ယကဲထီၣ် ကစၢ်ယွၤအသကိး ကသ့ဒ်လဲၣ်
တၢ်မၤလိ ၃၅
ယကဲထီၣ် ကစၢ်ယွၤအသကိး ကသ့ဒ်လဲၣ်
ကၠဲရဲမံၤန့ၣ် ထံၣ်ဘၣ်ဒီး တၢ်အိၣ်သးလၢ အလီၤသးအုးအဃိ အဝဲပာ်လုၢ်ပာ်ပှ့ၤ အတၢ်ရ့လိာ်သးဒီး ကစၢ်ယွၤ. အဝဲ တဲဝဲလၢ “ဖဲယသးအိၣ် ၁၂ နံၣ်အခါ ယပါပာ်တ့ၢ်ကွံာ် ပဟံၣ်ဖိဃီဖိ. ဒီးဘၣ်တနၤန့ၣ် ယဃ့ထုကဖၣ် ဒီးဃ့ကညး ယဟိဝၤယွၤလၢ အကမၢယပါ ဟဲက့ၤကဒါလၢပအိၣ်.”
ကၠဲရဲမံၤန့ၣ် ဖဲအသူၣ်ဘၣ်ဒိသးဘၣ်ဒိအခါ အစးထီၣ်ဖးဝဲ လံာ်စီဆှံ ဒီးဖဲအဖးဘၣ်ဝဲ စံးထီၣ်ပတြၢၤ ၁၀:၁၄ အခါ အဘၣ်သးဝဲဒိၣ်မး .ဘၣ်ဃးဒီး ယဟိဝၤယွၤန့ၣ် လံာ်စီဆှံတဆၢအံၤ တဲဝဲလၢ “ပှၤဖိၣ်ဃဲလၢ အဖှီၣ်န့ၢ်ယာ်ကဲန့ၣ် ဟ့ၣ်လီၤအသးလၢနၤ, နမ့ၢ်နဲ တၢ်မၤစၢၤတၢ်လီၤ.” ကၠဲရဲမံၤ တဲဝဲလၢ “ယတူၢ်ဘၣ်လၢ ယဟိဝၤယွၤ တဲတၢ်ဒီးယၤ ဒီးအဒုးသ့ၣ်ညါယၤလၢ အကမၤစၢၤယၤ ဒီးအမ့ၢ်ယပါ. ပါလၢအဂ့ၤန့ၢ်အီၤန့ၣ် တအိၣ်ဘၣ်.”
နတၢ်အိၣ်သး မ့ၢ်လီၤဂာ်ဒီး ကၠဲရဲမံၤမ့ၢ်ဂ့ၤ တလီၤဂာ်ဘၣ်မ့ၢ်ဂ့ၤ လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ အဲၣ်ဒိးလၢ နကကဲထီၣ်အသကိး. အဃိ လံာ်စီဆှံ တဲဝဲလၢ “သုးဘူးသုသးဆူယွၤအအိၣ်တက့ၢ်, ဒီးကသုးဘူးအသးဆူသုအိၣ်လီၤ.” (ယၤကိာ် ၄:၈) ပကဆိကမိၣ်ကွၢ် တၢ်ကတိၤတဖၣ်အံၤ အခီပညီအိၣ်ဒ်လဲၣ်. ယဟိဝၤယွၤန့ၣ် ပထံၣ်အီၤတသ့ဘၣ် ဒီးအပတီၢ်ထီန့ၢ်ပှၤ စၢၢ်တလၢၢ် သနာ်က့ အအဲၣ်ဒိးလၢ ပကကဲအသကိး.
ဒ်သိး နကကဲထီၣ် ကစၢ်ယွၤအသကိးအဂီၢ် တၢ်လၢနကဘၣ်မၤန့ၣ် အိၣ်ဝဲ. အဒိ နမ့ၢ်သူၣ်လီၤတၢ်မုၢ်တၢ်ဘိ လၢနဟံၣ်န့ၣ် ဒ်သိး အကဒိၣ်ထီၣ်အဂီၢ် နကဘၣ် လူန့ၢ်အီၤထံထီဘိ, ဒုးထံၣ်အီၤဒီး မုၢ်အတၢ်ကပီၤ မ့တမ့ၢ် ပာ်အီၤလၢ တၢ်ကဒုအလီၢ် လၢအကြၢးအဘၣ်လၢအဂီၢ်. နမ့ၢ်တမၤဒ်န့ၣ်ဘၣ်န့ၣ် အဒိၣ်ထီၣ်တန့ၢ်ဘၣ်. နတၢ်ရ့လိာ်သးဒီး ယဟိဝၤယွၤစ့ၢ်ကီး လီၤဂာ်ဒ်န့ၣ်လီၤ. အဃိ ဒ်သိးနတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤဒိၣ်ထီၣ်အဂီၢ် နကဘၣ်မၤဒ်လဲၣ်.
