၂၃, ခ့ခါစှီၤကျိာ်, မၢ်ကူး ၈:၃၂, ၃၃) ယ့ၣ်ၡူးအတၢ်ကတိၤတဖၣ်အံၤ ကဲထီၣ်တၢ်မၤလိ လၢပဝဲကိးဂၤဒဲးအဂီၢ် ဒီးပာ်ဖျါထီၣ်ဝဲလၢ ပကဆိကမိၣ်တၢ်လၢ အတလီၤပလိာ်လိာ်အသးဒီး ကစၢ်ယွၤအတၢ်ဆိကမိၣ်တဖၣ်န့ၣ် ညီဝဲဒိၣ်မးလီၤ. လၢတၢ်န့ၣ်အဃိ တဘျီတခီၣ်န့ၣ် ပဆိကမိၣ်လီၤပသးလၢ ပမၤစၢၤပှၤတဂၤဂၤဘၣ်ဆၣ် လၢတၢ်တပာ်သူၣ်ပာ်သးအပူၤ ပမၤတၢ်လၢအဘၣ်မုၣ်ကီၤလံၢ်အသးသ့ဝဲလီၤ. ဖဲန့ၣ်အဆၢကတီၢ် စီၤပ့းတရူး မၤဝဲဒ်လဲၣ်.
၁၇. ဖဲယ့ၣ်ၡူးသိၣ်က့ၤသီက့ၤ စီၤပ့းတရူးအခါန့ၣ် အဝဲအဲၣ်ဒိးတဲဝဲတၢ်မနုၤလဲၣ်.
၁၇ စီၤပ့းတရူး ကသ့ၣ်ညါလီၤအသးလၢ ယ့ၣ်ၡူးတအဲၣ်ဒိးစံးဝဲလၢ အဝဲမ့ၢ်မုၣ်ကီၤလံၢ်အနီၢ်ကီၢ်ဘၣ်. မုၣ်ကီၤလံၢ်န့ၣ် အၢဝဲသီဝဲအဃိ ယ့ၣ်ၡူးတတူၢ်လိာ်အီၤနီတစဲးဘၣ်. (မး. ၄:၁၀) မ့မ့ၢ် စီၤပ့းတရူးန့ၣ် တမ့ၢ်ပှၤအၢပှၤသီဘၣ်. ယ့ၣ်ၡူးထံၣ်ဘၣ်ဝဲလၢ စီၤပ့းတရူးအိၣ်ဒီး တၢ်ဂ့ၤတၢ်ဝါတဖၣ်အဃိ အဝဲတပာ်တ့ၢ်ကွံာ်အီၤဘၣ်. လၢတၢ်န့ၣ်အလီၢ် ယ့ၣ်ၡူးဘှီဘၣ်ထီၣ်က့ၤ စီၤပ့းတရူးအတၢ်ဆိကမိၣ်လၢ အကမၣ်တဖၣ်လီၤ. ဖျါတြၢၢ်ကလာ်လၢ စီၤပ့းတရူးန့ၣ်တဘၣ် ကဲထီၣ်တၢ်လီၤဃံၤအလီၢ်လၢ ယ့ၣ်ၡူးအဂီၢ်ဘၣ်. အဝဲကဘၣ်အိၣ်လၢ ယ့ၣ်ၡူးအလီၢ်ခံဒီး ဆီၣ်ထွဲမၤစၢၤအီၤလီၤ.
ပမ့ၢ်တူၢ်လိာ် တၢ်သိၣ်က့ၤသီက့ၤလၢ တၢ်ဆီၣ်လီၤသးအပူၤန့ၣ် ပကလဲၤထီၣ်လဲၤထီ ဒီးပကဘူးထီၣ်ဒီးယ့ၣ်ၡူးခရံာ်ဒီး အပၢ်ယဟိဝၤယွၤလီၤ
၁၈. စီၤပ့းတရူးပာ်ဖျါထီၣ် တၢ်သးတီဒ်လဲၣ်, ဒီးပဝဲစ့ၢ်ကီး ပကွၢ်လိမၤဒိးအီၤ ကသ့ဒ်လဲၣ်.
