Mary mpe bakala na yandi, John, a kezingaka na kisika yina balenda samuna nsangu ya mbote na banzenza mingi yina kekatukaka na Philippines samu na kukuiza sala kuna. Na ntangu ya maladi ya COVID-19, Mary nungaka kubanda bandongokolo ya Biblia kaka ve na bantu ya buala yina yandi vuandaka zinga, kasi diaka na bantu yina kezingaka na babuala yankaka. Yinki mutindu yandi salaka yau?

Mary vuandaka yuvusa banlonguki na yandi ya Biblia: “Nge mezaba muntu yankaka yina kesepela kulonguka Biblia?” Kana bamendima, yandi vuandaka lomba bau basadisa yandi samu yandi solola na bau. Kuyuvusa kiuvu yango ya pete vuandaka bimisa mbala mingi mambu ya mbote. Samu na yinki? Samu mbala mingi bantu yina kesepelaka na Mpova ya Nzambi kevuandaka na nsatu ya kutubila bantu ya mabuta mpe bankundi na bau mambu yina bakena kulonguka. Kuyuvusa kiuvu yango bimisaka yinki mambote?

Jasmin, nlonguki ya Biblia ya Mary sadisaka yandi samu yandi baka banlonguki ya Biblia yiya ya yimpa. Mosi na bau, Kristine, sepelaka mingi na ndongokolo yango, na yau yandi lombaka Mary yandi banda kulonguka na yandi mbala zole na sabala. Ntangu Mary yuvusaka yandi kana yandi mezaba muntu mosi yina kesepela kulonguka Biblia, Kristine tubaka: “Ee, munu kesadisa nge samu nge solola na bankundi na munu.” Mua basabala na manima, Kristine sadisaka Mary samu yandi solola na bankundi na yandi yiya yina vuandaka na nsatu ya kulonguka Biblia. Na manima, Kristine sadisaka diaka Mary samu yandi solola na bankundi na yandi yankaka, mpe ndambu ya bankundi yango sadisaka yandi samu yandi solola na bantu yankaka.

Kristine zolaka diaka ti dibuta na yandi na Philippines longuka mambu metadila Biblia. Na yau yandi sololaka na muana na yandi ya nketo, Andrea. Na ebandeli, Andrea tubaka: ‘Dibundu ya Bambangi ya Yehova kele dibundu ya banzenza, bakendiminaka Yesu ve, mpe bakesadilaka kaka Testama ya ntama.’ Kasi kaka na manima ya ndongokolo mosi, yandi katulaka makanisi yina ya yimbi. Mbala nionso yina yandi vuandaka longuka diambu ya yimpa na Biblia, yandi vuandaka tuba: “Yakele na Biblia, na yau yafueti vuanda kedika!”

Mua ntangu na manima, Andrea sadisaka Mary samu yandi solola na bankundi na yandi zole mpe nkundi na yandi mosi ya kisalu, mpe bau nionso babandaka kulonguka Biblia. Diaka, kondua ti Mary zaba, Angela, tata muasi ya Andrea yina vuandaka meso ya kufua, vuandaka kuwa bau ntangu bavuandaka longuka. Mpe kilumbu mosi, Angela lombaka Andrea yandi sadisa yandi samu yandi solola na Mary mpe yandi lomba ndongokolo na yandi mosi ya Biblia. Angela vuandaka zola mambu yina yandi vuandaka longuka. Ngonda mosi na manima, yandi kangaka baverse mingi na yintu, mpe yandi  vuandaka na nsatu ya kulonguka mbala yiya na sabala! Na lusadusu ya Andrea, Angela bandaka kusangana mbala na mbala na balukutakanu na nzila ya apele video.

Ntangu Mary zabaka ti Joshua, bakala ya Kristine, vuandaka ntangu nionso pembeni ntangu Kristine vuandaka longuka, Mary lombaka yandi kana yandi kesepela kulonguka Biblia na bau. Joshua tubaka: “Munu kekuwa kaka, kasi kuyuvusa munu ve biuvu; kana nge meyuvusa munu kiuvu, munu kebika munu.” Na manima ya kulonguka baminti 5, yandi yuvusaka biuvu mingi kuluta Kristine mpe yandi diaka yandi kumaka na nsatu ya kulonguka Biblia.

Kiuvu ya pete ya Mary salaka ti bantu mingi longuka Biblia. Yandi bakaka bankubukulu samu mingi kati na bau longuka na bampangi yankaka Baklisto. Mary bandaka kulonguka Biblia na bantu 28 na babuala yiya ya kusuasana.

Jasmin, nlonguki ya ntete yina beto metubila na disolo yayi, bakaka mbotama na avril 2021. Kristine bakaka mbotama na mai 2022 mpe yandi vutukaka na Philippines samu yandi vuanda kintuadi na dibuta na yandi. Banlonguki zole yankaka yina Kristine sadisaka Mary samu yandi solola na bau, bau diaka babakaka mbotama. Angela bakaka mbotama mua ngonda na manima mpe bubu yayi yandi kele mpasudi nzila ya ngonda na ngonda. Joshua bakala ya Kristine, mpe Andrea, muana na bau ya nketo, mpe banlonguki mingi yankaka kena kutatamana kulonguka Biblia mpe kupusana penepene ya Yehova.

Na siekle ya ntete, bantu mingi kuwaka nsangu ya mbote na nzila ya bampangi na bau ya mabuta mpe bankundi na bau. (Yoa. 1:41, 42a; Mis. 10:24, 27, 48; 16:25-33) Samu na yinki ve kuyuvusa nlonguki na nge ya Biblia mpe bantu yankaka yina kesepelaka na kedika: “Nge mezaba muntu yankaka yina kesepela kulonguka Biblia?” Kana nge meyuvusa mua kiuvu yango, mbala yankaka nge kebaka bantu mingi yina kesepela kulonguka Biblia!