ပကဘၣ် မၤလိလံာ်စီဆှံန့ၣ် မ့ၢ်တၢ်လၢအရ့ဒိၣ်
နကရ့လိာ်သးဒီးပှၤတဂၤအဂီၢ် နကဘၣ်မၤတၢ်ခံမံၤ လၢအမ့ၢ်ဝဲ နကဘၣ် ဒိကနၣ်န့ၢ်လိာ်သး ဒီးတဲသကိးတၢ်. တၢ်ရ့လိာ်သးဒီး ယဟိဝၤယွၤစ့ၢ်ကီး ဒ်န့ၣ်လီၤ. တၢ်ဖးလံာ်စီဆှံ ဒီးတၢ်မၤလိလံာ်စီဆှံန့ၣ် မ့ၢ်ဝဲပဒိကနၣ် တၢ်လၢယဟိဝၤယွၤတဲဝဲ.—စံးထီၣ်ပတြၢၤ ၁:၂, ၃.
ဘၣ်သ့ၣ်သ့ၣ် နမၤလိလံာ်စီဆှံတမုာ်ဘၣ်. ပှၤသးစၢ်အါတက့ၢ်န့ၣ် အမၤဝဲမုာ်ထဲ အကွၢ်တၢ်ဂီၤမူ, အလိာ်ကွဲက့ ဒီးရ့လိာ်အသးဒီး အသကိး. ဘၣ်ဆၣ် နမ့ၢ်အဲၣ်ဒိး မၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤန့ၣ် နကဘၣ် မၤဒ်အတဲဝဲအသိး တခါဘၣ်တခါ. ဒီးနကဘၣ် ဒိကနၣ်အကလုၢ် ခီဖျိ နမၤလိအကလုၢ်ကထါ လံာ်စီဆှံ.
နမ့ၢ်တူၢ်ဘၣ်လၢ တၢ်ဖးလံာ်စီဆှံ ကဲဝဲဒ်သိးဒီး မူဒါလၢနဘၣ်မၤအီၤန့ၣ် တဘၣ်ကိၢ်တဂ့ၤ. နမ့ၢ်ကဲပှၤလၢ အမၤလိတၢ်တမုာ်ဘၣ် သနာ်က့ ဒ်သိးနမၤလိတၢ် ကမုာ်အဂီၢ် နမၤသ့. အဆိကတၢၢ်န့ၣ် နကဘၣ် ပာ်လီၤဃာ် တၢ်ဆၢကတီၢ် လီၤလီၤဆီဆီ လၢနကမၤလိလံာ်စီဆှံအဂီၢ်. အဒိ ပိာ်မုၣ်သးစၢ်တဂၤ လၢအမ့ၢ်လံး တဲဝဲလၢ “ယအိၣ်ဒီး တၢ်ရဲၣ်လီၤကျဲၤလီၤ ဒီးဖဲယပၢၢ်ထီၣ် လၢဂီၤခီအခါ တၢ်လၢယမၤ အဆိကတၢၢ်န့ၣ်မ့ၢ်ဝဲ ယဖးလံာ်စီဆှံ အဆၢဒိၣ်တဆၢ.” မ့မ့ၢ် မရံယၤ လၢအသးအိၣ် ၁၅ နံၣ်န့ၣ် အမၤဝဲလၢ ကျဲအဂၤတဘိ. အဝဲတဲဝဲလၢ “ကိးနၤဒဲး တချုးလၢယမံဒံးဘၣ်န့ၣ် ယဖးလံာ်စီဆှံတစဲးဖိ.”
