NA NTANGU ya ntama, bakala yina zola kuela to dibuta na yandi vuandaka futa dote na dibuta ya nketo kana mabuta nionso zole mendima ti bakuelana. Dote yango vuandaka sangisa bima ya valere, bibulu, to mbongo. Na bantangu yankaka, yavuandaka futama na nzila ya kusala kisalu mosi, na kifuani, Yakobi ndimaka kusadila tata ya Rachel samu na bamvula 7 samu na kubaka Rachel na dikuela. (Kuy. 29:17, 18, 20) Yinki vuandaka lukanu ya kupesa dote?

Nsoniki mosi ya Biblia na nkumbu ya Carol Meyers metuba: “Dote vuandaka futa kisalu yina muana ya nketo yina zola kuela lendaka sala na dibuta na yandi, yavuandaka na mfunu na kisalu ya bilanga samu na mabuta.” Dote vuandaka futama diaka samu na kukumisa ngolo nguizani ya mabuta zole yina mesangana samu na makuela. Bantu ya mabuta yango lendaka salasana na bantangu ya mpasi. Diaka, kufuta dote vuandaka monisa ti nketo yina mebongisama samu na makuela kebanda kubaka lutanunu ya bakala na yandi kasi ya tata na yandi diaka ve.

Kufuta dote vuandaka monisa ve ti nketo vuandaka kima mosi yina balenda kusumba to kuteka. Mukanda mosi (Ancient Israel—Its Life and Institutions) metuba: “Diambu metadila kufuta ntalu mosi ya mbongo, to ya kima yina mekokana na yau, na dibuta ya nketo vuandaka sala ti bantu yankaka tadila makuela ya Bayisaele lokola kusumba. Kasi [kufuta dote] vuandaka monisa nde kufuka kima mosi na dibuta ya nketo kasi ve kufuta ntalu mosi samu na kusumba nketo.”

Bubu yayi, na babuala yankaka, bantu ketatamanaka kulanda mimeseno ya kufuta dote. Ntangu bibuti yina kele Baklisto kena kulomba dote, bafueti bika ti ‘bantu nionso zaba kikadulu na bau ya kuvuanda ve mambu ya ngolo’ na kulombaka ve mbongo to bima yina kena kumonisa ti bakele na mambu ya ngolo. (Fil 4:5; 1Bk 10:32, 33) Na mutindu yina nde, bakemonisa ti bakele ve na ‘nzola ya mbongo,’ to lokoso. (2 Tm. 3:2) Diaka, kana bibuti yina kele Baklisto kena kulomba ve ntalu ya dote yina meluta ngolo, yakesadisa bakala yina kezola kuela samu yandi bika vutusa dikuela na manima tii ntangu yandi kebaka ntalu ya kukoka samu na kufuta dote. To yakesala ti bakala yina zola kuela yandi bika ve kisalu na yandi ya mpasudi nzila samu yakena lomba yandi lutisa ntangu mingi na kusosa mbongo yina bamelomba samu na kufuta dote ya ntalu mingi.

Na bisika yankaka ya yinza, dote kelombamaka na kutadila nsiku ya Leta. Na bisika yina yakelombaka kusala mutindu yina, bibuti yina kele Baklisto kezitisaka bansiku yango. Samu na yinki? Mpova ya Nzambi kena kulomba na Baklisto bavuanda ‘bantu yina kezitisaka bamfumu ya Leta’ mpe bazitisa minsiku yina kena kutelemina ve bansiku ya Nzambi.—Bar. 13:1; Bis. 5:29.