၁၈ မ့ၢ်စီၤပ့းတရူး တဲအါတဲစှၤတၢ်, သးဒိၣ်ထီၣ်တၢ် မ့တမ့ၢ် ကဒူးကဒ့ၣ်တၢ်လၢယ့ၣ်ၡူးအလိၤဧါ. တမ့ၢ်ဒ်န့ၣ်ဘၣ်. အဝဲတူၢ်လိာ်တၢ်သိၣ်က့ၤသီက့ၤ လၢတၢ်ဆီၣ်လီၤသးအပူၤလီၤ. ဒီးအဝဲတီလၢ ယ့ၣ်ၡူးအဖီခိၣ်လီၤ. ပှၤလၢအပိာ်ယ့ၣ်ၡူးအခံကိးဂၤဒဲးန့ၣ် တဘျီတခီၣ် လိၣ်ဘၣ်ဝဲတၢ်သိၣ်က့ၤသီက့ၤလီၤ. ပမ့ၢ်တူၢ်လိာ် တၢ်သိၣ်က့ၤသီက့ၤလၢ တၢ်ဆီၣ်လီၤသးအပူၤန့ၣ် ပကဘူးထီၣ်ဒီးယ့ၣ်ၡူးခရံာ်ဒီး အပၢ်ယဟိဝၤယွၤန့ၣ်လီၤ.—ဖး ကတိၤဒိ ၄:၁၃ တက့ၢ်.
ဖဲစီၤပ့းတရူး ဘၣ်တၢ်သိၣ်က့ၤသီက့ၤအီၤ အခါ အဝဲအိၣ်ဒီးတၢ်သးတီ
ဒိးန့ၢ်တၢ်ဆိၣ်ဂ့ၤခီဖျိလၢ အတၢ်သးတီအဃိ
၁၉. ယ့ၣ်ၡူးတဲဝဲ တၢ်ကတိၤလၢအလီၤကမၢကမၣ် မနုၤတခါလဲၣ်, ဒီးစီၤပ့းတရူး ကဆိကမိၣ်လီၤက့ၤအသးဒ်လဲၣ်.
၁၉ တယံာ်ဘၣ်ဒီး ယ့ၣ်ၡူးတဲကဒီးဝဲတၢ်လၢ အဒုးကမၢကမၣ် အပျဲၢ်အဘီၣ်တဖၣ်အသးလီၤ. အဝဲစံးဝဲလၢ– “ယစံးဘၣ်တဲဘၣ်သုတီတီအံၤ, ပှၤဆၢထၢၣ်ဖဲအံၤတနီၤနီၤလၢ အတချုးထံၣ်ဒံးဘၣ် ပှၤကညီဖိခွါအံၤဟဲလၢ အဘီအမုၢ်အပူၤန့ၣ်ဒီး, တလ့ၣ်ကွၢ်ဘၣ်တၢ်သံဘၣ်လီၤ.” (မး. ၁၆:၂၈) ဖဲန့ၣ်န့ၣ်စီၤပ့းတရူး ကထိၣ်ထံစီၤထံတၢ်လီၤ. မ့ၢ်ယ့ၣ်ၡူးအဲၣ်ဒိးတဲဝဲ အခီပညီဒ်လဲၣ်. ဘၣ်သ့ၣ်သ့ၣ် အဝဲကဆိကမိၣ်လီၤအသးလၢ ယ့ၣ်ၡူးသိၣ်ယၤဖဲမကၢာ်အဃိ မ့ၢ်ယကပၣ်လၢ ပှၤတဖၣ်အံၤအကျါဒံးဧါ.