ဒ်သိးနစးထီၣ် တၢ်ဖးလံာ်စီဆှံ အတၢ်ရဲၣ်တၢ်ကျဲၤကသ့အဂီၢ် ကွၢ်တၢ်လွံၢ်နၢၣ်လၢ လံာ်ကဘျံးပၤ ၂၉၂. ဒီးနမၤလိလံာ်စီဆှံ ကချုးအမံးနံး ၃၀ လၢအဆၢကတီၢ်ဖဲလဲၣ်န့ၣ် ကွဲးလီၤဃာ်တၢ်ဆၢကတီၢ် ဖဲတၢ်ဖီလာ်အံၤ.
․․․․․
နပာ်လီၤဃာ် တၢ်ဆၢကတီၢ်န့ၣ် အိၣ်ဒၣ်အခီၣ်ထံး တပတီၢ်ဒံးလီၤ. ဖဲနစးထီၣ်ဖး လံာ်စီဆှံအခါ ဘၣ်သ့ၣ်သ့ၣ် နကထံၣ်ဘၣ်လၢ တၢ်ဖးလံာ်စီဆှံန့ၣ် တညီဝဲထီဘိဘၣ်. ဒီးဘၣ်သ့ၣ်သ့ၣ် နကတူၢ်ဘၣ်ဒ် ကၠဲးစရံ လၢအသးအိၣ် ၁၁ နံၣ်တဂၤ တဲဝဲအသိးလီၤ. အဝဲတဲဝဲလၢ “လံာ်စီဆှံ တၢ်ဂ့ၢ်တၢ်ကျိၤတနီၤန့ၣ် ပနၢ်ပၢၢ်ဘၣ်အီၤ ကီဒိၣ်မး ဒီးတလီၤသူၣ်အိၣ်သးအိၣ် အါအါဘၣ်.” နမ့ၢ်တူၢ်ဘၣ် ဒ်န့ၣ်သနာ်က့ သးဟးဂီၤတဂ့ၤ. တၢ်မၤလိလံာ်စီဆှံန့ၣ် ထံၣ်အီၤဒ်သိးဒီး နဒိကနၣ် နသကိး ယဟိဝၤယွၤတဲတၢ်. နမ့ၢ်ဂုာ်ကျဲးစၢး မၤလိလံာ်စီဆှံန့ၣ် လၢခံနဖးအီၤကမုာ်ဒိၣ်ထီၣ် ဒီးနကဒိးန့ၢ်ဘၣ်အဘျုး.
တၢ်ဃ့ထုကဖၣ် မ့ၢ်တၢ်လၢအရ့ဒိၣ်
ဖဲပဃ့ထုကဖၣ် လၢကစၢ်ယွၤအအိၣ်အခါ မ့ၢ်ဝဲပတဲတၢ်ဒီးအီၤလီၤ. တၢ်ထုကဖၣ်န့ၣ် မ့ၢ်တၢ်ဟ့ၣ်လၢ အလီၤကမၢကမၣ်ဒိၣ်မး. လၢမုၢ်နၤမ့ၢ်ဂ့ၤ လၢမုၢ်ဆါမ့ၢ်ဂ့ၤ ပတဲတၢ်ဒီး ယဟိဝၤယွၤ သ့ဝဲထီဘိ. ဒီးအဝဲဒိကနၣ် ပတၢ်ထုကဖၣ်ထီဘိ. တကးဒံးဘၣ် အဝဲအဲၣ်ဒိးဒိကနၣ် တၢ်လၢပတဲအီၤတဖၣ်လီၤ. အဃိ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ “လၢတၢ်ကိးမံၤဒဲးန့ၣ်လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤတၢ်အဘျုး အဖှိၣ်အပူၤန့ၣ်, ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်.”—ဖံလံးပံၤ ၄:၆.
ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိး ပတဲဘၣ်ယဟိဝၤယွၤ တၢ်ဂ့ၢ်အါမံၤသ့. ပတဲဘၣ်အီၤ ပတၢ်ကီတၢ်ခဲ, ပတၢ်သူၣ်ကိၢ်သးဂီၤတဖၣ် ဒီးပစံးဘျုးစံးဖှိၣ်အီၤသ့. ပသကိး မ့ၢ်မၤန့ၢ်ပှၤ တၢ်တမံၤမံၤန့ၣ် ပစံးဘျုးစံးဖှိၣ်အဝဲသ့ၣ်လီၤ. ယဟိဝၤယွၤန့ၣ် အမၤန့ၢ်ပှၤတၢ်အါန့ၢ်ဒံး ပသကိးတဖၣ် မၤန့ၢ်ပှၤဒံးအဃိ ပစံးဘျုးစံးဖှိၣ်အီၤသ့.—စံးထီၣ်ပတြၢၤ ၁၀၆:၁.
