Kimvuka fueti tadila dikuela ya ntete lokola dikuela yina memanisa kana bakala mekuela diaka mpe kimvuka fueti tadila dikuela ya yimpa lokola dikuela yina mendimama. Samu na kubakusa bamfunu yina beto metubila mutindu yina, beto tadila mambu yina Yesu tubaka na diambu metadila kufua dikuela mpe kukuela diaka.

Na kutadila Matayo 19:9, Yesu monisaka yina kele mfunu ya ngudi samu na kufua dikuela. Yandi tubaka: ‘Konso muntu yina mekufua dikuela na nketo na yandi, katula kaka samu na pite, mpe yandi mekuela nketo yankaka yandi mesala ekobo.’ Na kutadila bampova ya Yesu, beto melonguka (1) ti pite kele kaka mfunu mosi yina Masonukua metubila samu na kufua dikuela mpe (2) bakala yina mekufua dikuela na nketo na yandi na bamfunu yina Masonukua tubila ve mpe yandi mekuela nketo yankaka yandi mesala ekobo. *

Bampova ya Yesu zolaka monisa ti bakala yina mesala pite mpe mekufua dikuela na nketo na yandi kele na kimpuanza ya kukuela diaka na kutadila Masonukua? Ve. Kana ekobo mesalama na dikuela, nkuelani yina sala diambu ve kebaka nzengolo kana yandi kenlemvukila to ve nkuelani na yandi. Kana yandi memanga kunlemvukila yandi mpe bamekufua dikuela na meso ya Leta, bau zole kele na kimpuanza ya kukuela diaka ntangu kaka kufua makuela na bau mendimama.

Na ndambu yankaka, nkuelani yina sala diambu ve lenda vuanda mpenza na nsatu ya kutanina dikuela na yandi mpe kuvuanda pene ya kunlemvukila bakala na yandi. Kasi, yinki kesalama kana bakala yina mesala ekobo memanga ti nketo na yandi nlemvukila yandi mpe yandi mekuenda fuisa dikuela na mutindu ya yimbi? Lokola nketo kele pene ya kunlemvukila yandi mpe kutatamana makuela, bakala kevuanda na yinsua ve ya kukuela diaka na kutadila Masonukua. Kana yandi mebaka nzengolo ya kukuela muntu yankaka atako yandi kele ve na yinsua ya kukuela diaka, yandi kesala diaka ekobo, na manima bankulutu fueti sala diaka komite ya kusambisa samu na kutadila diambu ya yimbi yina yandi mesala.—1Bk. 5:1, 2; 6:9, 10.

Kana bakala mosi mekuela atako yandi kele ve na yinsua ya kukuela diaka, yinki mutindu kimvuka ketadila dikuela ya ntete mpe dikuela na yandi ya yimpa? Na kutadila Biblia, dikuela ya ntete kena kutatamana kaka? Nkuelani yina sala diambu ve ketatamana kuvuanda na nzengolo ya kunlemvukila to ve bakala na yandi ya ntama? Kimvuka ketatamana kutadila dikuela na yandi ya yimpa lokola dikuela ya ekobo?

Na ntama, kimvuka vuandaka tadila dikuela yango ya yimpa lokola dikuela ya ekobo ntangu nionso yina nkuelani yina sala diambu ve kele na luzingu, kele kaka mpupa, mpe yandi sala pite ve. Nzokande, Yesu tubilaka ve nkuelani yina sala diambu ve ntangu yandi vuandaka tubila diambu metadila kufua dikuela mpe kukuela diaka. Kasi, yandi sasilaka ti bakala yina mekufua dikuela na nketo na yandi na diambu yina Biblia tubila ve mpe yandi mekuela diaka muntu yankaka, yandi  mesala ekobo. Na diambu ya mutindu yina, kufua dikuela mpe kukuela diaka, yina Yesu tubilaka ti yakele ekobo, metula nsuka na dikuela ya ntete.

Kana bakala mosi mekufua dikuela na nketo na yandi mpe yandi mekuela diaka, nketo na yandi ya ntete yina salaka diambu ve kele diaka na dikoki ve ya kunlemvukila to ya kumanga kunlemvukila yandi. Na yau, yandi kele ve na kiyekua ya kubaka nzengolo ya kunlemvukila to kumanga kunlemvukila bakala na yandi ya ntama. Diaka, yavuanda kana nkuelani yina sala diambu ve kufua ve, buela kuela ve, to sala ve pite, yau fueti soba ve mutindu yina kimvuka fueti tadila dikuela yina ya yimpa. *

Na kifuani yina beto tubilaka na ebandeli, bakala salaka ekobo, yau nataka tii na kufua dikuela. Yinki kesalama kana bakala salaka ve ekobo kasi yandi mekufua dikuela mpe na manima yandi mekuela diaka? To yinki kesalama kana bakala salaka ve pite tekila ya kufua dikuela kasi yandi mesala yau na manima ya kufua dikuela mpe na manima yandi mekuela diaka atako nketo na yandi kele pene ya kunlemvukila yandi? Na bifuani yayi nionso, kufua dikuela mpe kukuela diaka, yina mesalama nde kele ekobo, mpe yaketula nsuka na dikuela ya ntete. Dikuela ya yimpa kele dikuela yina mendimama na Leta. Mutindu La Tour de Garde ya 15 Février 1980, na paje 31-32 tubaka yau, “lokola yandi mekuela diaka, yandi buela vutukila diaka ve mambu na yandi yina lutaka; dikuela ya ntama sukaka ntangu bakufuaka dikuela, ekobo mpe kukuela diaka.”

Nsobolo yayi ya mbakusulu na beto zola monisa ve ti Muklisto fueti kanisa ti dikuela kele nlongo ve to ekobo kele disumu ya nene ve. Kana bakala mosi mekufua dikuela na nketo na yandi na kutadila ve mfunu yina Masonukua mepesa mpe na manima yandi mekuela muntu yankaka kondua ti yandi vuanda na yinsua ya kusala yau, bankulutu fueti sala komite ya kusambisa samu yandi mesala ekobo. (Kana nketo yina bamekuela ya yimpa diaka kele Muklisto, bafueti sambisa yandi samu yandi mesala ekobo.) Atako dikuela yango ya yimpa kele dikuela ya ekobo ve, bakala lenda ndimama ve samu na kubaka biyekua na kimvuka samu na bamvula mingi tii ntangu bantu yankaka kelemba kukitungisa samu na diambu ya yimbi yina yandi salaka na ntama to tii ntangu bantu kebanda kuzitisa yandi diaka. Tekila ya kupesa yandi biyekua, bankulutu fueti kanisa na mambu yina nkuelani ya ntama kena kukutana na yau bubu yayi na mutindu basadilaka yandi mambu ya yimbi mpe na mambu yina bana yina kele ntete baminere kena kukutana na yau na mutindu basundolaka bau na kibuti na bau yina salaka diambu ya yimbi.—Mal. 2:14-16.

Lokola kufua dikuela mpe kukuela diaka na mutindu yina Biblia pesila nzila ve kenataka mambu ya mpasi, Baklisto yina kevuandaka na nduenga kelandaka kifuani ya Yehova mpe baketadilaka dikuela lokola kima mosi ya nlongo.—Lon. 5:4, 5; Ebr 13:4.