Etas-Unis mpe babuala 30 ya Europe memonisa bampasi mpe kinkesi yina buala ya Russie kesalaka na bampangi na beto yankaka. Yimbi yango yina Russie kena kusala tubukaka na lukutakanu mosi yina Conseil permanent ya Organisation pour la sécurité et la coopération en Europe (OSCE) salaka * na kilumbu ya 23 Juillet 2020.

Lane Darnell Bahl yina kena kusala samu na mua ntangu lokola conseillère politique ya mission américaine ya OSCE, tubaka na bamfunu yina kutakanaka ti: “Etats-Unis mpe bantu mingi yankaka yina mesangana na lukutakanu yayi bamonisaka mpe baketatamana kutuba samu na mambu yina ya kukondua lunungu bapolisi kena kusala, yamesangisa kukanga mpe kukotisa na buloko, kupesa bitumbu yina kena kunata tii na bamvula 6 na buloko mpe kuniokola Bambangi ya Yehova na bamfumu ya Russie.”

Bamfumu tungisamaka diaka samu na bansangu yina babakaka ti bamfumu ya buala Russie na kizunga ya Voronezh kuendaka kota na bayinzo kuluta 100 ya Bambangi ya Yehova. Lane Darnell Bahl tubaka: “Bansangu ya kuniokola dibundu mosi yina kele bantu ya kiyenge kena kusala mpasi na ntima.”

Nicola Murray yina kele kilandi ya mfumu ya bamonisi ya Royaume-Unis, tubilaka diaka diambu yina kena kutungisa yandi samu na “diambu metadila kukotila bantu na kingolo na bayinzo kena kubuelama kaka, mpe yakena kumonisa ti yakele nkubukulu yina bongisamaka samu na kuniokola Bambangi ya Yehova.” Yandi mebuela diaka: “Bamfumu ya Russie kelandilaka mpe kekangaka Bambangi ya Yehova kaka samu bakesalaka ntangu nionso mambu yina metadila nsambudulu na bau.”

Bamfumu ya Voronej tubaka ti batulaka Bambangi ya Yehova na buloko samu bakangaka bau na “bima yina vuandaka monisa ti bakena kutelemina bamfumu ya Leta.” Kasi Bahl monisaka puele ti mambu yango yakele luvunu. Bima yango sangisaka balapolo mpe mikanda yankaka na Internet, bankubukulu ya bimvuka ya fioti fioti mpe kusadila videoconference samu na balukutakanu. Bahl monisaka ti mutindu bamfumu ya Russie kena kusadila Bambangi ya Yehova mambu kele “nsoni mpe yabonga ve.” Yandi tubaka: “Munu kesadila ‘bima ya mutindu yina ntangu nionso.’” Yandi buelaka diaka ti bamonisi ya Russie yina sanganaka na distanse na lukutakanu ya OSCE vuandaka na “kati ya bantu yina kesalaka mambu yango.”

Babuala 27 yina kesanganaka na Union Europeenne (UE), buela diaka babuala 8 yina kele ve na kati ya Union Européenne tubaka kintuadi ti: “Beto kuwaka ti bamonisi ya Russie tubaka na mbala mingi ti Bambangi ya Yehova kele, mpe baketatama kusala nsambudulu na bau na kimpuanza mpe kimpuanza ya mabundu kele ya kundimama na Russie. Kasi, beto kena kutatamana kubaka balapolo mingi yina kena kumonisa ti bapolisi kena kukota na bayinzo na kingolo, kukanga mpe kuniokola bambangi ya Yehova. Yau kele ve na nguizani na yina bamonisi ya Russie kena kutuba.”

Bamonisi ya Union Europeenne tubaka diaka: “Bantu nionso, buela diaka Bambangi ya Yehova fueti vuanda na dikoki ya kusadila bayinsua na bau, mpe yinsua ya kimpuanza ya dibundu to ya lukuikilu, kimpuanza ya kusangana mpe ya balukutakanu ya kiyenge, mpe kimpuanza ya kutuba, kukondua kupona pona, mutindu minsiku ya buala Russie mpe na kuzitisaka minsiku ya nkubukulu ya OSCE na kulandaka mpe yinsua yina ketuadisaka yinza ya mvimba.”

Murray sukisaka bampova ya Royaume-Unis na kulombaka Russie balemba kuniokola Bambangi ya Yehova.

Bahl lombaka Russie na: (1) kulemba kulandila mpe kukanga Bambangi ya Yehova, (2) kulemba kukanga bima ya biro ya filiale ya Bambangi ya Yehova ya Russie, mpe (3) kubikidila Bambangi ya Yehova nionso yina kele na buloko.

Yakele mbala ya ntete ve yina bankubukulu ya yinza ya mvimba kena kutubila mambu yina Russie kesalaka bampangi na beto. Bakebisaka Russie—nkubukulu ya yinza ya mvimba mezaba mambu ya mpasi yina buala ya Russie kena kumonisa bampangi na beto. Diambu meluta mfunu, beto kena kundimisama ti Yehova mezaba mambu yina bampangi na beto ya Russie kena kukutana na yau. (Nkunga 37:18) Tata na beto ya nzola ya dizulu ketatamana kusakumuna kiminu, kibakala, mpe kukanga ntima na bau.—Nkunga 37:5, 28, 34.