၂၀, ၂၁. (က) စီၤပ့းတရူးထံၣ်ဘၣ်ဝဲ တၢ်ထံၣ်လၢညါခီ ဒ်လဲၣ်တခါလဲၣ်. (ခ) ဖဲစီၤပ့းတရူးနၢ်ဟူဘၣ် ပှၤသၢဂၤအတၢ်ကတိၤအခါ အဝဲသ့ၣ်ညါထီၣ်ဝဲတၢ်မနုၤလဲၣ်.
၂၀ ဖဲတၢ်ဆၢကတီၢ်လဲၤပူၤကွံာ် တနွံဃၣ်ဃၣ်ဝံၤအလီၢ်ခံ ယ့ၣ်ၡူးကိးဝဲ စီၤယၤကိာ်, စီၤယိၤဟၣ် ဒီးစီၤပ့းတရူးဆူ “ကစၢၢ်ဖးထီတဖျၢၣ်အလိၤ” န့ၣ်လီၤ. ဘၣ်သ့ၣ်သ့ၣ် ကစၢၢ်တဖျၢၣ်အံၤကမ့ၢ်ဝဲ ကစၢၢ်ဃ့ရမိၣ်လၢ အအိၣ်ယံၤဒီးအဝဲသ့ၣ် ထဲစှၤမံးလာ်န့ၣ်လီၤ. ဘၣ်လၢမုၢ်နၤခီအဃိ ယ့ၣ်ၡူးအပျဲၢ်သၢဂၤအံၤ အဲၣ်ဒိးမံဝဲလံ. ဘၣ်ဆၣ် ဖဲယ့ၣ်ၡူးဃ့ဘါထုကဖၣ်တၢ် အဆၢကတီၢ်န့ၣ် တၢ်လီၤဆီကဲထီၣ်အသးတခါအဃိ အဝဲသ့ၣ်ဘံၣ်အမဲာ်တချုးလၢၤဘၣ်.—မး. ၁၇:၁; လူၤကၣ် ၉:၂၈, ၂၉, ၃၂.
၂၁ ယ့ၣ်ၡူးလဲလိာ်အသးလၢ အဝဲသ့ၣ်အမဲာ်ညါလီၤ. ယ့ၣ်ၡူးအမဲာ်သၣ် ကပီၤထီၣ်ဝဲဒ် မုၢ်အသိးဒီး အကူအသိးတဖၣ် ဝါထီၣ်ဒီးကပြုၢ်ကပြီၤဝဲလီၤ. ဝံၤဒီးပှၤခံဂၤ အိၣ်ဖျါထီၣ်လၢ ယ့ၣ်ၡူးအဃၢၤလီၤ. ပှၤခံဂၤန့ၣ် ဘၣ်တၢ်ဒိလီၤအီၤလၢစီၤမိၤၡ့ ဒီးဝံအ့ၤလံယၤလီၤ. အဝဲသ့ၣ် ကတိၤတၢ်ဒီးယ့ၣ်ၡူးဘၣ်ဃးဒီး “အတၢ်က့ၤထီၣ်, လၢအကလၢထီၣ်ပှဲၤထီၣ်လၢ ယရူၤၡလ့ၣ်အပူၤအဂ့ၢ်န့ၣ်လီၤ.” ဖျါလၢတၢ်ဂ့ၢ်တဖၣ်အံၤ ပၣ်ဃုာ်ဒီး ယ့ၣ်ၡူးအတၢ်သံဒီး အတၢ်ဂဲၤဆၢထၢၣ်သမူထီၣ်က့ၤအဂ့ၢ်န့ၣ်လီၤ. လၢတၢ်န့ၣ်အဃိ စီၤပ့းတရူး ကသ့ၣ်ညါလီၤက့ၤအတၢ်ကမၣ်လီၤ. မ့ၢ်လၢအဝဲတဲဝဲလၢ ယ့ၣ်ၡူးန့ၣ်တလိၣ်တူၢ်ဘၣ် တၢ်နးတၢ်ဖှီၣ်ဒီးသံဝဲအဃိလီၤ.—လူၤကၣ် ၉:၃၀, ၃၁.