ကွဲးလီၤတၢ်ဂ့ၢ်လၢ နကစံးဘျုးစံးဖှိၣ် ယဟိဝၤယွၤ. ကွဲးလီၤအီၤ ဖဲတၢ်ဖီလာ်အံၤ.
․․․․․
တဘျီတခီၣ်န့ၣ် နကပျံၤတၢ် ဒီးဘၣ်ယိၣ်တၢ်. အဃိ လံာ်စီဆှံ တဲဝဲလၢ “ပာ်ထီၣ်နတၢ်ဝံတၢ်ယိးလၢယွၤအလိၤတက့ၢ်. ဒီးအဝဲဒၣ်ကမၤစၢၤနၤလီၤ. အဝဲတပျဲပှၤတီပှၤလိၤဟူးဝးနီတဘျီဘၣ်.”—စံးထီၣ်ပတြၢၤ ၅၅:၂၂, ခ့ခါစှီၤကျိာ်.
ဖဲနဃ့ထုကဖၣ်အခါ နအဲၣ်ဒိးတဲဘၣ် ယဟိဝၤယွၤလၢ နတၢ်သူၣ်ကိၢ်သးဂီၤမနုၤလဲၣ်. ကွဲးလီၤအီၤ ဖဲတၢ်ဖီလာ်အံၤ.
․․․․․
နီၢ်ကစၢ် တၢ်လဲၤခီဖျိ
ပတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤအဂီၢ် တၢ်လၢပမၤအီၤသ့န့ၣ်အိၣ်ဒံး. ပှၤကွဲးထါစံးထီၣ်ပတြၢၤ စီၤဒၤဝံး တဲဝဲလၢ “လ့ၣ်ကွၢ်, ဒီးထံၣ်လၢ ယွၤမ့ၢ်တၢ်ဂ့ၤန့ၣ်တက့ၢ်.” (စံးထီၣ်ပတြၢၤ ၃၄:၈) ဖဲစီၤဒၤဝံး လဲၤခီဖျိဘၣ်ဝဲ တၢ်အိၣ်သးလၢ အလီၤပျံၤလီၤဖုးအခါ အကွဲးဝဲ စံးထီၣ်ပတြၢၤ အဆၢဒိၣ် ၃၄ လီၤ. မ့ၢ်လၢ စီၤစီလူး အဲၣ်ဒိးမၤသံအီၤအဃိ စီၤဒၤဝံးထံၣ်ဘၣ်ဒီး တၢ်အိၣ်သးလၢ အလီၤသးအုးဖးဒိၣ် ဒီးအဘၣ်ဃ့ၢ်ပူၤဖျဲးအသး. ဒီးလၢခံ အဘၣ်လဲၤဃ့ၢ်ပူၤဖျဲးအသးလၢ အဒုၣ်အဒါ ပှၤဖလ့ၡသးဖိတဖၣ်အအိၣ်. ဖဲန့ၣ်အခါ ဖျါလၢစီၤဒၤဝံး အကျဲကတၢၢ်လံသနာ်က့ အဝဲပာ်မၤအသး ဒ်သိးဒီးပှၤပျုၢ်တဂၤ အဃိအပူၤဖျဲးဝဲလီၤ.—၁ ၡမူၤအ့လး ၂၁:၁၀-၁၅.
