Bamonisaka nzola na bisalu

KUWA NA

YOMARA mpe bampangi na yandi ya babakala—Marcelo mpe Hiver—kezingaka na buala mosi ya fioti na Guatemala. Yomara bandaka kulonguka Biblia na Bambangi ya Yehova, mpe bampangi na yandi diaka bandaka kulonguka. Kasi yavuandaka na diambu mosi ya mpasi. Bau nionso tatu bakele na meso ya kufua, mpe bazabaka ve kutanga braille. Kasi, mpangi yina vuandaka longuka na bau Biblia vuandaka tangila bau baparagrafe mpe baverse ya Biblia ya dilongi yina bakena kulonguka.

Yavuandaka diaka mpasi samu na bau na kukuenda na balukutakanu ya kimvuka. Bavuandaka ve na dikoki ya kutambula bau mosi na distanse ya baminiti 40 samu na kukuenda na Yinzo ya Kimfumu yina kele penepene na bau. Kasi bampangi na kimvuka bakaka nkubukulu samu na kunata bau na balukutakanu nionso ya kimvuka. Mpe ntangu babandaka kusala badevuare na balukutakanu ya katikati ya sabala, bampangi sadisaka bau samu bakanga na yintu badevuare yina bakesala.

Na ngonda ya mai 2019, balukutakanu ya kimvuka bandaka kusalama na buala na bau. Mpe na manima, bankuelani mosi yina kele bampasudi nzila kuendaka na buala yango. Bankuelani yango kukitudilaka lukanu ya kulongisa bampangi yango kutanga mpe kusonika braille, atako bau mosi diaka bankuelani yango bazabaka ve braille. Bakuendaka na kisika yina bakelundaka mikanda samu na kuyuvusa mambu metadila braille mpe kulonguka mayele ya kusadila samu na kulonga yau.

Marcelo kena kupesa komantere na lukutakanu ya kimvuka

Na bangonda fioti kaka, bampangi yango tatu vuandaka na dikoki ya kutanga braille na pete, yasalaka ti bakudisa nguizani na bau na Yehova. a Bubu yayi Yomara, Marcelo, mpe Hiver kena kusala lokola bampasudi nzila ya ngonda na ngonda. Marcelo kele nsadisi na kisalu. Sabala ya mvimba, bakekukipesaka mingi na mambu ya kimpeve. Bakevuandaka na vema ya kusadila Yehova, mpe bantu yankaka diaka kelandaka kifuani ya vema na bau.

Bampangi yango nionso tatu kele na butondi mingi samu na lusadusu yina kimvuka pesaka bau na nzola nionso. Yomara metuba: “Banda beto kutanaka samu na mbala ya ntete, Bambangi ya Yehova monisinaka beto nzola ya kedika ya Buklisto.” Marcelo mebuela: “Beto kele na bankundi ya mbote na kimvuka na beto, mpe beto kele na dibuta ya yinza ya mvimba yina kele na bumosi na nzola.” Yomara mpe bampangi na yandi ya babakala kena kuvingila na nsatu ya ngolo kumona mutindu Yehova kekumisa ntoto paradiso.—Nk. 37:10, 11; Yez. 35:5.

a Mua mukanda mosi yina kele na yintu ya diambu Longuka kutanga Braille na Anglais salamaka samu na kusadisa bantu yina kele na meso ya kufua to bayina kemonaka mbote ve samu balonguka mutindu ya kutanga mpe kusonika braille.