Na kilumbu ya 25 mai 2022, mpangi Dennis Christensen kumaka na Danemark na lutanunu nionso. Babimisaka yandi na buloko ya Russie mpe kilumbu yina landaka bakukaka yandi mbala mosi. Yandi salaka bamvula tanu na babuloko yina mesuasana.

Mpangi Dennis metuba: “Munu kele mpenza na kiese ya kubima na buloko mpe kuvuanda diaka kintuadi na nketo na munu ya nzola, Irina. Lusadusu mpe balukindusu yina bampangi ya yinza ya mvimba vuandaka tindila munu vuandaka nde dikabu yina katukaka na Yehova. Munu kena kutatamana kusambila samu na bampangi na munu ya babakala mpe ya banketo yina kena kumonisa kibakala, yina kena kukutana na mikakatano mpe bakena kukota buloko samu na kiminu na bau.”

Mpangi Dennis mpe mpangi Irina kena kubaka lusadusu ya kimpeve mpe ya kinsuni yina kena kukatuka na bankundi na bau mpe na bantu ya dibuta na bau. Bametuba: “Beto kena kuvingila na nsatu ya ngolo kusambila Yehova na kimpuanza nionso kintuadi na bampangi na beto ya babakala mpe ya banketo na Danemark.”

Bakangaka mpangi Dennis mpe yandi kotaka buloko na kilumbu ya 25 mai 2017, ntangu bapolisi ya Russie yina vuataka bamaske kotaka na kingolo na kimvuka mosi na Oriol mpe mpangi Dennis vuandaka na lukutakanu yango. Na manima, tribinale fundaka yandi ti yandi vuandaka pesa maboko na bisalu ya nkubukulu ya dibundu yina kele ya baekstremiste mpe yina tribinale ya nene ya Russie mepekisaka yameluta ngonda mosi.

Bamfumu ya Leta ya Russie vuandaka ndimisama mbala na mbala ti bipekiseli yina basamunaka na 2017 tadilaka kaka kuzabana ya nkubukulu ya Bambangi ya Yehova na Leta, na kutubaka ti yatadila ve yinsua ya konso Mbangi ya Yehova ya kumonisa kiminu na yandi. Kasi, kukangama ya mpangi Dennis vuandaka ebandeli ya mikakatano mpe ya kukangama ya Bambangi ya Yehova mingi na buala ya mvimba ya Russie mpe na Crimée.

Bubu yayi, bampangi ya babakala mpe ya banketo 91 kele kaka na buloko. Beto kena kusambila samu Yehova tatamana kusadisa bampangi na beto ya kukuikama mpe yandi sadila bau mambu na ‘mutindu ya kusuasana.’—Nkunga 4:3.