Ntangu kisumbula mekubua, Bambangi ya Yehova kekubikaka mbala mosi lusadusu samu na kusadisa bampangi ya bau yina mebuila mpasi. Kusala mutindu yina kemonisaka ti bakezolanaka mpenza. (Yoane 13:34, 35; 1 Yoane 3:17, 18) Yinki mutindu beto kepesaka lusadusu yango?

Beto kepesaka makabu ya mbongo. Ntangu nsatu mosi ya ngolo builaka bampangi ya Yudea, Baklisto ya Antiokia tindilaka bau mbongo. (Bisalu 11:27-30) Mutindu mosi diaka, ntangu beto kekuwaka ti bampangi ya beto ya buala mosi bakele na mpasi, beto ketindaka makabu ya mbongo na nzila ya kimvuka samu na kusadisa bayina kele na nsatu ya lusadusu.​—2 Bakorinto 8:13-15.

Beto kepesaka lusadusu yina mefuana. Bankulutu yina kele kisika kisumbula mesalamina bakesosaka kuzaba kisika mpangi mosimosi ya kimvuka kele mpe yinki mutindu yandi kele. Komite ya lusadusu lenda tuadisa kisalu ya kukabula madia, maza ya kuvedila samu na kunua, bilele, bisika ya kuleka, mpe lusadusu ya munganga. Bambangi mingi yina mezaba bisalu ya mutindu na mutindu bakefutaka bau mosi tike samu na kukuenda na bisika yango, samu na kusadisa bampangi yina mebaka mpasi, to kubongisa bayinzo mpe Bayinzo ya Kimfumu yina mebeba. Lokola beto kevuandaka na bumosi mpe beto memesanaka kusala kintuadi, yau kesadisaka beto beto bongisa bima ya kupesa lusadusu malumalu. Atako beto kesadisaka ntetentete ‘bampangi ya beto na kati ya kiminu,’ beto kesadisaka diaka bantu yankaka, yavuanda yinki dibundu, kana diluaku kele.​—Bagalatia 6:10.

Beto kekindisaka bantu na nzila ya Biblia. Bantu yina kisumbula mebuila bakevuandaka mingimingi na nsatu ya lukindusu. Na ntangu ya mutindu yina, beto kebakaka ngolo na Yehova, ‘Nzambi ya lukindusu nionso.’ (2 Bakorinto 1:3, 4) Beto kesepelaka mpenza kuzabisa bantu yina kele na mpasi bivuvu yina Biblia mepesa, mpe diaka ti Kimfumu ya Nzambi kemanisa bisumbula nionso yina kena kusala bantu mpasi.​—Kusonga 21:4.

• Samu na yinki Bambangi kezingilaka ve kupesa lusadusu ntangu kisumbula mekubua?

• Yinki mutindu beto kesadilaka Biblia samu na kukindisa bayina mevuka na kisumbula?