၂၂, ၂၃. (က) စီၤပ့းတရူးပာ်ဖျါထီၣ် တၢ်သူၣ်ဆူၣ်သးဆူၣ်ဒီး တၢ်အဲၣ်တၢ်ကွံဒ်လဲၣ်. (ခ) နၤအဝဲန့ၣ် စီၤပ့းတရူး, စီၤယၤကိာ်ဒီး စီၤယိၤဟၣ်ဒိးန့ၢ်ဘၣ်ဝဲ တၢ်ဆိၣ်ဂ့ၤအဂၤမနုၤလဲၣ်.
၂၂ ဖျါလၢစီၤမိၤၡ့ဒီး ဝံအ့ၤလံယၤကထုးဖးအသးဒီးယ့ၣ်ၡူးလီၤ. ဘၣ်ဆၣ် စီၤပ့းတရူးတအဲၣ်ဒိးဝဲလၢ တၢ်ထံၣ်တၢ်လၢညါခီအံၤ ကကတၢၢ်ကွံာ်ဝဲချ့သဒံးဘၣ်. လၢတၢ်န့ၣ်အဃိ အဝဲတဲဝဲလၢ– “ကစၢ်ဧၢ, ပအိၣ်ဖဲအံၤဂ့ၤမးလီၤ. ဒီးမ်ပမၤဒဲသၢဖျၢၣ်, လၢနဂီၢ်တဖျၢၣ်, ဒီးလၢစီၤမိၤၡ့အဂီၢ်တဖျၢၣ်, ဒီးလၢစီၤအ့ၤလံယၤအဂီၢ်တဖျၢၣ်တက့ၢ်.” နီၢ်နီၢ်န့ၣ်စီၤမိၤၡ့ဒီး ဝံအ့ၤလံယၤသံဝဲဖးယံာ်လံ. ဒီးမ့ၢ်ဒၣ်ထဲ တၢ်ထံၣ်လၢညါခီတခါအဃိ ပှၤလၢအအိၣ်ဖျါထီၣ်အသး ဒ်စီၤမိၤၡ့ဒီးဝံအ့ၤလံယၤအသိးန့ၣ် တလိၣ်ဘၣ်ဝဲဒဲဘၣ်. စီၤပ့းတရူးအထးခိၣ်ချ့အဃိ အဝဲဆိကမိၣ်တၢ်တချုးဘၣ် ဒီးတဲဝဲဒ်န့ၣ်လီၤ. ဘၣ်ဆၣ် စီၤပ့းတရူးအတၢ်သူၣ်ဆူၣ်သးဆူၣ်ဒီး အတၢ်အဲၣ်တၢ်ကွံန့ၣ် ထုးန့ၢ်ပသးဒိၣ်မးလီၤ.—လူၤကၣ် ၉:၃၃.
