Na yinza, bantu mingi yina ketubaka ti bakelandaka Yesu Klisto, nzokande bakekukikotisaka mpenza na mambu ya politiki. Bantu yankaka kepesaka bantu ya politiki maboko samu banungisa malongi mpe bikadulu yina mabundu na bau kelongaka. Na ndambu na bau, bantu ya politiki baketubilaka mbala mingi mambu metadila bikadulu ya bantu mpe bakepesaka bantu nsilulu ya luzingu ya mbote samu bantu ya mabundu pesa bau maboko. Mbala mingi bamfumu ya mabundu kepesaka bankumbu na bau samu baponama na bakiti ya kimfumu ya politiki. Mpe na babuala mingi, nkumbu “Muklisto” lenda baka kisika ya lokumu mpenza mutindu mosi kaka na kimvuka ya Leta, to buala mosi.

 Yinki nge mekanisa? Banlonguki ya Yesu Klisto fueti kukikotisa na mambu ya politiki? Nge lenda baka bamvutu na biuvu yango na kutadilaka kifuani ya Yesu. Yandi tubaka: ‘Munu mepesa beno kifuani, samu beno sala mutindu munu mesala beno.’ (Yoane 13:15) Na mambu metadila politiki, yinki kifuani Yesu pesaka?

 Ve. Yesu kotaka ve na mambu ya politiki ya yinza yayi.

 Yesu sosaka ve kimfumu ya politiki. Yandi mangaka kundima kukuma mfumu ya baguvernema ya bantu ntangu Satana Diabulu pesaka yandi ‘bimfumu nionso ya yinza.’ (Matayo 4:8-10) a Na diluaku yankaka, bantu yina ndimaka ti Yesu kele na makoki mpenza ya kuvuanda ntuadisi ya mbote, basosaka kukanga yandi na kingolo samu na kukotisa yandi na politiki. Biblia metuba: ‘Lokola Yesu zabaka ti bazolaka kuiza kanga yandi samu na kutula yandi ntinu, yandi katukaka mpe yandi kuendaka na mongo yandi mosi.’ (Yoane 6:15) Yesu mangaka kusala diambu yina bantu vuandaka zola yandi sala. Yandi mangaka kukota na mambu ya politiki.

 Yesu kotilaka ata ndambu mosi ve na mambu ya politiki. Na kifuani, na bilumbu ya Yesu, Bayuda vuandaka zola ata fioti ve kufuta mpaku ya guvernema ya Bayuda, mpe bavuandaka mona yakele diambu yina bonga ve. Ntangu basosaka kukotisa Yesu na diambu yango, yandi kukikotisaka ve na bantembe ya mambu ya politiki samu na kumonisa ti bampaku yango vuandaka mbote to yimbi. Yandi tubaka: ‘Beno pesa bima ya Kaisala na Kaisala, kasi bima ya Nzambi na Nzambi.’ (Marko 12:13-17) Yandi kukikotisaka ve na ndambu mosi na mambu ya politiki, kasi yandi monisaka nde ti bafueti futa mpaku yina bamfumu ya Leta yina vuandaka monikisa Kaisala vuandaka lomba. Kaka na ntangu yango, yandi monisaka ti kuzitisa bamfumu kele na ndilu. Muntu fueti pesa ve bamfumu ya guvernema kima yina fueti pesama kaka na Nzambi, na kifuani, kukipesa na Nzambi.—Matayo 4:10; 22:37, 38.

 Yesu vuandaka pesa maboko mpe kulonga bantu guvernema mosi ya dizulu, Kimfumu ya Nzambi. (Luka 4:43) Yesu kukikotisaka ve na mambu ya politiki samu yandi zabaka ti kaka Kimfumu ya Nzambi, kasi baguvernema ya bantu ve, nde kekokisa mambu yina Nzambi kele na nsatu ya kusala na ntoto. (Matayo 6:10) Yandi zabaka ti Kimfumu ya Nzambi kesala mambu na nzila ya baguvernema ya bantu ve, kasi yakebaka nde kisika ya baguvernema ya bantu.—Daniele 2:44.

 Ve. Banlonguki ya Yesu zitisaka ntumu ya Yesu ya kuvuanda ‘ve bantu ya yinza.’ (Yoane 15:19) Balandaka kifuani na yandi mpe bakotaka ata fioti ve na mambu ya politiki ya yinza. (Yoane 17:16; 18:36) Na kisika ya kukikotisa na mambu ya politiki, basalaka nde kisalu yina Yesu tindaka bau basala—kusamuna mpe kulonga mambu metadila Kimfumu ya Nzambi.—Matayo 28:18-20; Bisalu 10:42.

 Baklisto ya siekle ya ntete vuandaka tula kuzitisa Nzambi na kisika ya ntete na luzingu na bau, kasi bazabaka diaka ti bafueti zitisa bamfumu ya Leta. (Bisalu 5:29; 1 Piere 2:13, 17) Bavuandaka zitisa bansiku mpe bavuandaka futa mpaku. (Baroma 13:1, 7) Atako bavuandaka kota ve na mambu ya politiki, bavuandaka baka mambote na bisalu yina baguvernema vuandaka sala. Bavuandaka sadila diaka minsiku samu na kubaka lutanunu.—Bisalu 25:10, 11; Bafilipi 1:7.

 Biblia memonisa puelele ti, yavuanda Yesu to banlonguki na yandi na siekle ya ntete, bavuandaka kota ve na mambu ya politiki. Samu na yau, Bambangi ya Yehova na yinza ya mvimba, lokola bakele Baklisto, bakekotaka ata fioti ve na mambu ya politiki. Mutindu mosi na Baklisto ya siekle ya ntete, bakesalaka kisalu yina Yesu tindaka bau basala—Bakesamunaka ‘nsangu ya mbote ya Kimfumu.’—Matayo 24:14.