ဖဲစီၤဒၤဝံး ပူၤဖျဲးအခါ တတဲဝဲလၢ အဖၠဲးအဃိ အပူၤဖျဲးဘၣ်. လၢတၢ်န့ၣ်အလီၢ် အစံးပတြၢၤဝဲ ယဟိဝၤယွၤ ဒီးဖဲထါစံးထီၣ်ပတြၢၤ အဆၢဒိၣ် ၃၄ အပူၤန့ၣ် အကွဲးဝဲလၢ “ယဃုယွၤ, ဒီးအဝဲဒၣ်စံးဆၢယၤ, ဒီးမၤပူၤမၤဖျဲးယၤလၢ ကယဲၢ်ယတၢ်ဘၣ်ယိၣ်ခဲလၢာ်အပူၤလီၤ.” (စံးထီၣ်ပတြၢၤ ၃၄:၄) မ့ၢ်လၢ စီၤဒၤဝံး လဲၤခီဖျိဘၣ်ဝဲ ယဟိဝၤယွၤ အတၢ်မၤစၢၤလၢ အနီၢ်ကစၢ်အဃိ အဝဲဟ့ၣ်ဂံၢ်ဟ့ၣ်ဘါ ပှၤဂၤလၢ “လ့ၣ်ကွၢ်, ဒီးထံၣ်လၢ ယွၤမ့ၢ်တၢ်ဂ့ၤန့ၣ်တက့ၢ်.” *
ဆိကမိၣ်ထီၣ်က့ၤ နတၢ်လဲၤခီဖျိတခါခါလၢ ကစၢ်ယွၤမၤစၢၤနၤ ဒီးကွဲးလီၤအီၤ ဖဲတၢ်ဖီလာ်အံၤ. တၢ်ဟ့ၣ်ကူၣ်– နတၢ်လဲၤခီဖျိ လီၤလီၤဆီဆီဖးဒိၣ်လၢ ကစၢ်ယွၤမၤစၢၤနၤ မ့ၢ်တအိၣ်ဘၣ်သနာ်က့ နဆိကမိၣ်ထီၣ်က့ၤ တၢ်လဲၤခီဖျိ ယိယိတဖၣ်သ့. အဒိ ဆိကမိၣ်ထီၣ်က့ၤ တၢ်ဂ့ၢ်ယိယိဖိလၢ ကစၢ်ယွၤမၤန့ၢ်နၤ လၢတနံၤဘၣ်တနံၤအဂီၢ်.
․․․․․
ဘၣ်သ့ၣ်သ့ၣ် နမိနပါ ကသိၣ်လိနၤလံာ်စီဆှံ. မ့မ့ၢ်ဒ်န့ၣ်ဒု ဂ့ၤဒိၣ်မး. ဘၣ်ဆၣ် နတၢ်ရ့လိာ်သးဒီး ကစၢ်ယွၤကအိၣ်အဂီၢ် နကဘၣ်မၤလၢ နနီၢ်ကစၢ်လီၤ. နမ့ၢ်တမၤဘၣ်ဒံးဘၣ်န့ၣ် နစးထီၣ်မၤဒ် တၢ်ဟ့ၣ်ကူၣ် ဖဲတၢ်မၤလိတခါအံၤအပူၤသ့. နမၤမၤန့ၣ် ယဟိဝၤယွၤ ကဆိၣ်ဂ့ၤ နတၢ်ဂုာ်ကျဲးစၢး. လံာ်စီဆှံ တဲဝဲလၢ “ဃ့တၢ်တက့ၢ်, ဒီးတၢ်ကဟ့ၣ်သုလီၤ. ဃုတၢ်တက့ၢ်, ဒီးသုကထံၣ်န့ၢ်တၢ်လီၤ. ဒိတကျိာ်တၢ်တက့ၢ်, ဒီးတၢ်ကအိးထီၣ်န့ၢ်သုဂီၢ်လီၤ.”—မးသဲ ၇:၇.
နမ့ၢ်အဲၣ်ဒိး သ့ၣ်ညါအါထီၣ်တၢ်ဂ့ၢ်အံၤန့ၣ် ဖးကွၢ်အီၤလၢ VOLUME 1, CHAPTERS 38 AND 39
Find it hard to talk to others about God? Learn how you can defend your beliefs.
[တၢ်ဂ့ၢ်အဘျဲၣ်]
^ ဘၣ်ဃးဒီး တၢ်ကတိၤလၢအမ့ၢ် “လ့ၣ်ကွၢ်, ဒီးထံၣ်” န့ၣ်လံာ်စီဆှံတနီၤ ကွဲးဝဲလၢ “ဃုသ့ၣ်ညါလၢ နနီၢ်ကစၢ်, “ဃုကွၢ်လၢ နနီၢ်ကစၢ်” ဒီး “လဲၤခီဖျိအီၤလၢ နနီၢ်ကစၢ် ဒီးနကထံၣ်ဘၣ်.”—Contemporary English Version, Today’s English Version, and The Bible in Basic English.