စီၤပ့းတရူး, စီၤယၤကိာ် ဒီးစီၤယိၤဟၣ်န့ၣ် ဒိးန့ၢ်ဘၣ်တၢ်ဆိၣ်ဂ့ၤခီဖျိလၢ အဝဲသ့ၣ် ထံၣ်ဘၣ်ဝဲတၢ်ထံၣ်လၢညါခီ လၢအလီၤသူၣ်ပိၢ်သးဝးလီၤ
၂၃ နၤအဝဲန့ၣ် စီၤပ့းတရူး, စီၤယၤကိာ်ဒီး စီၤယိၤဟၣ်ဒိးန့ၢ်ဘၣ်ဝဲ တၢ်ဆိၣ်ဂ့ၤလၢအဂၤတမံၤလီၤ. ဖဲအဝဲသ့ၣ်အိၣ်လၢ ကစၢၢ်ခိၣ်အဖၢမုၢ်န့ၣ် တၢ်အၢၣ်တလိၣ်ဟဲအိၣ်ဖျါထီၣ်ဒီး လီၤကဒုဘၣ်အဝဲသ့ၣ်လီၤ. ဒီးလၢတၢ်အၢၣ်အပူၤန့ၣ် ယဟိဝၤယွၤအကလုၢ်သီၣ်ထီၣ်ဝဲ ဒီးစံးဝဲလၢ– “တၢ်လၢပှၤတဂၤအံၤ, မ့ၢ်ယဖိခွါလၢ ယအဲၣ်အီၤလီၤ. ဒိကနၣ်အကလုၢ်တက့ၢ်.” ဝံၤဒီးတၢ်ထံၣ်လၢညါခီ ကတၢၢ်ကွံာ်ဝဲလီၤ. ဒီးအဝဲသ့ၣ်ထံၣ်ဘၣ်ဝဲထဲ ယ့ၣ်ၡူးတဂၤဧိၤလီၤ.—လူၤကၣ် ၉:၃၄-၃၆.
၂၄. (က) တၢ်ထံၣ်လၢညါခီအံၤ ကဲဘျုးလၢစီၤပ့းတရူးအဂီၢ်ဒ်လဲၣ်. (ခ) မုၢ်မဆါတနံၤညါအံၤ တၢ်ထံၣ်လၢညါခီအံၤ ကဲဘျုးလၢပဂီၢ်ဒ်လဲၣ်.
၂၄ စီၤပ့းတရူးထံၣ်ဘၣ်ဝဲ တၢ်ထံၣ်လၢညါခီအံၤန့ၣ် မ့ၢ်တၢ်ဆိၣ်ဂ့ၤဖးဒိၣ်လၢအဂီၢ် တကးဒံးဘၣ် ကဲဘျုးလၢပဂီၢ်စ့ၢ်ကီးလီၤ. နံၣ်လၢအဆံတဖၣ် လဲၤပူၤကွံာ်ဝံၤအလီၢ်ခံ စီၤပ့းတရူးကွဲးဖျါထီၣ်ဝဲ ဘၣ်ဃးဒီးတၢ်ဆိၣ်ဂ့ၤအံၤလီၤ. ခီဖျိလၢ အဝဲထံၣ်ဆိဝဲ ယ့ၣ်ၡူးဒ်စီၤပၤလၢ မူခိၣ်အဃိအဝဲကွဲးဝဲလၢအ ‘ထံၣ်ဘၣ် [ယ့ၣ်ၡူး] အစိအကမီၤလၢအမဲာ်’ န့ၣ်လီၤ. တၢ်ထံၣ်လၢညါခီအံၤ ပာ်ဂၢၢ်ပာ်ကျၢၤထီၣ်ဝဲ ဝံအတၢ်စံးပာ်အါမံၤ ဒီးမၤဆူၣ်ထီၣ်စီၤပ့းတရူးအတၢ်နာ် ဒ်သိးအဝဲကွၢ်ဆၢၣ်မဲာ် တၢ်နးတၢ်ဖှီၣ်လၢခါဆူညါကကဲဝဲအဂီၢ်န့ၣ်လီၤ. (ဖး ၂ ပ့းတရူး ၁:၁၆-၁၉ တက့ၢ်.) တကးဒံးဘၣ် တၢ်ထံၣ်လၢညါခီအံၤ မၤဆူၣ်ထီၣ်ပတၢ်နာ် ဘၣ်ဃးဒီး ဝံအတၢ်စံးပာ်တဖၣ်လၢ အဘၣ်ထွဲလိာ်အသးဒီးယ့ၣ်ၡူးဒီး ယွၤအဘီအမုၢ်သ့ဝဲလီၤ. ဘၣ်ဆၣ် ပမ့ၢ်အဲၣ်ဒိးဒိးန့ၢ်ဘၣ် ဘီမုၢ်အတၢ်ဆိၣ်ဂ့ၤတဖၣ်န့ၣ် ဒ်စီၤပ့းတရူးအသိး ပကဘၣ်တီဒီးယ့ၣ်ၡူး, မၤလိတၢ်လၢအအိၣ်, တူၢ်လိာ်အတၢ်သိၣ်က့ၤသီက့ၤ ဒီးပိာ်အခံလၢတၢ်ဆီၣ်လီၤသးအပူၤ တုၤလၢအကတၢၢ်လီၤ.
