Bambangi ya Yehova ketindaka bana na bau na kingolo bakuma Bambangi ya Yehova?

KUWA NA

Ve, samu kusambila Nzambi kele nzengolo yina muntu kebakaka yandi mosi. (Baroma 14:12) Bambangi ya Yehova kelongaka bana na bau bansikudukusu ya Biblia, kasi ntangu bana na bau kekuma bambuta, bau mosi nde kepona kana bakekuma Bambangi ya Yehova to ve.—Baroma 12:2; Bagalatia 6:5.

Mutindu mosi na bibuti nionso, Bambangi ya Yehova kezolaka ti bana na bau vuanda na luzingu yina meluta mbote. Bakelongaka bana na bau mambu yina bakemonaka ti yakesadisa bau: kisalu ya kusala, bikadulu ya mbote mpe malongi ya Biblia. Bambangi ya Yehova kendimaka ti Biblia nde kesadisaka bantu bavuanda na luzingu yina meluta mbote. Na yau, bakesadisaka bana na bau bavuanda na bikadulu ya mbote na kulongukaka na bau Biblia mpe na kunataka bau na balukutakanu ya Buklisto. (Kolimbola Mibeko 6:6, 7) Konso muana, ntangu yandi keyunduka lenda pona yandi mosi kana yandi kelanda malongi ya bibuti na yandi to ve.

Bambangi ya Yehova kepesaka babebe mbotama?

Ve. Biblia tubila ata kisika mosi ve mbotama ya muana bebe. Na kifuani, Biblia memonisa ti na siekle ya ntete Baklisto vuandaka kuwa nsangu, ‘kundima yau na ntima ya mvimba,’ mpe kubalula ntima tekila kubaka mbotama. (Misala 2:14, 22, 38, 41) Mutindu mosi, samu na kubaka mbotama muntu fueti vuanda na mvula yina kesadisa yandi yandi bakusa malongi ya Biblia, yandi ndimina yau, mpe yandi baka nzengolo ya kuzinga na kuzitisaka malongi. Nzokande muana bebe lenda koka kusala mambu yango ve.

Ntangu bana kena kuyunduka, balenda pona ntangu yankaka kubaka mbotama. Kasi, samu na kusala yau, bafueti zaba mbotembote mfunu ya nzengolo na bau.

Bambangi ya Yehova kesundolaka bana na bau kana bamemanga kubaka mbotama?

Ve. Atako bibuti yina kele Bambangi ya Yehova kemonaka mpenza kiadi kana bana na bau memanga kukuma Bambangi ya Yehova, baketatamanaka kuzola bana na bau mpe bakezengaka ve nguizani na bana na bau samu kaka bana yango memanga kukuma Bambangi ya Yehova.

Konso muntu, ata kana yandi kele na yinki mvula, fueti baka nzengolo yandi mosi kana yandi kebaka mbotama to ve

Samu na yinki Bambangi ya Yehova kesamunaka kintuadi na bana na bau?

Beto kesamunaka kintuadi na bana na beto samu na bamfunu mingi. a

Biblia kekindisaka bibuti balonga bana na bau mambu ya kimpeve, basadisa bau samu basambila Nzambi. (Baefese 6:4) Lokola kutubila bantu yankaka mambu metadila Nzambi kele mpe na kati ya nsambudulu yina beto kepesaka Nzambi, kisalu ya kusamuna kele mosi ya mambu yina kesadisaka bana na beto bazaba mambu ya Nzambi.—Baroma 10:9, 10; Baebre 13:15.
Biblia kekindisaka mingimingi bantuenia “bakumisa nkumbu ya Mfumu Nzambi.” (Nkunga 148:12, 13, Bible en Kituba) Mosi ya mitindu ya mfunu ya kukumisa Nzambi kele kutubila bantu yankaka mambu yina metadila yandi. b
Bana kebakaka mambote migni ntangu bakesamunaka kintuadi na bibuti na bau. Na kifuani, bakelongukaka kusolola na bantu ya mitindu nionso, mpe bakelongukaka kuvuanda na bikadulu lokola ntima kiadi, kimpombo, luzitu, mpe kukitula na kisika ya bantu yankaka. Bakemesanaka diaka na Masonukua yina kele na mambu yina mesimba kiminu na bau.