လံာ်စီဆှံအဆၢလၢအရ့ဒိၣ်
“ပှၤလၢ အသ့ၣ်ညါလီၤအသးလၢ အလိၣ်ဘၣ် ကစၢ်ယွၤ အတၢ်ဟံးစုနဲၣ်ကျဲန့ၣ် ကသးခုဝဲ.”—မးသဲ ၅:၃, NWT.
တၢ်ဟ့ၣ်ကူၣ်
နမ့ၢ်ဖးလံာ်စီဆှံ တနံၤအဆၢဒိၣ် သၢဆၢတုၤယဲၢ်ဆၢန့ၣ် လၢတနံၣ်အတီၢ်ပူၤ နဖးလံာ်စီဆှံကဝံၤဝဲဒီဘ့ၣ်.
နသ့ၣ်ညါဧါ . . .?
နဖးလံာ်တဘ့ၣ်အံၤ ဒီးနတူၢ်လိာ် လံာ်စီဆှံ အတၢ်ဟ့ၣ်ကူၣ်အဃိ ပာ်ဖျါထီၣ်ဝဲလၢ ယဟိဝၤယွၤ သူၣ်အိၣ်သးအိၣ်နၤ လီၤလီၤဆီဆီ.—ယိၤဟၣ် ၆:၄၄.
ကွဲးလီၤ တၢ်လၢနကမၤအီၤ
ဒ်သိး ယကဒိးန့ၢ်ဘၣ် အဘျုးလၢ နီၢ်ကစၢ်တၢ်မၤလိလံာ်စီဆှံအဂီၢ်, ယက ․․․․․
ဒ်သိး ယကဃ့ဘါထုကဖၣ် ထီဘိအဂီၢ်, ယက ․․․․․
ဘၣ်ဃးဒီး တၢ်ဂ့ၢ်အံၤ ယကသံကွၢ် ယမိယပါလၢ ․․․․․
နဆိကမိၣ်ဒ်လဲၣ်
● ဒ်သိးနမၤနီၢ်ကစၢ် တၢ်မၤလိလံာ်စီဆှံ ကမုာ်အဂီၢ် နကမၤဒ်လဲၣ်.
● ဘၣ်မနုၤအဃိ ယဟိဝၤယွၤအဲၣ်ဒိးနၢ်ဟူ ပှၤဟီၣ်ခိၣ်ဖိလၢ တလၢတပှဲၤဘၣ်တဖၣ် အတၢ်ထုကဖၣ်လဲၣ်.
● နမၤဂ့ၤထီၣ် နတၢ်ထုကဖၣ်ကသ့ဒ်လဲၣ်.
[တၢ်ဂ့ၢ်ဖုၣ်ကိာ်လၢ]
‘‘ဖဲယသးစၢ်အခါ ယဃ့ထုကဖၣ်တၢ် ဘၣ်ဃးဒီးတၢ်ဂ့ၢ် အလီၢ်လီၢ်ထီဘိ. ဘၣ်ဆၣ် ခဲအံၤန့ၣ် တနံၤဘၣ်တနံၤ တၢ်ကဲထီၣ်သးဒီးယၤ အဂ့ၤမ့ၢ်ဂ့ၤ အအၢမ့ၢ်ဂ့ၤ ယတဲဘၣ် ကစၢ်ယွၤ လၢယတၢ်ထုကဖၣ်အပူၤ. မ့ၢ်လၢ တနံၤဒီးတနံၤန့ၣ် တၢ်ကဲထီၣ်သး တဒ်သိးဘၣ်အဃိ ယတၢ်ဃ့ထုကဖၣ် တဘျီဒီးတဘျီန့ၣ် တဒ်သိးလိာ်သးဘၣ်.”—အံၣ်
[တၢ်လွံၢ်နၢၣ်/တၢ်ဂီၤအဖီလာ်]
ဃုသ့ၣ်ညါအါထီၣ် နလံာ်စီဆှံ
၁. ဃုထၢလံာ်စီဆှံတၢ်ဂ့ၢ်လၢ နအဲၣ်ဒိးဖးအီၤတခါ. ဃ့ဘါထုကဖၣ်လၢ နကအိၣ်ဒီးတၢ်ကူၣ်သ့ ဒ်သိး နကနၢ်ပၢၢ်တၢ်ဂ့ၢ်တၢ်ကျိၤလၢ နဖးအီၤတဖၣ်.
