Na kilumbu ya 23 mai 2023, munganga mosi yina kelandelaka mambu metadila mavimpi ya bantu na États-Unis luengisaka bantu ti basite Internet ya kusolola na bantu kena kubebisa bantuenia mingi.

•    “Atako basite Internet ya kusolola na bantu lenda vuanda mbote samu na bana mpe bantuenia, kasi yakele na mambu mingi yina kena kumonisa diaka ti basite Internet ya kusolola na bantu lenda bebisa makanisi ya bana mpe bantuenia, ata mpe kubebisa nzutu na bau.”—Réseaux sociaux et santé mentale des jeunes: Chef des services de santé des États-Unis, 2023.

 Munganga yango tubilaka kusosasosa yina salamaka, yina memonisa ti bivonza kele.

•    Bana ya bamvula kubanda na 12 tii 15 “yina lutisaka bawola kuluta 3 na kilumbu samu na kusadila basite ya kusolola na bantu, makanisi na bau vuandaka beba mpenza mpe mingi na bau kumaka tungisama ngolo to kuniokuama na makanisi.”

•    Bana ya bamvula 14 yina vuandaka sadila basite Internet ya kusolola na bantu, mingi na bau kutanaka na bivonza lokola “kuleka mbote ve, misokosi ya bankundi yankaka, kusepela ve mutindu bakele, kukimona ti bamekondua mfunu, mpe kutungisama na makanisi. Mambu yango kena kumonana mingimingi na bana nketo.”

 Yinki mutindu bibuti lenda tanina bana na bau na bivonza yango? Biblia mepesa malongi ya mfunu.

 Beno kukikotisa na diambu yango. Lokola beno kele bibuti, beno sosa kuzaba bivonza ya basite Internet ya kusolola na bantu mpe beno baka nzengolo kana bana na beno fueti sadila yau to ve.

•    Nsikudukusu ya Biblia: “Longa muana bakala nzila yina yandi fueti kuenda.”—Masese 22:6, noti na yinsi ya paje.

•   Samu na kuzaba mambu yankaka, tanga disolo “Muana na munu fueti sadila basite ya Internet samu na kusolola na bantu?”

 Kana beno mepesa muana na beno nzila ya kusadila basite Internet samu na kusolola na bantu, beno sosa kuzaba bivonza yina lenda bima mpe beno kukikotisa na mambu yina bakena kusala na basite yango. Yinki mutindu?

 Beno tanina bana na beno na mambu ya yimbi yina kele na kati. Beno longisa bana na beno mutindu balenda zaba mambu ya yimbi mpe mutindu ya kutina yau.

•    Nsikudukusu ya Biblia: “Pite mpe mvindu ya mutindu nionso to lokoso tangama ve ata kutangama na kati na beno, . . . mambu ya nsoni mpe ve, masolo ya buzoba ve, maseki ya nsoni ve.”—Baefese 5:3, 4.

•    Samu na kuzaba makanisi yankaka ya mfunu, tanga disolo ““Protégez votre adolescent des dangers des réseaux sociaux.”

 Beno tudila bana bandilu. Na kifuani, beno tula bansiku samu na ntangu yikua mpe yinki ntangu bana na beno lenda sadila basite Internet ya kusolola na bantu.

•    Nsikudukusu ya Biblia: “Beno keba mpenza ti mutindu na beno ya kutambula vuanda . . . lokola bantu ya nduenga, beno sadila ntangu na beno mbote.”—Baefese 5:15, 16.

•    Beno sadila video Keba na basite ya Internet ya kusolola na bankundi samu na kusadisa muana na nge yandi zaba mfunu ya kutula bandilu.