Bambangi ya Yehova kesalaka bafeti to bankinzi yankaka?

Bambangi ya Yehova kesalaka ve bafeti ya mabundu to bafeti yankaka yina kesepedisaka Nzambi ve. c (2 Bakorinti 6:14-17; Baefese 5:10) Na kifuani, beto kesalaka ve bafeti ya mbutukulu to feti ya Noele samu ya katuka ve na Baklisto.

Atako mutindu yina, beto kesepelaka kulutisa ntangu kintuadi na dibuta na beto mpe kupesa bana na beto bakado. Na kisika ya kuvingila dati mosi ya kalandriye samu na kukutakana na dibuta mpe kupesana bakado, beto kebongisaka bilumbu ya kukutana mpe kupesana bakado mvula ya mvimba.

Bibuti yina kele Baklisto kesepelaka kupesa bana na bau bakado

Bantu yina keyundukaka na dibuta ya Bambangi ya Yehova kekukimonaka yinki mutindu?

“Kisalu ya kusamuna melonga munu munu zitisa bantu yankaka, yavuanda yinki bindimeli bakele na yau to bamesadila munu mambu ya yinki mutindu. Diaka, ntangu beto kesamunaka, mbala mingi bantu ketubilaka beto mitungisi mpe bampasi na bau. Na yau na kisika ya kutula makanisi kaka na munu mosi, munu melonguka kutula makanisi na banguilu ya bantu yankaka mpe kutula dikebi na bansatu ya bantu yankaka.”—Tara. d
“Bibuti na munu tindikaka munu ve na kingolo mukuma Mbangi ya Yehova. Bavuandaka tubila munu ntangu nionso ti munu mosi fueti pona. Konso ntangu yina muvuandaka yuvusa mama mambu metadila bindimeli ya Bambangi ya Yehova, yandi vuandaka yuvusa munu, ‘Nge mesosasosa samu na yau?’ Na yau muvuandaka sosasosa mingi, mpe nsukansuka mundimisamaka ti yavuandaka nde dibundu na munu—kasi ve dibundu ya bibuti na munu kaka.”—Ellie.
“Munu salaka kukimona ata fioti ve ti munu konduaka diambu mosi ya mfunu samu munu vuandaka sala ve bafeti ya yinza. Munu vuandaka kondua ve diambu ya kusala na Bambangi ya Yehova yankaka na nsuka ya sabala. Beto vuandaka kudia, kukina, mpe kusekana. Mbala mingi bankundi na munu ya kalasi vuandaka tubila munu ti mesala mambu mingi kintuadi na bankundi kuluta bau.”—Melissa.
“Atako munu vuandaka zaba mfunu yina beto kesalaka ve feti ya Noele, ntangu yankaka munu vuandaka kukimona lokola munu kena kukondua kima mosi. Kasi diambu yina sadisaka munu samu munu nunga banguilu yango kele mutindu bibuti na munu vuandaka bokidisa bankundi mpe bampangi ya dibuta na beto mbala na mbala na yinzo. Mukena kuzaba diaka ti bavuandaka pesa munu bakado.”—Miguel.

a Mbala mingi, bana ya Bambangi ya Yehova kesamunaka kaka kana bakele kintuadi na bibuti na bau to na mbuta yankaka.

b Biblia metubila bana mingi yina sepedisaka Nzambi na kutubilaka bantu yankaka mambu metadila bindimeli na bau.—2 Bakonzi 5:1-3; Matai 21:15, 16; Luka 2:42, 46, 47.

c Tala disolo “Samu na yinki Bambangi ya Yehova kesalaka ve bafeti yankaka?”

d Beto mepesa bau bankumbu yankaka.