၂. ဖးတၢ်ဂ့ၢ်တၢ်ကျိၤ လီၤတံၢ်လီၤဆဲး. ဟံးန့ၢ်တၢ်ဆၢကတီၢ်. ဖဲနဖးလံာ်စီဆှံအခါ ဆိကမိၣ်ထံအီၤ. ထံၣ်တမှံကွၢ် ပှၤဖဲန့ၣ်တဖၣ် မၤတၢ်မနုၤလဲၣ်, နၢ်ဟူကွၢ် အဝဲသ့ၣ်တဲတၢ်အသီၣ်ဒ်လဲၣ်, ဆိကမိၣ်ကွၢ်အဝဲသ့ၣ်ကနၢဘၣ် တၢ်အစိဒ်လဲၣ်, အတၢ်အီၣ်တၢ်အီ အဝံၣ်အဘဲကမၤအသးဒ်လဲၣ် ဒီးတၢ်အဂၤတဖၣ်. ဖဲနဖးလံာ်အခါ ဂုာ်ကျဲးစၢးဆိကမိၣ်ဒီး တၢ်ဂ့ၢ်သ့ၣ်တဖၣ်အံၤ.
၃. ဆိကမိၣ်ထီၣ် တၢ်လၢနဖးအီၤ. ဒီးသံကွၢ်လီၤနသးလၢ
● ဘၣ်မနုၤအဃိ ယဟိဝၤယွၤ ကွဲးလီၤတၢ်ဂ့ၢ်တခါအံၤလၢ လံာ်စီဆှံအပူၤလဲၣ်.
● ယကြၢးကွၢ်လိ ပှၤဖဲလဲၣ်တဂၤလဲၣ်, ဒီးမတဂၤအဒိအတဲာ်ကဲထီၣ် တၢ်ဟ့ၣ်ပလီၢ်လၢ ယဂီၢ်လဲၣ်.
● ယမၤလိန့ၢ်ဘၣ် တၢ်မၤလိမနုၤလၢ တၢ်ဂ့ၢ်တခါအံၤအပူၤလဲၣ်.
● တၢ်ဂ့ၢ်အံၤသိၣ်လိယၤ ဘၣ်ဃးဒီး ယဟိဝၤယွၤအဂ့ၢ်ဒ်လဲၣ် ဒီးတၢ်လၢအမၤဝဲတဖၣ်ဒ်လဲၣ်.
၄. ဃ့ဘါထုကဖၣ်ဖုၣ်ကိာ်ဖိလၢ ယဟိဝၤယွၤအအိၣ်. တဲဘၣ်အီၤတၢ်လၢနမၤလိန့ၢ်ဘၣ် လၢတၢ်မၤလိတခါအံၤအပူၤ ဒီးတၢ်လၢနအဲၣ်ဒိးအိၣ်မူ မၤထွဲအီၤတဖၣ်. ဒီးထီဘိန့ၣ် စံးဘျုး ယဟိဝၤယွၤလၢအဟ့ၣ်လီၤနၤ အကလုၢ်ကထါ လံာ်စီဆှံ.
[တၢ်ဂီၤအဖီလာ်]
“နကလုၢ်ကထါန့ၣ် မ့ၢ်မ့ၣ်အူဒၢတဖျၢၣ်လၢယခီၣ်အဂီၢ်, ဒီးတၢ်ကပီၤတဖျၢၣ်လၢ ယကျဲအဂီၢ်လီၤ.”—စံးထီၣ်ပတြၢၤ ၁၁၉:၁၀၅.