^ လံာ်အဆၢ. 6 ဖဲပှၤဂီၢ်မုၢ်လၢ ဘူၣ်ဘျီၣ်အပူၤနၢ်ဟူဘၣ်ဝဲ ယ့ၣ်ၡူးအတၢ်ကတိၤတဖၣ် အဆၢကတီၢ်န့ၣ် အဝဲသ့ၣ်အသးပှံၢ်ထီၣ်ဝဲလီၤ. ဘၣ်ဆၣ်လၢအပူၤကွံာ်တသီန့ၣ် အဝဲသ့ၣ်တဲဝဲလၢတၢ်သူၣ်ဆူၣ်သးဆူၣ်အပူၤ လၢယ့ၣ်ၡူးမ့ၢ် ယွၤအဝံတဂၤလီၤ. လၢတၢ်န့ၣ်အဃိ ပထံၣ်ဘၣ်လၢပှၤသ့ၣ်တဖၣ်အံၤ မ့ၢ်ပှၤလၢအသးကဒံကဒါညီဝဲလီၤ.—ယိၤဟၣ် ၆:၁၄.
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
စီၤပ့းတရူး—အဝဲတြီဆၢမၤနၢၤကွံာ်ဝဲ တၢ်သူၣ်ပျံၤသးဖုး ဒီးတၢ်သးဒ့ဒီ
တၢ်သးဒ့ဒီန့ၣ် ယူၢ်လီၤကွံာ်ဝဲပတၢ်နာ် ဝံၤဒီးပလီၤအုးသံဝဲလၢ နီၢ်သးတခီသ့ဝဲလီၤ. ဘၣ်ဆၣ်စီၤပ့းတရူး ဆဲးပိာ်ဝဲယ့ၣ်ၡူးအခံအဃိ မၤနၢၤကွံာ်အတၢ်သူၣ်ပျံၤသးဖုးဒီး အတၢ်သးဒ့ဒီလီၤ.
ကွၢ်လိမၤဒိးအဝဲသ့ၣ်အတၢ်နာ်
စီၤပ့းတရူး—အဝဲမၤလိ တၢ်ပျၢ်တၢ်ကမၣ်လၢ အသရၣ်အအိၣ်
ဘၣ်ဃးဒီးတၢ်ပျၢ်တၢ်ကမၣ်န့ၣ် ယ့ၣ်ၡူးသိၣ်လိဝဲ စီၤပ့းတရူးဒ်လဲၣ်. ယ့ၣ်ၡူးပျၢ်ဝဲစီၤပ့းတရူးအတၢ်ကမၣ်န့ၣ် အဝဲပာ်ဖျါထီၣ်ဝဲဒ်လဲၣ်.
လံာ်စီဆှံ အတၢ်သိၣ်လိတဖၣ်
တၢ်ပီးတၢ်လီတဖၣ်လၢ တၢ်မၤလိလံာ်စီဆှံအဂီၢ်
ဒ်သိး နမၤလိလံာ်စီဆှံကမုာ် ဒီးကထုးန့ၢ်နသးအဂီၢ် ဃုထၢ တၢ်ပီးတၢ်လီလၢ တၢ်မၤလိလံာ်စီဆှံအဂီၢ် တဖၣ်အံၤတက့ၢ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