[တၢ်လွံၢ်နၢၣ်/တၢ်ဂီၤအဖီလာ်]
မၤဆိတၢ်အရ့ဒိၣ်လၢညါ
နကဃ့ဘါထုကဖၣ် ဒီးမၤလိလံာ်စီဆှံအဂီၢ် နတၢ်ဆၢကတီၢ် အိၣ်ဧါတအိၣ်ဧါန့ၣ် ဒိးသန့ၤထီၣ်အသးလၢ တၢ်လၢနပာ်ဆိ လၢညါအဖီခိၣ်.
မၤကွၢ်ဒ်အံၤ– ဟံးန့ၢ်ထံစဲၤတဖျၢၣ် ဒီးထၢနုာ်လၢၢ်ဖးဒိၣ်တနီၤ လၢအကိပူၤ. ဝံၤဒီး ထၢနုာ်ပှဲၤထီၣ်မဲး လၢအပူၤ. နကထံၣ်ဘၣ်လၢ နထံစဲၤန့ၣ် အိၣ်ပှဲၤဝဲဒီး လၢၢ်ဒီးမဲး.
ဒီးထုးထီၣ်က့ၤ လၢၢ်ဒီးမဲးခဲလၢာ်. ဘၣ်ဆၣ် တဘျီအံၤန့ၣ် ထၢနုာ်လီၤဆိမဲးအံၤ လၢထံစဲၤပူၤ ဝံၤမၣ် ထၢနုာ်လီၤက့ၤ လၢၢ်တဖၣ်အံၤ. မ့ၢ်လၢ နထၢနုာ်ဆိမဲးအဃိ နကထံၣ်ဘၣ်လၢ နထၢနုာ်လီၤလၢၢ် တတြီၢ်ခဲလၢာ်ဘၣ်.
ပသ့ၣ်ညါထီၣ်ဘၣ် တၢ်မနုၤလဲၣ်. လံာ်စီဆှံ တဲဝဲလၢ “သ့ၣ်ညါနီၤဖး တၢ်လၢအရ့ဒိၣ်ကတၢၢ်တဖၣ်.” (ဖံလံးပံၤ ၁:၁၀, NWT) နမ့ၢ်ပာ်ဆိ တၢ်လၢအရ့တဒိၣ်အါအါဘၣ် ဒ်သိးဒီး တၢ်မၤမုာ်မၤဖှံသး လၢညါန့ၣ် နကမၤတၢ်လၢအရ့ဒိၣ် ဒ်သိးဒီး နီၢ်သးအတၢ်ဖံးတၢ်မၤ တဖၣ်အဂီၢ် နတၢ်ဆၢကတီၢ် တလၢဘၣ်. ဘၣ်ဆၣ် နမ့ၢ်မၤထွဲ လံာ်စီဆှံ အတၢ်ဟံးစုနဲၣ်ကျဲန့ၣ် နမၤကစၢ်ယွၤအတၢ်မၤ ကချုး ဒီးနမၤ တၢ်မၤမုာ်မၤဖှံသးဖဲအကြၢး ကချုးစ့ၢ်ကီး. အဃိ ဒ်သိး နတၢ်ဆၢကတီၢ် ကလၢအဂီၢ် နကဘၣ်မၤဆိ တၢ်လၢအရ့ဒိၣ်လၢညါ.
[တၢ်ဂီၤအဖီလာ်]
ဒ်သိး နတၢ်မုၢ်တၢ်ဘိ ကဒိၣ်ထီၣ်အဂီၢ် နဘၣ်လူန့ၢ်အီၤထံ ဒီးကွၢ်ထွဲအီၤဂ့ၤဂ့ၤ ဒ်န့ၣ်အသိး နတၢ်ရ့လိာ်သးဒီး ကစၢ်ယွၤကဂ့ၤထီၣ်အဂီၢ် နကဘၣ်မၤဒံးန့ၣ်
တၢ်ဂ့ၤအဂၤလၢ နကဘၣ်သး
ပှၤဒိၣ်ထီၣ်သီ ဒီးပှၤသးစၢ်တဖၣ်
သးစၢ်တဖၣ်အတၢ်သံကွၢ်
တၢ်သံကွၢ်တဖၣ်လၢ သးစၢ်တဖၣ်အတၢ်သံကွၢ်ညီနုၢ်လၢဘၣ်ဃးဒီး က့း, တံၤသကိး, မိၢ်ပၢ်, ကၠိ, ဒီးတၢ်ဂ့ၢ်အဂၤတဖၣ်.
